ໃນວັນທີ 26/4/2022 ສູນຂໍ້ມູນຂ່າວສານການເມືອງ ແລະ ການປົກຄອງໄດ້ຈັດຕັ້ງກອງປະຊຸມສະຫຼຸບຖອດຖອນບົດຮຽນກ່ຽວກັບການຈັດຕັ້ງປະຕິບັດວຽກງານ ຂອງສູນຂໍ້ມູນຂ່າວສານການເມືອງ ແລະ ການປົກຄອງ ປີ 2021 ແລະ ທິດທາງແຜນການ ປີ 2022 ທີ່ສະຖາບັນການເມືອງ ແລະ ການປົກຄອງແຫ່ງຊາດ, ໂດຍການເປັນປະທານ ທ່ານ ປທ ນາງ ບຸນມີ ຈຸນລະຈັກ ຮອງເລຂາຄະນະບໍລິຫານງານພັກ, ຮອງຫົວໜ້າ ສມປຊ ແລະມີຜູ້ເຂົ້າຮ່ວມຕາງໜ້າຫ້ອງການ, ກົມ, ຄະນະ, ສູນຄົ້ນຄວ້າແນວຄິດໄກສອນ ພົມວິຫານ ແລະຕາງໜ້າຄະນະຫ້ອງ ນັກສຶກສາກໍໃຫ້ກຽດເຂົ້າຮ່ວມ.
ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອສະຫຼຸບຕີລາຄາຄືນ ວຽກງານສະຫຼຸບຖອດຖອນບົດຮຽນການຈັດຕັ້ງປະຕິບັດວຽກງານ ຂອງສູນຂໍ້ມູນຂ່າວສານການເມືອງ ແລະ ການປົກ ຄອງໃນໄລຍະ 2020-2021 ຜ່ານມາ. ໂດຍສະເພາະແມ່ນໄດ້ສຸມໃສ່ສະຫຼຸບການຈັດຕັ້ງປະຕິບັດໜ້າທີ່ວຽກງານຂອງ 3 ໜ້າວຽກຫຼັກໆຕົ້ນຕໍຄື: 1) ວຽກງານບໍລິການຂໍ້ມູນຂ່າວສານ ປະກອບມີໜ້າວຽກ: ການບໍລິການຫໍສະໝຸດ, ວຽກງານຂົນຂວາຍ ແລະຊອກຫາຊັບພະຍາກອນປື້ມເຂົ້້້າຫໍສະໝຸດ. 2) ວຽກງານວາລະສານ. 3) ວຽກງານຄົ້ນຄວ້າວິໄຈຂ່າວ.
ໃນພິທີໄດ້ຮັບຟັງການຜ່ານບົດສະຫຼຸບຈາກທ່ານ ປທ ນ. ວະໄລລັກ ອະໄພ ຫົວໜ້າສູນຂໍ້ມູນຂ່າວການເມືອງ ແລະການປົກຄອງ ເຊິ່ງທ່ານໄດ້ຍົກໃຫ້ເຫັນຜົນງານດ້ານຕັ້ງໜ້າຂອງທັງ 3 ພະແນກເປັນຕົ້ນ: ວຽກງານຫໍສະໝຸດ ການບໍລິການຢືມ-ສົ່ງປື້ມທັງໝົດ 11.034 ເທື່ອຄົນ (ແຜນການ 11.000 ເທື່ອຄົນ) ທຽບໃສ່ແຜນການແມ່ນລື່ນ 0,3%; ອອກບັດສະມາຊິກຫໍສະໝຸດໃໝ່ ແລະບັນທຶກເຂົ້າໂປຣແກຣມ PMB ໄດ້ 316 ບັດ; ສະໜອງປື້ມເຂົ້າຫ້ອງສະໝຸດໄດ້ 810 ຫົວ, ລົງທະບຽນປື້ມປ້ອງກັນ ແລະວິທະຍານິພົນໄດ້ 384 ຫົວ, ສ້ອມແປງປຶ້ມທີ່ເປ່ເພໄດ້ 85 ຫົວ, ວຽກງານວາລະສານ ຮັບບົດວາລະສານ ທັງໝົດ 465 ບົດ; ບົດທີ່ຜ່ານບັນນາທິການ ແລະສາມາດຈັດພິມໄດ້ 104 ບົດ. ສຳເລັດການຈັດພິມວາລະສານໄດ້ທັງໝົດ 12 ສະບັບເທົ່າກັບ 100% ຂອງ ແຜນການປີ ແລະວຽກງານວິໄຈຂ່າວ ສຳເລັດການຮີບໂຮມ ປື້ມສັງລວມນິຕິກຳຂອງ
ສມປຊ 1 ເຫຼັ້ມ (ໄລຍະປີ 1984-2003), ສັງລວມນິຕິກຳລຸ່ມກົດໝາຍຂົງເຂດການປົກຄອງ ແລະຄຸ້ມຄອງລັດ ຂອງລັດຖະບານ ຈຳນວນ 3 ເຫຼັ້ມ, ປຶ້ມບົດສູນທອນພົດປະທານ ທ່ານ ໄກສອນ ພົມວິຫານ 1 ເຫຼັ້ມ ຈໍານວນ 279 ໜ້າ, ສໍາເລັດການຈັດພິມ ບົດກ່າວເປີດ ກ່າວປິດກອງປະຊຸມຂອງ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ຊຸດທີ VII, ໄດ້ເຜີຍແຜ່ຂ່າວສານພາຍໃນ ສມປຊ ໂດຍຜ່ານຫຼາຍຊ່ອງທາງ ເຊັ່ນ: ຂ່າວການເຄື່ອນໄຫວພາຍໃນ ສມປຊ 212 ຂ່າວ, ຂ່າວສັງຄົມ(ຄັດຈາກໜັງສືພິມ)ໄດ້ 74 ບົດ, ສົ່ງຂ່າວສານລົງກຸ່ມວັອດແອັບ ຂອງອົງການຈັດຕັ້ງມະຫາຊົນ, ກຸ່ມນັກສຶກສາແຕ່ລະຫ້ອງຮຽນ ແລະກຸ່ມວອດແອັບຜູ້ຕາງໜ້າຂອງກົມ, ຄະນະຕ່າງໆ ສູນຕ່າງໆ ເພື່ອນຳເອົາຂ່າວໄປເຜີຍແຜ່ ຊຶ່ງໄດ້ທັງໝົດ 341 ຂ່າວ, ເອົາຂ່າວລົງເວບໄຊ ສມປຊ (www.nappa.gov.la) ໄດ້ 138 ບົດ, ສ້າງປ໋ອບອັບຂຶ້ນໜ້າເວບໄຊໃນໂອກາດວັນສໍາຄັນຕ່າງໆ ໄດ້ 7 ເຫດການ ແລະມີຜູ້ເຂົ້າຊົມເວບໄຊ 3.431 ເທື່ອຄົນ.
ໃນຕອນທ້າຍ ທ່ານ ປທ ນາງ ບຸນມີ ຈຸນລະຈັກ ປະທານກອງປະຊຸມໄດ້ມີຄຳເຫັນແລກປ່ຽນ ແລະ ເນັ້ນໜັກບາງບັນຫາດັ່ງນີ້:
1). ສືບຕໍ່ເອົາໃຈໃສ່ວຽກງານການເມືອງ-ແນວຄິດ ໃຫ້ພະນັກງານ, ຄູ-ອາຈານທົ່ວສູນຂໍ້ມູນຂ່າວສານ ໃຫ້ມີຄວາມອຸ່ນອ່ຽງທຸ່ນທ່ຽງ, ເຊື່ອໝັ້ນຕໍ່ການນໍາພາຂອງພັກ-ລັດ ກໍຄືຂອງທິດທາງແຜນການ ຂອງຄະນະພັກ, ຄະນະນໍາ ກໍຄືຄະນະສູນຂໍ້ມູນຂ່າວສານ ເພື່ອໃຫ້ພະນັກງານ, ຄູອາຈານມີ ຄວາມເປັນເອກະພາບໃນການຈັດຕັ້ງປະຕິບັດມະຕິຄໍາສັ່ງຕ່າງໆ ຂອງຂັ້ນເທິງໃຫ້ເຂັ້ມງວດ ພ້ອມນັ້ນ, ກໍເອົາໃຈໃສ່ຄວາມສາມັກຄີເປັນເອກະພາບໃນຖັນແຖວພະນັກງານ. 2) ດ້ານວຽກງານວິຊາສະເພາະ: ເພີ່ມທະວີຄວາມເປັນເຈົ້າການໃນການປະຕິບັດໜ້າທີ່ວຽກງານ ຂອງພະນັກງານ, ຄູ-ອາຈານພາຍໃນສູນຂໍ້ມູນຂ່າວສານໃຫ້ຫຼາຍຂຶ້ນເປັນຕົ້ນ: ຕ້ອງເຂົ້າເຖິງພາລະບົດບາດ, ໜ້າທີ່ຄວາມຮັບຜິດຊອບ ແລະປັບປຸງແບບແຜນວິທີເຮັດວຽກຂອງແຕ່ລະຄົນໃຫ້ດີ, ພ້ອມທັງປະສານສົມທົບກັນພາຍໃນຢ່າງເປັນລະບົບຫຼາຍຂຶ້ນກວ່າເກົ່າ. ເພີ່ມທະວີການພົວພັນຮ່ວມມືກັບພາກສ່ວນທີ່ກ່ຽວຂ້ອງທັງພາຍໃນ ແລະພາຍນອກສະຖາບັນໃຫ້ມີຄວາມກວ້າງຂວາງ ເຊັ່ນ: ສຳນັກຂ່າວຂ່າວສານປະເທດລາວ, ກົມສໍາເນົາເອກະສານ, ຫໍສະໝຸດພາຍໃນນະຄອນຫຼວງ ແລະພາກສ່ວນອື່ນໆ. 3). ສືບເອົາໃຈໃສ່ໃນການພັດທະນາສູນຂໍ້ມູນຂ່າວສານ ໃຫ້ເປັນສູນກາງໃນການສະຫນອງຂໍ້ມູນຂ່າວສານທາງດ້ານການເມືອງ-ການປົກຄອງ, ເສດຖະກິດ, ວັດທະນະທໍາ-ສັງຄົມ ເພື່ອຮັບໃຊ້ການຄົ້ນຄວ້າການຮຽນ-ການສອນ ຂອງພະນັກງານ, ຄູ-ອາຈານ, ນັກສຶກສາ, ນັກຄົ້ນຄວ້າ, ປັນຍາຊົນ ພາຍໃນ ແລະ ພາຍນອກສະຖາບັນ ໃຫ້ນັບມື້ນັບຂະຫຍາຍຕົວ ແລະມີຂໍ້ມູນທີ່ຫຼາກຫຼາຍ. 4). ຫັນຫໍສະໝຸດ ສມປຊ ໃຫ້ເປັນຫໍສະໝຸດ ດີຈີຕອນ ທີ່ສາມາດສະໜອງຂໍ້ມູນຂ່າວສານ ເອເລັກໂຕນິກ ເປັນຕົ້ນແມ່ນ ເຮັດໃຫ້ວາລະສານການເມືອງ-ການປົກຄອງ ເປັນເອເລັກໂທນິກ (EMagazines), ເຮັດປື້ມເອເລັກໂທນິກ (E-books) ເພື່ອໃຫ້ກາຍເປັນຫໍສະໝຸດທີ່ມີຂໍ້ມູນ ຂ່າວສານທີ່ທັນສະໄໝ ແລະກ້າວສູ່ຫໍສະໝຸດທີ່ໄດ້ລະດັບມາດຕະຖານສາກົນຂຶ້ນເທື່ອລະກ້າວ.
ຂ່າວ/ພາບ: ນ. ທິດດາວອນ ດວງປະເສີດ
ບັນນາທິການ: ຕາອັອດ ແສນທະວີສຸກ