ເພື່ອເປັນການກໍ່ສ້າງ-ບຳລຸງສະມາຊິກພັກ-ພະນັກງານໃຫ້ມີຄຸນທາດທາງດ້ານການເມືອງທີ່ໜັກແໜ້ນ, ສາມາດເຕົ່າໂຮມຄວາມສາມັກຄີ ແລະກຳໄດ້ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ເພື່ອສ້າງໃຫ້ເປັນພະນັກງານສືບທອດປ່ຽນແທນໃນຕໍ່ໜ້າ ແລະເພື່ອເປັນການຍົກລະດັບຄວາມຮູ້, ຄວາມສາມາດແລະຮັບຮູ້ພຶດຕິກຳຕົວຈິງທາງດ້ານທິດສະດີການເມືອງ- ການປົກຄອງໃຫ້ແກ່ສະມາຊິກພັກ-ພະນັກງານພາຍໃນສູນກາງສະຫະພັນກຳມະບານລາວ. ສະນັ້ນ, ໃນຕອນເຊົ້າຂອງວັນທີ 7 ກຸມພາ 2023 ສູນກາງສະຫະພັນກຳມະບານລາວໄດ້ຈັດພິທີເປີດຊຸດຝຶກອົບຮົມທິດສະດີການເມືອງ-ການປົກຄອງໄລຍະສັ້ນ 45 ວັນຊຸດທີ II ໃຫ້ສະມາຊິກພັກ, ພະນັກງານພາຍໃນສູນກາງສະຫະພັນກຳມະບານລາວ, ພາຍໃຕ້ການເປັນປະທານ ຂອງທ່ານ ປທ ນາງ ອາລິຍາວັນ ອັກຄະວົງ ຮອງເລຂາຄະນະພັກ, ຮອງປະທານຄະນະບໍລິຫານງານສູນກາງສະຫະພັນກຳມະບານລາວ, ໃຫ້ກຽດເປັນປະທານຮ່ວມຂອງ ທ່ານ ປອ ດາວສະຫວັນ ເຄືອມີໄຊ ຄະນະບໍລິຫານງານພັກ, ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ມີຄະນະພັກ, ການນໍາແຕ່ລະຂັ້ນ ແລະພາກສ່ວນທີ່ກ່ຽວຂ້ອງເຂົ້າຮ່ວມ.
ໃນພິທີ ທ່ານ ອຸດອນ ພົງສະຫວັດ ຮອງຫົວໜ້າກົມຈັດຕັ້ງ-ພະນັກງານໄດ້ຜ່ານແຜນການເຄື່່ອນໄຫວການການຮຽນ-ການສອນ ລະບົບ 45 ວັນ, ຊຶ່ງຜູ້ເຂົົ້າຮ່ວມຝຶກອົບຮົມຊຸດນີ້ແມ່ນມາຈາກສູນກາງສະຫະພັນກຳມະບານລາວ ຈຳນວນ 38 ທ່ານ, ຍິງ 18 ທ່ານ ທີ່ຈະໄດ້ຮຽນຮູ້ທິດສະດີມາກ-ເລນິນ ແລະແນວຄິດໄກສອນ ພົມວິຫານ ເພື່ອໃຫ້ເປັນພື້ນຖານໃນການນຳໄປສົມທຽບທິດສະດີ ແລະພຶດຕິກຳໃຫ້ຖືກຕ້ອງ ນຳໄປໝູນໃຊ້ເຂົ້າໃນຊີວິດຕົວຈິງ ພ້ອມທັງໝູນໃຊ້ເຂົ້າໃນໜ້າທີ່ວຽກງານ ຂອງຕົນໃຫ້ໄດ້ຮັບຜົນດີກວ່າເກົ່າ. ເພື່ອເຫັນໄດ້ຄວາມສຳຄັນໃນການພັດທະນາຊັບພະຍາກອນມະນຸດ ແລະບຸກທະລຸທາງດ້ານຈິນຕະນາການອັນໃໝ່, ສ້າງແນວຄວາມຄິດໃຫ້ເປັນລະບົບ, ມີຄວາມເປັນເອກະພາບຕໍ່ແນວທາງນະໂຍບາຍຂອງພັກ, ເສີມຂະຫຍາຍຄວາມສາມັກຄີທັງພາຍໃນ ແລະພາຍນອກ, ເຮັດວຽກມີແບບແຜນ, ມີຫຼັກການ ແລະເບິ່ງບັນຫາແບບສັດຈະວິພາກ, ພ້ອມກັນຈັດຕັ້ງປະຕິບັດໜ້າທີ່ການເມືອງຂອງພັກໃຫ້ບັນລຸຜົນເປັນຈິງ ແລະກ້າວສູ່ຈຸດໝາຍສັງຄົມນິຍົມ.
ຂ່າວ: ຕາອັອດ ແສນທະວີສຸກ
ຮູບພາບ: ສູນກາງກຳມະບານລາວ
ບັນນາທິການ: ຄອນສະຫວັນ ແສນຍານຸພາບ