ຕອນບ່າຍຂອງວັນທີ 20 ມີນາ 2023 ຢູ່ທີ່ ຫ້ອງປະຊຸມໂຮງຮຽນການເມືອງ ແລະ ການປົກຄອງແຂວງຫຼວງນໍ້າທາ. ເປີດຊຸດຮຽນທິດສະດີການເມືອງ ຂັ້ນຕົ້ນ ຮຸ່ນທີ I ໃຫ້ແກ່ພະນັກງານຫຼັກແຫຼ່ງຢູ່ແຂວງຫຼວງນໍ້າທາ. ໂດຍການເປັນປະທານຂອງ ທ່ານ ປທ ສິງໄຊ ວັນຄໍາ ກໍາມະການພັກແຂວງ, ຫົວໜ້າໂຮງຮຽນການເມືອງ ແລະການປົກຄອງແຂວງ, ເຂົ້າຮ່ວມຂອງທ່ານ ຈັນຖະໜອມ ຂັນທະລາດ ຮອງຫົວໜ້າຄະນະຈັດຕັ້ງແຂວງ, ມີຮອງຫົວໜ້າໂຮງຮຽນ, ຄູ-ອາຈານ, ແຂກຖືກເຊີນ, ຕະຫຼອດຮອດນັກສຶກສາເຂົ້າຮ່ວມ.
ທ່ານ ປທ ແສງ ເຊືອຍສົມບັດ ຫົວໜ້າຂະແໜງວິຊາການໂຮງຮຽນການເມືອງ ແລະ ການປົກຄອງແຂວງ ໄດ້ຜ່ານແຜນການຮຽນ-ການສອນທິດສະດີການເມືອງ ຂັ້ນຕົ້ນ ຮຸ່ນທີ I ໃຫ້ແກ່ພະນັກງານຫຼັກແຫຼ່ງຢູ່ແຂວງຫຼວງນໍ້າທາປະຈຳປີ2023 ເພື່ອສ້າງໃຫ້ພະນັກງານຄຸ້ມຄອງ ແລະ ພະນັກງານນໍາພາຮຸ່ນສືບທອດຢູ່ບັນດາພະແນກການ-ຫ້ອງການຂອງແຂວງ, ບັນດາຂະແໜງການອ້ອມຂ້າງ ມີນັກສຶກສາທັງໜົດ 41 ຄົນ, ຍິງ 13 ຄົນຈະໄດ້ປະຕິບັດການຮຽນ-ການສອນໄລຍະ 3 ເດືອນ, ລວມ 70 ວັນ, ຮຽນຕົວຈີ່ງ 60 ວັນ, ເທົ່າກັບ 420 ຊົ່ວໂມງເທົ່າກັບ 26,25 ໜ່ວຍກິດ ລວມມີ 7 ກຸ່ມວິຊາຮຽນ ແລະ 1 ຂຽນບົດລາຍງານຈົບຂັ້ນ ລວມເປັນ 8 ກຸ່ມວິຊາຮຽນ ຄື: ກຸ່ມວິຊາປັດຊະຍາມາກ-ເລນິນ ມີ 7 ບົດ, ກຸ່ມວິຊາເສດຖະສາດການເມືອງມາກ-ເລນີນ ມີ 9 ບົດ,ກຸ່ມວິຊາ ລັດທິສັງຄົມນິຍົມວິທະຍາສາດ, ການເມືອງວິທະຍາ ແລະ ສັງຄົມສາດ ມີ 12 ບົດ, ກຸ່ມວິຊາ ແນວຄິດ ໄກສອນ ພົມວິຫານ ມີ 5 ບົດ,ກຸ່ມວິຊາ ພື້ນຖານການຄຸ້ມຄອງບໍລິຫານ, ທິດສະດີລັດ ແລະ ກົດໝາຍ, ເຕັກນິກບໍລິຫານມີ 7 ບົດ ແລະ ກຸ່ມວິຊາ:ປະຫວັດສາດພັກ ແລະ ກໍ່ສ້າງພັກ 10 ບົດ, ນອກນັ້ນ ນັກສືກສາຍັງຈະໄດ້ເຄື່ອນໄຫວກິດຈະກໍາອື່ນໆທີ່ທາງໂຮງຮຽນວາງອອກ, ການເປີດຮຽນໄດ້ເລີ່ມແຕ່ວັນທີ 21 ມີນາ 2023 ເຖີ່ງທ້າຍເດືອນ ພືດສະພາ 2023 ໃຫ້ສໍາເລັດ.
ໂອກາດດັ່ງກ່າວໄດ້ຜ່ານແຈ້ງການຂອງທ່ານເຈົ້າແຂວງ ກ່ຽວກັບການສືບຕໍ່ເປີດຂະບວນການແຂ່ງຂັນຮັກຊາດ ແລະ ພັດທະນາຂັ້ນຂອງຕົນ ແລະ ຜ່ານເນື້ອໃນຂໍ້ແຂ່ງຂັນ ຂອງໂຮງຮຽນການເມືອງ ແລະ ການປົກຄອງ ແຂວງແຕ່ນີ້ຮອດປີ 2025 ພາຍໃຕ້ຄໍາຂວັນ ຮັກຊາດ ແລະ ພັດທະນາໂດຍຕິດພັນກັບຂໍ້ແຂ່ງຂັນແຜນພັດທະນາເສດຖະກິດ-ສັງຄົມ 5 ປີ ຂອງແຂວງ, 5 ປີຂອງໂຮງຮຽນການເມືອງ ແລະ ການປົກຄອງແຂວງ ໃຫ້ເປັນຂະບວນການຟົດຟື້ນ, ກວ້າງຂວາງ ແລະ ສຳເລັດຕາມລະດັບຄາດໝາຍ ແລະ ຊອກໃຫ້ເຫັນບຸກຄົນທີ່ດີເດັ່ນ. ພ້ອມທັງຜ່ານຂໍ້ຕົກລົງຂອງທ່ານເຈົ້າແຂວງ ວ່າດ້ວຍການມອບສິດໃຫ້ບັນດາພະແນກການ, ອົງການທຽບເທົ່າຂັ້ນແຂວງ, ຕາງໜ້າລັດຖະບານ ແລະ ແຂວງເປັນກຽດປະດັບການຍ້ອງຍໍໃຫ້ຜູ້ທີ່ມີຜົນ ງານດີເດັ່ນ. ໂຮງຮຽນການເມືອງ ແລະ ການປົກຄອງແຂວງຫຼວງນໍ້າທາ ໄດ້ຮັບຫຼຽນໄຊແຮງງານຊັ້ນ 1 ຈໍານວນ 1 ທ່ານ, ຫຼຽນໄຊແຮງງານຊັ້ນ 3 ຈໍານວນ 1 ທ່ານ ແລະ ກົມກອງ 1 , ຫຼຽນກາແຮງງານ ຈໍານວນ 11 ທ່ານ,ໃບຍ້ອງຍໍລັດຖະບານຈໍານວນ 13 ທ່ານ.
ໂອກາດທີມີຄວາມໝາຍຄວາມຄັນທ່ານ ປທ ສິງໄຊ ວັນຄໍາ ກໍາມະການພັກແຂວງ ຫົວໜ້າໂຮງຮຽນການເມືອງ ແລະ ການປົກຄອງແຂວງໄດ້ໃຫ້ທິດຊີ້ນຳ ໃຫ້ເອົາໃຈໃສ່ສຶກສາຮໍ່າຮຽນເອົາ ດ້ານທິດສະດີການເມືອງ, ທິດສະດີມາກ-ເລນີນ,ດ້ານຄຸນສົມບັດສິນທໍາປະຕິບັດ, ແບບແຜນວິທີເຮັດວຽກ, ຄວາມສາມັກຄີ, ຄວາມເປັນແບບຢ່າງ ແລະ ນໍາເອົາຄວາມຮູ້ຄວາມສາມາດເຂົ້າໃນການຈັດຕັ້ງປະຕິບັດໜ້າທີ່ວຽກງານໃນໄລຍະໃໜ່ໃຫ້ມີຄວາມກ້າວໜ້າຂື້ນເລື້ອຍໆ ຕິດພັນກັບການປະຕິດບັດຂໍ້ແຂ່ງຂັນຮັກຊາດ ແລະ ພັດທະນາ ເພີ່ມທະວີການຈັດຕັ້ງປະຕິບັດໃຫ້ເປັນຂະບວນຟົດຟື້ນໃຫ້ຊອກໄດ້ບຸກຄົນທີ່ດີເດັ່ນ.
ຂ່າວ: ປທ ນ. ມະນີລາ ແກ້ວລະກໍາ
ບັນນາທິການ: ຄອນສະຫວັນ ແສນຍານຸພາບ