ເພື່ອປະຕິບັດເນື້ອໃນ 4 ບຸກທະລຸ ຂອງພັກວາງອອກໃຫ້ປະກົດຜົນເປັນຈິງເທື່ອລະກ້າວ ໃນນັ້ນ, ແມ່ນການບຸກທະລຸທາງດ້ານຈິນຕະນາການ ແລະການພັດທະນາຊັບພະຍາກອນມະນຸດ ໃຫ້ຮັບຮູ້ທາງດ້ານທິດສະດີມາກ-ເລນິນ ໃຫ້ແກ່ພະນັກງານ; ສະມາຊິກພັກ ທີ່ເປັນເປົ້າໜາຍທົດແທນ ໃນສະເພາະໜ້າ ແລະຍາວນານ. ປະຕິບັດຕາມທິດຊີ້ນຳ ຂອງຄະນະປະຈຳພັກແຂວງ ໃນການກໍ່ສ້າງ, ບຳລຸງພະນັກງານ, ສະມາຊິກພັກໃຫ້ຮັບຮູ້, ເຂົ້າໃຈທິດສະດີມາກ-ເລນິນ, ແນວຄິດ ປະທານ ໄກສອນ ພົມວິຫານ, ເຮັດໃຫ້ພະນັກງານ, ສະມາຊິກພັກ ມີຄວາມເປັນເອກະພາບກັບອຸດົມການ, ແນວທາງຂອງພັກ ແລະຈັດຕັ້ງປະຕິບັດໜ້າທີ່ ຂອງຕົນຢ່າງມີປະສິດທິຜົນ. ໃນວັນທີ 13 ມີຖຸນາ 2022 ຢູ່ທີ່ສະໂມສອນ ເມືອງສິງ ແຂວງຫຼວງນໍ້າທາ ໄດ້ຈັດພິທີເປີດການຮຽນ-ການສອນທິດສະດີການເມືອງ-ການປົກຄອງ ລະບົບ 45 ວັນ ຊຸດທີ II ໃຫ້ແກ່ພະນັກງານ; ສະມາຊິກພັກ ຂົງເຂດສຶກສາທິການ ແລະກິລາ ຢູ່ເມືອງສິງ ແຂວງຫຼວງນໍ້າທາ.
ໃນພິທີ ທ່ານ ປທ ສິງໄຊ ວັນຄຳ ກຳມະການພັກແຂວງ ເລຂາໜ່ວຍພັກ, ຫົວໜ້າໂຮງຮຽນການເມືອງ ແລະການປົກຄອງແຂວງໃຫ້ກຽດເປັນປະທານ ແລະເປັນກຽດເຂົ້າຮ່ວມ ຂອງທ່ານ ປອ ຈັນພິພັກ ກອງຈຳປາ ກຳມະການພັກເມືອງ ເລຂາພັກເມືອງ ເຈົ້າເມືອງ ເມືອງສິງ; ມີທ່ານ ສົມຊາຍ ວັດທະນາທອນ ກຳມະການພັກເມືອງ ຫົວໜ້າຫ້ອງການສຶກສາ ແລະກິລາເມືອງສິງ, ມີບັນດາທ່ານແຂກຕາງໜ້າຫ້ອງການອອ້ມຂ້າງເມືອງ, ມີພະນັກງານ, ຄູ-ອາຈານ ແລະນັກສຶກສາ 45 ວັນ ເຂົ້າຮ່ວມຢ່າງພ້ອມພຽງ. ຫຼັງຈາກນັ້ນ, ຄະນະຈັດຕັ້ງພິທີກໍ່ໄດ້ຂຶ້ນຜ່ານຂໍ້ຕົກລົງ. ຈາກນັ້ນ, ທ່ານ ປທ ສິງໄຊ ວັນຄຳ ກຳມະການພັກແຂວງ ເລຂາໜ່ວຍພັກ, ຫົວໜ້າໂຮງຮຽນການເມືອງ ແລະ ການປົກຄອງ ແຂວງ ໄດ້ຂຶ້ນກ່າວເປີດຊຸດຮຽນ ຢ່າງເປັນທາງການ. ທ່ານ ປທ ແສງ ເຊືອຍສົມບັດ ຫົວໜ້າວິຊາການ ໄດ້ຂຶ້ນຜ່ານແຜນການຮຽນ-ການສອນ. ການເປີດຮຽນທິດສະດີການເມືອງ-ການປົກຄອງ ໃນຄັ້ງນີ້ແມ່ນມີຂຶ້ນໃນທ່າມກາງຄວາມຮຽກຮ້ອງຕ້ອງການ ຂອງໜ້າທີ່ການເມືອງ ຂອງພັກ ໃນວຽກງານບຸກທະລຸທາງດ້ານຈິນຕະນາການຕາມເນື້ອໃນກອງປະຊຸມໃຫຍ່ຂອງພັກຄັ້ງທີ IX-XI ທີ່ໄດ້ກຳນົດໃຫ້ບັນລຸຜົນເປັນຈິງເທື່ອລະກ້າວ. ແນໃສ່ສ້າງໃຫ້ພະນັກງານ, ສະມາຊິກພັກພາຍໃນໃຫ້ໄດ້ຮັບຮູ້ທິດສະດີມາກ-ເລນິນ ແລະແນວຄິດ ປະທານ ໄກສອນ ພົມວິຫານ ເພື່ອໃຫ້ເປັນພື້ນຖານໃນການນຳໄປສົມທຽບທິດສະດີ ແລະພຶດຕິກຳໃຫ້ຖືກຕ້ອງ ນຳໄປໝູນໃຊ້ເຂົ້າໃນຊີວິດຕົວຈິງ ພ້ອມທັງໝູນໃຊ້ເຂົ້າໃນໜ້າທີ່ວຽກງານ ຂອງຕົນໃຫ້ໄດ້ຮັບຜົນດີກວ່າເກົ່າ. ເພື່ອເຫັນໄດ້ຄວາມສຳຄັນໃນການພັດທະນາຊັບພະຍາກອນມະນຸດ ແລະບຸກທະລຸທາງດ້ານຈິນຕະນາການອັນໃໝ່, ສ້າງແນວຄວາມຄິດໃຫ້ເປັນລະບົບ, ເຂົ້າໃຈໂດຍພື້ນຖານໃນທິດສະດີມາກ-ເລນິນ ແລະແນວຄິດ ປະທານ ໄກສອນ ພົມວິຫານ. ສ້າງໃຫ້ພະນັກງານມີຄວາມເປັນເອກະພາບຕໍ່ແນວທາງນະໂຍບາຍຂອງພັກ, ເສີມຂະຫຍາຍຄວາມສາມັກຄີທັງພາຍໃນ ແລະພາຍນອກ, ເຮັດວຽກມີແບບແຜນ, ມີຫຼັກການ ແລະສັດຈະວິພາກ, ພ້ອມກັນຈັດຕັ້ງປະຕິບັດໜ້າທີ່ການເມືອງຂອງພັກໃຫ້ບັນລຸຜົນເປັນຈິງ ແລະກ້າວສູ່ຈຸດໝາຍສັງຄົມນິຍົມ. ສະນັ້ນ, ທາງຄະນະພັກ, ຄະນະນຳຂອງສະຫະພັນກຳມະບານແຂວງຈິ່ງຕັດສິນໃຈສູງໃນການກໍ່ສ້າງ; ຕໍ່ກັບການບຳລຸງສ້າງພະນັກງານ, ສະມາຊິກພັກ ທີ່ເປັນພະ ນັກງານສືບທອດທົດແທນພາຍໃນຂອງຕົນໃຫ້ມີຄວາມຮັບຮູ້ທິດສະດີມາກ-ເລນິນ; ຊຶ່ງເປັນແນວຄິດທິດສະດີພື້ນຖານຂອງພັກ ເຮົາ ກໍຄືພະນັກງານ-ສະມາຊິກພັກທຸກຄົນ ຕ້ອງໄດ້ຮັບຮູ້ ແລະເຂົ້າໃຈແຈ້ງ, ການກໍ່ສ້າງ ແລະບຳລຸງທິດສະດີໃນຄັ້ງນີ້ ໄດ້ຈັດເປັນພາກປົກກະຕິຮຽນວັນຈັນ ຫາ ວັນສຸກ ມີນັກສຶກສາທັງໝົດ 59 ຄົນ, ຍິງ 24 ຄົນ. ຊິຶ່ງຈະເລີ່ມຈັດຕັ້ງປະຕິບັດແຕ່ວັນທີ 13 ມີຖຸນາ 2022 ເປັນຕົ້ນໄປ, ຄາດຄະເນປະມານຕົ້ນເດືອນ 8 ສໍາເລັດ.
ການຮຽນ-ການສອນ ທິດສະດີການເມືອງ-ການປົກຄອງລະບົບ 45 ວັນປະກອບມີວິຊາຮຽນຄື: ມີ 5 ພາກວິຊາ
- ວິຊາ ປັດຊະຍາມາກ-ເລນິນ ມີ 8 ບົດ.
- ວິຊາ ເສດຖະສາດການເມືອງມາກ-ເລນິນ ມີ 10 ບົດ.
- ວິຊາ ລັດທິສັງຄົມນິຍົມວິທະຍາສາດ ມີ 8 ບົດ.
- ວິຊາ ກໍ່ສ້າງພັກ ມີ 6 ບົດ.
- ວິຊາ ພາກບໍລິຫານລັດ ແລະການປົກຄອງ 8 ບົດ.
ການຈັດຕັ້ງປະຕິບັດການຮຽນ-ການສອນທັງໝົດມີ 295 ຊົ່ວໂມງເທົ່າກັບ 18,43 ໜ່ວຍກິດ, ໃນນີ້ຂຶ້ນຫ້ອງບັນຍາຍຕົວຈິງມີ 196 ຊົ່ວໂມງ; ຄົ້ນຄວ້າ 84 ຊົ່ວໂມງ.
ຕອນທ້າຍ; ທ່ານ ປອ ຈັນພິພັກ ກອງຈຳປາ ກຳມະການພັກເມືອງ ເລຂາພັກເມືອງ ເຈົ້າເມືອງ ເມືອງສິງ; ໄດ້ໃຫ້ກຽດໂອ້ລົມຕໍ່ພິທີເປີດຊຸດຮຽນເຊຶ່ງທ່ານໄດ້ກ່າວຍ້ອງຍໍຊົມເຊີຍທາງຄະນະພັກ ແລະທຸກພາກສ່ວນທີ່ໄດ້ໃຫ້ຄວາມສຳຄັນ ເຊິ່ງໄດ້ສ່ອງແສງເຖິງຄວາມຕື່ນຕົວ ຂອງທຸກພາກສ່ວນ ແລະທ່ານໄດ້ກ່າວວ່າ: ການຮ່ຳຮຽນເຖິງວ່າຈະຮຽນໜ້ອຍ ຫຼື ຮຽນຫຼາຍ ກໍ່ລ້ວນແຕ່ມີຄຸນຄ່າທັງນັ້ນ. ເຊຶ່ງສະພາບປັດຈຸບັນການຮຽນແມ່ນທັນສະໄໝຫຼາຍຂຶ້ນ ການຄົ້ນຄວ້າຮ່ຳຮຽນກໍ່ງ່າຍ; ຄວາມຮູ້ແມ່ນຢູ່ໃນກຳມື ຂອງທຸກຄົນທີ່ສົນໃຈໃນການສຶກສາຮໍ່າຮຽນດ້ວຍຕົນເອງ.
ນອກນັ້ນ, ທ່ານຍັງໄດ້ຮຽກຮ້ອງມາຍັງຄະນະຮັບຜິດຊອບ, ມີບົດຮຽນອັນໃດກໍ່ໃຫ້ຊ່ວຍແບ່ງປັນແກ່ໂຮງຮຽນ, ຕິດຕາມການເຄື່ອນໄຫວ ຂອງນັກສຶກສາ ຊ່ວຍເຫຼືອເຊິ່ງກັນແລະກັນ ແກ້ໄຂບັນຫາທີ່ຫຍຸ້ງຍາກສັບສົນ ແລະຮຽກຮ້ອງໃຫ້ນັກສຶກສານຳເອົາບົດຮຽນໄປໝູນໃຊ້ຢ່າງມີຄວາມເປັນເອກະພາບ. ພ້ອມກັນຈັດຕັ້ງປະຕິບັດແນວທາງຂອງພັກ; ລະບຽບກົດໝາຍ ຂອງລັດຢ່າງເຂັ້ມງວດ. ເພື່ອປະກອບສ່ວນເຂົ້າໃນການສ້າງສາພັດທະນາປະເທດຊາດ ໂດຍສະເພາະກໍຄືເມືອງສິງ ແຂວງຫຼວງນ້ຳທາໃຫ້ມີຄວາມຈະເລີນຮຸ່ງເຮື່ອງ ແລະສີວິໄລເປັນກ້າວໆ.
ຂ່າວ/ພາບ: ປທ ນ. ມະນີລາ ແກ້ວລະກຳ
ບັນນາທິການ: ປທ ບຸນປັນ ສຸມຸນທອງ