ສະຖາບັນການເມືອງ ແລະ ການປົກຄອງແຫ່ງຊາດ ໄດ້ເປີດການເຝິກອົບຮົມ ພາຍໃຕຫົວຂໍ້ “ຄວາມອາດສາມາດໃນການນໍາພາຂອງພະນັກງານບໍລິຫານຂັ້ນພະແນກ ແລະຂັ້ນຮອງກົມຈໍານວນໜຶ່ງ ຢູ່ ສມປຊ” ເປັນເວລາ 3 ວັນ (1-3 ມີນາ 2023), ການຈັດເຝິກອົບຮົມໃນຄັ້ງນີ້ແມ່ນໂຄງການປະກວດ Project Award ຂອງຄະນະທີມງານທີ່ໄດ້ໄປເຂົ້າຮ່ວມເຝິກອົບຮົມພາວະຜູ້ນຳໃນການບໍລິຫານລັດ ທີ່ທາງສະຖານ ທູດອົດສະຕາລີ ປະຈຳລາວຈັດຂຶ້ນໃນໄລຍະຜ່ານມາ” ແມ່ນຜົນສຳເລັດອັນໜຶ່ງຂອງຄະນະຮັບຜິດຊອບເຝິກອົບຮົມທີ່ໄດ້ຍາດແຍ່ງຂຽນເປັນໂຄງການປະກວດແລະໄດ້ຮັບທຶນການຊ່ວຍເຫຼືອຈາກສະຖານທູດອົດສະຕາລີ. ເຊິ່ງຈຸດປະສົງກໍເພື່ອສ້າງຄວາມອາດສາມາດ ໃນການນຳພາໃຫ້ແກ່ພະນັກງານ-ຄູອາຈານ ກໍ່ຄືການນຳຂັ້ນພະແນກທົ່ວ ສມປຊ ໃຫ້ສາມາດນຳພາທີມງານຂອງຕົນໃນການປະຕິບັດໜ້າທີ່ວຽກງານໃຫ້ໄດ້ດີຂຶ້ນກວ່າເກົ່າ. ການເຝິກອົບຮົມດັ່ງກ່າວໄດ້ຈັດຂຶ້ນ ທີ່ຫ້ອງປະຊຸມຊັ້ນ 5 ຕຶກສູນຂໍ້ມູນຂ່າວສານ ສະຖາບັນການເມືອງ ແລະ ການປົກຄອງແຫ່ງຊາດ ໃຫ້ກຽດການເປັນປະທານໂດຍ: ທ່ານ ປທ ນ. ຄໍາຫຼ້າ ແກ້ວອຸ່ນຄໍາ ຄະນະບໍລິຫານງານພັກ, ຮອງຫົວໜ້າ ສະຖາບັນການເມືອງ ແລະ ການປົກຄອງແຫ່ງຊາດ ພ້ອມດ້ວຍພະນັກງານ, ຄູ-ອາຈານ ຂັ້ນພະແນກທົ່ວ ສມປຊ.
ການເຝິກອົບຮົມຄັ້ງນີ້ມີຜູ້ເຂົ້າຮ່ວມທັງໝົດ 55 ທ່ານ, ຍິງ 22 ທ່ານ, ໃນນັ້ນ, ມີວິທະຍາກອນ 05 ທ່ານ, ຍິງ 01 ທ່ານ, ສຳມະນາກອນມີ 42 ທ່ານ, ຍິງ 18 ທ່ານ ແລະຄະນະຊ່ວຍວຽກ 08 ທ່ານ, ຍິງ 04 ທ່ານ. ພິເສດມີການນຳຂັ້ນຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດເຂົ້າຮ່ວມເປັນຜູ້ຊີ້ນຳ.
ທ່ານ ປອ ສຸພາວະດີ ຫຼ້າຄຳສາຍ ຮອງຫົວໜ້າຄະນະບໍລິຫານສາດ, ຄະນະຈັດເຝິກອົບຮົມໄດ້ຜ່ານບົດສະຫຼຸບຕີລາຄາການເຝິກອົບຮົມວ່າ:
ຜ່ານການເຝິກອົບຮົມເປັນເວລາ 3 ວັນເຫັນໄດ້ວ່ານັກສໍາມະນາກອນມີຄວາມເອົາໃຈໃສ່ຢ່າງກະຕືລືລົ້ນໃນການເຮັດກິດຈະກໍາຮ່ວມກັນຢ່າງມີບັນຍາກາດຟົດຟື້ນ, ມີການແລກປຽ່ນ ແລະປະກອບຄໍາຄິດຄໍາເຫັນໃສ່ວິທີການສອນຂອງແຕ່ລະກຸ່ມຢ່າງສ້າງສັນ. ນອກຈາກນັ້ນ, ການເຂົ້າຮ່ວມຂອງນັກສໍາມະນາກອນສາມາດປະຕິບັດໄດ້ຕາມວັນເວລາທີ່ກໍານົດ ແລະບໍ່ມີການຂາດຮຽນ.
ຮູບແບບການສິດສອນ, ເນື້ອໃນບົດສອນ ແລະຮູບແບບກິດຈະກຳຕ່າງໆ ຂອງວິທະຍາກອນແມ່ນສາ ມາດຖ່າຍທອດໄດ້ດີ, ສອດຄ່ອງ ແລະເຂົ້າໃຈງ່າຍ. ພິເສດແມ່ນໄດ້ຮັບຄວາມເອົາໃຈໃສ່ເປັນຢ່າງສູງຈາກຄະນະນຳຂັ້ນເທິງກໍ່ຄື ທ່ານ ປທ ນ. ຄຳຫຼ້າ ແກ້ວອຸ່ນຄຳ, ຄະນະບໍລິຫານງານພັກ ໄດ້ໃຫ້ກຽດເປັນຜູ້ຊີ້ນຳໂດຍກົງ ແລະເປັນວິທະຍາກອນຮ່ວມນຳຄະນະຮັບຜິດຊອບໃນການຈັດເຝິກອົບຮົມ, ຂຶ້ນຫ້ອງສອນດ້ວຍຄວາມເອົາໃຈ ໃສ່ ແລະເປັນຫ່ວງເປັນໄຍຕໍ່ສຳມະນາກອນທຸກໆທ່ານ. ເຊິ່ງໄດ້ເຮັດໃຫ້ນັກສໍາມະນາກອນມີຄວາມກະຕືລືລົ້ນໃນການຮຽນ, ສາມາດປະຕິບັດໂມງເວລາໄດ້ດີ ແລະເຂົ້າຮ່ວມທຸກກິດຈະກຳຢ່າງເປັນເຈົ້າການ ແລະສາມາດແລກປ່ຽນ, ຖອດຖອນເອົາບົດຮຽນໄດ້ເປັນຢ່າງດີ ແລະໄດ້ຮ່ວມກັນສ້າງສັນຍາຄວາມມຸ້ງໝັ້ນຮ່ວມກັນໃຫ້ສຳມະນາກອນທັງໝົດກໍ່ຄືການນຳຂັ້ນພະແນກທຸກພະແນກທົ່ວ ສມປຊ ໃນການຫັນປ່ຽນຮ່ວມກັນໃນການນຳພາເພື່ອຫັນປ່ຽນຕົນເອງ, ຫັນປ່ຽນທິມງານຕົນເອງ, ກົມກອງຕົນເອງ ກໍ່ຄືວຽກງານຂອງສະຖາບັນໃຫ້ດີຂຶ້ນກວ່າເກົ່າ.
ຜ່ານການປະເມີນຈາກສຳມະນາກອນທຸກທ່ານເຫັນໄດ້ຄະແນນຄວາມເພິ່ງພໍໃຈທັງໝົດຄະແນນສະ ເລ່ຍໄດ້ 4.35 ຄະແນນ, ຈັດຢູ່ໃນລະດັບ ດີຫຼາຍ.
ເພື່ອເປັນການຢັ້ງຢືນຄວາມສຳເລັດຕໍ່ກັບການຍົກລະດັບຄວາມຮູ້ຄວາມ, ຄວາມສາມາດຂອງຜູ້ເຂົ້າຮ່ວມເຝິກອົບຮົມດັ່ງກ່າວນັ້ນ; ທ່ານ ປທ ນ. ຄຳຫຼ້າ ແກ້ວອຸ່ນຄຳ ໄດ້ມອບໃບຢັ້ງຢືນການເຝິກອົບຮົມ ພ້ອມທັງໄດ້ໂອ້ລົມ ແລະໃຫ້ທິດຊີ້ນຳຕໍ່ກັບສຳມະນາກອນ 4 ເນື້ອໃນຈິດໃຈລຸ່ມນີ້:
ໜຶ່ງ; ພະນັກງານການນຳ, ຜູ້ບໍລິຫານພວກເຮົາ ຕ້ອງກຳແໜ້ນເປົ້າໝາຍລວມຂອງສະຖາບັນເຮົາຄື: ສ້າງໃຫ້ເປັນສະຖາບັນການສຶກສາ, ທັງເປັນສູນເຝິກອົບຮົມທີ່ນຳໜ້າທີ່ຊົງກຽດ ຂອງພັກ-ລັດ ກໍ່ຄືປະເທດຊາດ; ກຳແໜ້ນເປົ້າໝາຍຂອງພາກສ່ວນຕົນ, ກຳແໜ້ນພາລະບົດບາດ ແລະໜ້າທີ່ຂອງພາກສ່ວນຕົນ ແລະຂອງພາກສ່ວນອື່ນໃຫ້ເລິກເຊິ່ງຈະແຈ້ງ, ຊ່ວຍເຫຼືອກັນ, ປະສານງານກັນໃຫ້ໂລ່ງລ່ຽນກົມກຽວ, ມີບັນຍາກາດ ແລະສະພາບແວດລ້ອມທີ່ດີໃນການເຮັດວຽກຮ່ວມກັນ ພ້ອມກັນກ້າວໜ້າ,
ສອງ; ຈາກການເຝິກອົບຮົມຄັ້ງນີ້ຈະຊ່ວຍໃຫ້ທຸກຄົນສາມາດຫັນປ່ຽນຕົນເອງ ໄປໃນທາງທີ່ກ້າວໜ້າ, ຮູ້ນຳໃຊ້ທ່າແຮງບົ່ມມຊ້ອນຂອງຕົນ, ນຳໃຊ້ຊັບພະຍາກອນ, ເວລາທີ່ມີຢູ່ຢ່າງຈຳກັດເຂົ້າໃນການນຳພາ ຊີ້ນຳໜ່ວຍງານຂອງຕົນໃຫ້ມີປະສິດທິຜົນສູງສຸດ,
ສາມ; ການຄວບຄຸມອາລົມ ແລະການເຂົ້າໃຈຕົນເອງໄດ້ດີ ຈະສົ່ງຜົນໃຫ້ການເຮັດວຽກ ແລະການເຂົ້າໃຈຄົນອື່ນໄດ້ດີເຊັ່ນດຽວກັນ,
ສີ່; ການສ້າງແຮງຈູງໃຈໃນການເຮັດວຽກ ເປັນຫົວຂໍ້ທີ່ວິທະຍາກອນ ໄດ້ເປີດໂອກາດໃຫ້ນັກຝຶກອົບຮົມ ມີການແລກປ່ຽນເຖິງວິທີສ້າງແຮງຈູງໃຈ ແລະ ການຮັກສາແຮງຈູງໃຈຫຼາຍພໍສົມຄວນ, ຖ້າຈະຍົກເອົາຕາມທິສະດີຂອງ Maslow ແລ້ວ ແມ່ນລາວໄດ້ອະທິບາຍເຖິງ 5 ຄວາມຕ້ອງການ (5 needs) ທີ່ເປັນພື້ນຖານຫຼັກການໃນການສ້າງແຮງຈູງໃຈໃນການເຮັດວຽກ, ເຊິ່ງມີອັນໃດແດ່ນັ້ນ ທາງວິທະຍາກອນໄດ້ບັນລະຍາຍໄປແລ້ວ ບັນດາທ່ານສາມາດສຶກສາເພີ່ມເຕີມ ເພື່ອຈະນໍາມາປັບໃຊ້ໃນຕົວຈິງໄດ້.
ແລະທັງໝົດນີ້ກໍເປັນເນື້ອໃນຈິດໃຈ ທີ່ ທ່ານ ປທ ນ. ຄຳຫຼ້າ ແກ້ວອຸ່ນຄຳ ເນັ້ນໃຫ້ບັນດານັກສໍາມະນາກອນເອົານໍາໄປໃຊ້ເຂົ້າໃນການນຳພາ, ການບໍລິຫານຈັດການວຽກງານໃນພະແນກ, ໃນກົມກອງຂອງຕົນໃຫ້ດີຂຶ້ນກວ່າເກົ່າ ແລະຫັນເປັນມືອາຊີບຫຼາຍຂຶ້ນ.
ຂ່າວ/ພາບ ນ. ທິດດາວອນ ດວງປະເສີດ
ບັນນາທິການ: ປທ ບຸນປັນ ສຸມຸນທອງ