ກອງປະຊຸມສຳມະນາ ວິທະຍາສາດ ເປັນການຮ່ວມມືຂອງສອງປະເທດ ສປປ. ລາວ ແລະ ສສ.ຫວຽດນາມ ຊຶ່ງມີ 4 ຝ່າຍຄື ສະຖາບັນການເມືອງ ແລະ ການປົກຄອງແຫ່ງຊາດ, ສະຖາບັນວິທະຍາສາດເສດຖະກິດສັງຄົມແຫ່ງຊາດ, ສະຖາບັນການເມືອງແຫ່ງຊາດໂຮ່ຈີມິນ ແລະສະຖາບັນດິດວິທະຍາສາດສັງຄົມແຫ່ງຊາດ ຊຶ່ງທັງ 4 ຝ່າຍໄດ້ຮ່ວມກັນຄົ້ນຄວ້າວິທະຍາສາດພາຍໃຕ້ຫົວຂໍ້: “ການປຸກລະດົມ, ນຳໃຊ້ທຶນ ແລະ ເຕັກໂນໂລຊີ ຢ່າງມີປະສິດທິຜົນ ຮັບປະກັນການພັດທະນາຢູ່ ລາວ-ຫວຽດນາມ” ໃນຄັ້ງວັນທີ 29 ມິຖຸນານີ້, ຢູ່ແຂວງລາວກາຍ ສສ.ຫວຽດນາມ.
ກອງປະຊຸມດັ່ງກ່າວມີຄວາມໝາຍສຳຄັນສຳລັບສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ, ຫວຽດນາມ-ລາວ. ເປັນໄລຍະທີ່ ພັກກອມມູນິດຫວຽດນາມ ພວມຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XIII ຂອງຕົນ ແລະ ພັກປະຊາຊົນ ປະຕິວັດລາວ ພວມຈັດຕັ້ງການສະຫຼຸບຜົນງານການຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ໄລຍະກາງສະໄໝ.
ກອງປະຊຸມ ມີຄະນະປະທານຮ່ວມ ທ່ານ ຮສ ພູວົງ ອຸ່ນຄຳແສນ, ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າ ສມປຊ, ທ່ານ ປອ. ສອນທະນູ ທຳມະວົງ, ກໍາມະການສູນກາງພັກ, ຫົວໜ້າສະຖາບັນວິທະຍາສາດເສດຖະກິດສັງຄົມແຫ່ງຊາດ, ທ່ານ ສຈ. ປອ. ເລວັນເລີ້ຍ, ຮອງຫົວໜ້າສະຖາບັນການເມືອງແຫ່ງຊາດໂຮ່ຈີມິນ, ທ່ານ ປອ. ຟານ ຈິ ຫຽວ, ຫົວໜ້າສະຖາບັນດິດວິທະຍາສາດສັງຄົມແຫ່ງຊາດ ຫວຽດນາມ ແລະ ບັນດາທ່ານນັກວິທະຍາສາດລາວ-ຫວຽດນາມ.
ກອງປະຊຸມ, ໄດ້ຜ່ານບົດນຳສະເໜີ ທັງໝົດ 40 ຫົວຂໍ້ ແລະໄດ້ແບ່ງເປັນ 3 ວາລະຄື: ວາລະທີ 1: ທຶນສຳລັບການພັດທະນາຢູ່ລາວ ແລະ ຫວຽດນາມ, ວາລະທີ 2: ເຕັກໂນໂລຊີຕໍ່ກັບການພັດທະນາຢູ່ລາວ-ຫວຽດນາມ ແລະ ວາລະທີ 3 ສົນທະນາໂຕະມົນ ບົດຮຽນຂອງສາກົນ ແລະ ວິທີການແກ້ໄຂຊຸກຍູ້ການລະດົມ, ນຳໃຊ້ທຶນ ແລະ ເຕັກໂນໂລຊີໃນການພັດທະນາ, ໂດຍພື້ນຖານທັງ 3 ວາລະບັນດານັກວິທະຍາສາດ 4 ຝ່າຍ ໄດ້ລາຍງານບົດ, ປຶກສາຫາລື, ວິເຄາະ, ແລກປ່ຽນບົດຮຽນເຊິ່ງກັນ ແລະ ກັນ ກ່ຽວກັບການລະດົມ, ນຳໃຊ້ທຶນ ແລະ ນຳໃຊ້ເຕັກໂນໂລຊີເຂົ້າໃນການພັດທະນາປະເທດຊາດ ແມ່ນຄວາມຮຽກຮ້ອງຕ້ອງການແຫ່ງການພັດທະນາໃນຍຸກສະໄໝໃໝ່ເວົ້າລວມ, ຢູ່ ສປປ ລາວ ເວົ້າສະເພາະ. ພັກປະຊາຊົນປະຕິວັດລາວ ໄດ້ເນັ້ນໜັກວ່າ: “ສ້າງການຫັນປ່ຽນອັນເປັນພື້ນຖານ ແລະແຂງແຮງໃນການດຶງດູດການລົງທຶນພາຍໃນ ແລະຕ່າງປະເທດ”; ດ້ວຍການປັບປຸງໂຄງປະກອບການລົງທຶນ, ສຸມໃສ່ບັນດາໂຄງການພັດທະນາດ້ານພື້ນຖານໂຄງລ່າງ ທີ່ມີປະສິດທິຜົນອັນແທ້ຈິງຕາມບໍລິເວນເຂດແຄວ້ນ ໂດຍສະເພາະໂຄງການທີ່ຈຳເປັນ, ເປັນໄມ້ງັດໃຫ້ແກ່ການພັດທະນາເສດຖະກິດ-ສັງຄົມ ແລະປ້ອງກັນຊາດ, ປ້ອງກັນຄວາມສະຫງົບ, ລວມທັງການລົງທຶນພັດທະນາພື້ນຖານໂຄງລ່າງ-ວັດຖຸເຕັກນິກ ອັນຈຳເປັນໃນເຂດຈຸດສຸມຜະລິດສິນຄ້າ. ລັດໄດ້ມີນະໂຍບາຍສົ່ງເສີມໃຫ້ທຸກພາກສ່ວນເສດຖະກິດ ແລະ ຜູ້ປະກອບການຈາກພາຍໃນ ແລະຕ່າງປະເທດ ຂະຫຍາຍບັນດາກິດຈະການລົງທຶນໃນທຸກຂົງເຂດ ແລະ ທຸກລະດັບ.
ການນຳໃຊ້ທຶນເຂົ້າໃນການພັດທະນານັ້ນ, ພັກໄດ້ “ສົ່ງເສີມການຄົ້ນຄວ້າ ແລະນຳໃຊ້ຜົນສຳເລັດການຄົ້ນຄວ້າວິທະຍາສາດ, ເຕັກໂນໂລຊີ, ເຕັກນິກວິຊາການ, ນະວັດຕະກຳໃໝ່ ແລະ ພູມປັນຍາ ເຂົ້າໃນການຊຸກຍູ້ການພັດທະນາເສດຖະກິດ-ສັງຄົມ”. ດ້ວຍການຮັບຮູ້ແຈ້ງວ່າ: ເຕັກໂນໂລຊີ ແມ່ນຂະບວນການຫັນປ່ຽນຊັບພະຍາກອນໃຫ້ກາຍເປັນຜະລິດຕະພັນ ເພື່ອຮັບໃຊ້ສັງຄົມ ດ້ວຍການນຳໃຊ້ລະບົບເຄື່ອງມື, ພະລັງງານ, ພາຫະນະ, ວິທີການ ແລະ ກຳມະວິທີການຜະລິດສະເພາະ. ປະເທດໃດບໍ່ສາມາດປັບໂຕທັນ ແລະນຳໃຊ້ເຕັກໂນໂລຊີເຂົ້າໃນການພັດທະນາຢ່າງມີປະສິດທິຜົນ ແມ່ນບໍ່ສາມາດຕາມທັນຍຸກສະໄໝໄດ້.
ບົນຈິດໃຈດັ່ງກ່າວ, ການລະດົມ, ນຳໃຊ້ທຶນ ແລະນຳໃຊ້ເຕັກໂນໂລຊີ ເຂົ້າໃນການພັດທະນາ ສປປ.ລາວ ແມ່ນໄດ້ຮັບການຈັດຕັ້ງຜັນຂະຫຍາຍມີຜົນສຳເລັດໃນຫຼາຍດ້ານ, ການລະດົມ ແລະ ນຳໃຊ້ທຶນຈາກການລົງທຶນຂອງລັດ, ການລົງທຶນຂອງເອກະຊົນ ແລະທຶນຊ່ວຍເຫຼືອທາງການເພື່ອການພັດທະນາ (ODA)
ກອງປະຊຸມໄດ້ຍົກໃຫ້ເຫັນວ່າ: ການຮ່ວມມືດ້ານການລົງທຶນລະຫວ່າງລາວ ແລະ ຫວຽດນາມ ແມ່ນໄດ້ຮັບການເສີມຂະຫຍາຍ ແລະໄດ້ຮັບໝາກຜົນພົ້ນເດັ່ນແບບກ້າວກະໂດດ, ນັບແຕ່ປີ 1989 ເຖິງປີ 2021 ສອງປະເທດໄດ້ມີການ ລົງທຶນຮ່ວມກັນທັງໝົດ 410 ໂຄງການ, ມູນຄ່າການລົງທຶນ 4,1 ຕື້ໂດລາສະຫະລັດ ຊຶ່ງຈັດຢູ່ໃນ ອັນດັບທີ 3 ໃນຈຳນວນ 54 ປະເທດ ແລະເຂດແຄວ້ນທີ່ມີການລົງທຶນຢູ່ ສປປ ລາວ.
ໃນຕອນທ້າຍກອງປະຊຸມ ທ່ານ ຮສ ພູວົງ ອຸ່ນຄຳແສນ ໄດ້ກ່າວສະຫຼຸບກອງປະຊຸມວ່າ: ເນື້ອໃນບົດປະກອບຄຳເຫັນ ທີ່ນັກວິທະຍາສາດ ນຳສະເໜີຕໍ່ກອງປະຊຸມ ມີຄວາມອຸດົມສົມບູນ, ສ້າງຄວາມກະຈ່າງແຈ້ງໄດ້ໃນຫຼາຍບັນຫາ. ການວິເຄາະ, ວິໄຈແຕ່ລະບັນຫາ ມີວິທີວິທະຍາທີ່ຊັດເຈນ. ຂ້າພະເຈົ້າຂໍຢັ້ງຢືນວ່າ ຜົນການຄົ້ນຄວ້າວິທະຍາສາດມີຄຸນຄ່າດ້ານທິດສະດີ ແລະພຶດຕິກຳດັ່ງນີ້:
– ດ້ານທິດສະດີ: ໄດ້ສ້າງຄວາມກະຈ່າງແຈ້ງທິດສະດີລວມກ່ຽວກັບການລະດົມ ແລະນຳໃຊ້ ທຶນ ແລະນຳໃຊ້ເຕັກໂນໂລຊີເຂົ້າໃນການພັດທະນາສອງຊາດລາວ-ຫວຽດນາມ; ຍົກໃຫ້ບົດບາດ, ຄວາມສຳຄັນ, ຫຼັກມູນ, ຫຼັກການ, ກົດເກນ, ວິທີວິທະຍາໃນການຄົ້ນຄວ້າວິທະຍາສາດ ທີ່ມີພື້ນຖານບ່ອນອີງ ຮັບປະກັນໄດ້ລັກສະນະພັກ, ລັກສະນະວິທະຍາສາດ, ລັກສະນະກົມກຽວລະຫວ່າງ ທິດສະດີ ແລະພຶດຕິກຳ ແລະລັກສະນະທັນກັບຍຸກສະໄໝ ມີເນື້ອໃນອຸດົມສົມບູນ ຊີ້ໃຫ້ເຫັນທາງອອກ ແລະ ວິທີການໃນການລະດົມທຶນ, ນຳໃຊ້ທຶນ ແລະນຳໃຊ້ເຕັກໂນໂລຊີ ເຂົ້າໃນການພັດທະນາ ໃຫ້ສອດຄ່ອງກັບເງື່ອນໄຂຂອງສອງປະເທດລາວ-ຫວຽດນາມ.
– ດ້ານພຶດຕິກຳ: ບົດຄົ້ນຄວ້າຂອງສອງປະເທດ ແລະ 4 ຝ່າຍ ໄດ້ສະໜອງຂໍ້ມູນດ້ານພຶດຕິກຳທີ່ອຸດົມສົມບູນ; ໄດ້ມີຕົວເລກສະຖິຕິ, ມີຂໍ້ມູນສົມທຽບ ແລະມີການຄາດຄະເນລ່ວງໜ້າໃນການລະດົມທຶນ ແລະນຳໃຊ້ເຕັກໂນໂລຊີໃນຕໍ່ໜ້າ, ນັກວິທະຍາສາດໄດ້ມີການວິເຄາະ, ໄຈ້ແຍກຜົນສຳເລັດໃນພຶດຕິກຳ ແລະຊອກຫາວິທີທາງອອກທີ່ສອດຄ່ອງໃນການແກ້ໄຂບັນຫາຢູ່ລາວ ແລະຫວຽດນາມ. ນອກຈາກການແລກປ່ຽນບົດຮຽນພຶດຕິກຳຂອງລາວ ແລະຫວຽດນາມແລ້ວ, ກອງປະຊຸມຍັງໄດ້ແລກ ປ່ຽນບົດຮຽນພຶດຕິກຳ ຂອງບັນດາປະເທດຕ່າງໆ ຊຶ່ງມີຄຸນຄ່າໃຫ້ແກ່ການສຶກສາຄົ້ນຄວ້າ ແລະໝູນໃຊ້ຢ່າງປະດິດສ້າງ ໃນເງື່ອນໄຂ ແລະສະພາບແວດລ້ອມຂອງລາວ-ຫວຽດນາມ.
ຂ່າວ: ຕາອັອດ ແສນທະວີສຸກ
ຮູບພາບ: ສະຖາບັນການເມືອງແຫ່ງຊາດ ໂຮ່ຈີມິນ hcma.vn
ບັນນາທິການ: ປທ ບຸນປັນ ສຸມຸນທອງ