ນັບແຕ່ວັນທີ 4 ພະຈິກ 2020 ໂດຍນໍາໃຊ້ໂຄງການຫຼັກສູດການຮຽນ-ການສອນ ທີ່ສະຖາບັນການເມືອງ ແລະການປົກຄອງແຫ່ງຊາດ ໄດ້ກໍານົດໄວ້ເປັນໄລຍະເວລາ 2 ປີ. ມາຮອດວັນທີ 20 ມັງກອນ 2023 ແມ່ນໄດ້ສຳເລັດການປ້ອງກັນບົດຈົບຊັ້ນ. ດັ່ງນັ້ນ, ທາງໂຮງຮຽນການເມືອງ ແລະ ການປົກຄອງແຂວງສະຫວັນນະເຂດ ໄດ້ມີພິທີປິດຊຸດຮຽນຊັ້ນອະນຸປະລິນຍາຮຸ່ນທີ XV ແລະມອບປະກາສະນີຍະບັດ ຂຶ້ນໃນວັນທີ 25 ມັງກອນ 2023 ໃຫ້ແກ່ນັກສຶກສາລະບົບຊັ້ນອະປະລິນຍາຮຸ່ນທີ XV ຢູ່ ໂຮງຮຽນການເມືອງ ແລະ ການປົກຄອງແຂວງສະຫວັນນະເຂດ, ໂດຍການເປັນປະທານຂອງ ທ່ານ ປທ ນ. ບຸນມີ ຈຸນລະຈັກ ຮອງເລຂາຄະນະບໍລິຫານງານພັກ, ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ຜູ້ເຂົ້າຮ່ວມມີ ທ່ານ ພູເຂົາ ສີຫາວົງ ເລຂາຄະນະພັກຮາກຖານ, ຫົວໜ້າ ໂຮງຮຽນການເມືອງ ແລະການປົກຄອງແຂວງສະຫວັນນະເຂດ, ມີຄະນະປະຈຳພັກແຂວງ, ຫົວໜ້າຈັດຕັ້ງແຂວງ ແລະເຈົ້ານະຄອນໄກສອນ ພົມວິຫານ.
ນັກສຶກສາລະບົບຊັ້ນອະປະລິນຍາຮຸ່ນທີ XV ຈຳນວນ 68 ທ່ານ, ຍິງ 19 ທ່ານ ທີ່ມາຈາກ 3 ແຂວງດັ່ງນີ້: ມາຈາກແຂວງຄໍາມ່ວນ 10 ທ່ານ, ຍິງ 01 ທ່ານ, ມາຈາກແຂວງສາລະວັນ 10 ທ່ານ, ຍິງ 03 ທ່ານ, ມາຈາກ ແຂວງສະຫວັນນະເຂດຈຳນວນ 48 ທ່ານ, ຍິງ 15 ທ່ານ, ມາຈາກຂົງເຂດປ້ອງກັນຊາດ ປ້ອງກັນຄວາມສະຫງົບມີ 9 ທ່ານ, ຍິງ 1 ທ່ານ, ນອກນັ້ນ, ມາຈາກບັນດາ 14 ຕົວເມືອງ, 1 ນະຄອນໄກສອນພົມວິຫານ ຈຳນວນໜຶ່ງ ແລະພະແນກການອ້ອມຂ້າງຂອງແຂວງ ເຊິ່ງໄດ້ເປັນການປະກອບສ່ວນອັນສຳຄັນເຂົ້າໃນການກໍ່ສ້າງຖັນແຖວພະນັກງານນຳພາ, ຄຸ້ມຄອງ, ພະນັກງານຫຼັກແຫຼ່ງໃຫ້ແກ່ 3 ແຂວງຄື: ແຂວງສະຫວັນນະເຂດ, ແຂວງຄຳມ່ວນ ແລະແຂວງສາລະວັນ ແນໃສ່ຕອບສະໜອງໃຫ້ແກ່ການນໍາພາ-ຊີ້ນຳ, ຈັດຕັ້ງປະຕິບັດແນວທາງນະໂຍບາຍຂອງພັກ ແລະລະບຽບກົດໝາຍຂອງລັດໃນແຕ່ລະໄລຍະໃຫ້ປະກົດຜົນເປັນຈິງ.
ໃນພິທີ ທ່ານພູເຂົາ ສີຫາວົງ ໄດ້ຜ່ານບົດສະຫຼຸບລາຍງານ ໃນຊຸດຮຽນລະບົບຊັ້ນອະນຸປະລິນຍາ ຮຸ່ນທີ XIV ຊຶ່ງໄດ້ຜ່ານການຄົ້ນຄວ້າຮໍ່າຮຽນມີວິຊາ ທັງໝົດ 32 ວິຊາ ແລະມີການປ້ອງກັນບົດຈົບຊັ້ນ, ວິຊາຮຽນທັງໝົດມີ ຢູ່ 80 ໜ່ວຍກິດ, ຂຶ້ນຫ້ອງມີ 58 ໜ່ວຍກິດ, ສຳມະນາ ແລະສອບເສັງມີ 31 ໜ່ວຍກິດ ແລະໄປທັດສະນະ, ລົງເຮັດຕົວຈິງ 18 ໜ່ວຍກິດ, ລວມທັງ. ໝົດໃນຫຼັກສູດມີ 1.712 ຊົ່ວໂມງ, ມີການສອບເສັງລະດັບ ສມປຊ ມີ 6 ວິຊາ ໃນນີ້ສອບເສັງລະດັບໂຮງຮຽນ 32 ວິ ຊາໂດຍມີ: ເສັງປະລາໄນ 10 ວິຊາ, ເສັງເປີດ 19 ວິຊາ, ເສັງປິດ 3ວິຊາ; ໂດຍປະຕິບັດຕາມໂຄງການຫຼັກສູດການຮຽນການສອນ ແລະແບ່ງຕາມໝວດກຸ່ມວິຊາມີດັ່ງນີ້: ໝວດວິຊາຄວາມຮູ້ທົ່ວໄປ ມີ 528 ຊົ່ວໂມງ, ໝວດວິຊາເຕັກນິກທົ່ວໄປ ມີ 208 ຊົ່ວໂມງ, ໝວດວິຊາສະເພາະ ມີ 944 ຊົ່ວໂມງ, ໝວດວິຊາເລືອກມີ 32 ຊົ່ວໂມງ, ຈັດປະເພດຄົ້ນຄວ້າຮໍ່າຮຽນ ຂອງນັກສຶກສາ ໃນຈໍານວນ 68 ທ່ານ, ຍິງ 19 ທ່ານ, ຮຽນໄດ້ປະເພດດີເລີດ (Grade A) ຊຶ່ງມີຄ່າຄະແນນແຕ່ 3,9 ຫາ 4, ມີ 31 ທ່ານ, ຍິງ 09 ທ່ານ ເທົ່າກັບ 45,59% ແລະຮຽນໄດ້ປະເພດດີຫຼາຍ (Grade B+) ຊຶ່ງມີຄ່າຄະແນນແຕ່ 3,5 ຫາ 3,8 ມີ 37 ທ່ານ, ຍິງ 10 ທ່ານ ເທົ່າກັບ 44,41%.
ເພື່ອເປັນການຢັັ້ງຢືນຜົນສຳເລັດໃນການສຶກສາຮ່ຳຮຽນທິດສະດີ 2 ປີ ຈຶ່ງໄດ້ມອບໃບປະກາສະນີ ຍະບັດ ໃຫ້ເແດ່ຜູ້ສຳເລັດຊຶ່ງໃຫ້ກຽດມອບໂດຍ: ທ່ານ ປທ ນ. ບຸນມີ ຈຸນລະຈັກ ຮອງເລຂາຄະນະບໍລິຫານງານພັກ, ຮອງຫົວໜ້າ ສະຖາບັນການເມືອງ ແລະ ການປົກຄອງແຫ່ງຊາດ ພ້ອມທັງໂອ້ລົມຕໍ່ກັບນັກສຶກສາທີ່ສຳເລັດຮຽນທິດສະດີເພື່ອເປັນທິດໃນການເຄື່ອນໄຫວວຽກງານຕໍ່ໜ້າວ່າ:
1). ພວກເຮົາກຳລັງຕັ້ງໜ້າຈັດຕັ້ງປະຕິບັດເກືອບຈະຮອດເຄິ່ງສະໄໝ ເນື້ອໃນຈິດໃຈມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ 9, 2 ວາລະແຫ່ງຊາດ, ມະຕິກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງສະຫວັນນະເຂດ, ແຂວງຄຳມ່ວນ, ແຂວງສາລະວັນເຂົ້າສູ່ວຽກງານຕົວຈິງ. ສະນັ້ນ, ຄວາມຮູ້, ຄວາມເຂົ້າໃຈທີ່ພວກເຮົາສະສົມຈາກພຶດຕິກຳຕົວຈິ່ງ ກໍຄືຄວາມຮູ້ທີ່ໄດ້ຮັບຈາກຄູ-ອາຈານ ຂໍໃຫ້ບັນດາສະຫາຍນຳໄປຄົ້ນ ຄວ້າຢ່າງເລິກເຊິ່ງ, ໝູນໃຊ້ເຂົ້າສູ່ພຶດຕິກຳຕົວຈິງໃຫ້ເກີດປະໂຫຍດສູງສຸດໃຫ້ແກ່ກົມກອງ, ຂະແໜງການ, ການຈັດຕັ້ງແລະປະເທດຊາດ. ສຳລັບ 2 ວາລະແຫ່ງຊາດຮຽກຮ້ອງໃຫ້ພວກເຮົາຕ້ອງຮ່ວມແຮງຮ່ວມໃຈ ການຈັດຕັ້ງປປະຕິບັດໃຫ້ສຳເລັດຢ່າງເປັນຮູບປະທຳ. ດັ່ງນັ້ນ, ມັນຮຽກຮ້ອງໃຫ້ພວກເຮົາຕ້ອງກ້າຄິດ, ກ້າຮັບຜິດຊອບ, ສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະຮອບດ້ານໃນຂົງເຂດວຽກງານທີ່ຕົນຮັບຜິດຊອບ. ຢາກບັນລຸໄດ້ຄືແນວນັ້ນມັນຮຽກຮ້ອງໃຫ້ບັນດາສະຫາຍຕ້ອງກຳແໜ້ນວິທີວິທະຍາ ແລະວິທະຍາສາດຂອງລັດທິ ມາກ-ເລນິນ ແລະແນວຄິດ ໄກສອນ ພົມວິຫານ ທີ່ໄດ້ຮຽນມາ, ກຳແໜ້ນສະພາບຄວາມເປັນຈິງ, ປຶກສາຫາລືກັບໝູ່ຄະນະກ່ຽວກັບວິທີການ, ຮູບການນຳໃຊ້ບົດຮຽນເຂົ້າສູ່ວຽກງານຕົວຈິງຢ່າງປະດິດສ້າງແລະສອດຄ່ອງກັບສະພາບຄວາມເປັນຈິງ ແລະສອດຄ່ອງກັບແນວທາງນະໂຍບາຍຂອງພັກ-ລັດ. ກໍ່ໃຫ້ເກີດມີການຫັນປ່ຽນໃນໜ້າທີ່ວຽກງານກໍຄືຂະບວນການຕ່າງໆ, ຫຼີກລ່ຽງແນວຄິດຫວນຄືນສູ່ສະພາບເດີມຄືຕອນບໍ່ທັນໄດ້ມາຮຽນ ພວກເຮົາຕ້ອງຍຶດໝັ້ນທິດນຳເນື້ອໃນຈິດໃຈຂອງມະຕິກອງປະຊຸມໃຫຍ່ຄັ້ງທີ XI ຂອງພັກ ແມ່ນເນັ້ນໃສ່ການຫັນປ່ຽນຢ່າງແຂງແຮງ, ເລິກເຊິ່ງ ແລະຮອບດ້ານ ເຮົາຕ້ອງສະແດງໃຫ້ໝູ່ຄະນະໄດ້ເຫັນການປ່ຽນແປງຂອງເຮົາສົມກັບວ່າໄດ້ຮຽນທິດສະດີການເມືອງ-ການປົກຄອງເປັນເວລາ 2 ປີຕ້ອງມີການປ່ຽນແປງໃນທາງທີ່ດີຂຶ້ນອີຫຼີ.
2). ບັນດາສະຫາຍຈົ່ງສືບຕໍ່ເຝິກຝົນຫຼໍ່ຫຼອມຕົນເອງທາງດ້ານຄວາມຮູ້ຄວາມສາມາດ, ຄຸນສົມບັດ ແລະແບບແຜນວິທີເຮັດວຽກເພື່ອກຽມພ້ອມເປັນພະນັກງານນຳພາຫຼັກແຫຼ່ງທີ່ໜັກແໜ້ນ ແລະຄົບຖ້ວນສົມບູນທາງດ້ານມາດຕະຖານ ແລະເງື່ອນໄຂຕ່າງໆ ຕາມທີ່ພັກ-ລັດຕ້ອງການ.
3). ອີກຢ່າງໜຶ່ງ, ບັນດາສະຫາຍແມ່ນຜະລິດຕະພັນຊຸດໜຶ່ງທີ່ມີຄຸນນະພາບຂອງໂຮງຮຽນແຫ່ງນີ້, ຂ້າພະເຈົ້າເຊື່ອໝັ້ນຢ່າງໜັກແໜ້ນວ່າ:ບັນດາ ສະຫາຍນັກສຶກສາທີ່ຈົບອອກໄປໃນເທື່ອນີ້ ຈະຮັກສາຊື່ສຽງກຽດສັກສີຂອງຕົນກໍຄືຂອງໂຮງ ຮຽນ;ການເຄື່ອນໄຫວ, ການປະພຶດທຸກຢ່າງຕ້ອງໄດ້ຮັບຄວາມໄວ້ເນື້ອເຊື່ອໃຈຈາກການຈັດຕັ້ງພັກ-ລັດ, ຈາກປະຊາຊົນຊຶ່ງໄດ້ຝາກຄວາມຫວັງໄວ້ນຳບັນດາສະຫາຍໝົດທຸກສະຫາຍ, ເພາະສະນັ້ນ, ບໍ່ວ່າຈະຢູ່ແຫ່ງຫົນໃດ, ໃນໜ້າທີ່ວຽກງານອັນໃດຈະຕ້ອງໄດ້ຄົ້ນຄິດ, ການປະພຶດ ແລະກະທຳອັນໃດກໍຕ້ອງຄຳນຶງ ແລະຍຶດໝັ້ນໃນທາດແທ້ຂອງຊົນຊັ້ນກຳມະກອນຂອງພັກຢ່າງສະເໝີຕົ້ນສະເໝີປາຍ; ເຄົາລົບ ແລະປະຕິບັດກົດໝາຍ ແລະລະບຽບການຕ່າງໆ ຂອງລັດຢ່າງເປັນເຈົ້າການ.
ຂ່າວ: ຕາອັອດ ແສນທະວີສຸກ
ພາບ: ໂຮງຮຽນການເມືອງ ແລະ ການປົກຄອງແຂວງສະຫວັນນະເຂດ
ບັນນາທິການ: ປທ ບຸນປັນ ສຸມຸນທອງ