ໂຮງຮຽນການເມືອງແຂວງຫູໜານ ໄດ້ພົບປະ, ຢ້ຽມຢາມ ແລະແລກປ່ຽນບົດຮຽນ ທີ່ ສະຖາບັນການເມືອງ ແລະ ການປົກຄອງແຫ່ງຊາດ ໃນຕອນເຊົ້າຂອງວັນທີ 6 ກັນຍາ 2023 ທີ່ຫ້ອງຮັບແຂກ ສມປຊ ໃຫ້ກຽດຕ້ອນຮັບໂດຍ ທ່ານ ປທ ນ. ບຸນມີ ຈຸນລະຈັກ ຮອງເລຂາຄະນະບໍລິຫານງານພັກ, ປະທານກວດກາພັກ, ຮອງຫົວໜ້າ ສມປຊ, ພ້ອມດ້ວຍຕາງໜ້າແຕ່ລະພາກສ່ວນພາຍໃນ ສມປຊ ແລະນຳພາຄະນະຜູ້ແທນການພົບປະ, ຢ້ຽມຢາມ ແລະແລກປ່ຽນບົດຮຽນຂອງ ທ່ານ ຊາວ ໄຄໝີງ ຮອງຫົວໜ້າໂຮງຮຽນການເມືອງ ແຂວງຫູໜານ ພ້ອມດ້ວຍຄະນະ 5 ທ່ານ.
![](https://www.nappa.gov.la/wp-content/uploads/2023/09/e051e7cb-ff2a-4088-b002-bf5269c1860f-1024x682.jpeg)
ການພົບປະໃນຄັ້ງນີ້, ທັງສອງຝ່າຍກໍໄດ້ຜັດປ່ຽນກັນຂຶ້ນມີຄໍາເຫັນ ແລະລາຍງານໂດຍຫຍໍ້ສະພາບທີ່ຕັ້ງພາລະບົດບາດ ແລະໜ້າທີ່ເພື່ອເປັນການຖອດຖອນບົດຮຽນ ໂດຍສະເພາະແມ່ນ 3 ວຽກງານ ຄື: 1. ວຽກງານສິດສອນ ແລະບໍາລຸງສ້າງໃນປັດຈຸບັນ, 2. ການກໍ່ສ້າງພະນັກງານທີ່ມີຄຸນນະພາບສູງ, ໝາກຜົນການຄົ້ນຄວ້າວິທະຍາສາດດີເດັ່ນ, ຄວາມສາມາດຂອງຜູ້ບໍລິຫານຂັ້ນສູງ, ການກໍ່ສ້າງພະນັກງານ ແລະ 3. ກົນໄກແຮງຈູງໃຈທີ່ມີຫົວຄິດປະດິດສ້າງເພື່ອແລກປ່ຽນປະສົບການ ແລະການສົນທະນາຢ່າງເລິກເຊິ່ງກ່ຽວກັບຄວາມຕັ້ງໃຈຄູ່ຮ່ວມມືຍຸດທະສາດ.
ຜ່ານການແລກປ່ຽນທັງ 3 ວຽກງານ ທັງສອງຝ່າຍໄດ້ແລກປ່ຽນຄໍາຄິດເຫັນ ແລະຂໍ້ສະເໜີໃນການພົວພັນຮ່ວມ ມືຮອບດ້ານນຳກັນຢ່າງກົງໄປກົງມາ ແລະຕີລາຄາສູງຕໍ່ການພົວພັນມິດຕະພາບ ແລະແຜນການຮ່ວມມືອັນຍາວນານບົນພື້ນຖານການເປັນຄູ່ຮ່ວມອັນແໜ້ນແກ່ນ ລະຫວ່າງ ປະຊາຊົນທັງສອງຊາດ, ສອງພັກສອງລັດ ລາວ-ຈີນ, ເວົ້າສະເພາະກໍແມ່ນໂຮງຮຽນການເມືອງແຂວງຫູໜານ ແລະສະຖາບັນການເມືອງ ແລະ ການປົກຄອງແຫ່ງຊາດ ໃຫ້ໄດ້ຮັບການພັດທະນາ ແລະຂະຫຍາຍຕົວຢ່າງຕໍ່ເນື່ອງ.
![](https://www.nappa.gov.la/wp-content/uploads/2023/09/331307a2-8578-41de-a70f-19727f0cb107-1024x682.jpeg)
![](https://www.nappa.gov.la/wp-content/uploads/2023/09/6ec8fcff-e570-44e8-8168-8a61e4a04cc0-1024x682.jpeg)
![](https://www.nappa.gov.la/wp-content/uploads/2023/09/710bec7b-da50-46aa-ba6f-75e06260b0c4-1024x682.jpeg)
![](https://www.nappa.gov.la/wp-content/uploads/2023/09/52d7112f-614f-4ba3-a93d-ab2641ed4669-948x1024.jpeg)
ໃນຕອນທ້າຍ, ທ່ານ ປທ ນ. ບຸນມີ ຈຸນລະຈັກ ໄດ້ກ່າວສະແດງຄວາມຂອບໃຈໃນການພົບປະ, ຢ້ຽມຢາມ ແລະການແລກປ່ຽນບົດຮຽນໃນຄັ້ງນີ້ ໂດຍສະເພາະແຜນການຮ່ວມມື ເພື່ອເສີມຂະຫຍາຍສາຍພົວພັນມິດຕະພາບອັນດີງາມ ໃຫ້ໄດ້ຮັບໝາກຜົນດີຂຶ້ນເລື້ອຍໆ.
ຂ່າວ/ພາບ: ຕາອັອດ ແສນທະວີສຸກ
ບັນນາທິການ: ປທ ບຸນປັນ ສຸມຸນທອງ