ວັນທີ 23 ມິຖຸນານີ້, ສະຖາບັນຂົງຈື, ມະຫາວິທະຍາໄລແຫ່ງຊາດ ໄດ້ມາເຜີຍແຜ່ວັດທະນະທຳ ບຸນຫໍ່ເຂົ້າຕົ້ມ ແລະຊຸດເຄື່ອງນຸ່ງແຕ່ລະສະໄໝ ໃຫ້ພະນັກງານ, ຄູ-ອາຈານ ສມປຊ ທີ່ກຳລັງຮຽນພາສາຈີນ ຢູ່ຫ້ອງຫ້ອງຮຽນຂົງຈື ສມປຊ ໄດ້ຮຽນຮູ້ປະຫວັດຄວາມເປັນມາປະເພນີ-ວັດທະນະທຳຈີນ. ໃຫ້ກຽດເປັນປະທານໂດຍ: ທ່ານ ປທ ນ ພອນໄຊ ລາດຊະວົງ ຄະນະບໍລິຫານງານພັກ, ຫົວໜ້າກົມຈັດຕັ້ງ-ພະນັກງານ ພ້ອມດ້ວຍ ທ່ານ ຄໍາຮຸ່ງ ຈັນທະວົງ ຜູ້ອໍານວຍການສະຖາບັນຂົງຈື (ມຊ) ຝ່າຍລາວ ແລະທ່ານ ໂຫຼວໝິງ ຜູ້ອໍານວຍການສະຖາບັນຂົງຈື (ມຊ) ຝ່າຍຈີນ, ມີ ຄູ-ອາຈານ ປະຈຳຫ້ອງຮຽນຂົງຈື ສມປຊ 2 ທ່ານ ແລະເປັນກຽດເຂົ້າຮ່ວມຮັບຊົມ ມີຕາງໜ້າຫ້ອງການ, ກົມ, ຄະນະຕ່າງໆ ແລະສູນຕ່າງໆ.
ກິດຈະກຳດັ່ງກ່າວ, ອາຈານ ຟູນານ່າ ແລະອາຈານ ຊືິຊິວນ່າ ໄດ້ບັນຍາຍປະຫວັດຄວາມເປັນມາຂອງປະເພນີ-ວັດທະນະທຳການຫໍ່ເຂົ້າຕົ້ມຊຶ່ງເປັນປະເພນີອັນເກົ່າແກ່ຂອງຊາວຈີນທີ່ໄດ້ສືບທອດກັນມາໃນວັນຂຶ້ນ 5 ຄ່ຳ ເດືອນ 5 ຕາມປະຕິທິນຂອງທຸກໆປີ, ນອກນັ້ນ, ໄດ້ບັນຍາຍປະເພດເຄື່ອງນຸ່ງຂອງຈີນແຕ່ລະສະໄໝ ພ້ອມທັງໃຫ້ຜູ້ເຂົ້າຮ່ວມໄດ້ຮັບຟັງ ແລະໄດ້ລົງມືປະຕິບັດຕົວຈິງເພື່ອໄດ້ສໍາພັດກັບວັດທະນະທຳ-ປະເພນີອັນດີງາມຂອງຈີນທີ່ສືບທອດກັນມາຍາວນານ.
ປະມວນຮູບພາບໃນກິດຈະກຳ
ຂ່າວ/ພາບ: ຕາອັອດ ແສນທະວີສຸກ
ບັນນາທິການ: ປທ ບຸນປັນ ສຸມຸນທອງ