ວຽກງານຫໍສະໝຸດເປັນວຽກງານໜື່ງໃນການສະໜອງ, ບໍລິການຂໍ້ມູນຂ່າວສານໃຫ້ແກ່ພະນັກງານ, ຄູ-ອາຈານນັກສຶກສາ, ການຢືມ-ສົ່ງປື້ມ, ການຈັດລະບົບປື້ມ ແລະການເກັບມ້ຽນ, ການເຂົ້າລະຫັດ ແລະອື່ນໆ ເຊິ່ງບັນດາໜ້າວຽກເຫຼົ່ານີ້ ນັບມື້ນັບຫັນໄປສູ່ທັນສະໄໝ, ເມື່ອຫັນໄປສູ່ທັນສະໄໝແລ້ວ ຄວາມຮູ້ໃໝ່ທີ່ກ່ຽວກັບລະບົບໂປຣແກຣມ ແລະຄອມພີວເຕີ ຈຶ່ງມີບົດບາດສຳຄັນ ແລະຈຳເປັນຕໍ່ກັບການປະຕິບັດໜ້າທີ່ວຽກງານໃນການໃຫ້ບໍລິການ.
ສະນັ້ນ, ສູນຂໍ້ມູນຂ່າວສານການເມືອງ ແລະການປົກຄອງຈຶ່ງໄດ້ຈັດເຝິກອົບຮົມໃນຫົວຂໍ້: ການນໍາໃຊ້ເຄື່ອງມືເຕັກໂນໂລຊີດີຈິຕອນໃຫ້ແກ່ພະນັກງານຫໍສະໝຸດ ສມປຊ ແລະໂຮງຮຽນການເມືອງ-ການປົກຄອງທ້ອງຖິ່ນຢູ່ ສມປຊ ເປັນເວລາ 03 ວັນ (27-29 ກໍລະກົດ 2022). ໃນພິທີໃຫ້ກຽດເປັນປະທານໂດຍ: ທ່ານ ປທ ນ. ວະໄລລັກ ອະໄພ ຫົວໜ້າສູນຂໍ້ມູນຂ່າວສານການເມືອງ ແລະການປົກຄອງ, ມີຕາງໜ້າເຂົ້າຮ່ວມເຊັ່ນ: ຫ້ອງການ, ກົມ, ຄະນະຕ່າງໆ ແລະສູນຄົ້ນຄວ້າແນວຄິດໄກສອນ ພົມວິຫານ.
ສຳມະນາກອນເຝິກອົບຮົມເຂົ້າຮ່ວມ 19 ທ່ານ, ຍິງ 11 ທ່ານ (ພາຍໃນ ສມປຊ 3 ທ່ານ ແລະຕາງໜ້າໂຮງ ຮຽນການເມືອງ ແລະການປົກຄອງທ້ອງຖິ່ນລວມມີ 16 ແຂວງ, ແຂວງລະ 1 ທ່ານ) ຊຶ່ງເນື້ອໃນຂອງການເຝິກອົບຮົມ ລວມມີ 3 ເນື້ອໃນຄື:
1). ການແນະນຳເຄື່ອງມືຕ່າງໆສໍາລັບການສື່ສານໃນຂົງເຂດວຽກງານ ແລະການນຳໃຊ້ແອັບສໍາລັບວຽກງານ (Google Workspace), Gmail, Google Calendar, Google Meet, Google Form, Google Doc, Google Sheet, Google Slides, Google Drive;
2). ການບໍລິຫານແຟ້ມເອກະສານ ແລະການແບ່ງປັນຜູ້ໃຊ້ເທິງອອນໄລ (Share, Get Link, QR Code) ແລະການເຮັດບັດສະມາຊິກແບບ QR Code;
3). ການບັນທຶກຂໍ້ມູນປື້ມ, ຂໍ້ມູນສະມາຊິກລົງໂປຣແກຣມ PMB, ການນຳໃຊ້ໂປຣແກຣມ PMB (ໃນການບໍລິການຢືມ-ສົ່ງປື້ມ), ການນຳໃຊ້ໂປຣແກຣມ PMB (ກວດກາລາຍການປື້ມ, ກວດກາການສົ່ງປື້ມຊ້າ), ການນຳໃຊ້ ໂປຣແກຣມ PMB (ການຈັດການຜູ້ໃຊ້ງານໂປຣແກຣມ)
ທ່ານ ນ. ວາດສະໜາ ກິນອາພອນ ຮອງຫົວໜ້າພະແນກຫໍສະໝຸດ ໄດ້ໃຫ້ຮູ້ວ່າ: ການດໍາເນີນການເຝິກອົບຮົມໃນຄັ້ງນີ້ປະກອບດ້ວຍຄວາມຮູ້ທາງດ້ານທິດສະດີ ແລະພາກປະຕິບັດຕົວຈິງເປັນຕົ້ນແມ່ນ: ຄວາມໝາຍ ແລະຄວາມສຳຄັນຂອງການບໍລິຫານວຽກງານຫໍສະໝຸດ; ພ້ອມນັ້ນ ກໍ່ຍັງເປັນການເຝິກບັນດາການນໍາໃຊ້ໂປຣແກຣມ PMB ແລະສື່ຕ່າງໆທີ່ກ່ຽວຂ້ອງກັບວຽກງານຫໍສະໝຸດ ແລະຄະນະຮັບຜິດຊອບໄດ້ມີຄວາມເອົາໃຈໃສ່ສູງໃນການກະກຽມຄວາມພ້ອມໃນການຈັດເຝິກອົບຮົມ ແລະເຮັດໃຫ້ການເຝິກໃນຄັ້ງນີ້ມີຜົນສໍາເລັດຢ່າງຈົບງາມ;
ເພື່ອເປັນການຢັ້ງຢືນຜົນສຳເລັດຂອງການຝຶກອົງຮົມຄັ້ງນີ້ທ່ານ ປທ ນ. ວະໄລລັກ ອະໄພ ໄດ້ເປັນກຽດມອບໃບຢັ້ງຢືນຈຳນວນ 19 ທ່ານ, ຍິງ 11 ທ່ານ, ພ້ອມທັງໃຫ້ທິດຊີ້ນຳ ແລະໂອ້ລົມຕໍ່ກັບສຳມະນາກອນທີ່ສຳເລັດການເຝິກອົບຮົມຄັ້ງນີ້ວ່າ: ຈົ່ງນຳເອົາຄວາມຮູ້, ປະສົບການ ທີ່ໄດ້ຈາກການເຝິກອົບຮົມນຳໄປຈັດຕັ້ງຜັນຂະຫຍາຍເຂົ້າສູ່ວຽກງານຂອງຕົນໃຫ້ໄດ້ຮັບການຈັດຕັ້ງປະຕິບັດຢ່າງມີປະສິດທິຜົນ.
ຂ່າວ: ຕາອັອດ ແສນທະວີສຸກ
ຮູບພາບ: ນ. ທິດດາວອນ ດວງປະເສີດ
ບັນນາທິການ: ປທ ບຸນປັນ ສຸມຸນທອງ