ໃນຕອນເຊົ້າ ວັນທີ 04 ກັນຍາ 2023 ທີ່ສະໂມສອນໃຫຍ່ແຂວງອັດຕະປື, ສະຖາບັນການເມືອງ ແລະ ການປົກຄອງແຫ່ງຊາດ ໄດ້ຈັດພິທີເປີດກອງປະຊຸມຖອດຖອນບົດຮຽນ ລະບົບໂຮງຮຽນພັກທົ່ວປະເທດ ໃຫ້ກຽດເປັນປະທານໂດຍ: ສະຫາຍ ຮສ ພູວົງ ອຸ່ນຄໍາແສນ ກໍາມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ໃຫ້ກຽດເຂົ້າຮ່ວມກອງປະຊຸມໂດຍ: ສະຫາຍ ເລັດ ໄຊຍະພອນ ກໍາມະການສູນກາງພັກ, ເລຂາພັກແຂວງ, ເຈົ້າແຂວງອັດຕະປື, ມີສະຫາຍໃນຄະນະປະຈໍາພັກ, ຄະນະອໍານວຍການ ສມປຊ, ມີຜູ້ຕາງໜ້າຈາກຫ້ອງການ, ກົມ, ຄະນະຕ່າງໆ, ສູນຕ່າງໆຂອງ ສມປຊ ແລະຜູ້ຕາງໜ້າຈາກໂຮງຮຽນການເມືອງ ແລະ ການປົກຄອງນະ ຄອນຫຼວງວຽງຈັນ ແລະບັນດາໂຮງຮຽນການເມືອງ ແລະ ການປົກຄອງແຂວງທົ່ວປະເທດເຂົ້າຮ່ວມຢ່າງພ້ອມພຽງ.
ພິທີໄດ້ເລີ່ມແຕ່ເວລາ 7 ໂມງ 30 ນາທີ ບັນດາຜູ້ແທນກອງປະຊຸມທັງໝົດໄດ້ເຕົ້າໂຮມກັນ ຢູ່ອະນຸສາວະລີປະທານ ໄກສອນ ພົມວິຫານ ເພື່ອວາງກະຕ່າດອກໄມ້ຕໍ່ໜ້າຮູບປັ້ນປະທານໄກສອນ ພົມວິຫານ. ຈາກນັ້ນ, ຜູ້ແທນກອງປະຊຸມທັງໝົດກໍໄດ້ພ້ອມກັນເຂົ້າຮ່ວມປະຊຸມ ເພື່ອດຳເນີນກອງປະຊຸມຕາມວາລະ.
ສະຫາຍ ປທ ສີຈັນ ສູນດາລາ ຮອງຫົວໜ້າກົມຄຸ້ມຄອງການຮຽນ-ການສອນ ສມປຊ ໄດ້ຂຶ້ນກ່າວຈຸດປະສົງຂອງກອງປະຊຸມ ແລະນໍາສະເໜີຜູ້ເຂົ້າຮ່ວມຕໍ່ກອງປະຊຸມ.
ສະຫາຍ ເລັດ ໄຊຍະພອນ ກໍາມະການສູນກາງພັກ, ເລຂາພັກແຂວງ, ເຈົ້າແຂວງອັດຕະປື ໄດ້ຂຶ້ນລາຍງານສະພາບການພັດທະນາເສດຖະກິດ-ສັງຄົມ ຂອງແຂວງໃຫ້ຜູ້ແທນກອງປະຊຸມຮັບຊາບ ໂດຍໄດ້ຍົກໃຫ້ເຫັນສະພາບຈຸດພິເສດຂອງແຂວງອັດຕະປື, ສະພາບການພັດທະນາເສດຖະກິດ-ສັງຄົມຂອງແຂວງແຕ່ລະໄລຍະ ເຊິ່ງມີທັງສິ່ງທີ່ເອື້ອອໍານວຍ ແລະສິ່ງທ້າທາຍທົດສອບຕ່າງໆນາໆ ແຕ່ດ້ວຍຄວາມເອົາໃຈໃສ່ຢ່າງໃກ້ຊິດ ແລະໃຫ້ທິດຊີ້ນໍາຂອງສູນກາງພັກບວກກັບຄວາມສາມັກຄີເອກະພາບພາຍໃນອົງຄະນະພັກແຂວງ ແລະທົ່ວປວງຊົນພາຍໃນແຂວງ ຈຶ່ງເຮັດໃຫ້ແຂວງອັດຕະປື ມີທ່າ ແຮງ ແລະມີຄວາມໜັກແໜ້ນໃນທົ່ວສັງຄົມ ທີ່ເປັນເງື່ອນໄຂໃນການສືບຕໍ່ສ້າງສາພັດທະນາແຂວງໃຫ້ມີຄວາມຈະເລີນກ້າວໜ້າຕະຫຼອດໄປ.
ສະຫາຍ ປທ ບຸນປອນ ອ່ອນໄຊວຽງ ຫົວໜ້າໂຮງຮຽນການເມືອງ ແລະ ການປົກຄອງ ແຂວງອັດຕະປື ໄດ້ຂຶ້ນກ່າວຕ້ອນຮັບຜູ້ແທນກອງປະຊຸມທີ່ໄດ້ເດີນທາງມາຈາກນະຄອນຫຼວງວຽງຈັນ ແລະບັນດາແຂວງໃນທົ່ວປະເທດ ເຊິ່ງໄດ້ຍົກໃຫ້ເຫັນຄວາມຕັ້ງໃຈຂອງຄະນະອໍານວຍການ ແລະພະນັກງານ, ຄູ-ອາຈານທົ່ວໂຮງຮຽນການເມືອງ ແລະການປົກຄອງແຂວງອັດຕະປື ໃນການເປັນເຈົ້າພາບສະຖານທີ່ຈັດກອງປະຊຸມໃນຄັ້ງນີ້ ໂດຍໄດ້ຫ້າງຫາກະກຽມຄວາມພ້ອມທຸກດ້ານໃນການຈັດກອງປະຊຸມຄັ້ງນີ້ ແລະຕິດຕາມການເດີນທາງມາແຂວງອັດຕະປື ຂອງບັນດາຜູ້ແທນກອງປະຊຸມຈາກນະຄອນຫຼວງວຽງຈັນ ແລະບັນດາແຂວງໃນຂອບເຂດທົ່ວປະເທດຢ່າງຈົດຈໍ່ ແລະກ່າວຍິນດີຕ້ອນຮັບຜູ້ແທນກອງປະຊຸມທີ່ເດີນທາງຈາກທົ່ວປະເທດ.
ສະຫາຍ ປອ ນາງ ໄກສອນ ຈັນສີນາ ກໍາມະການຄະນະພັກ, ຫົວໜ້າກົມຄຸ້ມຄອງການຮຽນ-ການສອນ ສມປຊ, ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດຫຼັກສູດການຮຽນ-ການສອນ ຢູ່ໂຮງຮຽນພັກໃນທົ່ວປະເທດປະຈໍາສົກຮຽນ 2022-2023, ເຊິ່ງໃນທົ່ວປະເທດມີໂຮງຮຽນພັກທັງໝົດ 18 ແຫ່ງ, ທີ່ຕັ້ງຢູ່ໃນບັນດາແຂວງ ແລະນະຄອນຫຼວງ (ບໍ່ນັບໃນລະບົບຮຽນຂອງກໍາລັງ ປກຊ-ປກສ), ເຊິ່ງໃນ 1 ປີທີ່ຜ່ານມາ ໄດ້ມີຜົນສໍາເລັດ ເຊິ່ງມີບາງເນື້ອໃນດັ່ງນີ້:
1). ການປະຕິບັດຫຼັກສູດ
ສົກປີ 2022-2023 ທົ່ວລະບົບໂຮງຮຽນພັກໃນທົ່ວປະເທດໄດ້ຈັດຕັ້ງປະຕິບັດຫຼັກສູດການຮຽນ-ການສອນໃນລະບົບອະນຸປະລິນຍາ, ລະບົບຊັ້ນກາງ, ລະບົບຊັ້ນຕົ້ນ, ລະບົບ 45 ວັນ ແລະລະບົບ 10 ວັນໃຫ້ເລຂາພັກບ້ານ ແລະ ຄະນະພັກບ້ານ, ລະບົບທິດສະດີການເມືອງຂັ້ນຕົ້ນ ແລະຂັ້ນກາງມີທັງໝົດ 222 ຊຸດຮຽນ, ມີຜູ້ເຂົ້າຮຽນທັງໝົດ 11.429 ຄົນ, ຍິງ 2.733 ຄົນ ລາຍລະອຽດດັ່ງນີ້:
+ ລະບົບອະນຸປະລິນຍາ: ມີທັງໝົດ 6 ຊຸດ ມີຜູ້ເຂົ້າຮຽນທັງໝົດ 367 ຄົນ, ຍິງ 85 ຄົນ, ສໍາລັບລະບົບອະນຸປະລິນຍາແມ່ນສຳເລັດໝົດທັງ 5 ໂຮງຮຽນ.
+ລະບົບຊັ້ນກາງ: ມີທັງໝົດ 26 ຊຸດ, ມີຜູ້ເຂົ້າຮຽນທັງໝົດ 1.481 ຄົນ, ຍິງ 346 ຄົນ, ຮຽນສໍາເລັດ 19 ຊຸດ, ມີຜູ້ສໍາເລັດທັງໝົດ 1.104 ຄົນ, ຍິງ 272 ຄົນ, ຍັງສືບຕໍ່ດຳເນີນການຮຽນ ມີຢູ່ 7 ຊຸດ, ມີຜູ້ເຂົ້າຮຽນທັງໝົດ 377 ຄົນ, ຍິງ 272 ຄົນ.
+ ລະບົບຊັ້ນຕົ້ນ: ມີ 50 ຊຸດ, ມີຜູ້ເຂົ້າຮຽນທັງໝົດ 2.701 ຄົນ, ຍິງ 748 ຄົນ, ຮຽນສໍາເລັດ 36 ຊຸດ ມີຜູ້ສໍາເລັດທັງໝົດ 1.980 ຄົນ, ຍິງ 566 ຄົນ, ຍັງສືບຕໍ່ດຳເນີນການຮຽນ ມີຢູ່ 14 ຊຸດ, ມີຜູ້ເຂົ້າຮຽນທັງໝົດ 721 ຄົນ, ຍິງ 182 ຄົນ. ຖ້າທຽບໃສ່ສົກປີຜ່ານມາເຫັນວ່າດ້ານຈຳນວນແມ່ນຫຼຸດລົງ 77 ຊຸດ, ຈໍານວນຄົນຫຼຸດລົງ 865 ຄົນ, ຍິງ 299 ຄົນ.
+ ລະບົບເຝິກອົບຮົມໄລຍະສັ້ນ 45 ວັນ: ມີ 32 ຊຸດ, ມີຜູ້ເຂົ້າຮຽນທັງໝົດ 1.701 ຄົນ, ຍິງ 554 ຄົນ; ຮຽນສໍາເລັດ 28 ຊຸດ, ມີຜູ້ສໍາເລັດທັງໝົດ 1.507 ຄົນ, ຍິງ 495 ຄົນ; ຍັງສືບຕໍ່ດຳເນີນການຮຽນ ມີຢູ່ 4 ຊຸດ, ມີຜູ້ເຂົ້າຮຽນທັງໝົດ 194 ຄົນ, ຍິງ 59 ຄົນ.
+ ລະບົບ 10 ວັນ ເລຂາພັກບ້ານ ແລະຄະນະພັກບ້ານ. ສາມາດເປີດຊຸດເຝິກອົບຮົມໄດ້ 73 ຊຸດ, ມີຜູ້ເຂົ້າຮຽນທັງໝົດ 3.358 ຄົນ, ຍິງ 473 ຄົນ; ຮຽນສໍາເລັດ 70 ຊຸດ, ມີຜູ້ສໍາເລັດທັງໝົດ 3.241 ຄົນ, ຍິງ 456 ຄົນ.
+ ລະບົບ ທິດສະດີການເມືອງຂັ້ນຕົ້ນ: ມີ 17 ຊຸດ, ມີຜູ້ເຂົ້າຮຽນທັງໝົດ 885 ຄົນ, ຍິງ 317 ຄົນ, ຮຽນສໍາເລັດ 11 ຊຸດ; ມີຜູ້ສໍາເລັດທັງໝົດ 568 ຄົນ, ຍິງ 180 ຄົນ, ຍັງສືບຕໍ່ດຳເນີນການຮຽນມີຢູ່ 6 ຊຸດ, ມີຜູ້ເຂົ້າຮຽນທັງໝົດ 317 ຄົນ, ຍິງ 137 ຄົນ.
+ ລະບົບທິດສະດີການເມືອງຂັ້ນກາງ: ມີ 18 ຊຸດ, ມີຜູ້ເຂົ້າຮຽນທັງໝົດ 936 ຄົນ, ຍິງ 210 ຄົນ, ຮຽນສໍາເລັດ 3 ຊຸດ; ມີຜູ້ສຳເລັດການຮຽນທັງໝົດ 182 ຄົນ, ຍິງ 33 ຄົນ, ຍັງສືບຕໍ່ດຳເນີນການຮຽນມີຢູ່ 15 ຊຸດຮຽນ, ມີຜູ້ສືບຕໍ່ເຂົ້າຮຽນທັງໝົດ 754 ຄົນ, ຍິງ 177 ຄົນ.
2). ວຽກງານຄົ້ນຄວ້າວິທະຍາສາດ.
ໃນສົກປີ 2022-2023 ການຄົ້ນຄວ້າວິທະຍາສາດ ລວມທັງໝົດ 4 ຫົວຂໍ້ໃຫຍ່ 47 ຫົວຂໍ້ຍ່ອຍ (ແລະ 4 ບົດປະກອບຄໍາເຫັນ).
3). ການກໍ່ສ້າງ ແລະບໍາລຸງຄູ.
ພະນັກງານ, ຄູ-ອາຈານໄປຍົກລະດັບໃນສົກປີ 2022-2023 ມີທັງໝົດ 46 ຄົນ, ຍິງ 17 ຄົນ ທຽບໃສ່ປີຜ່ານມາແມ່ນ (ຫຼຸດລົງ 14 ຄົນ, ຍິງຫຼຸດລົງ 3 ຄົນ) ໃນນັ້ນ, ປະລິນຍາເອກ 05 ຄົນ, ຍິງ 02 ຄົນ, (ເພີ່ມຂຶ້ນ 1 ຄົນ, ຍິງເພີມຂຶ້ນ 1 ຄົນ), ປະລິນຍາໂທ 28 ຄົນ, ຍິງ 9 ຄົນ (ເພີ່ມຂຶ້ນ 4 ຄົນ, ຍິງເພີ່ມຂຶ້ນ 2 ຄົນ), ປະລິນຍາຕີ 5 ຄົນ, ຍິງ 3 ຄົນ (ຫຼຸດລົງ 12 ຄົນ, ຍິງເທົ່າເກົ່າ) ຊັ້ນສູງ 1 ຄົນ (ຫຼຸດລົງ 7 ຄົນ), ຊັ້ນກາງ 04 ຄົນ, ຍິງ 02 ຄົນ (ເທົ່າເກົ່າ) ແລະ ຊັ້ນຕົ້ນ 1 ຄົນ, (ຫຼຸດລົງ 1 ຄົນ).
3). ການສະໜອງປື້ມຕໍາລາໃຫ້ລະບົບຮຽນ.
ໃນສົກຮຽນນີ້ສາມາດສະໜອງປຶ້ມໄດ້ຈຳນວນ 8.874 ຫົວ; ປື້ມແບບຮຽນທິດສະດີການເມືອງຂັ້ນຕົ້ນ 4.808 ຫົວ; ປື້ມແບບຮຽນທິດສະດີການເມືອງຂັ້ນກາງ 4.066 ຫົວ; ຈັດສົ່ງວາລະສານທິດສະດີການເມືອງ-ການປົກຄອງໄດ້ຈໍານວນທັງໝົດ 4.046 ຫົວ.
ທິດທາງ ແລະແຜນການປະຈໍາສົກຮຽນ 2023-2024.
1). ສືບຕໍ່ຍົກລະດັບທາງດ້ານແນວຄິດການເມືອງໃຫ້ແກ່ພະນັກງານ, ຄູ-ອາຈານ ແລະນັກສຶກສາ ດ້ວຍການເພີ່ມທະວີຈັດຕັ້ງເຜີຍແຜ່, ຄົ້ນຄວ້າເຊື່ອມຊືມແນວທາງ, ແຜນນະໂຍບາຍພັກ, ຂໍ້ກຳນົດ, ກົດໝາຍທີ່ພັກ ແລະລັດວາງອອກ.
2). ສືບຕໍ່ຈັດຕັ້ງຄຸ້ມຄອງຫຼັກສູດການຮຽນ-ການສອນໃຫ້ມີຄຸນນະພາບ, ສູ້ຊົນຈັດຕັ້ງການຮຽນ-ການສອນລະບົບຊັ້ນກາງທີ່ພວມດຳເນີນໃຫ້ມີຜົນສໍາເລັດຕາມແຜນການຂອງຫຼັກສູດ.
3). ຍົກສູງປະສິດທິຜົນໃນການຄົ້ນຄວ້າວິທະຍາສາດ ໂດຍສຸມໃສ່ສ້າງຄວາມເຂັ້ມແຂງໃຫ້ສະພາຄູ ຂອງແຕ່ລະໂຮງຮຽນ, ຍົກສູງຂີດຄວາມສາມາດໃຫ້ສະມາຊິກໃນສະພາຄູ ໃນການຄົ້ນຄວ້າວິທະຍາສາດ ເພື່ອແນໃສ່ເຮັດໃຫ້ການຄົ້ນຄວ້າວິທະຍາສາດ ຢູ່ໂຮງຮຽນມີປະລິມານເພີ່ມຂຶ້ນ.
4). ຈັດຕັ້ງບໍາລຸງ, ກໍ່ສ້າງພະນັກງານ, ຄູ-ອາຈານ. ສືບຕໍ່ຊຸກຍູ້ການຍົກລະດັບຄວາມຮູ້, ຄວາມສາມາດໃຫ້ພະນັກງານ, ຄູ-ອາຈານ ໃຫ້ຫຼາຍຂຶ້ນບົນພື້ນຖານການເຝິກອົບຮົມທັງພາຍໃນ ແລະຕ່າງປະເທດ.
5). ສູມໃສ່ການຈັດຕັ້ງປະຕິບັດໂຮງຮຽນພັດທະນາ ຕາມຂໍ້ກໍານົດວ່າດ້ວຍມາດຕະຖານໂຮງຮຽນພັດທະນາທີ່ມີຄຸນນະພາບໄດ້ດ້ວຍ 3 ປະເພດຄື: ປະເພດ 1 ແມ່ນໂຮງຮຽນທີ່ສາມາດປະຕິບັດໄດ້ 12 ມາດຕະຖານ; ປະເພດ 2 ແມ່ນໂຮງຮຽນທີ່ສາມາດປະຕິບັດໄດ້ 9 ມາດຕະຖານ ແລະປະເພດ 3 ແມ່ນໂຮງຮຽນທີ່ສາມາດປະຕິບັດໄດ້ 7 ມາດຕະຖານ ເພື່ອນຳມາຄົ້ນຄວ້າ ແລະຕົກລົງຍ້ອງຍໍຜົນງານດີເດັ່ນໃນການຈັດຕັ້ງຂໍ້ກຳນົດວ່າດ້ວຍມາດຕະຖານໂຮງຮຽນພັດທະນາທີ່ມີຄຸນນະພາບ.
6). ຍົກສູງປະສິດທິຜົນການຮ່ວມມືກັບຕ່າງປະເທດໂດຍສືບຕໍ່ເພີ່ມທະວີການພົວພັນຮ່ວມມືຢ່າງແໜ້ນແຟ້ນກັບບັນດາໂຮງຮຽນແຂວງແຮກສ່ຽວໂດຍສະເພາະແມ່ນ ສສ ຫວຽດນາມ, ກັບ ສປ ຈີນໃນການກໍ່ສ້າງພະນັກງານ, ແລກປ່ຽນຂໍ້ມູນຂ່າວສານ ແລະການຄົ້ນຄວ້າວິທະຍາສາດ.
ຫຼັງຈາກນັ້ນ, ບັນດາຜູ້ແທນກອງປະຊຸມໄດ້ສືບຕໍ່ປະກອບຄໍາເຫັນບົດສະຫຼຸບ ແລະຄໍາຖາມເຈາະຈິ້ມຂອງທ່ານປະທານແບບກົງໄປກົງມາ.
ກອງປະຊຸມຄັ້ງນີ້ຈະດຳເນີນໄປເປັນເວລາ 5 ວັນ (ຕັ້ງແຕ່ວັນທີ 04-08 ກັນຍາ 2023) ຈຶ່ງຈະສໍາເລັດ.
ຂ່າວ/ພາບ: ຄອນສະຫວັນ ແສນຍານຸພາບ
ບັນນາທິການ: ປທ ບຸນປັນ ສຸມຸນທອງ