ເພື່ອເຮັດໃຫ້ແຜນການຮຽນ-ການສອນທິດສະການເມືອງຂັ້ນສູງ 9 ເດືອນ ຮຸ່ນທີ I ເຊິ່ງເປັນຊຸດປະຖົມມະລືກ ແລະທັງຕອບສະໜອງໄດ້ທາງດ້ານເນຶ້ອໃນ, ຄູ-ອາຈານ ແລະການບໍລິຫານຄຸ້ມຄອງແກ່ຊຸດຮຽນ, ຮັບປະກັນໄດ້ທາງດ້ານປະລິມານ, ຄຸນນະພາບ, ເວລາ ແລະມີຜົນສໍາເລັດທີ່ໄດ້ກຳນົດໄວ້ໃນແຜນການຮຽນ-ການສອນທຸກປະການ.
ສະນັ້ນ, ອີງຕາມມະຕິຕົກລົງຂອງ ເລຂາຄະນະສູນກາງພັກສະບັບເລກທີ 244/ຄລສພ, ລົງວັນທີ 24 ພະຈິກ 2022 ວ່າດ້ວຍການອະນຸມັດພະນັກງານນຳພາ-ຄຸ້ມຄອງໄປບຳລຸງທິດສະດີການເມືອງລະບົບ 9 ເດືອນ ຮຸ່ນທີ I ຢູ່ສະຖາບັນການເມືອງ ແລະການປົກຄອງແຫ່ງຊາດປະຈຳສົກປີ 2022-2023.
ສະຖາບັນການເມືອງ ແລະ ການປົກຄອງແຫ່ງຊາດ ຈຶ່ງໄດ້ເປີດຊຸດເຝິກອົບຮົມທິດສະການເມືອງຂັ້ນສູງ 9 ເດືອນ ຮຸ່ນທີ I ໃນວັນທີ 30 ພະຈິກ 2022 ໃຫ້ກຽດເປັນປະທານໂດຍ: ທ່ານ ຮສ ພູວົງ ອຸ່ນຄຳແສນ ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ມີຕາງໜ້າຫ້ອງການ, ກົມ, ຄະນະຕ່າງໆ, ສູນຄົ້ນຄວ້າແນວຄິດ ໄກສອນ ພົມວິຫານ ແລະສູນຂໍ້ມູນຂ່າວສານການເມືອງ ແລະ ການປົກຄອງ.
ໃນພິທີໄດ້ຮັບຟັງແຜນການເຄື່ອນໄຫວການຮຽນ-ການສອນ ຕະຫຼອດໄລຍະ 9 ເດືອນ ຈາກທ່ານ ປທ ແສງແກ້ວ ວົງລໍາພັນ ຮອງຫົວໜ້າກົມຄຸ້ມຄອງການຮຽນ-ການສອນເປັນຕົ້ນແມ່ນ: ຈຸດພິເສດການສ້າງເນື້ອໃນຫຼັກສູດນີ້ ແມ່ນໄດ້ຮັບການກຳນົດຢ່າງເປັນລະບົບ, ຜ່ານການໄປເກັບກໍາຂໍ້ມູນທັງພາຍໃນ ແລະຕ່າງປະເທດ, ມີການປຶກສາຫາລືຫຼາຍຝ່າຍ ໂດຍອີງໃສ່ຄວາມຮຽກຮ້ອງຕ້ອງການຂອງໜ້າທີ່ວຽກງານ, ຄວາມຈໍາເປັນທີ່ຈະຕ້ອງໄດ້ຮຽນຮູ້ ແລະເຂົ້າໃຈຢ່າງເລິກເຊິ່ງ ສໍາລັບສະມາຊິກພັກທັງຢູ່ສູນກາງ ແລະທ້ອງຖິ່ນ ຫຼັງຈາກນັ້ນກໍໄດ້ກໍານົດຄວາມສອດຄ່ອງຂອງຫົວຂໍ້ ແລະໄດ້ແຕ່ງຕັ້ງອາຈານຜູ້ຊ່ຽວຊານຮັບຜິດຊອບຂຽນເນື້ອໃນບົດສອນ ແລະບັນນາທິການຕາມຂັ້ນຕອນ ແລະສະເໜີຂໍຜ່ານຮັບຮອງຈາກສະພາທິດສະດີສູນກາງພັກຄັ້ງວັນທີ 23 ມິຖຸນາ 2022.
ໃນຊຸດນີ້ຜູ້ເຂົ້າຮຽນຈະໄດ້ຄົ້ນຄວ້າຮ່ຳຮຽນ 7 ກຸ່ມວິຊາຮຽນ ແລະຂຽນບົດປ້ອງກັນຈົບຂັ້ນລວມ 1,113 ຊມ ຫຼື 152 ບົດຄື:
1). ກຸ່ມວິຊາປັດຊະຍາມາກ-ເລນິນ ປະກອບມີ 9 ບົດ, ລວມ ມີ 68 ຊມ, ກຸ່ມວິຊາວັດທະນະທໍາ ແລະຄຸນສົມບັດປະກອບມີ 6 ບົດ ລວມມີ 46 ຊມ ແລະກຸ່ມວິຊາສາສະໜາປະກອບມີ 4 ບົດ, ລວມ 33 ຊມ, ໃນນັ້ນຈະປະກອບມີການບັນລະຍາຍ, ຟັງລາຍງານເພີ່ມ, ຄົ້ນຄວ້າ, ສໍາມະນາ, ແກ້ຂໍ້ຂ້ອງໃຈ ແລະຂຽນບົດຈົບວິຊາ.
2). ກຸ່ມວິຊາເສດຖະສາດການເມືອງມາກ-ເລນິນ ປະກອບມີ 20 ບົດ ລວມ128 ຊົ່ວໂມງ, ກຸ່ມວິຊາຄຸ້ມຄອງເສດຖະກິດປະກອບມີ 9 ບົດ ລວມ 55 ຊົ່ວໂມງ.
3). ກຸ່ມວິຊາລັດທິສັງຄົມນິຍົມວິທະຍາສາດປະກອບມີ 10 ບົດ ລວມ54 ຊົ່ວໂມງ, ການເມືອງວິທະຍາປະກອບມີ 7 ບົດ ລວມ 36 ຊມ, ພົວພັນສາກົນປະກອບມີ 6 ບົດ ລວມ 31 ຊມ, ສັງຄົມສາດປະກອບມີ 6 ບົດ ລວມ 30 ຊົ່ວໂມງ, ເຜົ່າວິທະຍາປະກອບມີ 5 ບົດ ລວມ 26ຊມ ແລະປ້ອງກັນຊາດ-ປ້ອງກັນຄວາມສະຫງົບປະກອບມີ 6 ບົດ ລວມ 31 ຊມ ແລະວິຊາບົດບາດຍິງ-ຊາຍ ປະກອບມີ 5 ບົດ ລວມ 24 ຊມ.
4). ແນວຄິດ ໄກສອນ ພົມວິຫານ ປະກອບມີ10 ບົດລວມທັງໝົດ 90 ຊມ;
5). ກຸ່ມວິຊາພື້ນຖານການຄຸ້ມຄອງບໍລິຫານລັດ ປະກອບມີ 8 ບົດ ລວມທັງໝົດ 65 ຊມ, ກຸ່ມທິດສະດີລັດ-ກົດໝາຍປະກອບມີ 7 ບົດ ລວມ 57 ຊມ ແລະກຸ່ມວິຊາບໍລິຫານປະກອບມີ 7 ບົດ ລວມ 58 ຊມ.
6). ກຸ່ມວິຊາປະຫວັດສາດພັກປະກອບມີ 4 ບົດ ລວມ 35 ຊມ, ກໍ່ສ້າງພັກປະກອບມີ 10 ບົດ ລວມ 74 ຊມ ແລະຈິດຕະສາດ-ຂົນຂວາຍປະກອບມີ 4 ບົດ ລວມ 29 ຊມ.
7). ກຸ່ມວິຊາບັງຄັບ ແລະຫົວຂໍ້ລາຍງານເພີ່ມປະກອບມີ 9 ຫົວຂໍ້ ລວມ 63 ຊມ.
+ ຂຽນບົດຈົບຊັ້ນ 142 ຊມ ໃນນັ້ນນໍາໃຊ້ການເຄື່ອນໄຫວຄື:
– ແນະນໍາຫົວຂໍ້ ແລະແນະນໍາຂຽນບົດ ລວມ 4 ຊົ່ວໂມງ;
– ແນະນໍາປ້ອງກັນບົດ 14 ຊມ ແລະລົງເກັບກໍາຂໍ້ມູນ 120 ຊມ.
ໃນຕອນທ້າຍ ທ່ານ ຮສ ພູວົງ ອຸ່ນຄຳແສນ ໄດ້ເນັ້ນໜັກ 4 ຈຸດຄື:
- ຮຽກຮ້ອງໃຫ້ບັນດາຜູ້ທີ່ໄດ້ຄັດເລືອກເຂົ້າມາຮຽນປະຕິບັດລະບຽບວິໄນຢ່າງເຂັ້ມງວດ, ເຄື່ອນໄຫວຕາມລະບຽບ ແລະກໍໃຫ້ມີຄວາມສາມັກຄີແລກປ່ຽນປະສົບການເຊິ່ງກັນ ແລະກັນ.
- ຕ້ອງຮັບຮູ້ຢ່າງເລິກເຊິ່ງຕໍ່ໜ້າທີ່ການເມືອງຂອງຕົນເອງ, ເຝິກຝົນຫຼໍ່ຫຼອມຄຸນທາດການເມືອງ, ສິນທໍາປະຕິວັດ, ການຄົ້ນຄວ້າບັນດາເອກະສານ, ນິຕິກໍາ, ບັນດາເອກະສານ, ເພີ່ມທະວີການຮໍ່າຮຽນກັບໝູນໃຊ້ພຶດຕິກໍາຕົວຈິງເຂົ້າໃນການຮໍ່າຮຽນ.
- ການຮຽນຕ້ອງມີວິທີ ທີ່ເໜາະສົມກັບເງື່ອນໄຂກັບສະພາບທີ່ເໝາະສົມຂອງຕົນເອງ, ໃຫ້ມີຄວາມເຂັ້ມງວດ, ປະຕິບັດຕາມພາລະບົດບາດ, ຕາມຫຼັກສູດ, ຊອກຫາເຫດ ແລະຜົນ, ຊອກບັນດາພຶດຕິກໍາຕົວຈິງໃຫ້ສອດຄ່ອງກັບທິດສະດີ ແລະຊອກຮູ້ຮໍ່າຮຽນໃຫ້ຫຼາຍຂຶ້້ນ.
- ປະຕິບັດບັນດາຈຸດໜາຍ, ບັນດາຄາດໜາຍ, ສຸຂະພາບຮ່າງກາຍຕ້ອງແຂງແຮງ, ສຸຂະພາບຈິດກໍໃຫ້ປອດໂປ່ງ ແລະຕ້ອງມີເວລາພັກຜ່ອນອອກກໍາລັງກາຍຕາມໂມງຕາມເວລາ.
ນອກຈາກນັ້ນ, ກໍຍັງເນັ້ນໜັກໃຫ້ບັນດາຄູ-ອາຈານທີ່ຂຶ້້ນຫ້ອງສິດສອນບັນຍາຍໃຫ້ນັກຮຽນຕ້ອງຮັບປະກັນໃຫ້ມີທັງທິດສະດີພ້ອມທັງພຶດຕິກໍາ, ສ້າງບົດຮຽນອັນໃໝ່, ວິທີການສິດສອນແບບໃໜ່ໂດຍເອົານັກຮຽນເປັນຈຸດໃຈກາງ ແລະຊອກຮູ້ຄົ້ນຄວ້າໃຫ້ຫຼາຍຂຶ້ນຕື່ມ.
ໃນວາລະດັ່ງກ່າວ, ຍັງໄດ້ຈັດຕັ້ງເຜີຍແຜ່ເອກະສານສຳຄັນຂອງພັກເປັນຕົ້ນ: ມະຕິກອງປະຊຸມຄົບຄະນະບໍລິ ຫານງານສູນກາງພັກຄັ້ງທີ V ສະໄໝທີ XI, ມະຕິວ່າດ້ວຍການຕີລາຄາພະນັກງານ, ມະຕິວ່າດ້ວຍການຕີລາຄາພະນັກ ງານ, ຄຳສັ່ງແນະນຳກ່ຽວກັບການຜັນຂະຫຍາຍຜົນສຳເລັດກອງປະຊຸມວຽກງານກໍ່ສ້າງຮາກຖານການເມືອງ, ແຈ້ງການ ກ່ຽວກັບສືບຕໍ່ຂະບວນການຮັກຊາດ ແລະພັດທະນາ ແລະການປະຕິບັດແຜນກຳນົດພະນັກງານນຳພາ-ຄຸ້ມຄອງ.
ຊຶ່ງທັງ 5 ເອກະສານ ເປັນມະຕິທີ່ກໍານົດຫຼັກການ, ລະບຽບການ, ວິທີການ, ຂັ້ນຕອນ ແລະເນື້ອໃນທີ່ສ່ອງແສງໃຫ້ເຫັນຄື:
- ເພື່ອຮັບປະກັນການດຳເນີນການຕີລາຄາພະນັກງານຢ່າງພາວະວິໄສ, ແນໃສ່ກໍາແໜ້ນພະນັກງານຢ່າງ ຮອບດ້ານທັງດ້ານຕັ້ງໜ້າ ແລະດ້ານຫຍໍ້ທໍ້ຂອງພະນັກງານ ເພື່ອບຳລຸງ-ກໍ່ສ້າງ ແລະນຳໃຊ້ໃຫ້ຖືກຕ້ອງສອດຄ່ອງກັບຄວາມຮູ້-ຄວາມສາມາດຂອງພະນັກງານ.
- ເພື່ອເປັນທິດໃຫ້ແກ່ການຜັນຂະຫຍາຍ ຜົນສຳເລັດຂອງກອງປະຊຸມ ວຽກງານກໍ່ສ້າງຮາກຖານການເມືອງຕິດພັນກັບວຽກງານພັດທະນາຊົນນະບົດຮອບດ້ານແກ້ໄຂຄວາມທຸກຍາກ ແລະວຽກງານ 3 ສ້າງ ໃຫ້ເຂົ້າສູ່ຕົວຈິງ ແລະເປັນຮູບປະທຳ.
- ເພື່ອຮັບປະກັນໃຫ້ການຈັດຕັ້ງປະຕິບັດກຳນົດພະນັກງານນຳພາ-ຄຸ້ມຄອງ ບັນລຸລະດັບຄາດໝາຍ, ສ້າງໄດ້ພະນັກງານນໍາພາ-ຄຸ້ມຄອງ ແຕ່ລະຂັ້ນມີຄຸນນະພາບ, ຕອບສະໜອງຄວາມຮຽກຮ້ອງຕ້ອງການ ຂອງວຽກງານໃນສະເພາະໜ້າ ແລະຍາວນານ, ຈຶ່ງແຈ້ງມາຍັງບັນດາສະຫາຍໃນຄະນະປະຈຳພັກ, ຄະນະພັກກະຊວງ-ອົງການ, ແຂວງ-ນະຄອນຫຼວງວຽງຈັນ ເພີ່ມທະວີຄວາມເອົາໃຈໃສ່ຕໍ່ບາງວຽກງານ.
- ເພື່ອສືບຕໍ່ປະຕິບັດສອງໜ້າທີ່ຍຸດທະສາດ ຄື: ປົກປັກຮັກສາ ແລະສ້າງສາປະເທດຊາດ, ໂດຍສະເພາະການ ຈັດຕັ້ງຜັນຂະຫຍາຍມະຕິກອງປະຊຸມຂອງພັກຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ການຜັນຂະຫຍາຍເນື້ອໃນການແຂ່ງຂັນຮັກຊາດ ແລະພັດທະນາ ທີ່ໄດ້ຮັບຮອງໃນກອງປະຊຸມສະຫຼຸບຕີລາຄາຂະບວນການແຂ່ງຂັນຮັກຊາດ ແລະພັດທະນາ ແລະທິດທາງແຜນການຮອດປີ 2025.
ຂ່າວ/ພາບ: ນ. ທິດດາວອນ ດວງປະເສີດ
ບັນນາທິການ: ປທ ບຸນປັນ ສຸມຸນທອງ