ພິທີເປີດຊຸດຮຽນຂັ້ນກາງ ຮຸ່ນທີ III ແລະຂັ້ນຕົ້ນ ຮຸ່ນທີ III ໃຫ້ແກ່ພະນັກງານນໍາພາ-ຄຸ້ມຄອງຢູ່ຂັ້ນເມືອງ, ພະແນກການຂອງແຂວງສະຫວັນນະເຂດແມ່ນດຳເນີນໄປພາຍໃຕ້ບັນຍາກາດທີ່ທົ່ວພັກ, ທົ່ວກໍາລັງປະກອບອາວຸດແລະທົ່ວປວງຊົນລາວບັນດາເຜົ່າພວມອອກແຮງແຂ່ງຂັນການຈັດຕັ້ງຜັນຂະຫຍາຍມະຕິກອງປະໃຫຍ່ຄັ້ງທີ XI ຂອງພັກປະຊາຊົນປະຕິວັດລາວ, ແຜນພັດທະນາເສດຖະກິດ-ສັງຄົມແຫ່ງລັດ 5 ປີ ຄັ້ງທີ IX, ໂດຍສະເພາະຢູ່ແຂວງສະຫວັນນະເຂດພວມອອກແຮງແຂ່ງຂັນໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງໃຫ້ເຂົ້າສູ່ລວງເລິກ.
ໃນພິທີດັ່ງກ່າວ, ຈັດຂຶ້ນໃນວັນທີ 1 ກັນຍາ 2023 ທີ່ສະໂມສອນ ໂຮງຮຽນການເມືອງ ແລະການປົກຄອງແຂວງສະຫວັນນະເຂດ ໃຫ້ກຽດເປັນປະທານຮ່ວມໂດຍ: ທ່ານ ປອ ດາວສະຫວັນ ເຄືອມີໄຊ ຄະນະປະຈຳພັກ, ຮອງຫົວໜ້າ ສມປຊ ແລະສະຫາຍ ລໍາທອງ ຂອບສີລາວົງ ຄະນະປະຈໍາພັກແຂວງ, ປະທານກວດກາພັກ-ລັດແຂວງ, ມີທ່ານ ພູເຂົາ ສີຫາວົງ ເລຂາຄະນະພັກຮາກຖານ, ຫົວໜ້າໂຮງຮຽນການເມືອງ ແລະ ການປົກຄອງແຂວງ ພ້ອມດ້ວຍຄະນະ ແລະພະນັກງານ, ຄູ-ອາຈານເຂົ້າຮ່ວມຢ່າງພ້ອມພຽງ.
ຊຸດຮຽນທິດສະດີຂັ້ນກາງມີນັກສຶກສາຈໍານວນ 45 ທ່ານ, ຍິງ 10 ທ່ານ ຈະໃຊ້ເວລາ 6ເດືອນ, ສຳລັບລະບົບຂັ້ນຕົ້ນມີນັກສຶກສາຈຳນວນ 42 ທ່ານ, ຍິງ 16 ທ່ານ ໃຊ້ເວລາ 3 ເດືອນ, ຊຶ່ງໃນ 2 ລະບົບດັ່ງກ່າວ, ຈະໄດ້ຮຽນຮູ້ທິດສະດີມາກ-ເລນິນ ແລະແນວຄິດ ໄກສອນ ພົມວິຫານ ເພື່ອໃຫ້ເປັນຫຼັກມູນທິດສະດີ ໃນການນຳໄປສົມທຽບທິດສະດີ ແລະພຶດຕິກຳໃຫ້ຖືກຕ້ອງ ນຳໄປໝູນໃຊ້ເຂົ້າໃນຊີວິດຕົວຈິງ ພ້ອມທັງໝູນໃຊ້ເຂົ້າໃນໜ້າທີ່ວຽກງານ ຂອງຕົນໃຫ້ໄດ້ຮັບຜົນດີກວ່າເກົ່າ ແລະເພື່ອເຫັນໄດ້ຄວາມສຳຄັນໃນການພັດທະນາຊັບພະຍາກອນມະນຸດ ແລະບຸກທະລຸທາງດ້ານຈິນຕະນາ ການອັນໃໝ່, ສ້າງແນວຄວາມຄິດໃຫ້ເປັນລະບົບ, ມີຄວາມເປັນເອກະພາບຕໍ່ແນວທາງນະໂຍບາຍຂອງພັກ, ເສີມຂະຫຍາຍຄວາມສາມັກຄີທັງພາຍໃນ ແລະພາຍນອກ, ເຮັດວຽກມີແບບແຜນ, ມີຫຼັກການ ແລະເບິ່ງບັນຫາແບບສັດຈະວິພາກ ແລະພ້ອມກັນຈັດຕັ້ງປະຕິບັດໜ້າທີ່ການເມືອງຂອງພັກໃຫ້ບັນລຸຜົນເປັນຈິງ.
ທິດສະດີຂັ້ນກາງ ແລະຂັ້ນຕົ້ນປະກອບມີ 7 ກຸ່ມວິຊາຄື: ກຸ່ມວິຊາປັດຊະຍາມາກ-ເລນິນ, ກຸ່ມວິຊາເສດຖະສາດການເມືອງມາກ-ເລນິນ, ກຸ່ມວິຊາລັດທິສັງຄົມນິຍົມວິທະຍາສາດ, ກຸ່ມວິຊາແນວຄິດ ໄກສອນ ພົມວິຫານ, ກຸ່ມວິຊາພື້ນຖານການຄຸ້ມຄອງບໍລິຫານລັດ, ກຸ່ມວິຊາປະຫວັດສາດພັກ ແລະກໍ່ສ້າງພັກ ແລະກຸ່ມວິຊາຫົວຂໍ້ລາຍງານເພີ່ມ.
ໃນຕອນທ້າຍພິທີ ທ່ານ ປອ ດາວສະຫວັນ ເຄືອມີໄຊ ໄດ້ໂອ້ລົມຕໍ່ກັບຊຸດຮຽນທິດສະດີທັງ 2 ລະບົບດັ່ງກ່າວ, ເພື່ອໃຫ້ມີຄວາມຮັບຮູ້ເຖິງການຮຽນຢ່າງເຂັ້ມງວດ, ອ່ານໃຫ້ເລິກ, ຄົ້ນຄວ້າໃຫ້ແທດເຖິງ, ມີຄວາມມັກຮັກໃນການອ່ານ-ໃນການຄົ້ນຄວ້າ, ຮຽນດ້ວຍຄວາມຮັບຜິດຊອບ ທັງຮຽນທິດສະດີທັງຄົ້ນຄວ້າພຶດຕິກຳ, ເອົາທິດສະດີເຍືອງໃສ່ພຶດຕິກຳ, ໄປແກ້ບັນຫາທີ່ຕັ້ງຂຶ້ນໃນພຶດຕິກຳຕົວຈິງ; ເພີ່ມທະວີການຮຽນດ້ວຍຕົນເອງໃຫ້ຫຼາຍຂຶ້ນຄຽງຄູ່ກັບສົນທະນາແລກປ່ຽນກັບອາຈານເພື່ອຄວາມສຳເລັດໃນການຮຽນ–ການສອນຢ່າງມີປະສິດທິພາບ.
ຂ່າວ/ພາບ: ຕາອັອດ ແສນທະວີສຸກ
ບັນນາທິການ: ປທ ບຸນປັນ ສຸມຸນທອງ