ວັນທີ 2 ທັນວາ 1975 ແມ່ນວັນທີ່ມີຄວາມໝາຍສໍາຄັນ ສໍາລັບທົ່ວພັກ, ທົ່ວລັດ ແລະ ທົ່ວປວງຊົນລາວ ແມ່ນວັນແຫ່ງໄຊຊະນະອັນຍິ່ງໃຫຍ່ໃນປະຫວັດສາດແຫ່ງການຕໍ່ສູ້ເປັນພັນໆປີຂອງຊາດລາວເຮົາ; ແມ່ນວັນທີ່ປະຊາຊົນລາວບັນດາເຜົ່າໄດ້ມີອິດສະຫຼະພາບ ແລະ ໄດ້ເປັນເຈົ້າຂອງປະເທດຊາດຢ່າງແທ້ຈິງແມ່ນວັນທີ່ປະເທດລາວໄດ້ມີເອກະລາດຢ່າງສົມບູນ ແລະ ມີອະທິປະໄຕຢ່າງຄົບຖ້ວນ, ມີທີ່ຕັ້ງອັນສົມກຽດ ແລະ ມີຖານະເທົ່າທຽມກັບປະເທດອື່ນໆ ໃນເວທີປະຊາຄົມໂລກ.
ວັນທີ 2 ທັນວາ ແມ່ນວັນແຫ່ງສັນຕິພາບ, ວັນແຫ່ງການກ້າວສູ່ຍຸກສະໄໝໃໝ່ແຫ່ງການສ້າງປະເທດລາວ ສັນຕິພາບ, ເອກະລາດ, ປະຊາທິປະໄຕ, ເອກະພາບ, ວັດທະນະຖາວອນ. ປະທານ ໄກສອນ ພົມວິຫານ ໄດ້ຕີລາຄາວັນທີ 2 ທັນວາ ປີ 1975 ວ່າ: ” ບໍ່ທັນມີເວລາໃດທີ່ປະຊາຊົນເຮົາ ເຊິ່ງເປັນຜູ້ ສ້າງປະຫວັດສາດຂອງຊາດນັ້ນ ໄດ້ຍາດເອົາໄຊຊະນະສົມບູນ, ເຖິງຖອງ ແລະ ບໍລິບູນໄດ້ຢ່າງສະຫງ່າລາສີໄດ້ຄືແນວນີ້ຈັກເທື່ອ, ໄຊຊະນະນັ້ນ ບໍ່ສະເພາະແຕ່ໄດ້ຟື້ນຟູຄວາມເປັນເອກະລາດ ຂອງປະເທດເຮົາ, ຫາກຍັງເປັນຄັ້ງທໍາອິດທີ່ປະຊາຊົນບັນດາເຜົ່າ ຜູ້ເຄີຍດຳລົງຊີວິດເປັນທາດ ໄດ້ກາຍມາເປັນເຈົ້າຂອງແທ້ຈິງຂອງຊາດໜຶ່ງ ທີ່ມີເອກະລາດ, ມີອິດສະຫຼະພາບຢ່າງສົມບູນ ແລະ ພວມກ້າວຂຶ້ນສູ່ສັງຄົມນິຍົມ, ເຮັດໃຫ້ຄວາມມຸ່ງຫວັງອັນແຮງກ້າຂອງປວງຊົນລາວ ກໍຄືຂອງມວນມະນຸດປະກົດເປັນຈິງຢູ່ຜືນແຜ່ນດິນອັນແສນຮັກ ຂອງພວກເຮົາ.
ດັ່ງນັ້ນ, ສະຖາບັນການເມືອງ ແລະ ການປົກຄອງແຫ່ງຊາດ ຈຶ່ງໄດ້ຖືໂອກາດວັນສຳຄັນດັ່ງກ່າວໃນການຈັດ ຕັ້ງປາຖະກະຖາ ວັນຊາດທີ 2 ທັນວາ ຄົບຮອບ 47 ປີ ( 2 ທັນວາ 1975-2 ທັນວາ 2022) ທີ່ໄດ້ໝູນວຽນມາ ຄົບຮອບອີກຄັ້ງ ແລະສະຫຼຸບຜົນງານປະຈຳປີ 2022 ຂອງ ສມປຊ ໃນວັນທີ 1 ທັນວາ 2022 ທີ່ສະໂມສອນ ສມປຊ ໂດຍການເປັນປະທານ ຂອງທ່ານ ຮສ ພູວົງ ອຸ່ນຄຳແສນ ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າ ສມປຊ ພ້ອມດ້ວຍຄະນະອຳນວຍການ, ມີຕາງໜ້າ ຫ້ອງການ, ກົມ, ຄະນະຕ່າງໆ, ສູນຕ່າງໆ ແລະຕາງໜ້າຄະນະພັກ, ຄະນະຫ້ອງ ນັກສຶກສາທີ່ກຳລັງສຶກສາ.
ໃນພິທີ ທ່ານ ປທ ຄົມວິກິດ ສິມມະລິວົງ ຮັກສາການຫົວໜ້າຫ້ອງ ໄດ້ຜ່ານບົດສະຫຼຸບຜົນງານປະຈຳປີ 2022 ຂອງ ສມປຊ ຊື່ງເນຶື້ອໃນໄດ້ສ່ອງແສງໃຫ້ເຫັນ ໃນປີ 2022 ສະຖາບັນໄດ້ເອົາໃຈໃສ່ໃນການສຶກສາອົບຮົມການເມືອງ-ແນວຄິດຂອງພະນັກງານ, ຄູ-ອາຈານ ແລະ ນັກສຶກສາຢ່າງເປັນປົກກະຕິ, ຕໍ່ເນື່ອງດ້ວຍຫຼາຍຮູບແບບ ໄດ້ຈັດຕັ້ງເຜີຍແຜ່ເຊື່ອມຊຶມ, ແນວທາງ, ແຜນນະໂຍບາຍຂອງພັກ, ລະບຽບການ, ກົດໝາຍ ແລະ ບັນດາເອກະສານທີ່ສຳຄັນຕ່າງໆ ຂອງພັກ-ລັດ 8 ຄັ້ງ, ມີຜູ້ເຂົ້າຮ່ວມທັງໝົດ 2.160 ເທື່ອຄົນ, ໄດ້ຈັດຕັ້ງກອງປະຊຸມສະຫຼຸບຖອດຖອດບົດຮຽນ ແລະ ສ່ອງແສງວຽກພັກ-ລັດ, ສ່ອງແສງນັກສຶກສາ ໃນແຕ່ລະເດືອນເພື່ອສຶກສາອົບຮົມ, ກໍາໄດ້ແນວຄິດພະນັກງານ-ຄູອາຈານ ແລະນັກສຶກສາ ເປັນປົກກະຕິ.
ສະຖາບັນໄດ້ຮັບທຶນ ໃນການກໍ່ສ້າງຍົກລະດັບວິຊາສະເພາະ ລະບົບປະລິນຍາໂທ ຢູ່ ສມປຊ ຈຳນວນ 8 ທຶນໃນນັ້ນໄດ້ແບ່ງໃຫ້ບັນດາໂຮງນການເມືອງ ແລະ ການປົກຄອງທ້ອງຖິ່ນ ຈຳນວນ 4 ທຶນ, ສະຖາບັນໄດ້ 4 ທຶນ. ໃນນັ້ນໄດ້ຈັດຝຶກອົບຮົມ ຈໍານວນ 9 ຄັ້ງ ມີຜູ້ເຂົ້າຮ່ວມ 300 ເທື່ອຄົນ ປະຕິບັດໄດ້ 100% ຕາມແຜນກຳນົດໄວ້, ຄົ້ນຄວ້າປະລິນຍາໂທ ແລະ ປະລິນຍາເອກ ຢູ່ຕ່າງປະເທດ ຈຳນວນ 11 ທ່ານ, ຍິງ 7 ທ່ານ (ສສ ຫວຽດນາມ ແລະ ສປ ຈີນ).
ການແຂ່ງຂັນຍ້ອງຍໍສາມາດຈັດຕັ້ງປະຕິບັດຕາມແຜນການທີ່ວາງໄວ້ໄດ້ຄື: ນັກສຶກສາທັງໝົດທີ່ຈົບໃນ ສົກປີ 2021-2022 ຈໍານວນ 243 ຄົນ ເຊັ່ນ: ນັກສຶກສາຮຽນເກັ່ງມີວິໄນດີປະເພດ I ຈໍານວນ 87 ຄົນ, ຍິງ 27 ຄົນ; ປະເພດ II ຈໍານວນ 75 ທ່ານ, ຍິງ 21 ຄົນ; ປະເພດ III ຈໍານວນ 57 ຄົນ, ຍິງ 12 ຄົນ; ຄະນະພັກຄະນະຫ້ອງໃນການນຳພາຊີ້ນໍາຫ້ອງ ຮຽນດີເດັ່ນ ປະເພດ I ມີ 4 ຫ້ອງຮຽນ ຈໍານວນ 20 ຄົນ, ຍິງ 5 ຄົນ, ຫ້ອງຮຽນດີເດັ່ນ ປະເພດ I ຈຳນວນ 3 ຫ້ອງຮຽນ, ປະເພດ II ຈໍານວນ 1 ຫ້ອງຮຽນ.
ຈາກການປະເມີນການປະຕິບັດງານ ປີ 2022 ຂອງພະນັກງານ, ຄູ-ອາຈານ ທົ່ວສະຖາບັນ ມີພະນັກງານດີເດັ່ນ,ປະເພດ I ມີ 83 ຄົນ ຍິງ 33 ຄົນ, ປະເພດ ll ມີ 36 ຄົນ, ຍິງ 18 ຄົນ, ປະເພດ lll ມີ 9 ຄົນ 6 ຍິງ. ຄູ-ອາຈານ ດີ ເດັ່ນປະເພດ I ມີ 38 ຄົນ ຍິງ 15 ຄົນ, ປະເພດ ll ມີ 3 ຄົນ, ຍິງ 1 ຄົນ; ກົມກອງດີເດັ່ນປະເພດ I ມີ 5 ກົມກອງ, ປະເພດ II ມີ 7 ກົມກອງ.
ການຈັດຕັ້ງການຮຽນ ຂອງນັກສຶກສາທຸກລະບົບຮຽນພາຍໃນ ສມປຊ ແມ່ນໄດ້ຈັດຕັ້ງການແບ່ງຫ້ອງຮຽນເປັນແຕ່ລະຊັ້ນຮຽນ, ຫ້ອງຮຽນ. ປະຈຸບັນນັກສຶກສາທີ່ກໍາລັງສືບຕໍ່ຄົ້ນຄວ້າ, ຮໍ່າຮຽນ ແລະ ຂຽນບົດປ້ອງກັນຈົບຊັ້ນ ພາຍໃນ ສມປຊ ໃນສົກປີ 2022-2023 ມີທັງໝົດ 476 ຄົນ, ຍິງ 131 ຄົນ.
ການຈັດຕັ້ງສິດສອນຂອງຄູ-ອາຈານ: ສົກຮຽນ 2021-2022 ພະນັກງານ-ຄູອາຈານ ສາມາດຈັດຕັ້ງປະຕິບັດຊົ່ວໂມງຂຶ້ນຫ້ອງສອນ, ສໍາມະນາ, ແກ້ຂໍ້ຂ້ອງໃຈ, ສອບເສັງ ແລະ ປ້ອງກັນບົດ ໄດ້ທັງໝົດ 19.766 ຊົ່ວໂມງ, ທຽບໃສ່ສົກປີຜ່ານມາເພີ່ມຂຶ້ນ 1.084 ຊົ່ວໂມງເທົ່າກັບ 5,48% (ສົກຮຽນຜ່ານມາປະຕິບັດໄດ້ 18.682 ຊົ່ວໂມງ).
ການຈັດຕັ້ງແຜນການຮຽນ-ການສອນໃນສົກປີ 2021-2022 ໄດ້ສໍາເລັດການຈັດຕັ້ງການຮຽນ-ການສອນຄື: ລະບົບຮຽນຊັ້ນປີສຸດທ້າຍສໍາເລັດການຮຽນ-ການສອນ 100%.
ໃຫ້ບໍລິການຂໍ້ມູນຂ່າວສານໃຫ້ແກ່ພະນັກງານ, ຄູ-ອາຈານ, ນັກສຶກສາ ພາຍໃນ ແລະ ພາຍນອກ ທັງໝົດ 6.554 ເທື່ອຄົນ, ຖ້າທຽບໃສ່ແຜນການປະຈຳປີແມ່ນຫຼຸດຄາດໝາຍ 41 % (ແຜນ 11.000 ເທື່ອຄົນ); ຮັບປື້ມເຂົ້າໃໝ່ 2.104 ຫົວ, ລົງທະບຽນປື້ມ, ຕິດສັນ, ຕິດບາໂຄດ ແລະ ຕິດຊອງໄດ້ 1.824 ຫົວ; ລົງທະບຽນປື້ມເຂົ້າໂປຣແກຣມ PMB 1819 ຫົວ; ວິເຄາະໝວດໝູ່ປື້ມ 116 ຫົວເລື່ອງຮັບວາລະສານເຂົ້າໃໝ່ 1.006 ຫົວ; ໄດ້ຮັບວາລະສານທັງໝົດ 478 ໃນນັ້ນ, ສົ່ງເປັນເອກະສານ 308 ບົດ ແລະ ສົ່ງມາທາງອີເມວ ຈຳນວນ 170 ບົດ; ສາມາດບັນນາວາລະສານຂັ້້ນຕົ້ນໄດ້ 448 ບົດ; ຜ່ານ ບ.ກ ໃຫ່ຍ ລົງໄດ້ 179 ບົດ; ສໍາເລັດການສ້າງວາລະສານບັນລຸໄດ້ 91.66%; ສໍາເລັດການແຈກຢາຍ ແລະ ຈຳໜ່າຍຕາມການສັັ່ງຈອງວາລະສານ ຈຳນວນ 15.587 ຫົວ; ບັນລຸໄດ້ 67.15%; ໃນນັ້ນໄດ້ແຈກຢາຍວາລະສານເກົ່າແຕ່ 2015-2021 ໃຫ້ພາກສ່ວນຕ່າງໆຈຳນວນ 4.221 ຫົວ ບັນລຸໄດ້ 84.42%; ພິເສດແມ່ນໄດ້ແຈກຢາຍ ແລະ ຈຳໜ່າຍວາລະສານສະບັບພິເສດ ປີ 2022 ໃຫ້ບັນດາພາກສ່ວນຕ່າງໆຕາມເປົ້າໝາຍ ຈຳນວນ 1440 ຫົວ.
ເພື່ອເປັນຢັ້ງຢືນເຖິງຜົນງານດີເດັ່ນ ຂອງບຸນຄົນ, ກົມກອງ ແລະຫ້ອງຮຽນ ທ່ານ ປອ ນ. ເກດມະນີ ອິນທະວົງ ຫົວໜ້າພະແນກ ພະນັກງານ, ກົມຈັດຕັ້ງ-ພະນັກງານຜ່າ ນຂໍ້ຕົກລົງວ່າດ້ວຍການຍ້ອງຍໍພະນັກງານດີເດັ່ນ, ກົມກອງດີເດັ່ນ ແລະ ຫ້ອງຮຽນດີເດັ່ນຄື:
– ຍ້ອງຍໍພະນັກງານ.
ປະເພດ I: 83 ທ່ານ, ຍິງ 33 ທ່ານ
ປະເພດ II: 36 ທ່ານ, ຍິງ 18 ທ່ານ
ປະເພດ III: 6 ທ່ານ, ຍິງ 4 ທ່ານ
– ກົມກອງດີເດັ່ນ:
ປະເພດ I: 5 ກົມກອງ
ປະເພດ II: 7 ກົມກອງ
– ຫ້ອງຮຽນດີເດັ່ນ:
ປະເພດ I:
– ນັກສຶກສາ ປະລິນຍາໂທ ຮຸ່ນທີ XVII ຫ້ອງ ກ
– ນັກສຶກສາ ປະລິນຍາໂທ ຮຸ່ນທີ XVII ຫ້ອງ ຂ
ໃນຕອນທ້າຍພິທີ ທ່ານ ຮສ ພູວົງ ອຸ່ນຄຳແສນ ໄດ້ຫວນຄືນມູນເຊື້ອຂອງວັນຊາດທີ 2 ທັນວາ ຄົບຮອບ 47 ປີ ( 2 ທັນວາ 1975-2 ທັນວາ 2022) ແລະວັນເກີດ ປະທານ ໄກສອນ ພົມວິຫານ ຄົບຮອບ 102 ປີ (13 ທັນວາ 1920-13 ທັນວາ 2022) ໃຫ້ຜູ້ເຂົ້າຮ່ວມໃນພິທີຮັບຮູ້ເຖິງມູນເຊື້ອອັນດີງາມຂອງການປະຕິວັດ ແລະທ່ານໄດ້ໂອ້ລົມ, ໃຫ້ທິດຊີ້ນຳ ພ້ອມທັງສະແດງຄວາມຍ້ອງຍໍຊົມເຊີຍຕໍ່ກັບພະນັກງານ, ຄູ-ອາຈານ, ທີ່ໄດ້ທຸ່ມເທແຮງສະຕິປັນຍາ ເຂົ້າໃນໜ້າທີ່ວຽກງານການເມືອງຂອງ ສມປຊ ຈຶ່ງເຮັດໃຫ້ຜົນງານອອກມາໄດ້ທັງປະລິມານ ແລະ ຄຸນນະພາບ, ແຕ່ເພື່ອເປັນການສືບຕໍ່ ແລະໃຫ້ທິດຊີ້ທາງວຽກງານໃນຕໍ່ໜ້າ ທ່ານ ປະທານພິທີ ໄດ້ໂອ້ລົມ ແລະ ເພີ່ມທະວີການຄົ້ນຄວ້າວິທະຍາສາດໃຫ້ມີຄຸນນະພາບສູງ, ສາມາດສະໜອງຂໍ້ມູນຮັບໃຊ້ໃຫ້ແກ່ລະບົບການຮຽນ-ການສອນ ແລະຄວາມຮຽກຮ້ອງຕ້ອງການໃນໄລຍະໃໝ່ຄຽງຄູ່ກັບການສ້າງ ແລະປັບປຸງບັນດາລະບົບພື້ນຖານໂຄງລ່າງ, ສະໜອງວັດຖຸອຸປະກອນທີ່ຈຳເປັນດ້ວຍການຂຸດຄົ້ນ ແລະນຳໃຊ້ທຶນທີ່ມີຢ່າງຈຳກັດ ເພື່ອອຳນວຍຄວາມສະດວກໃຫ້ແກ່ການປະຕິບັດໜ້າທີ່ການເມືອງ ຂອງສະຖາບັນໃຫ້ມີລັກສະນະຄົບຖ້ວນ ແລະມີຄຸນນະພາບດີຂຶ້ນກວ່າເກົ່າ ເພື່ອເຂົ້າສູ່ຄວາມທັນສະໄໝເທື່ອລະກ້າວ.
ຂ່າວ: ຕາອັອດ ແສນທະວີສຸກ
ຮູບພາບ: ນ. ທິດດາວອນ ດວງປະເສີດ
ບັນນາທິການ: ປທ ບຸນປັນ ສຸມຸນທອງ