ໃນລະຫວ່າງວັນທີ 11-16 ກັນຍາ 2022, ຄະນະຜູ້ເເທນ ຂອງສະຖາບັນການເມືອງ ເເລະ ການປົກຄອງເເຫ່ງຊາດ ນໍາໂດຍສະຫາຍ ປອ. ດາວສະຫວັນ ເຄືອມີໄຊ ຄະນະບໍລິຫານງານພັກ, ຮອງຫົວໜ້າສະຖາບັນການເມືອງ ເເລະ ການປົກຄອງເເຫ່ງຊາດລາວ ພ້ອມດ້ວຍຄະນະ 9 ທ່ານ ໄດ້ເຂົ້າພົບປະຢ້ຽມຢາມ ເເລະເຮັດວຽກ ຢູ່ສະຖາບັນການເມືອງເເຫ່ງຊາດໂຮ່ຈີມິນ.
ສະຫາຍ ປອ. ດາວສະຫວັນ ເຄືອມີໄຊ ພ້ອມດ້ວຍຄະນະ ເຂົ້າຢ້ຽມຂໍ່ານັບ ສະຫາຍ ສຈ.ປອ ຫງວຽນ ຊວນ ຖັງ ກໍາມະການກົມການເມືອງສູນກາງພັກຄອມມູນິດຫວຽດນາມ, ປະທານສະພາທິດສະດີສູນກາງພັກ, ຫົວໜ້າສະຖາບັນການເມືອງເເຫ່ງຊາດໂຮ່ຈີມິນ ພ້ອມດ້ວຍຄະນະ ໃນນັ້ນປະກອບມີສະຫາຍ ຮສ.ປອ ຫງວຽນ ຢຸຍ ບັກ ຮອງຫົວໜ້າສະຖາບັນການເມືອງເເຫ່ງຊາດ ໂຮ່ຈີມິນ ເເລະຕາງໜ້າການນໍາຫ້ອງການ, ກົມ ເເລະ ບັນດາອະນຸສະຖາບັນ ທີ່ຂື້ນກັບສະຖາບັນການເມືອງເເຫ່ງຊາດໂຮ່ຈີມິນ ກໍ່ໃຫ້ກຽດເຂົ້າຮ່ວມ.
ໃນບົດຄໍາເຫັນກ່າວຕ້ອນຮັບ ຂອງສະຫາຍ ສຈ.ປອ ຫງວຽນ ຊວນ ຖັງ ໄດ້ຢັ້ງຢືນວ່າ: ການພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງ ຫວຽດນາມ-ລາວ, ລາວ-ຫວຽດນາມ ໂດຍເເມ່ນປະທານໂຮ່ຈີມິນ ຜູ້ນໍາທີ່ຍິ່ງໃຫ່ຍ ແລະ ປະທານ ໄກສອນ ພົມວິຫານ ເປັນຜູ້ກໍ່ສ້າງຂື້ນ ເຊິ່ງໃນນັ້ນແມ່ນຊັບສິນລວມອັນລ້ຳຄ່າ ຂອງປະຊາຊົນສອງຊາດ ເເລະໄດ້ຮັບການສືບທອດກັນມາສູ່ເເຕ່ລະຮຸ່ນຄົນ. ຕໍ່ກັບພາລະບົດບາດ, ໜ້າທີ່ສະຖາບັນການເມືອງແຫ່ງຊາດ ໂຮ່ຈີມິນ ແລະສະຖາບັນການເມືອງ ເເລະ ການປົກຄອງແຫ່ງຊາດລາວ ເເມ່ນຍັງມີພາລະກິດອັນໜັກໜ່ວງທີ່ຈະປະກອບສ່ວນເຂົ້າໃນການປົກປັກຮັກສາ, ບຳລຸງສ້າງ ແລະສືບຕໍ່ເສີມຂະຫຍາຍການພົວພັນສາມັກຄີແບບພິເສດລະຫວ່າງຫວຽດນາມ-ລາວ, ລາວ-ຫວຽດນາມ ໃຫ້ບໍລິສຸດຜ່ອງໃສ, ໝັ້ນຄົງທະນົງເເກ່ນຊົ່ວກາລະນານ.
ໃນພິທີຢ້ຽມຂໍ່ານັບອັນມີຄວາມໝາຍນີ້, ສະຫາຍ ປອ. ດາວສະຫວັນ ເຄືອມີໄຊ ໄດ້ນໍາເອົາການຢ້ຽມຢາມຖາມຂ່າວ ເເລະຄໍາອອຍພອນໄຊອັນປະເສີດ ຈາກສະຫາຍ ຮສ. ພູວົງ ອຸ່ນຄໍາເເສນ ກໍາມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດລາວ ເຖິງສະຫາຍ ສຈ.ປອ ຫງວຽນ ຊວນ ຖັງ ພ້ອມດ້ວຍຄະນະພັກ, ຄະນະນໍາ ທົ່ວສະຖາບັນການເມືອງເເຫ່ງຊາດ ໂຮ່ຈີມິນ ຈົ່ງມີສຸຂະພາບເຂັ້ມເເຂງ, ປະສົບຜົນສໍາເລັດໃນໜ້າທີ່ການງານ; ຂໍອວຍພອນໃຫ້ສາຍພົວພັນຮ່ວມມືລະຫວ່າງສອງສະຖາບັນ, ສາຍພົວພັນມິດຕະພາບແບບພິເສດ ແລະຄວາມສາມັກຄີລະຫວ່າງສອງປະເທດ ລາວ-ຫວຽດນາມ, ຫວຽດນາມ-ລາວ, ຈົ່ງໝັ້ນຄົງທະນົງເເກ່ນຕະຫຼອດໄປ.
ຫຼັງຈາກນັ້ນ ສະຫາຍ ປອ. ດາວສະຫວັນ ເຄືອມີໄຊ ພ້ອມດ້ວຍຄະນະ ໄດ້ເຂົ້າພົບປະ ເເລະເຮັດວຽກກັບຄະນະພັກ, ຄະນະນໍາສະຖາບັນການເມືອງເເຫ່ງຊາດ ໂຮ່ຈີມິນ ໂດຍການຕ້ອນຮັບ ຂອງສະຫາຍ ຮສ.ປອ ຫງວຽນ ຢຸຍ ບັກ ຊຶ່ງໃນພິທີດັ່ງກ່າວ, ຄະນະຜູ້ເເທນທັງສອງຝ່າຍ ໄດ້ປຶກສາຫາລືກ່ຽວກັບຫຼາຍບັນຫາ ເຊິ່ງສາມາດສະຫຼຸບໄດ້ບາງບັນຫາທີ່ສໍາຄັນດັ່ງນີ້:
1). ເເລກປ່ຽນບົດຮຽນກ່ຽວກັບການສ້າງຫຼັກສູດຝຶກອົບຮົມທິດສະດີການເມືອງຂັ້ນສູງລະຫວ່າງ ຫວຽດນາມ-ລາວ.
2). ເເລກປ່ຽນບົດຮຽນກ່ຽວກັບເເຜນການຮ່ວມມືລະຫວ່າງສອງສະຖາບັນ.
3). ເເລກປ່ຽນບົດຮຽນກ່ຽວກັບການກະກຽມໂຄງການການເມືອງຂອງພັກ.
4). ເເລກປ່ຽນບົດຮຽນກ່ຽວກັບການຂຸດຄົ້ນ ເເລະ ສໍາເນົາເອກະສານ, ເກັບກໍາຂໍ້ມູນກ່ຽວກັບປະທານ ໄກສອນ ພົມວິຫານ.
5). ເເລກປ່ຽນບົດຮຽນກ່ຽວກັບການກະກຽມສ້າງນິພົນຄົບຊຸດ.
ພ້ອມນັ້ນ, ຄະນະຜູ້ແທນ ສມປຊ ໄດ້ສືບຕໍ່ ເຮັດວຽກກັບອະນຸສະຖາບັນຂໍ້ມູນຂ່າວສານວິທະຍາສາດ, ອະນຸສະຖາບັນໂຮ່ຈີມິນ ເເລະບັນດາຜູ້ນໍາຂອງພັກ, ສຳນັກພິມຈໍາໜ່າຍການເມືອງແຫ່ງຊາດສື້ເຖິດ, ຫໍພິພິທະພັນ ໂຮ່ຈີມິນ; ກ່ຽວກັບວຽກງານການຂຸດຄົ້ນ, ສໍາເນົາ ແລະ ເກັບກຳເອກະສານກ່ຽວກັບປະທານ ໄກສອນ ພົມວິຫານ; ນອກຈາກນັ້ນຍັງໄດ້ເຂົ້າພົບປະແລກປ່ຽນກິລາ, ວັນນະຄະດີກັບສະຖາບັນດິດວິທະຍາສາດສັງຄົມຫວຽດນາມ, ບໍລິສັດ VNPT ແລະໄປທັດສະນະ, ເຮັດວຽກຢູ່ ເເຂວງກວາງນິງ…
ຂ່າວ: ປໍ່ຈົວຊົ່ງ ຈົງເຍ້ຍ
ຮູບພາບ: ສູນຄົ້ນຄວ້າແນວຄິດໄກສອນ ພົມວິຫານ
ບັນນາທິການ: ປທ ບຸນປັນ ສຸມຸນທອງ