ຫຼັກສູດຊຸດເຝິກອົບຮົມທິດສະດີການເມືອງ ແລະການບໍລິຫານຄຸ້ມຄອງລັດ ໃຫ້ແກ່ເລຂາພັກເມືອງ ແລະຄະນະປະຈໍາພັກເມືອງໃນຂອບເຂດທົ່ວປະເທດ ຊຸດທີ V ແມ່ນນອນຢູ່ໃນໂຄງການເຝິກອົບຮົມ ປະຈໍາປີ 2022 ຂອງສະຖາບັນການເມືອງ ແລະ ການປົກຄອງແຫ່ງຊາດ ແລະຂອງກະຊວງພາຍໃນ; ເນື້ອໃນຫຼັກສູດຊຸດຝຶກອົບຮົມໄດ້ແບ່ງອອກເປັນ 2 ທິດສະດີຄື: ທິດສະດີການເມືອງ ແລະທິດສະດີການບໍລິຫານຄຸ້ມຄອງລັດ ໃຊ້ເວລາເຝິກອົບຮົມຕົວຈິງທັງໝົດ 15 ວັນ ຫຼື 105 ຊົ່ວໂມງ, ໃນນີ້ທິດສະດີການເມືອງປະກອບມີ 16 ຫົວຂໍ້ ໃຊ້ເວລາ 10 ວັນ ຫຼື 70 ຊົ່ວໂມງ ແລະທິດສະດີການບໍລິຫານຄຸ້ມຄອງລັດປະກອບມີ 08 ຫົວຂໍ້ ໃຊ້ເວລາ 05 ວັນ ຫຼື 35 ຊົ່ວໂມງ.
ສະນັ້ນ, ໃນວັນທີ 4 ພະຈິກ ຊຸດເຝິກອົບຮົມດັ່ງກ່າວຈຶ່ງໄດ້ຈັດພິທີປິດຢ່າງເປັນທາງການ, ໃຫ້ກຽດເປັນປະທານ ໂດຍ: ທ່ານ ທອງຈັນ ມະນີໃສ ລັດະມົນຕີກະຊວງພາຍໃນ ແລະທ່ານ ຮສ ພູວົງ ອຸ່ນຄຳແສນ ກຳມະການສູນກາງພັກ, ເລ ຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ມີຕາງໜ້າຄະນະຫ້ອງການ, ກົມ, ຄະນະຕ່າງໆ ແລະສູນຕ່າງໆ.
ໃນພິທີ ທ່ານ ປອ ນ. ໄກສອນ ຈັນສີນາ ຄະນະບໍລິຫານງານພັກ, ຫົວໜ້າກົມຄຸ້ມຄອງການຮຽນ-ການສອນ ໄດ້ຜ່ານບົດສະຫຼຸບຕະຫຼອດໄລຍະຂອງການຮຽນ-ການສອນ ຊຶ່ງທ່ານໄດ້ລາຍງານວ່າ: ການຂຶ້ນຫ້ອງບັນຍາຍຂອງຄູ-ອາຈານຊຸດນີ້ແມ່ນໄດ້ສັງລວມເອົາຄູ-ອາຈານ ຈາກສະຖາບັນການເມືອງ ແລະ ການປົກຄອງແຫ່ງຊາດ, ກະຊວງພາຍໃນ ແລະອາ ຈານຮັບເຊີນຜູ້ທີ່ມີປະສົບການສູງໃນການຂຶ້ນຫ້ອງສິດສອນ, ມີຄວາມຮູ້, ມີຄວາມສາມາດທີ່ແນ່ນອນໃນການສົ່ງຄວາມຮູ້ໃຫ້ແກ່ຜູ້ຮໍ່າຮຽນໄດ້ດີ ຊຶ່ງມັນສະແດງອອກໃນການກະກຽມບົດສອນ, ການສະໜອງຂໍ້ມູນ ແລະການຂຶ້ນຫ້ອງບັນຍາຍ, ການແລກປ່ຽນ ແລະແກ້ໄຂຂໍ້ຂ້ອງໃຈໃຫ້ແກ່ຜູ້ເຂົ້າຮ່ວມ ຊຶ່ງສາມາດປະຕິບັດໄດ້ຢ່າງຖືກເປົ້າໝາຍ. ພ້ອມກັນນັ້ນ, ຜູ້ເຂົ້າຮ່ວມເຝິກອົບຮົມ ກໍມີຄວາມຕັ້ງໃຈໃນການຮັບຟັງ, ການຄົ້ນຄວ້າສົນທະນາ-ແລກປ່ຽນ ແລະຕັ້ງຄຳຖາມເຈາະຈີ້ມນໍາຄູ-ອາຈານ, ມີຊົ່ວໂມງຄົ້ນຄວ້າສຳມະນາກ່ຽວກັບບັນຫາຕ່າງໆ ໃນການຈັດຕັ້ງປະຕິບັດວຽກງານ ແລະການນໍາພາ-ຊີ້ນໍາຂອງບັນດາເມືອງ ເພື່ອແລກປ່ຽນຊອກຫາວິທີການແກ້ໄຂບັນຫາ, ພ້ອມທັງໄດ້ຊີ້ແຈງແກ້ຂໍ້ຂ້ອງໃຈ ຫຼື ບັນຫາທີ່ຍັງບໍ່ທັນເຂົ້າໃຈຮ່ວມກັບອາຈານຜູ້ຊ່ຽວຊານຢ່າງກົງໄປກົງມາ ແລະມີຄວາມສາມັກຄີຮັກແພງຊ່ວຍເຫຼືອຊຶ່ງກັນແລະກັນ, ເຮັດໃຫ້ມີບັນຍາກາດອັນດີ ລະຫວ່າງ ຄະນະຮັບຜິດຊອບຊຸດເຝິກອົບຮົມ, ຄູ-ອາຈານ ແລະຜູ້ເຂົ້າຮ່ວມເຝິກອົບຮົມດ້ວຍກັນຢ່າງເປັນຂະບວນການໃນການຄົ້ນຄ້ວາຮໍ່າຮຽນ.
ເພື່ອເປັນການຢັ້ງຢືນຄືນຜົນສຳເລັດເຝິກອົບຮົມ ທ່ານ ທອງຈັນ ມະນີໃສ ແລະທ່ານ ຮສ. ພູວົງ ອຸ່ນຄຳແສນ ໄດ້ເປັນກຽດມອບໃບຢັ້ງຢືນໃຫ້ສຳມະນາກອນຈຳນວນ 50 ທ່ານ, ຍິງ 2 ທ່ານ. ພ້ອມທັງໂອ້ລົມ ແລະໃຫ້ທິດເຍືອງທາງຕໍ່ກັບສຳມະນາກອນໃນການປະຕິບັດໜ້າທີ່ວຽກງານໃນຕໍ່ໜ້າ.
ຂ່າວ: ຕາອັອດ ແສນທະວີສຸກ
ຮູບພາບ: ພອນໄຊ ປາສີວົງໄຊ. ຄະນະຮັບຜິດຊອບເຝິກອົບຮົມ, ກະຊວງພາຍໃນ
ບັນນາທິການ: ບຸນປັນ ສຸມນທອງ