ໃນຕອນເຊົ້າຂອງວັນທີ 9 ເມສາ 2023 ທີ່ຫ້ອງປະຊຸມ ຂອງເມືອງວຽງພູຄາ ແຂວງຫຼວງນໍ້າທາ ໄດ້ຈັດພິທີປິດການເຝິກອົບຮົມທິດສະດີການເມືອງ-ການປົກຄອງລະບົບ 10 ວັນ ຊຸດທີ III ໃຫ້ເລຂາພັກບ້ານ, ນາຍບ້ານ ຢູ່ເມືອງວຽງພູຄາ ແຂວງຫຼວງນໍ້າທາ. ໃນຄັ້ງນີ້ມີນັກເຝິກອົບຮົມທັງໝົດ ຈໍານວນ 43 ທ່ານ, ຍິງ 6 ທ່ານ, ທັງນີ້ກໍເພື່ອເປັນການຈັດຕັ້ງປະຕິບັດຕາມເນື້ອໃນ ຂອງກອງປະຊຸມໃຫຍ່ຂອງພັກໃນແຕ່ລະໄລຍະໃຫ້ປະກົດຜົນເປັນຈິງເທື່ອລະກ້າວ. ໃຫ້ກຽດເປັນປະທານໂດຍ: ທ່ານ ປທ ຄຳຟອງ ລາດຊະພົນ ຮອງເລຂາໜ່ວຍພັກ, ຮອງຫົວໜ້າໂຮງຮຽນການເມືອງ ແລະການປົກຄອງແຂວງ. ເປັນກຽດເຂົ້າຮ່ວມມີ ທ່ານ ຕຽງສະໝອນ ພອນປະເສີດ ກຳມະການປະຈຳພັກແຂວງ, ເລຂາພັກເມືອງ, ເຈົ້າເມືອງ ເມືອງວຽງພູຄາ ແຂວງຫຼວງນໍ້າທາ; ພ້ອມດ້ວຍບັນດາທ່ານທີ່ເປັນຄະນະຮັບຜິດຊອບການເຝິກອົບຮົມໃນຄັ້ງນີ້, ມີຕົວແທນມາຈາກ ຫ້ອງວ່າການເມືອງໂຄສະນາອົບຮົມເມືອງ, ຄະນະຈັດຕັ້ງເມືອງ, ອົງການຈັດຕັ້ງມະຫາຊົນອ້ອມຂ້າງພາຍໃນເມືອງ, ຕະຫຼອດຮອດພະນັກງານ, ຄູ-ອາຈານ ແລະນັກເຝິກອົບຮົມເຂົ້າຮ່ວມຢ່າງພ້ອມພຽງ.
ຫຼັງຈາກນັ້ນ, ທ່ານ ປທ ແສງ ເຊືອຍສົມບັດ ຫົວໜ້າຂະແໜງວິຊາການ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດການຮຽນ-ການສອນ. ໂຮງຮຽນການເມືອງ ແລະການປົກຄອງແຂວງຫຼວງນໍ້າທາເລີ່ມຈັດຕັ້ງປະຕິບັດໂຄງການຫຼັກສູດການຮຽນ-ການສອນ ໃຫ້ນັກເຝິກອົບຮົມທິດສະດີການເມືອງ-ການປົກຄອງ ໂຄງການຫຼັກສູດ 10 ວັນ ຊຸດທີ III ຢູ່ເມືອງວຽງພູຄາ ແຕ່ວັນທີ 3 ເມສາ 2023 ເປັນຕົ້ນມາໄດ້ສຳເລັດການຮຽນ-ການສອນ ໃນວັນທີ 9 ເມສາ 2023. ສ່ວນເນື້ອໃນບົດຮຽນລວມມີ 03 ພາກວິຊາຮຽນມີ 19 ບົດ, ມີ 87 ຊົ່ວໂມງເທົ່າກັບ 468 ໜ່ວຍກິດ. ພວກເຮົາໄດ້ຈັດຕັ້ງປະຕິບັດຕົວຈິງມີລາຍລະອຽດດັ່ງນີ້:
ລໍາດັບ | ວິຊາຮຽນ | ຈໍານວນບົດ | ຊົ່ໂມງ |
01 | ພາກທີ 1: ທິດທາງລວມ | 4 ບົດ | 18 ຊົ່ວໂມງ |
02 | ພາກທີ 2: ວຽກງານພັກ | 7 ບົດ | 25 ຊົ່ວໂມງ |
03 | ພາກທີ 3: ວຽກງານບໍລິຫານ ແລະການປົກຄອງ | 8 ບົດ | 32 ຊົ່ວໂມງ |
ລວມ: | 19 ບົດ | 75 ຊົ່ວໂມງ |
– ໃນນີ້ໂຮງຮຽນການເມືອງ ແລະ ການປົກຄອງແຂວງໄດ້ນຳໃຊ້ ຄູ-ອາຈານ ພາຍໃນຂຶ້ນຫ້ອງສິດສອນ 100%;
– ຄູ-ອາຈານແຕ່ລະສະຫາຍກໍມີຄວາມພະຍາຍາມຄົ້ນຄ້ວາ, ແຕ່ງບົດສອນ, ຂຶ້ນຫ້ອງສິດສອນ, ອະທິບາຍທາງດ້ານທິດສະດີ ແລະສົມທຽບພຶດຕິກຳເຮັດໃຫ້ນັກເຝິກອົບຮົມມີຄວາມເຂົ້າໃຈໄດ້ດີສົມຄວນ;
– ບັນດານັກເຝິກອົບຮົມກໍໄດ້ມີຄວາມພະຍາຍາມຕັ້ງໃຈຂຶ້ນຫ້ອງ, ຄົ້ນຄ້ວາ-ຮ່ຳຮຽນ, ປະຕິບັດກົດລະບຽບຂອງການຮຽນ ແລະໄດ້ປະກອບຄຳຄິດຄຳເຫັນແລກປ່ຽນສົນທະນາບົດຮຽນນໍາກັນຢ່າງມີບັນຍາກາດຟົດຟື້ນພໍສົມຄວນ;
– ຈາກການຄົ້ນຄ້ວາ-ຮ່ຳຮຽນດັ່ງກ່າວ, ພວກເຮົາກໍໄດ້ຈັດຕັ້ງການປະເມີນຄວາມຮັບຮູ້ຂອງນັກເຝິກອົບຮົມເພື່ອປະເມີນຜົນການຮຽນ-ການສອນ ແລະເປັນການວັດແທກຄວາມຮັບຮູ້ຂອງນັກເຝິກອົບຮົມຊຶ່ງສະແດງອອກດັ່ງນີ້: ດີເລີດກວມ 85,25 %, ດີຫຼາຍ 14,75 % ລື່ນຄາດໝາຍຂອງແຜນການທີ່ວາງໄວ້ 5,25 %.
ຈາກນັ້ນ, ຄະນະຈັດຕັ້ງພິທີກໍໄດ້ຂຶ້ນຜ່ານຂໍ້ຕົກລົງຂອງຫົວໜ້າໂຮງຮຽນວ່າດ້ວຍການອອກໃບຢັ້ງຢືນ; ໃຫ້ກຽດຂຶ້ນມອບໂດຍ: ທ່ານ ປທ ຄຳຟອງ ລາດຊະພົນ ຮອງຫົວໜ້າໂຮງຮຽນການເມືອງ ແລະ ການປົກຄອງແຂວງ.
ໃນຕອນທ້າຍ; ທ່ານ ຕຽງສະໝອນ ພອນປະເສີດ ກຳມະການປະຈຳພັກແຂວງ, ເລຂາພັກເມືອງ, ເຈົ້າເມືອງ, ເມືອງວຽງພູຄາ ແຂວງຫຼວງນໍ້າທາ; ໄດ້ໃຫ້ກຽດໂອ້ລົມຕໍ່ພິທີປິດຊຸດຮຽນ ຊຶ່ງທ່ານໄດ້ກ່າວຍ້ອງຍໍຊົມເຊີຍທາງຄະນະພັກຂອງໂຮງຮຽນ ແລະຄະນະພັກ, ຄະນະນຳຂອງເມືອງວຽງພູຄາ ຕະຫຼອດຮອດທຸກພາກສ່ວນທີ່ໄດ້ໃຫ້ຄວາມສຳຄັນ ຊຶ່ງໄດ້ສ່ອງແສງເຖິງຄວາມຕື່ນຕົວຂອງທຸກພາກສ່ວນ ແລະທ່ານໄດ້ກ່າວຢໍ້າວ່າ: ການຮ່ຳຮຽນເຖິງວ່າຈະໄດ້ຮຽນໜ້ອຍ ຫຼື ຮຽນຫຼາຍ ກໍລ້ວນແຕ່ມີຄຸນຄ່າທັງນັ້ນ. ການຄົ້ນຄວ້າ-ຮ່ຳຮຽນທິດສະດີການເມືອງ-ການປົກຄອງ ໃນຄັ້ງບັນດານັກເຝິກອົບຮົມຕ້ອງຖືເປັນສຳຄັນ ແລະໝູນໃຊ້ເຂົ້າໃນການນໍາພາ-ຊີ້ນໍາວຽກງານຕົວຈິງ ພາຍໃນບ້ານຂອງຕົນ.
ຂ່າວ/ພາບ: ປທ ນ. ມະນີລາ ແກ້ວລະກໍາ
ບັນນາທິການ: ປທ ບຸນປັນ ສຸມຸນທອງ