ໃນຕອນແລງວັນທີ 26 ເມສາ 2022 ທີ່ຫ້ອງປະຊຸມຊັ້ນ 2 ຕຶກຫ້ອງການ ສະຖາບັນການເມືອງ ແລະ ການປົກຄອງແຫ່ງຊາດ ໄດ້ຈັດຕັ້ງກອງປະຊຸມວິສາມັນ ຄັ້ງທີ II ປະຈໍາປີ 2022 ຂອງສະພາວິທະຍາສາດສະຖາບັນການເມືອງ ແລະ ການປົກຄອງແຫ່ງຊາດ ຊຸດທີ V ພາຍໃຕ້ການເປັນປະທານ ຂອງທ່ານ ຮສ ພູວົງ ອຸ່ນຄຳແສນ ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ໃນພິທີມີສະມາຊິກສະພາວິທະຍາສາດຄະນະປະຈຳ, ສະມາຊິກສະພາວິທະຍາສາດພາຍນອກ ພ້ອມດ້ວຍກອງເລຂາ ເຂົ້າຮ່ວມທັງໝົດ 20 ທ່ານ, ຍິງ 3 ທ່ານ.
ໃນພິທີ ທ່ານ ປອ ຄຳມອນ ຈັນທະຈິດ ຫົວໜ້າກົມຄຸ້ມຄອງການຄົ້ນຄວ້າວິທະຍາສາດ ພ້ອມດ້ວຍສະມະຊິກສະພາໄດ້ພ້ອມກັນລາຍງານຄືນ ແລະປຶກສາຫາລືຫົວຂໍ້ຂຽນວິທະຍານິພົນຈົບຊັ້ນປະລິນຍາໂທ ຮຸ່ນທີ XVII, ລາຍງານສະພາບການປັບປຸງໜັງສືແນະນໍາ ວ່າດ້ວຍການຂຽນບົດວິທະຍານິພົນຈົບຊັ້ນປະລິນຍາໂທ ເຊິ່ງເລີ່ມຈາກການນໍາສະເໜີ ຈາກຄະນະປັດຊະຍາ, ຄະນະລັດທິສັງຄົມນິຍົມວິທະຍາສາດ, ຄະນະເສດຖະສາດການເມືອງ ແລະຄຸ້ມຄອງເສດຖະກິດ, ຄະນະບໍລິຫານສາດ ແລະ ຄະນະກໍ່ສ້າງພັກ ແລະປະຫວັດສາດພັກ, ພ້ອມກັນນັ້ນ, ຄະນະປະຈໍາສະພາວິທະຍາສາດ ສມປຊ ໄດ້ປະກອບຄໍາຄິດ, ຄໍາເຫັນໃສ່ແຕ່ລະຫົວຂໍ້ໃຫ້ຖືກຕ້ອງເໝາະສົມສອດຄ່ອງກັບເງື່ອນໄຂປັດຈຸບັນເຊັ່ນ: ການໃຊ້ຄໍາສັບ, ການລຽງຄໍາສັບໃນຫົວຂໍ້…ນອກຈາກການປຶກສາຫາລືກ່ຽວກັບຫົວຂໍ້ປ້ອງກັນບົດຈົບຊັ້ນແລ້ວ ກອງປະຊຸມຍັງໄດ້ປຶກສາຫາລື ກ່ຽວກັບອາຈານແນະນໍາແຕ່ລະທ່ານທີ່ມີເງື່ອນໄຂຕາມໜັງສືແນະນໍາການຂຽນບົດປ້ອງກັນຈົບຊັ້ນປະລິນຍາໂທສະບັບປັບປຸງ.
ປະທານກອງປະຊຸມຫຼັງຈາກໄດ້ສັງລວມເນື້ອໃນບັນດາຫົວຂໍ້ບົດປ້ອງກັນ, ບັນດາຄຳຄິດຄຳເຫັນຕ່າງໆຂອງສະມາຊິກສະພາວິທະຍາສາດ ໄດ້ໃຫ້ທິດຊີ້ນຳຄື: ຮຽກຮ້ອງໃຫ້ແຕ່ລະຄະນະ, ເອກະພາບກັນ ພ້ອມກັນເອົາໃຈໃສ່ເປັນເຈົ້າການໃນການນໍາໃຊ້ຄໍາສັບ ແລະການລຽງຄໍາສັບໃນແຕ່ລະຫົວຂໍ້, ສະພາວິທະຍາສາດແຕ່ລະຄະນະຈົ່ງຍົກສູງຄວາມຮັບຜິດຊອບຕື່ມໃນການຈັດຕັ້ງປະຕິບັດແຜນການພາລະບົດບາດ ແລະໜ້າທີ່ຄວາມຮັບຜິດຊອບຂອງຕົນຢ່າງເປັນເຈົ້າການ ແລະມີຄວາມຮັບຜິດຊອບສູງ, ເພີ່ມທະວີຄວາມເປັນເຈົ້າການໃນການຄົ້ນຄວ້າວິທະຍາສາດໃຫ້ຫຼາຍຂື້ນ, ສະມາຊິກສະພາວິທະຍາສາດຂັ້ນຕ່າງໆ ຕ້ອງໄດ້ມີຜະລິດຕະພັນອອກມາຮັບໃຊ້ຢ່າງຕໍ່ເນື່ອງ ເພື່ອຮັບປະກັນຕໍ່ກັບການການຄົ້ນຄວ້າໃຫ້ມີປະສິດທິຜົນ.
ຂ່າວ/ພາບ: ນ. ທິດດາວອນ ດວງປະເສີດ
ບັນນາທິການ: ປທ ບຸນປັນ ສຸມຸນທອງ