ສະຖາບັນການເມືອງ ແລະ ການປົກຄອງແຫ່ງຊາດນໍາໂດຍ: ສະຫາຍ ປທ ນ. ຄຳຫຼ້າ ແກ້ວອຸ່ນຄຳ ຄະນະບໍລິຫານງານພັກ, ຮອງຫົວໜ້າ ສມປຊ ພ້ອມດ້ວຍຕາງໜ້າຄະນະ 12 ພາກສ່ວນຂອງ ສມປຊ ໄດ້ອວຍພອນ ສະຫາຍ ຫງວຽນ ບ໋າຮຸ່ງ ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສສ ຫວຽດນາມ ປະຈໍາ ສປປ ລາວ ໃນຕອນແລງວັນທີ 29 ສິງຫາ 2023 ທີ່ສະຖານທູດ ສສ ຫວຽດນາມ ປະຈຳ ສປປ ລາວ, ເນື່ອງໃນໂອກາດວັນສະຖາປະນາ ສສ ຫວຽດນາມ ຄົບຮອບ 78 ປີ (2/9/1945-2/9/2023) ແລະວັນການທູດ ສສ ຫວຽດນາມ ຄົບຮອບ 78 ປີ (28/8/1945 – 28/8/2023).
ໃນໂອກາດດັ່ງກ່າວ, ສະຫາຍ ປທ ນ. ຄຳຫຼ້າ ແກ້ວອຸ່ນຄຳ ໄດ້ຕາງໜ້າໃຫ້ຄະນະພັກ, ຄະນະນໍາ ແລະ ພະນັກງານ, ຄູ-ອາຈານ ສມປຊ ສະແດງຄວາມຊົມເຊີຍວັນສະຖາປະນາ ສສ ຫວຽດນາມ ແລະວັນການທູດ ສສ ຫວຽດນາມ ຄົບຮອບ 78 ປີ ຢ່າງສຸດໃຈ. ພ້ອມນັ້ນ, ໄດ້ສະແດງຄວາມຊົມເຊີຍ ຕໍ່ຜົນສໍາເລັດອັນໃຫຍ່ຫຼວງໃນຫຼາຍດ້ານຂອງ ສສ ຫວຽດນາມ ທີ່ສາມາດຍາດມາໄດ້ຕະຫຼອດ 78 ປີ ຜ່ານມາເຊິ່ງເປັນຂະແໜງການນໍາໜ້າພາທາງທີ່ເຂັ້ມແຂງ, ເຮັດໃຫ້ບົດບາດຊື່ສຽງ ແລະອິດທິພົນຂອງ ສສ ຫວຽດນາມ ນັບມື້ນັບສູງເດັ່ນຂຶ້ນໃນເວທີພາກພື້ນ ແລະສາກົນ, ປະກອບສ່ວນອັນສໍາຄັນໃຫ້ແກ່ການພັດທະນາເສດຖະກິດ-ສັງຄົມ ຂອງ ສສ ຫວຽດນາມ ແລະທ່ານໄດ້ ຕີລາຄາສູງ ຕໍ່ການຊ່ວຍເຫຼືອ ໃນການປະກອບສ່ວນການຄົ້ນຄວ້າວິທະຍາສາດ, ການກໍ່ສ້າງພື້ນຖານໂຄງລ່າງ ສມປຊ ແລະອື່ນໆ ທີ່ມີຄຸນຄ່າຂອງ ສສ ຫວຽດນາມ ໃນໄລຍະຜ່ານມາ.
ໃນໂອກາດດຽວກັນນີ້, ສະຫາຍ ຫງວຽນ ບ໋າຮຸ່ງ ກໍໄດ້ສະແດງຄວາມຂອບໃຈຢ່າງຍິ່ງຕໍ່ການມາອວຍພອນຄັ້ງນີ້ຂອງ ສະຫາຍ ປທ ນ. ຄຳຫຼ້າ ແກ້ວອຸ່ນຄຳ ພ້ອມດ້ວຍຄະນະ ສະແດງຄວາມຂອບໃຈ ແລະ ຊົມເຊີຍ ຕໍ່ການໃຫ້ຄວາມສໍາຄັນອັນຈິງໃຈ, ພ້ອມທັງຕີລາຄາສູງຕໍ່ການພົວພັນຮ່ວມມື ລະຫວ່າງ ສອງປະເທດ ລາວ-ຫວຽດນາມ ໃນໄລຍະຜ່ານມາ ແລະຫວັງຢ່າງຍິ່ງວ່າ ສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີພິເສດ ແລະການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະປະຊາຊົນສອງຊາດຫວຽດນາມ-ລາວ ນັບມື້ຈະໄດ້ຮັບການຖະນຸຖະໜອມບໍາລຸງສ້າງ ແລະໄດ້ຮັບການເຊີດຊູຢ່າງບໍ່ຢຸດຢັ້ງ.
ຂ່າວ/ພາບ: ຕາອັອດ ແສນທະວີສຸກ
ບັນນາທິການ: ປທ ບຸນປັນ ສຸມຸນທອງ