ໃນວັນທີ 02 ກັນຍາ 2022 ຄະນະບໍລິຫານສາດ ຂອງສະຖາບັນການເມືອງ ແລະ ການປົກຄອງແຫ່ງຊາດ ຈຳນວນທັງໝົດ 13 ທ່ານ, ຍິງ 6 ທ່ານ, ໄດ້ໄປທັດສະນະແລກປ່ຽນບົດຮຽນກັບຫ້ອງວ່າການເມືອງສີສັດຕະນາກ ນະຄແນຫຼວງວຽງຈັນ ນໍາພາໂດຍ: ທ່ານ ປອ ໝອນແກ້ວ ຈິດຕະລາດ ຫົວໜ້າຄະນະບໍລິຫານສາດ, ທ່ານ ປອ ສຸພາວະດີ ຫຼ້າຄຳສາຍ ຮອງຫົວໜ້າຄະນະບໍລິຫານສາດ, ທ່ານ ປທ ນ ອານົງ ຂັນທະຍົງ ຮອງຫົວໜ້າຄະນະບໍລິຫານສາດ, ພະນັກງານ ແລະຄູ-ອາຈານ ຄະນະບໍລິຫານສາດເຂົ້າຮ່ວມ.
ໃນພາກເຊົ້າ ແມ່ນໄດ້ຮັບຟັງການລາຍງານ ໃນການບໍລິຫານລັດຂັ້ນເມືອງ ຢູ່ຫ້ອງວ່າການປົກຄອງເມືອງ ສີສັດຕະນາກ ເຊີ່ງເປັນຄະນະປະທານໂດຍ: ທ່ານ ປອ ທິນນະກອນ ທອງຄຳ ຮອງເຈົ້າເມືອງ ສີສັດຕະນາກ, ຫຼັງຈາກນັ້ນກໍ່ໄດ້ຮັບຟັງການລາຍງານທາງດ້ານທີ່ຕັ້ງ ແລະຈຸດພິເສດຂອງເມືອງ, ດ້ານການບໍລິຫານລັດ ຂັ້ນເມືອງໃນໄລຍະທີ່ຜ່ານມາມີການເຕີບໃຫຍ່ຂະຫຍາຍຕົວຢ່າງເຂັ້ມແຂງ.
ໃນທົ່ວເມືອງສີສັດຕະນາກ ມີເນື້ອທີທັງໝົດ 31 ກິໂລຕາແມັດ, ປະກອບດ້ວຍ 37 ບ້ານ, ມີ 839 ໜ່ວຍ, ມີ 14.955 ຫຼັງຄາເຮືອນ, ມີ 12.174 ຄອບຄົວ, ມີພົນລະເມືອງທັງໝົດ 67.019 ຄົນ, ຍິງ 34.248 ຄົນ, ຄວາມໜາແໜ້ນຂອງປະຊາກອນ 2.162 ຄົນ ຕໍ່ກິໂລຕາແມັດ, ມີຊາຍແດນຕິດກັບບັນດາເມືອງອ້ອມ ຂ້າງຄື: ທິດ
ເໜືອຕິດກັບເມືອງຈັນທະບູລີ, ທິດໃຕ້ຕິດກັບເມືອງຫາດຊາຍຟອງ, ທິດຕາເວັນອອກຕິດກັບເມືອງໄຊເສດຖາ, ທິດຕາເວັນຕົກຕິດກັບແມ່ນ້ຳຂອງ ມີ 14 ບ້ານທີ່ຕິດກັບຊາຍແດນລາວໄທ ທີ່ມີຄວາມຍາວ 8 ກິໂລແມັດ.
ເມືອງສີສັດຕະນາກມີທ່າແຮງທາງດ້ານການຄ້າ-ການບໍລິການ ແລະເປັນຈຸດໃຈກາງທາງດ້ານການເມືອງ, ການປ້ອງກັນຊາດ-ປ້ອງກັນຄວາມສະຫງົບ, ເສດຖະກິດ, ດ້ານວັດທະນະທຳ-ສັງຄົມ, ມີບັນດາສຳນັກງານຂອງພັກ-ລັດຖະ ບານ, ມີສະຖານທູດ ແລະອົງການຈັດຕັ້ງສາກົນ, ມີສູນການຄ້າ-ບໍລິການ, ມີທະນາຄານ, ມີສະຖາບັນການສຶກສາທັງພາກລັດ-ເອກະຊົນ, ມີໂຮງແຮມ, ມີອາພັດເມັ້ນ, ມີແຫຼ່ງທ່ອງທ່ຽວທາງດ້ານວັດທະນະທຳ, ປະຫວັດສາດ ແລະມີທິວທັດທຳມະຊາດຕາມລໍາແມ່ນໍ້າຂອງ ທີ່ສວຍງາມແຫ່ງໜຶ່ງ ຂອງນະຄອນຫຼວງວຽງຈັນ.
ທ່ານໄດ້ໃຫ້ກຽດອະທິບາຍກ່ຽວກັບການບໍລິຫານລັດ ຢູ່ເມືອງ ສີສັດຕະນາກ ໃນໄລຍະທີ່ຜ່ານມາອົງການບໍລິຫານລັດ ເມືອງສີສັດຕະນາກ ກໍ່ແມ່ນອົງການບໍລິຫານລັດຂັ້ນທ້ອງຖິ່ນ ເຮັດພາລະບົດບາດຄຸ້ມຄອງການບໍລິຫານລັດທາງດ້ານການເມືອງ, ການປົກຄອງ, ເສດຖະກິດ, ວັດທະນະທຳ-ສັງຄົມ, ການປ້ອງກັນຊາດ-ປ້ອງກັນຄວາມສະຫງົບ, ແລະນຳໃຊ້ຊັບພະຍາກອມະນຸດ, ປົກປັກຮັກສາ ແລະນຳໃຊ້ຊັບພະຍາກອນທຳມະຊາດ, ສິ່ງແວດລ້ອມ, ການຈັດຕັ້ງປະຕິບັດແຜນພັດທະນາໃນຂອບເຂດຄວາມຮັບຜິດຊອບຂອງຕົນ. ໂດຍແມ່ນຄະນະບໍລິຫານງານພັກເມືອງ ສີສັດຕະນາກ ສະໄໝທີ VII ເປັນຜູ້ຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນຄັ້ງທີ່ VII ຂອງອົງຄະນະພັກເມືອງສີສັດຕະນາກໂດຍແມ່ນ ຄະນະບໍລິຫານງານພັກເມືອງ ສີສັດຕະນາກ ຈຳນວນ 24 ສະຫາຍ ເປັນເຈົ້າການໃນການຈັດຕັ້ງປະ ຕິບັດໃຫ້ປາກົດຜົນເປັນຈິງເທື່ອລະກ້າວ. ໂດຍສະເພາະກໍແມ່ນການຮັບປະກັນໃນການຈັດຕັ້ງປະຕິບັດລັດຖະທຳມະນູນກົດໝາຍ, ດຳລັດ, ລະບຽບການ, ມະຕິ, ຄຳສັ່ງ ແລະຄຳແນະນຳຂອງຂັ້ນເທິງໃນແຕ່ລະໄລຍະ. ການສ້າງແຜນ ແລະການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ, ວຽກງານປ້ອງກັນຊາດ-ປ້ອງກັນຄວາມສະຫງົບ. ຄຸ້ມຄອງ ແລະປະຕິບັດແຜນລາຍຮັບ, ແຜນລາຍຈ່າຍຂອງທ້ອງຖິ່ນໃຫ້ຖືກຕ້ອງ, ຄົບຖ້ວນ, ທັນເວລາ ແລະໂປ່ງໃສ, ອອກຂໍ້ຕົກລົງ, ຄຳສັ່ງ, ຄຳແນະນຳ, ແຈ້ງການ…ພ້ອມກັນນັ້ນ, ກໍຍັງໄດ້ຄຸ້ມຄອງພະນັກງານ-ລັດຖະກອນໃນການຈັດຕັ້ງປະຕິບັດໜ້າທີ່ ແລະສ້າງບຳລຸງຍົກລະດັບຄວາມຮູ້-ຄວາມສາມາດທາງດ້ານການເມືອງ, ການປົກຄອງ, ວິຊາສະເພາະໃຫ້ພະນັກງານ-ລັດຖະກອນ, ພະນັກງານຂັ້ນບ້ານ ແລະການລາຍງານການຈັດຕັ້ງປະຕິບັດວຽກງານຂອງຕົນ ລວມໄປເຖິງສະພາບການຮອບດ້ານຂອງເມືອງ ໃຫ້ເຈົ້າຄອງນະຄອນຫລວງ ແລະອົງການທີ່ກ່ຽວຂ້ອງໄດ້ຮັບຊາບຢ່າງເປັນປົກກະຕິ.
ສັງລວມແລ້ວ, ການທັດສະນະສຶກສາ ຂອງພະນັກງານ-ຄູອາຈານ ຄະນະບໍລິຫານສາດ ເຫັນໄດ້ການບໍລິຫານລັດເຮັດວຽກແບບມີແຜນການ, ແຜນງານ, ໂຄງການລະອຽດ, ແກ້ໄຂວຽກງານຢ່າງມີຈຸດສຸມ, ມີເປົ້າໝາຍຖືກຕ້ອງຕາມລະບຽບການແຕ່ລະໄລຍະ, ປະສານສົມທົບຢ່າງແໜ້ນແຟ້ນ ກັບບັນດາອົງການທີ່ກ່ຽວຂ້ອງ, ເຮັດວຽກມີການກວດກາ, ຕິດຕາມ, ຊຸກຍູ້, ສະຫຼຸບຖອດຖອນບົດຮຽນ, ຕີລາຄາຜົນໄດ້, ຜົນເສຍພ້ອມທັງລາຍງານສ່ອງແສງຢ່າງເປັນປົກກະຕິ, ການເຄື່ອນໄຫວຂອງຫ້ອງວ່າການເມືອງ ສີສັດຕະນາກ ຖືເອົາແນວທາງຍຸດທະສາດ, ແຜນນະໂຍບາຍຂອງພັກ-ລັດ ຂັ້ນນະຄອນຫຼວງວຽງຈັນ, ເພື່ອເປັນທິດນໍາ, ເປັນໃຈກາງປະສານງານ ລະຫວ່າງ ການນໍາເມືອງ, ອົງການລັດທຽບເທົ່າຂັ້ນເມືອງ ແລະພາກສ່ວນອື່ນໆ ທີ່ຕັ້ງຢູ່ເມືອງ ເພື່ອໃຫ້ການປະຕິບັດໜ້າທີ່ການເມືອງ ຂອງຕົນປະສົບຜົນສໍາເລັດໃນແຕ່ລະໄລຍະ, ລາຍງານກ່ຽວກັບສະພາບການລວມ ແລະການຈັດຕັ້ງປະຕິບັດມະຕິ, ຄໍາສັ່ງຂອງສູນກາງພັກ, ສະພາບວຽກງານທີ່ພົ້ນເດັ່ນຂອງທ້ອງຖິ່ນປະຈໍາອາທິດ, ປະຈໍາເດືອນ, ປະຈຳ 3 ເດືອນ, ປະຈຳ 6 ເດືອນ, ປະຈຳ 9 ເດືອນ ແລະປະຈໍາປີຂັ້ນເມືອງສົ່ງໃຫ້ຫ້ອງວ່າການ ນະຄອນຫຼວງວຽງຈັນ ປະຕິບັດລະບອບປະຊຸມ, ລາຍງານປະຈໍາອາທິດ, ປະຈໍາເດືອນ, ປະຈໍາ 3 ເດືອນ, ປະຈໍາ 6 ເດື່ອນ, ປະຈໍາ 9 ເດືອນ ແລະປະຈໍາປີ ເພື່ອສະຫຼຸບສັງລວມສະພາບການເຄື່ອນໄຫວຂອງຫ້ອງວ່າ ການເມືອງ ສີສັດຕະນາກ ແລ້ວລາຍງານໃຫ້ການນໍາເມືອງ.
ຂ່າວ/ພາບ: ປທ ຄຳຝັ້ນ ແສງແກ້ວ
ບັນນາທິການ: ປທ ປຸນປັນ ສຸມຸນທອງ