ໃນຕອນເຊົ້າ ຂອງວັນທີ 06 ມິຖຸນາ 2023 ທີ່ຜ່ານມານີ້, ຢູ່ທີ່ຫ້ອງປະຊຸມ (ຕຶກສູນຂໍ້ມູນຂ່າວສານ ຊັ້ນ 5) ນັກສຶກສາປະລິນຍາໂທ ຮຸ່ນທີ XVII ຫ້ອງ ກ ໄດ້ເປີດກອງປະຊຸມຕີລາຄາປະເມີນຜົນການກໍ່ສ້າງໜ່ວຍພັກປອດໃສ, ເຂັ້ມແຂງ ແລະໜັກແໜ້ນ. ໃຫ້ກຽດເປັນປະທານໂດຍ: ສະຫາຍ ປອ ຄໍາໃບ ມາລາສິງ ກໍາມະການຄະນະພັກ, ຫົວໜ້າຄະນະລັດທິສັງຄົມນິຍົມວິທະຍາສາດ, ມີແຂກຖືກເຊີນ ແລະສະມາຊິກພັກນັກສຶກສາພາຍໃນຫ້ອງເຂົ້າຮ່ວມທັງໝົດຈຳນວນ 60 ສະຫາຍ, ຍິງ 16 ສະຫາຍ.
ສະຫາຍ ສີພອນ ມິດໄມຕີ ເລຂາໜ່ວຍພັກຮາກຖານ ນັກສຶກສາປະລິນຍາໂທ ຮຸ່ນທີ XVII ຫ້ອງ ກ, ຂຶ້ນຜ່ານບົດສະຫຼຸບໜ່ວຍພັກ ປອດໄສ, ເຂັ້ມແຂງ, ໜັກແໜ້ນ ໃນໄລຍະ 1 ປີຜ່ານມາ ແລະຜ່ານການຕີລາຄາແຕ່ລະດ້ານສະແດງອອກດັ່ງນີ້:
- ຕີລາຄາການນຳພາດ້ານການເມືອງສາມາດຕີລາຄາໜາກຜົນໃນການຈັດຕັ້ງປະຕິບັດ ຄາດໝາຍສູ້ຊົນ 1,8 ຄະແນນ ແລະປະຕິບັດໄດ້ 1,8 ຄະແນນ.
- ຕີລານຳພາທາງດ້ານແນວຄິດ ສາມາດຕີລາຄາໜາກຜົນໃນການຈັດຕັ້ງປະຕິບັດ ຄາດໝາຍສູ້ຊົນ 1,4 ຄະແນນ ແລະປະຕິບັດໄດ້ 1,4 ຄະແນນ.
- ຕີລາຄານຳພາທາງດ້ານການຈັດຕັ້ງ ສາມາດຕີລາຄາໜາກຜົນໃນການຈັດຕັ້ງປະຕິບັດຄາດໝາຍສູ້ຊົນ 1,5 ຄະແນນ ແລະປະຕິບັດໄດ້ 1,5 ຄະແນນ.
- ຕີລາຄານຳພາທາງດ້ານແບບແຜນນໍາພາ ສາມາດຕີລາຄາໜາກຜົນໃນການຈັດຕັ້ງປະຕິບັດຄາດໝາຍສູ້ຊົນ 1,8 ຄະແນນ ແລະປະຕິບັດໄດ້ 1,8 ຄະແນນ.
- ຕີລາຄານຳພາປະຕິບັດໜ້າທີ່ການເມືອງ ສາມາດຕີລາຄາໜາກຜົນໃນການຈັດຕັ້ງປະຕິບັດຄາດໝາຍສູ້ຊົນ 2,8 ຄະແນນ ແລະປະຕິບັດໄດ້ 2,8 ຄະແນນ.
ສັງລວມແລ້ວ ການປະເມີນໜ່ວຍພັກໃນຄັ້ງນີ້ ສະແດງອອກໃຫ້ເຫັນເຖິງການເຄື່ອນໄຫວທີ່ມີທິດທາງແຜນການຖືກຕ້ອງ ແລະເປັນໄປຕາມແນວທາງນະໂຍບາຍຂອງພັກ ໃນການປັບປຸງປົວແປງ, ສ້າງຄວາມເຂັ້ມແຂງພາຍໃນໜ່ວຍພັກ ມີການຕີລາຄາຈຸດດີ-ຈຸດອ່ອນ ແລະຂໍ້ຄົງຄ້າງໃນໄລຍະຜ່ານມາ ແລະໄດ້ປະກອບຄຳຄິດ, ຄຳເຫັນ ເຊິ່ງກັນ ແລະກັນຢ່າງເປັນຂະບວນຟົດຟື້ນ ມີລັກສະນະສ້າງສັນ ແລະກົງໄປກົງມາເຂັ້ມງວດຕາມລະບຽບການຂອງພັກ ຊຶ່ງມັນສະແດງເຖິງຄວາມຮັບຜິດຊອບຕໍ່ໜ້າທີ່ການເມືອງເປັນເຈົ້າການຮັບຜິດຊອບຮ່ວມກັນເພື່ອຜົນປະໂຫຍດລວມຂອງພັກ ຮັບປະກັນຕາມ 5 ເນື້ອໃນມາດຖານເງື່ອນໄຂຂອງພັກ ເພື່ອການກໍ່ສ້າງໜ່ວຍພັກໃຫ້ປອດໃສ ເຂັ້ມແຂງ ແລະໜັກແໜ້ນ.
ໃນຕອນທ້າຍກອງປະຊຸມ ສະຫາຍ ປອ ຄໍາໃບ ມາລາສິງ ປະທານກອງປະຊຸມໄດ້ໂອລົມຕໍ່ກອງປະຊຸມ, ເຊິ່ງ ສະຫາຍໄດ້ຍ້ອງຍໍຊົມເຊີຍຕໍ່ກັບຜົນງານທີ່ຍາດມາໄດ້ນັ້ນ ມັນໄດ້ສ່ອງແສງໃຫ້ເຫັນເຖິງບັນດາສະຫາຍສະມາຊິກພັກພາຍໃນໜ່ວຍພັກ ໄດ້ຍົກສູງສະຕິຄວາມເປັນເຈົ້າການໃນການປະຕິບັດລະບຽບ, ແນວທາງຂອງພັກ ເວົ້າລວມ, ເວົ້າສະເພາະແມ່ນຄວາມເປັນເຈົ້າການປະຕິບັດແຜນການກໍ່ສ້າງໜ່ວຍພັກປອດໃສ, ເຂັ້ມແຂງ ແລະໜັກແໜ້ນ ຂອງໜ່ວຍພັກຂອງພວກສະຫາຍ ເຊິ່ງເປັນຂີດໝາຍທີ່ດີ ແລະຄວນສືບຕໍ່ເສີມຂະຫຍາຍຜົນງານອັນນີ້ໃຫ້ດີຂຶ້ນຕື່ມໃນກົມກອງຂອງຕົນ.
ຂ່າວ: ນ. ທິດດາວອນ ດວງປະເສີດ
ຮູບພາບ: ຕາອັອດ ແສນທະວີສຸກ
ບັນນາທິການ: ປທ ບຸນປັນ ສຸມຸນທອງ