ໃນຕອນເຊົ້າ ວັນທີ 26 /06/2020 ຢູ່ທີ່ ສະໂມສອນໃຫຍ່ ສມປຊ, ຄະນະກວດກາສະຖາບັນການເມືອງ ແລະ ການປົກຄອງແຫ່ງຊາດ ໄດ້ຈັດກອງປະຊຸມສະຫຼຸບວຽກງານກວດກາປະຈຳປີຂຶ້ນ. ພາຍໃຕ້ການເປັນປະທານ ຂອງທ່ານ ຮສ ພູວົງ ອຸ່ນຄໍາແສນ ຮັກສາການເລຂາຄະນະບໍລິຫານງານພັກ, ຮັກສາການຫົວໜ້າ ສມປຊ, ທ່ານ ປທ ນາງ ບຸນມີ ຈຸນລະຈັກ ຄະນະບໍລິຫານງານພັກ ປະທານກວດກາພັກ, ມີຄະນະພັກ-ຄະນະນໍາ ສມປຊ ພ້ອມດ້ວຍ ສະມາຊິກພັກທົ່ວ ສມປຊ ເຂົ້າຮ່ວມ.
ໃນກອງປະຊຸມ ທ່ານ ປອ ຄຳຫຼ້າ ລໍວານໄຊ ຮັກສາການຫົວໜ້າກົມກວດກາ ສມປຊ ຜ່ານບົດສະຫຼຸບວຽກງານກວດກາປະຈຳປີ 2019 ແລະ ທິດທາງແຜນການປະຈຳປີ 2020 ຊຶ່ງເນື້ອໃນໄດ້ຍົກໃຫ້ເຫັນ ກົມກວດກາ ສມປຊ ທີ່ຜ່ານມາໄດ້ກວດກາຕາມພາລະບົດບາດ, ໜ້າທີ່, ຂອບເຂດສິດຂອງຕົນ, ເຮັດໃຫ້ວຽກງານກວດກາ ໄດ້ປະກອບສ່ວນສຳຄັນ ເຂົ້າໃນການປົກປັກຮັກສາສະຖຽນລະພາບທາງດ້ານການເມືອງ, ເສດຖະກິດ, ວັດທະນະທຳ-ສັງຄົມ, ບັນດາຂົງເຂດວຽກງານຂະແໜງການຕ່າງໆ ສມປຊ ໄດ້ມີຄວາມສະຫງົບໂດຍພື້ນຖານ, ພະນັກງານສະມາຊິກພັກ ມີຄວາມໜັກແໜ້ນທາງດ້ານການເມືອງແນວຄິດ, ປະກອບສ່ວນເຂົ້າໃນການກໍ່ສ້າງພັກ ໃຫ້ມີຄວາມປອດໃສເຂັ້ມແຂງ ທາງດ້ານການຈັດຕັ້ງ ແລະ ສະກັດກັ້ນ-ຕ້ານການສໍ້ລາດບັງຫຼວງ ໃນທຸກການຈັດຕັ້ງປະຕິບັດວຽກງານກວດກາ. ໃນໜຶ່ງປີ ຜ່ານມາກົມກວດກາເນັ້ນໜັກໃສ່ ບັນຫາສຳຄັນເພື່ອເປັນການສະກັດກັ້ນ ແລະ ຕ້ານປະກົດການຫຍໍ້ທໍ້ຕ່າງໆ ທີ່ຈະເກີດຂຶ້ນກັບສະມາຊິກພັກ, ພະນັກງານ, ຄູ-ອາຈານ-ການຈັດຕັ້ງພາຍໃນ ສມປຊ ແລະໄດ້ເປັນເຈົ້າການສົມທົບກັບພາກສ່ວນກ່ຽວ ຂ້ອງຄົ້ນຄວ້າ ແລະ ແກ້ໄຂບັນຫາຈາກຄຳຮ້ອງ, ຄຳສະເໜີຂອງບຸກຄົນ.
ພ້ອມກັນນັ້ນ, ທີ່ປະຊຸມຍັງໄດ້ຮັບຟັງການເຜີຍແຜ່ເອກະສານຕ່າງໆທີ່ກ່ຽວຂ້ອງ ເປັນຕົ້ນແມ່ນ:
1). ບົດສະຫຼຸບວຽກງານກວດກາທົ່ວປະເທດ ປະຈຳປີ 2019 ແລະ ທິດທາງແຜນການປະຈຳປີ 2020 ຂອງຄະນະກວດກາສູນກາງພັກ.
2). ຂໍ້ກຳນົດຂອງຄະນະກວດກາສູນກາງພັກ ວ່າດ້ວຍການຄົ້ນຄວ້າ, ແກ້ໄຂຄຳຮ້ອງຟ້ອງ, ຮ້ອງທຸກ ແລະ ຄຳສະເໜີ.
3). ຄຳສັ່ງແນະນຳ ວ່າດ້ວຍການດຳເນີນຄະດີຟອກເງິນ ແລະ ການສະໜອງທຶນໃຫ້ແກ່ການກໍ່ການຮ້າຍ ສະບັບເລກທີ 01/ຄຕຟງ, ລົງວັນທີ 08 ມັງກອນ
4). ດຳລັດ ເລກທີ 127/ລບ ລົງວັນທີ 20.2.2020 ວ່າດ້ວຍ ຄວາມຮັບຜິດຊອບການຕ້ານການສະກັດກັ້ນການຟອກເງິນ ແລະ ການສະໜອງທຶນໃຫ້ແກ່ານກໍ່ການຮ້າຍ.
5). ບົດໂອ້ລົມຂອງ ທ່ານ ປອ ບຸນທອງ ຈິດມະນີ ກຳມະການກົມການເມືອງ, ເລຂາທິການສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ ແລະ ອົງການກວດກາລັດຖະບານ ແລະ ຕ້ານການສໍ້ລາດບັງຫຼວງຂັ້ນສູນກາງຕໍ່ກອງປະຊຸມວຽກງານກວດກາທົ່ວປະເທດ ປີ 2019.
ກອງປະຊຸມຄັ້ງນີ້ ຜູ້ເຂົ້າຮ່ວມກອງປະຊຸມຍັງ ໄດ້ປະກອບຄຳຄິດເຫັນຕີລາຄາກ່ຽວກັບວຽກງານກວດກາ ເພື່ອພ້ອມກັນປັບປຸງແກ້ໄຂທັນເວລາ, ຕີຖອຍດ້ານອ່ອນ ເສີມຂະຫຍາຍດ້ານດີ ຊຶ່ງໄດ້ມີການປະກອບຄໍາຄິດຄໍາເຫັນຢ່າງເລິກເຊິ່ງ ເປັນເອກະພາບຕໍ່ທິດທາງໜ້າທີ່ຈຸດສຸມໃນແຕ່ລະດ້ານ ແນໃສ່ເຮັດໃຫ້ວຽກງານກວດກາ ມີຄວາມເຂັ້ມແຂງ ສະພາບແນວຄິດພະນັກງານ-ລັດຖະກອນມີຄວາມສະຫງົບ ແລະ ມີການຫັນປ່ຽນທີ່ດີຂຶ້ນກວ່າເກົ່າ
ໃນຕອນທ້າຍປະທານກອງປະຊຸມ ໄດ້ໃຫ້ກຽດມີຄຳເຫັນໂອ້ລົມ ຊຶ່ງທ່ານໄດ້ຮຽກຮ້ອງໃຫ້ບັນດາ ສະມາຊິພັກ, ພະນັກງານ, ຄູ-ອາຈານ ຫຼັກແຫຼ່ງຂອງຫ້ອງການ, ບັນດາກົມ, ຄະນະຕ່າງໆ ແລະ ສູນ ຕ້ອງໄດ້ກຳເເໜ້ນ, ເຂົ້າໃຈຢ່າງເລິກເຊິ່ງ ແລະ ນຳເອົາເນື້ອໃນຈິດໃຈຂອງກອງປະຊຸມຄັ້ງນີ້ ເປັນບ່ອນອີງໃນການຊີ້ນຳ-ນຳພາຈັດຕັ້ງປະຕິບັດໃຫ້ປະກົດຜົນເປັນຈິງ ເພື່ອປະກອບສ່ວນໃນການປັບປຸງກໍ່ສ້າງພັກ-ພະນັກງານ, ການກໍ່ສ້າງໜ່ວຍພັກໃຫ້ປອດໃສ, ເຂັ້ມແຂງ, ໜັກແໜ້ນ ທັງເປັນການຍົກສູງບົດບາດການນຳພາຂອງພັກ, ຄວາມຮັບຜິດຊອບໃນການຄຸ້ມຄອງລັດດ້ວຍກົດໝາຍ ແລະ ພ້ອມກັນນຳໄປຈັດຕັ້ງຜັນຂະຫຍາຍເຂົ້າໃນວຽກງານຕົວຈິງ ແລະ ເຮັດໃຫ້ການຕິດຕາມກວດກາ ສະກັດກັ້ນ ແລະ ຕ້ານການສໍ້ລາດບັງຫຼວງ ພາຍໃນສືບຕໍ່ຈັດຕັ້ງປະຕິບັດໄດ້ຢ່າງແຂງແຮງ.
ຂ່າວ/ພາບ: ຕາອັອດ ແສນທະວີສຸກ
ບັນນາທິການ: ຄອນສະຫວັນ ແສນຍານຸພາບ
