ໜ່ວຍພັກຮາກຖານກົມຈັດຕັ້ງ-ພະນັກງານ ແລະກົມກວດກາຈັດພິທີເລື່ອນສະມາຊິກພັກສໍາຮອງຂຶ້ນເປັນສະມາຊິກພັກສົມບູນຢູ່ທີ່ຫ້ອງປະຊຸມຂອງສູນຂໍ້ມູນຂ່າວສານການເມືອງ ແລະການປົກຄອງ ຊັ້ນ 5 ໃນຕອນແລງວັນທີ 30 ພຶດສະພາ, ໂດຍການເປັນປະທານ ຂອງສະຫາຍ ຮສ ພູວົງ ອຸ່ນຄຳແສນ ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ.
ໃນພິທີດັ່ງກ່າວ ສະຫາຍ ວິໄລສິດ ພິມພັກດີ ຫົວໜ້າພະແນກພັກ-ປ້ອງກັນພັກ ຜ່ານຂໍ້ຕົກລົງວ່າດ້ວຍການເລື່ອນສະມາຊິກພັກສຳຮອງເປັນສະມາຊິກພັກສົມບູນ ໃຫ້ສະຫາຍ ນ. ນາດຕະຍາ ແກ້ວຄູນນະລາດ, ຊຶ່ງສະຫາຍໄດ້ເຂົ້າສຳຮອງຊຶ່ງເປັນໄລຍະເວລາທີ່ຜູ້ກຽ່ວໄດ້ຜ່ານການຝຶກຝົນຫຼໍ່ຫຼອມ ແລະທົດສອບໃນຂະບວນການວຽກງານຕົວຈິງ, ມີຜົນງານດີເດັ່ນ, ໄດ້ຮັບຄວາມເຊື່ອຖື ແລະໄວ້ວາງໃຈຈາກມະຫາຊົນ. ຈາກນັ້ນ, ສະຫາຍ ປອ ຄໍາຫຼ້າ ລໍວານໄຊ ເລຂາໜ່ວຍພັກຮາກຖານກົມຈັດຕັ້ງ-ພະນັກງານ ແລະກົມກວດກາ ໄດ້ມີຄໍາເຫັນກ່າວຮັບ ແລະມອບມະຕິຕົກລົງໃຫ້ສະມາຊິກພັກສົມບູນ.
ສະຫາຍ ຮສ ພູວົງ ອຸ່ນຄຳແສນ ໄດ້ມີຄຳເຫັນໂອ້ລົມ ແລະໃຫ້ທິດຊີ້ນຳຕໍ່ກັບສະມາຊິກພັກສົມບູນວ່າ:
- ໃຫ້ສະຫາຍ ມີຄວາມເຊື່ອໝັ້ນ ແລະເນັ້ນໜັກສືບຕໍ່ກໍ່ສ້າງພັດທະນາຕົນເອງຕື່ມໂດຍເລີ່ມຈາກການເອົາໃຈໃສ່ໃນການຄົ້ນຄວ້າຮ່ຳຮຽນ;
- ກຳແໜ້ນແນວທາງນະໂຍບາຍ, ກົດລະບຽບຂອງພັກ, ກົດໝາຍຂອງລັດໃຫ້ເລິກເຊິ່ງ, ມີຄວາມຫ້າວຫັນຕໍ່ໜ້າທີ່ວຽກງານ ແລະບຸກບືນຜ່ານຜ່າທຸກຂໍ້ຫຍຸ້ງຍາກໃນການປະຕິບັດໜ້າທີ່ວຽກງານ ຂອງຕົນເອງດ້ວຍຄວາມຮັບຜິດຊອບສູງ;
- ມີນ້ຳໃຈເສຍສະຫຼະ, ມີຄວາມອົດທົນ, ຖືຜົນປະໂຫຍດສ່ວນລວມສູງກວ່າຜົນປະໂຫຍດສ່ວນຕົວ, ມີຄວາມເປັນແບບຢ່າງໃນການດຳລົງຊີວິດ ທີ່ປອດໃສຂາວສະອາດ;
- ຮູ້ໃຫ້ກຽດຮູ້ໃຫ້ອະໄພເຊິ່ງກັນແລະກັນ, ສືບຕໍ່ພັດທະນາດ້ານອ່ອນຂອງຕົນເອງໃຫ້ດີຂຶ້ນ, ມີຄວາມຶສາມັກຄີເປັນປຶກແຜ່ນ ແລະຍຶດໝັ້ນໃນການປະກອບສ່ວນສ້າງລະບອບ ປະຊາທິປະໄຕ ປະຊາຊົນ ໃຫ້ກ້າວສູ່ຈຸດໝາຍສັງຄົມນິຍົມເທື່ອລະກ້າວ.
ຂ່າວ/ພາບ: ນ.ທິດດາວອນ ດວງປະເສີດ
ບັນນາທິການ: ປທ ບຸນປັນ ສຸມຸນທອງ