ໃນຕອນເຊົ້າ ວັນທີ 06 ພະຈິກ 2023 ທີ່ ສະຖາບັນການເມືອງ ແລະ ການປົກຄອງແຫ່ງຊາດ, ໄດ້ຈັດພິທີເປີດຊຸດ ເຝິກອົບຮົມ ຫົວຂໍ້ສະເພາະໄລຍະ 15 ວັນ ຊຸດທີ VI ປະຈໍາປີ 2023 ໃຫ້ ເລຂາພັກເມືອງ, ຄະນະປະຈໍາພັກເມືອງ ແລະກໍາມະການພັກເມືອງ, ພາຍໃຕ້ການເປັນປະທານ ຂອງທ່ານ ຮສ ພູວົງ ອຸ່ນຄໍາແສນ ກໍາມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົົກຄອງແຫ່ງຊາດ, ທ່ານ ພັນເອກ ນາງ ລີວົງ ລາວລີ ກໍາມະການສໍາຮອງສູນກາງພັກ, ຮອງເລຂາຄະນະພັກ, ຮອງລັດຖະມົນຕີກະຊວງພາຍໃນ, ມີຜູ້ຕາງໜ້າຈາກຄະນະຈັດຕັ້ງສູນກາງພັກ ແລະພາກສ່ວນທີ່ກ່ຽວຂ້ອງເຂົ້າຮ່ວມ.
ກ່ອນຈະເລີ່ມພິທີທາງການ ທ່ານ ປທ ບຸນໜາ ສີຫາລາດ ຮອງຫົວໜ້າຫ້ອງການ ໄດ້ຂຶ້ນແນະນໍາກົດລະບຽບສໍາລັບຊຸດເຝິກອົບຮົມ ເປັນຕົ້ນແມ່ນລະບຽບຫໍພັກ, ລະບຽບການພັກເຊົາ, ເຂົ້າອອກໃນ ສມປຊ ແລະນະໂຍບາຍຕ່າງໆທີ່ນັກເຝິກອົບຮົມຈະໄດ້ຮັບໃນໄລຍະເຝິກອົບຮົມ.
ເພື່ອເລີ່ມພິທີທາງການ ທ່ານ ປທ ນວນແສງ ຄໍາມີໄຊ ຫົວໜ້າພະແນກຄຸ້ມຄອງລະບົບບໍາລຸງ ໄດ້ຂຶ້ນດໍາເນີນລາຍການ ໂດຍການແນະນໍາຜູ້ເຂົ້າຮ່ວມພິທີ ແລະເຊີນພາກສ່ວນກ່ຽວຂອງຂຶ້ນນໍາສະເໜີບົດຕ່າງໆ.
ໃນພິທີ ທ່ານ ປທ ແສງແກ້ວ ວົງລໍາພັນ ຮອງຫົວໜ້າກົມຄຸ້ມຄອງການຮຽນ-ການສອນ ໄດ້ຂຶ້ນຜ່ານແຜນການເຄື່ອນໄຫວ ຝຶກອົບຮົມທິດສະດີການເມືອງ ແລະ ການບໍລິຫານຄຸ້ມຄອງລັດຕາມຫົວຂໍ້ໃຫ້ແກ່ເລຂາພັກເມືອງ, ຄະນະປະຈໍາພັກເມືອງ ແລະ ກໍາມະການພັກເມືອງ ໃນຂອບເຂດທົ່ວປະເທດ ຊຸດທີ VI ວ່າ: ປະຕິບັດຕາມມະຕິຕົກລົງຂອງຄະນະຈັດຕັ້ງສູນກາງພັກ ສະບັບເລກທີ727/ຄຈສພ ລົງວັນທີ 24 ຕຸລາ 2023; ວ່າດ້ວຍການອະນຸມັດໃຫ້ພະນັກງານນຳພາ-ຄຸ້ມຄອງ ໄປຝຶກອົບຮົມທິດສະດີການເມືອງ ແລະ ການບໍລິຫານຄຸ້ມຄອງລັດຕາມຫົວຂໍ້ ໃຫ້ແກ່ເລຂາພັກເມືອງ, ຄະນະປະຈໍາພັກເມືອງ ແລະ ກໍາມະການພັກເມືອງ ໃນຂອບເຂດທົ່ວປະເທດ ຊຸດທີ VI ແລະປະຕິບັດຕາມໂຄງການຫຼັກສູດຝຶກອົບຮົມທິດສະດີການເມືອງ ແລະ ການບໍລິຫານຄຸ້ມຄອງລັດຕາມຫົວຂໍ້ ສໍາລັບຫຼັກສູດ ເລຂາພັກເມືອງ ກົມຄຸ້ມຄອງການຮຽນ-ການສອນ ສມປຊ ແລະ ສະຖາບັນຄົ້ນຄວ້າວິທະຍາສາດການປົກຄອງ ແລະ ຝຶກອົບຮົມ ກະຊວງພາຍໃນ ໄດ້ປະສານສົມທົບເປີດຊຸດຝຶກອົບຮົມຮ່ວມກັນ ຊຸດທີ VI ປະຈໍາປີ 2023. ໂດຍມີບັນດາສະຫາຍຜູ້ເຂົ້າຮ່ວມຝຶກອົບຮົມຄັ້ງນີ້ມີທັງໝົດ 50 ສະຫາຍ, ຍິງ 6 ສະຫາຍ, ມີຄະນະຫ້ອງ 5 ສະຫາຍ, ຕາມມະຕິຕົກລົງແຕ່ງຕັ້ງຂອງຄະນະຈັດຕັ້ງສູນກາງພັກ, ສະບັບເລກທີ728/ຄຈສພ, ລົງວັນທີ 24 ຕຸລາ 2023. ແຍກຕຳແໜ່ງຜູ້ເຂົ້າຮ່ວມຕາມສາຍພັກມີຄື:
- ກຳມະການພັກແຂວງມີຈຳນວນ 07 ສະຫາຍ, ຍິງ 0 ສະຫາຍ,
- ວ່າການເລຂາພັກເມືອງ, ວ່າການເຈົ້າເມືອງ ມີຈຳນວນ 1 ສະຫາຍ,
- ຮອງເລຂາພັກເມືອງ, ມີຈໍານວນ 21 ສະຫາຍ, ຍິງ 02 ສະຫາຍ,
- ກໍາມະການປະຈໍາພັກເມືອງ, ຮອງເຈົ້າເມືອງ ມີຈໍານວນ 10 ສະຫາຍ,
- ກໍາມະການປະຈໍາພັກເມືອງ, ມີຈໍານວນ 11 ສະຫາຍ, ຍິງ 04 ສະຫາຍ.
ດ້ານເນື້ອໃນໄດ້ຖືກຈັດແບ່ງອອກເປັນ ສອງທິດສະດີ ຄື: ທິດສະດີການເມືອງ-ການປົກຄອງ ແລະ ທິດສະດີການບໍລິຫານຄຸ້ມຄອງລັດ. ໃນນັ້ນ, ທິດສະດີການເມືອງ-ການປົກຄອງ ປະກອບມີ 16 ຫົວຂໍ້ຄື: 1). ພື້ນ ຖານທິດສະດີ ແລະແນວທາງກໍ່ສ້າງສັງຄົມນິຍົມຢູ່ປະເທດເຮົາ; 2). ພັດທະນາເສດຖະກິດຕະຫຼາດຕາມທິດສັງຄົມນິຍົມຢູ່ປະເທດເຮົາ; 3). ກໍ່ສ້າງພັກປອດໃສ ເຂັ້ມແຂງ ແລະ ໜັກແໜ້ນ; 4). ຄຸນທາດການເມືອງ ແລະຄຸນສົມບັດສິນທຳປະຕິວັດຂອງຄະນະພັກເມືອງ; 5). ການເປັນຜູ້ນຳແບບໃໝ່; 6). ສະພາບການສາກົນ ແລະແນວທາງການຕ່າງປະເທດ ຂອງ ສປປລາວ; 7). ນຳພາປະຕິບັດມະຕິ 3 ສ້າງໃນການພັດທະນາຊົນນະບົດຢູ່ປະເທດເຮົາ; 8). ຄຸ້ມຄອງລັດ ແລະຄຸ້ມຄອງສັງຄົມດ້ວຍກົດໝາຍ; 9). ການນຳພາ-ຊີ້ນໍາວຽກງານຈັດຕັ້ງ-ພະນັກງານຂອງຄະນະພັກເມືອງ; 10). ການນຳພາອຳນາດການປົກຄອງເມືອງຂອງເລຂາພັກເມືອງ ແລະຄະນະພັກເມືອງ; 11). ການນໍາພາບັນດາອົງການເສນາທິການຂອງເລຂາພັກເມືອງ, ຄະນະພັກເມືອງ; 12). ການນຳພາ-ຊີ້ນໍາຂອງເລຂາພັກເມືອງຕໍ່ວຽກງານຕິດຕາມກວດກາຢູ່ຂັ້ນເມືອງ; 13). ວິທີແກ້ໄຂຂໍ້ຂັດແຍ່ງຢູ່ຂັ້ນເມືອງ; 14). ການບໍລິຫານພາວະໄພພິບັດທາງທຳມະຊາດ; 15). ວິທີການເຈລະຈາລະຫວ່າງສອງຝ່າຍ ແລະຫຼາຍຝ່າຍ; 16). ການແກ້ໄຂບັນຫາຊົນເຜົ່າ ແລະສາດສະໜາ ຢູ່ປະເທດເຮົາ. ແລະທິດສະດີການບໍລິຫານຄຸ້ມຄອງລັດ ປະກອບມີ 8 ຫົວຂໍ້ ຄື: 1). ການບໍລິຫານລັດໃນລະບົບການເມືອງ; 2). ການນໍາພາ ແລະການຄຸ້ມຄອງ; 3). ການບໍລິຫານການປ່ຽນແປງເພື່ອຄວາມກ້າວໜ້າ; 4). ການວາງແຜນຍຸດທະສາດ; 5). ການຄຸ້ມຄອງພະນັກງານລັດຖະກອນ; 6). ການປະເມີນຜົນ ແລະການພັດທະນາພະນັກງານລັດຖະ ກອນ; 7). ການຄຸ້ມຄອງ ແລະກວດກາງົບປະມານແຫ່ງລັດ; ແລະ 8). ການກວດກາ, ກວດສອບ ແລະການຕ້ານການສໍ້ລາດບັງຫຼວງ. ລວມທັງໝົດ 24 ຫົວຂໍ້.
ໃນຕອນທ້າຍພິທີ ທ່ານປະທານມີຄໍາເຫັນຊີ້ນໍາຊຸດເຝິກອົບຮົມຄັ້ງນີ້ວ່າ:
ໃນໄລຍະທີ່ພວກສະຫາຍ ເຄື່ອນໄຫວແລກປ່ຽນຕາມຫົວຂໍ້ສະເພາະ ຢູ່ສະຖາບັນ ຮຽກຮ້ອງໃຫ້ບັນດາສະຫາຍຈົ່ງເອົາໃຈໃສ່ຄົ້ນຄວ້າ ແລກປ່ຽນບົດຮຽນນຳນັກວິທະຍາກອນ ໃຫ້ເລິກເຊິ່ງເຖິງຖອງ, ສ້າງໃຫ້ໄດ້ການຫັນປ່ຽນທາງດ້ານຈິນຕະນາການພັດທະນາທີ່ກ້າວໜ້າ, ເພື່ອນໍາໄປປັບປຸງໜ້າທີ່ວຽກງານຂອງຕົນເອງ ໃຫ້ມີຜົນສຳເລັດສູງກ່ວາເກົ່າ, ສ້າງໄດ້ການຫັນປ່ຽນຢ່າງເຖິງຖອງດ້ານຈິນຕະນາການຂອງການພັດທະນາ; ກຳໄດ້ສະພາບການພາຍໃນປະເທດ, ສະພາບແວດລ້ອມສາກົນ ແລະພາກພື້ນ ເພື່ອດັດປັບແຜນການພັດທະນາຢູ່ທ້ອງຖິ່ນຂອງຕົນເອງ.
ພວກເຮົາຕ້ອງມີວິທີຄົ້ນຄວ້າ, ແລກປ່ຽນທີ່ສົມຄູ່ກັບສະພາບຄວາມເປັນຈິງ ຂອງຕົນເອງ ໝາຍວ່າພວກສະຫາຍ ແມ່ນພະນັກງານໍາພາ-ຄຸ້ມຄອງ, ການຮຽນຕ້ອງຮູ້ສົມທົບລະຫວ່າງທິດສະດີ ແລະ ພຶດຕິກໍາ, ເອົາພຶດຕິກໍາມາເຍິງເບິ່ງທິດສະດີ, ຊອກຫາເຫດຜົນ, ຄົ້ນຄິດຫາວິທີການ ໃຫ້ຖືກຕ້ອງກັບພື້ນຖານລະບຽບ, ກົດໝາຍ, ຮຽນໄປນໍາ, ຄິດໄປນໍາ, ກວດກາຄືນການຈັດຕັ້ງປະຕິບັດຜ່ານມາ ເມື່ອທຽບກັບທິດສະດີ ເປັນໄປແນວໃດ? ຍັງອັນໃດ ຕ້ອງໄດ້ດັດແກ້, ຍັງອັນໃດຕ້ອງໄດ້ເສີມຂະຫຍາຍ?,ການເຝິກອົບຮົມຄັ້ງນີ້ ຈະດໍາເນີນໄປຮອດວັນທີ 24 ພະຈິກ ຈຶ່ງຈະອັດລົງ.
ຂ່າວ-ພາບ: ຄອນສະຫວັນ ແສນຍານຸພາບ
ບັນນາທິການ: ປທ ບຸນປັນ ສຸມຸນທອງ