ຫໍສະໝຸດສະຖາບັນການເມືອງ ແລະ ການປົກຄອງແຫ່ງຊາດໄດ້ຮັບການອຸປະຖຳປື້ມຈາກ 2 ພາກສ່ວນຄື: ພະອາຈານໄພວັນ ມາລາທອງ ເຈົ້າອະທິການວັດໜອງບົວທອງ, ທ່ານ ດາວວີ ວົງໄຊ ຫົວໜ້າກົມອົງການຈັດຕັ້ງສາກົນ ກະຊວງຕ່າງປະເທດຊຶ່ງເປັນນັກສຶກສາຊັ້ນສູງເລັ່ງລັດ 5 ເດືອນ ຮຸ່ນທີ XXX ມອບປື້ມໃຫ້ກັບຫໍສະໝຸດ ສະຖາບັນການເມືອງ ແລະ ການປົກຄອງແຫ່ງຊາດ, ໂດຍການກ່າວຮັບຂອງ ທ່ານ ປທ ທະວີພອນ ສຸດທິວົງນໍລາດ ຮອງຫົວໜ້າ ສູນຂໍ້ມູນຂ່າວສານການເມືອງ ແລະການປົກຄອງ.
ເຊິ່ງລາຍລະອຽດມີດັ່ງລຸ່ມນີ້
- ປຶ້ມໝວດວັນນະຄະດີ, ນິທານ, ເລື່ອງສັ້ນ ຈໍານວນ 33 ຫົວ ລວມມູນຄ່າ 1.800.000 ກີບ.
- ປຶ້ມບົດລາຍງານແຫ່ງຊາດແບບສະໝັກໃຈ ແລະປຶ້ມແຜນປະຕິບັດງານແຫ່ງຊາດເພື່ອການຈັດຕັ້ງປະຕິ ບັດວາລະປີ 2030 ເພື່ອການພັດທະນາແບບຍືນຍົງຢູ່ ສປປ ລາວ ຈໍານວນ 15 ຫົວ ລວມມູນຄ່າ 1.800.000 ກີບ.
ປຶ້ມດັ່ງກ່າວ ເປັນປຶ້ມຄູ່ມືອັນລໍ້າຄ່າ ຂອງຜູ້ທີ່ມີຄວາມປາຖະໜາຈະເຝິກຕົນເອງໃຫ້ກາຍເປັນກະວີ. ຊຶ່ງສາມາດຮຽນຮູ້ຢ່າງເລິກເຊິ່ງ ເຂົ້າໄດ້ຢ່າງເຖິງຖອງ ດ້ວຍຫຼາຍແບບ, ຫຼາຍວິທີ, ຫຼາຍຊະນິດຂອງກາບບູຮານລາວ, ຊຶ່ງເປັນປຶ້ມທ້ອນໂຮມຂໍ້ມູນຫຼັກຖານໃນແງ່ມູມປະຫວັດສາດ, ວັດທະນະທໍາ-ສັງຄົມ ທີ່ກ່ຽວກັບຄວາມເປັນມາ ແລະສາລະມາແຕ່ຍຸກສະໄໝບູຮານ ເພື່ອສະທ້ອນໃຫ້ເຫັນເອກະລັກຄຸນຄ່າຂອງມູນມໍລະດົກ, ນອກນັ້ນ, ຍັງໃຫ້ຮູ້ກ່ຽວກັບບົດລາຍງານແຫ່ງຊາດແບບສະໝັກໃຈ ແລະແຜນປະຕິບັດງານແຫ່ງຊາດເພື່ອການຈັດຕັ້ງປະຕິບັດວາລະປີ 2030 ເພື່ອການພັດທະນາແບບຍືນຍົງຢູ່ ສປປ ລາວ.
ທ່ານ ປທ ທະວີພອນ ສຸດທິວົງນໍລາດ ໄດ້ສະແດງຄວາມຊົມເຊີຍນໍາ ພະອາຈານໄພວັນ ມາລາທອງ ແລະທ່ານ ດາວວີ ວົງໄຊ ທີ່ໄດ້ນຳເອົາປຶ້ມດັ່ງກ່າວມອບໃຫ້ຫໍສະໝຸດ ສມປຊ ເພື່ອໃຫ້ຫໍສະໝຸດ ສມປຊ ກາຍເປັນຄັງແຫ່ງຂໍ້ມູນຂ່າວສານທີ່ອຸດົມສົມບູນຂຶ້ນໄປເລື່ອຍໆ.
ຂ່າວ/ພາບ: ນ. ທິດດາວອນ ດວງປະເສີດ
ບັນນາທິການ: ປທ ບຸນປັນ ສຸມຸນທອງ