ໃນຕອນເຊົ້າວັນທີ 25 ສິງຫາ 2022 ຢູ່ທີ່ໂຮງຮຽນການເມືອງ ແລະ ການປົກຄອງແຂວງ ແຂວງຫຼວງນ້ຳທາໄດ້ປິດຊຸດຮຽນຝຶກອົບຮົມທິດສະດີການເມືອງ ແລະການປົກຄອງລະບົບ 10 ວັນ ຊຸດທີ III ໃຫ້ແກ່ເລຂາຄະນະພັກບ້ານ, ນາຍບ້ານ ຢູ່ເມືອງຫຼວງນຳ້ທາ ແຂວງຫຼວງນ້ຳທາ ໃຫ້ກຽດເປັນປະທານໂດຍ ທ່ານ ປທ ຄຳຟອງ ລາດຊະພົນ ຮອງຫົວໜ້າໂຮງຮຽນການເມືອງ ແລະ ການປົກຄອງແຂວງ, ໃຫ້ກຽດເຂົ້າຮ່ວມໂດຍ ທ່ານ ຄຳພຸດ ໂພທິລາດ ກຳມະການພັກເມືອງ, ປະທານແນວລາວສ້າງຊາດ ເມືອງຫຼວງນຳ້ທາພ້ອມດ້ວຍຄະນະ, ມີພະນັກງານ, ຄູ-ອາຈານ ຕະຫຼອດຮອດສຳມະນາກອນທີ່ເປັນເລຂາພັກບ້ານ, ນາຍບ້ານພາຍໃນເມືອງຫຼວງນຳ້ທາເຂົ້າຮ່ວມຈຳນວນ 47 ທ່ານ, ຍິງ 16 ທ່ານ.
ທ່ານ ແອທອງ ບຸນຖາວອນ ຮອງຫົວໜ້າຂະແໜງວິຊາການ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດການຮຽນ-ການສອນ ທິດສະດີການເມືອງ ແລະ ການປົກຄອງ ຫຼັກສູດ 10 ວັນ ໃນຊຸດນີ້ວ່າ: ເພື່ອເປັນການສ້າງໃຫ້ຄະນະພັກບ້ານ, ອົງການຈັດຕັ້ງມະຫາຊົນຢູ່ໃນຂັ້ນຮາກຖານບ້ານ ໃຫ້ມີລະດັບຄວາມຮູ້ພື້ນຖານທາງດ້ານທິດສະດີການເມືອງ ແລະການປົກຄອງ ຕາມແນວທາງນະໂຍບາຍຂອງພັກ ແລະການຄຸ້ມຄອງຂອງລັດ ກໍ່ຄືອຸດົມການປ່ຽນແປງໃໝ່ຢ່າງມີຫຼັກການຂອງພັກ, ມີຄວາມຈົງຮັກພັກດີຕໍ່ປະເທດຊາດ, ມີຄວາມຫ້າວຫັນ, ເປັນແບບຢ່າງໃນທຸກຂົງເຂດວຽກງານ ເຮັດໃຫ້ການປະຕິບັດໜ້າທີ່ວຽກງານມີບາດກ້າວຂະຫຍາຍຕົວນັບມື້ນັບມີຄຸນນະພາບສູງຂຶ້ນ, ການຝຶກອົບຮົມໃນຄັ້ງນີ້ໄດ້ດຳເນີນມາແຕ່ວັນທີ່ 16-24 ສິງຫາ ປີ 2022, ມີສຳມະນາກອນທັງໝົດ 30 ທ່ານ, ຍິງ 8 ທ່ານ, ໃນນັ້ນ ມີອາຍຸສູງສຸດ 58 ປີ, ອາຍຸຕ່ຳສຸດ 26 ປີ. ລວມມີ 3 ພາກວິຊາຮຽນ, ມີ 19 ບົດ, ລວມ 87 ຊົ່ວໂມງເທົ່າກັບ 486 ໜ່ວຍກິດ, ມີວິຊາທິດທາງລວມ 4 ບົດ ເທົ່າກັບ 18 ຊົ່ວໂມງ, ວິຊາວຽກງານພັກ 7 ບົດ ເທົ່າ 25 ຊົ່ວໂມງ ແລະວິຊາບໍລິຫານການປົກຄອງ 8 ບົດ ເທົ່າ 32 ຊົ່ວໂມງ. ການຝຶກອົບຮົມທິດສະດີການເມືອງ ແລະການປົກຄອງໄລຍະ 10 ວັນສາມາດແບ່ງປະເພດດີເລີດກວມ 85.20%, ດີຫຼາຍກວມ 14.80% ລື່ນຄາດໝາຍຂອງແຜນການທີ່ວາງໄວ້.
ພ້ອມນັ້ນ, ຍັງໄດ້ຜ່ານຂໍ້ຕົກລົງຂອງໂຮງຮຽນການເມືອງ ແລະ ການປົກຄອງແຂວງ ວ່າດ້ວຍການມອບໃບຢັ້ງຢືນທິດສະດີການເມືອງ ແລະການປົກຄອງໄລຍະ 10 ວັນຊຸດທີ III ໃຫ້ແກ່ເລຂາພັກບ້ານ, ນາຍບ້ານຢູ່ເມືອງຫຼວງນ້ຳທາ ແຂວງຫຼວງນຳ້ທາ ຈຳນວນ 30 ທ່ານ; ຍິງ 8 ທ່ານ ໃຫ້ກຽດມອບໃບຢັ້ງຢືນຄັ້ງນີ້ໂດຍ: ທ່ານ ປທ ຄຳຟອງ ລາດຊະພົນ ຮອງຫົວໜ້າໂຮງຮຽນການເມືອງ ແລະການປົກຄອງແຂວງ.
ຂ່າວພາບ: ປອ ວັນນາໄຊ ບຸນຖາວອນ
ບັນນາທິການ: ປທ ບຸນປັນ ສຸມຸນທອງ