ເພື່ອເປັນການຈັດຕັ້ງປະຕິບັດ ແລະຜັນຂະຫຍາຍແຜນດຳເນີນງານຂອງຄະນະໜ່ວຍພັກ ປທ ຮຸ່ນ XVIII ຫ້ອງ ກ ແລະ ຫ້ອງ ຂ ໃຫ້ໄດ້ຮັບຄຸນນະພາບ ແລະສອດຄ່ອງກັບຫຼັກສູດການຮຽນ-ການສອນ ຂອງ ສມປຊ ວາງອອກຢ່າງເຂັ້ມງວດ ເພື່ອຕອບສະໜອງຄວາມຮຽກຕ້ອງການ ໃນເງື່ອນໄຂໃໝ່, ສາມາດເພີ່ມທະວີການນຳພາ-ຊີ້ນໍາ, ການຈັດຕັ້ງປະຕິບັດແນວທາງນະໂຍບາຍຕ່າງໆ ໃຫ້ປະສົບຜົນສຳເລັດຕາມລະດັບຄາດທີ່ວາງໄວ້ ແລະສ້າງໃຫ້ໄດ້ພື້ນຖານການເມືອງອັນໜັກແໜ້ນ. ສະນັ້ນ, ໜ່ວຍພັກນັກຄົ້ນຄວ້າ ປທ XVIII ຫ້ອງ ກ ແລະຫ້ອງ ຂ ໄດ້ດຳເນີນກອງປະຊຸມ ສະຫຼຸບຕີລາຄາຄືນການຈັດຕັ້ງເຄື່ອນໄຫວວຽກງານໃນ 3 ເດືອນຜ່ານທີ່ມາຂຶ້ນໃນວັນທີ 25 ມັງກອນ 2023 (ຕອນເຊົ້າ ຫ້ອງ ກ ແລະ ຕອນແລງ ຫ້ອງ ຂ) ໃຫ້ກຽດເປັນປະທານໂດຍ: ສະຫາຍ ຮສ ພູວົງ ອຸ່ນຄຳແສນ ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າ ສມປຊ, ມີຕາງໜ້າກົມຈັດຕັ້ງ-ພະນັກງານ, ຄູປະຈຳຫ້ອງ ແລະຕາງໜ້າໜ່ວຍພັກຮາກຖານ ນັກສຶກສາເຂົ້າຮ່ວມ.
ໃນພິທີເລຂາໜ່ວຍພັກຮາກຖານ ສະຫາຍ ສີພັນ ພົມມະນີ ຫ້ອງ ກ ແລະສະຫາຍ ສາຍສະໝອນ ນັນທະລັງ ສີ ຫ້ອງ ຂ ທັງສອງສະຫາຍໄດ້ຂຶ້ນກ່າວເປີດກອງປະຊຸມຄັ້ງນີ້ຢ່າງເປັນທາງການ ແລະຜ່ານຮ່າງບົດສະຫຼຸບການເຄື່ອນໄຫວນຳພາ-ຊີ້ນຳໃນໄລຍະ 3 ເດືອນທີ່ຜ່ານມາ ແລະທິດທາງແຜນການປີ 2023 ຊຶ່ງເນື້ອໃນ ສະຫາຍໄດ້ຍົກໃຫ້ເຫັນ ສະ ພາບການຮຽນ-ການສອນ ໃນໄລຍະຜ່ານມາແມ່ນໄດ້ຜ່ານຜ່າຄວາມຫຍຸ່ງຍາກນາໆ ປະການເປັນຕົ້ນແມ່ນສະພາບການຮຽນ-ການສອນ, ສະພາບເສດຖະກິດໃນປັດຈຸບັນທີ່ພົບກັບຄ່າຄອງຊີບສູງ ແຕ່ສະມາຊິກພັກທຸກສະຫາຍກໍໄດ້ສຸມໃສ່ຍົກສູງຄວາມຮັບຜິດຊອບອົດທົນຜ່ານຜ່າ ແລະປະຍັດຄຽງຄູ່ກັບການນໍາພາ-ຊີ້ນໍາສະມາຊິກພັກທະວີສຶກສາອົບຮົບການເມືອງ-ນຳພາແນວຄິດ, ດ້ວຍການຈັດຕັ້ງເຊື່ອມຊຶມມະຕິ, ຄຳສັ່ງຂອງພັກ ທີ່ສະຖາບັນການເມືອງ ແລະ ການປົກຄອງຈັດຂື້ນໄປຄຽງຄູ່ກັບການກອງປະຊຸມສະຫຼຸບສ່ອງແສງປະຈຳ 3 ເດືອນ ແລະປະຈຳປີຂອງໜ່ວຍພັກ ໃຫ້ເລິກເຊິ່ງເຖິງຖອງ, ເພີ່ມທະວີຄວາມສາມັກຄີພາຍໃນພັກ, ສະມາຊິກພັກຢ່າງໜັກແໜ້ນ, ຕັ້ງໜ້າປະຕິບັດການປັບປຸງ, ກໍ່ສ້າງພັກຕາມ 5 ຫຼັັກການ 3 ທິດນຳຂອງພັກຢ່າງເຂັ້ມງວດ ແລະເລິກເຊິ່ງ, ເອົາໃຈໃສ່ການຕິດຕາມ, ກວດກາພັກ ແລະປະເມີນຜົນເປັນວຽກປົກກະຕິຂອງໜ່ວຍພັກ, ຈຸພັກ ແລະເຮັດວຽກງານປ້ອງກັນພາຍໃນພັກ. ສັງລວມແລ້ວຄະນະພັກທັງສອງຫ້ອງທ່ີ່ຜ່ານມາໄດ້ຂໍທິດຊີ້ ນໍາຈາກຄະນະພັກຂັ້ນເທີງເປັນປົກກະຕິ, ຕໍ່ເນື່ອງ ແລະສາມາດແກ້ໄຂບັນຫາຕ່າງໆ ຢ່າງທັນການ, ເຕົ້າໂຮມຄວາມສາມັກຄີທົ່ວສະມາຊີພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ, ເອົາໃຈໃສ່ນໍາພາ-ຊີ້ນໍາ, ຕິດຕາມ, ກວດກາອົງການຈັດຕັ້ງມະຫາຊົນ ແລະໜ່ວຍງານທີ່ກ່ຽວຂ້ອງ, ເພີ່ມທະວີຄວາມເປັນເຈົ້າການຂອງແຕ່ລະຈຸພັກ ໃນການປະສານສົມທົບກັບຄູ-ອາ ຈານ ແລະພາກສ່ວນຕ່າງໆ ທີ່ກ່ຽວຂ້ອງໃນການຈັດຕັ້ງປະຕິບັດໜ້າທີ່ວຽກງານຢ່າງເປັນປະຈຳ.
ນອກນັ້ນ, ເພື່ອເປັນການສຳຫຼວດຄືນ ຕໍ່ຄະນະໜ່ວຍພັກຊຸດເກົ່າ ພ້ອມທັງໄດ້ຜ່ານບົດສຳຫຼວດການນຳພາ-ຊີ້ນໍາລວມຂອງຄະນະໜ່ວຍພັກທີ່ຜ່ານມາ, ໂດຍໄດ້ຕີລາຄາສູງຕໍ່ຄວາມພະຍາຍາມໃນການນຳພາ-ຊີ້ນໍາ ຂອງຄະນະໜ່ວຍພັກຊຸດທີ່ຜ່ານມາ, ເຊິ່ງການນຳພາ-ຊີ້ນໍາຂອງໜ່ວຍພັກໃນໄລຍະ 3 ເດືອນຜ່ານມາເຖິງແມ່ນວ່າຈະເປັນໄລຍະສັ້ນໆ ກໍ່ຕາມແຕ່ກໍ່ໄດ້ເຮັດສຳເລັດວຽກງານໄດ້ຫຼາຍດ້ານຊຶ່ງຜົນງານດັ່ງກ່າວເປັນໄດ້ໜໍ່ແໜງອັນດີ ແລະເປັນການເອກອ້າງໃຫ້ເຫັນເຖິງຜົນສຳເລັດອັນຕັ້ງໜ້າໃນເບື້ອງຕົ້ນຂອງໜ່ວຍພັກ, ຕາມທິດທາງຄາດໝາຍທີ່ໄດ້ກຳນົດໄວ້ ໃນມະຕິກອງປະຊຸມຂອງອົງ ຄະນະພັກ ສມປຊ ຜ່ານມາ.
ຫຼັງຈາກນັ້ນ, ທີ່ປະຊຸມໄດ້ພ້ອມກັນໃຊ້ສິດ ປະຊາທິປະໄຕ ຂອງຕົນປ່ອນບັດເລືອກຕັ້ງເອົາຄະນະໜ່ວຍຊຸດໃໝ່ບົນພື້ນຖານຫຼັກການລວມສູນປະຊາທິປະໄຕ, ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ໄດ້ກຳນົດໄວ້ຊື່ງມີຜູ້ອອກຮັບສະໝັກເລືອກຕັ້ງຈຳນວນ 07 ສະຫາຍ, ຍິງ 02 ສະຫາຍ; ຊຶ່ງຜ່ານການປ່ອນບັດໄດ້ເລືອກເອົາ 05 ສະຫາຍ, ຍິງ 1 ສະຫາຍ ແລະຜົນກອງປະຊຸມປະຖົມມະລືກໄດ້ຕົກລົງເປັນເອກະພາບກັນເລືອກເອົາດັ່ງນີ້:
– ນັກສຶກສາ ປະລິນຍາໂທ ຮຸ່ນທີ XVIII ຫ້ອງ ກ
- ສະຫາຍ ນ. ບົວຄົມ ຂານສຸວົງ ເປັນເລຂາໜ່ວຍພັກ
- ສະຫາຍ ໄຊສະຫວາດ ສຸດທິວົງ ເປັນຮອງເລຂາໜ່ວຍພັກ
- ສະຫາຍ ບຸນທະວີ ບັນດາສັກ ເປັນກໍາມະການ, ເປັນຜູ້ກວດກາໜ່ວຍພັກຮາກຖານ
- ສະຫາຍ ຄໍາຜອງ ພົມມະສອນ ເປັນຄະນະຫ້ອງ.
- ສະຫາຍ ໄວຄູນ ບັນດາສັກ ເປັນຄະນະຫ້ອງ
– ນັກສຶກສາ ປະລິນຍາໂທ ຮຸ່ນທີ XVIII ຫ້ອງ ຂ
- ສະຫາຍ ບຸນຖອງ ລາດສະວົງສຸກ ເປັນເລຂາໜ່ວຍພັກ
- ສະຫາຍ ຈິນດາ ກະທາທອງ ເປັນຮອງເລຂາໜ່ວຍພັກ
- ສະຫາຍ ຄໍາຫຼ້າ ວັນນາຮັກ ເປັນກໍາມະການ, ເປັນຜູ້ກວດກາໜ່ວຍພັກຮາກຖານ
- ສະຫາຍ ນາງ ກົງແກ້ວ ອິນທະວົງ ເປັນຄະນະຫ້ອງ.
- ສະຫາຍ ນາງ ປາໃນ ວຽງວິໄລ ເປັນຄະນະຫ້ອງ.
ກອງປະຊຸມໄດ້ຮັບກຽດຟັງການໂອ້ລົມ ຈາກສະຫາຍ ຮສ ພູວົງ ອຸ່ນຄຳແສນ ຊຶ່ງທ່ານໄດ້ຍ້ອງຍໍຊົມເຊີຍຕໍ່ຜົນງານຂອງຄະນະໜ່ວຍພັກຊຸດເກົ່າ ກໍ່ຄືສະມາຊິກພັກທຸກສະຫາຍ ຍາດມາໄດ້ໃນໄລຍະ 3 ເດືອນທີ່ຜ່ານມາ, ພ້ອມກັນນັ້ນສະຫາຍຍັງໄດ້ໃຫ້ທິດຊີ້ນຳເພື່ອສືບຕໍ່ເສີມຂະຫຍາຍດ້ານດີທີ່ຕັ້ງໜ້າ ແລະປັບປຸງແກ້ໄຂດ້ານອ່ອນ-ຂໍ້ຄົງຄ້າງ ແຕ່ລະດ້ານໃຫ້ຕົກໄປ ແລະຮຽກຮ້ອງໃຫ້ຄະນະພັກຊຸດໃໝ່ສືບຕໍ່ນຳພາ-ຊີ້ນຳ ຈັດຕັ້ງຜັນຂະຫຍາຍ ແລະປະຕິບັດມະຕິກອງປະຊຸມໃຫຍ່ຄັ້ງນີ້ໃຫ້ສຳເລັດຜົນ, ໃຫ້ສອດຄ່ອງຕາມມະຕິກອງປະຊຸມໃຫຍ່ຄັ້ງທີ XI ຂອງພັກປະຊາຊົນປະຕິວັດລາວ ກໍ່ຄືແຜນຍຸດທະສາດການສຶກສາຂອງ ສມປຊ ເວົ້າລວມ, ເວົ້າສະເພາະແມ່ນວຽກງານການສຶກສາ ຂອງນັກຄົ້ນຄວ້າປະລິນຍາໂທ ຮຸ່ນທີ XVIII ຫ້ອງ ກ ແລະຫ້ອງ ຂ ໃຫ້ມີຜົນສຳເລັດຕາມແຜນການທີ່ໄດ້ກຳນົດ.
ຂ່າວ/ພາບ: ຕາອັອດ ແສນທະວີສຸກ
ບັນນາທິການ: ປທ ບຸນປັນ ສຸມຸນທອງ