ກອງປະຊຸມສຳມະນາວິຊາການ ລະຫວ່າງ ສະຖາບັນການເມືອງ ແລະ ການປົກຄອງແຫ່ງຊາດລາວ ແລະສະຖາບັນການປົກຄອງແຂວງກວາງຊີໃຕ້ຫົວຂໍ້: “ການແລກປ່ຽນບົດຮຽນດ້ານການຄຸ້ມຄອງ ບໍລິຫານປະເທດຂອງພັກປະຊາຊົນປະຕິວັດລາວ ແລະພັກກອມມູນິດຈີນ” ໄດ້ຈັດຂຶ້ນໃນວັນທີ 27 ເມສາ 2022 ໃນຮູບແບບອອນໄລ, ກອງປະຊຸມສຳມະນາໃນຄັ້ງນີ້ມີຄວາມໝາຍສຳຄັນຢ່າງຍິ່ງ ນອກຈາກເປັນການຄົ້ນຄວ້າແລກປ່ຽນບົດຮຽນທາງດ້ານທິດສະດີ ແລະພຶດຕິກຳທີ່ມີຊີວິດຊີວາແລ້ວ ຍັງຈະປະກອບສ່ວນເຂົ້າໃນການຈັດຕັ້ງຜັນຂະຫຍາຍແນວທາງ, ແຜນນະໂຍບາຍການຄຸ້ມຄອງ ບໍລິຫານປະເທດ ຂອງພັກຂອງແຕ່ລະປະເທດໃຫ້ເຂົ້າສູ່ລວງເລິກ.
ກອງປະຊຸມສຳມະນາໃນຄັ້ງນີ້ ຝ່າຍລາວນຳໂດຍ: ທ່ານ ປອ ດາວສະຫວັນ ເຄືອມີໄຊ ກຳມະການຄະນະພັກ, ຫົວໜ້າສູນຄົ້ນຄວ້າແນວຄິດ ໄກສອນ ພົມວິຫານ ພ້ອມດ້ວຍນັກວິທະຍາສາດ ພະນັກງານ, ຄູ-ອາຈານ ແລະ ຝ່າຍ ສປ ຈີນ ນຳໂດຍ: ທ່ານ ເຫວີຍຢື້ພິງ ຮອງຫົວໜ້າສະຖາບັນການປົກຄອງແຂວງກວາງຊີ ພ້ອມດ້ວຍນັກວິທະຍາສາດ ພະນັກງານ, ຄູ-ອາຈານ.
ພາຍໃນກອງປະຊຸມບັນດານັກວິທະຍາສາດທັງ 2 ຝ່າຍ ທີ່ເຂົ້າຮ່ວມກອງປະຊຸມໄດ້ຜ່ານບົດສຳມະນາວິຊາການ 6 ຫົວຂໍ້ຍ່ອຍ, ຊຶ່ງເນື້ອໃນບົດປະກອບຄຳເຫັນ ທີ່ນັກວິທະຍາສາດ ນຳສະເໜີຕໍ່ກອງປະຊຸມເຫັນວ່າມີຄວາມອຸດົມສົມບູນ, ສ້າງຄວາມກະຈ່າງແຈ້ງໄດ້ໃນຫຼາຍບັນຫາ, ການວິເຄາະ, ວິໄຈແຕ່ລະບັນຫາເຫັນວ່າ ມີວິທີວິທະຍາທີ່ຊັດເຈນ ດ້ວຍການນຳໃຊ້ ວິທີສັດຈະວິພາກວັດຖຸນິຍົມ ຂອງລັດທິມາກ-ເລນິນ ແລະວິທີວິທະຍາໃນການຄົ້ນຄວ້າທິດສະດີ ແລະພຶດຕິກຳ ທີ່ສອດຄ່ອງໃນການຄຸ້ມຄອງບໍລິຫານປະເທດ ຂອງພັກກ່ຽວກັບການສ້າງລັດທີ່ປົກຄອງດ້ວຍກົດໝາຍ ດ້ວຍການນຳສະເໜີທັດສະນະໃນການປັບປຸງອົງການນິຕິບັນຍັດໃຫ້ເປັນລະບົບຄົບຊຸດ; ປັບປຸງອຳນາດລັດໃຫ້ມີຄວາມເປັນເອກະພາບຕາມແນວທາງຄຸ້ມຄອງບໍລິຫານປະເທດຂອງພັກ. ພ້ອມທັງໄດ້ເນັ້ນໜັກວ່າ: ຄວນເອົາໃຈໃສ່ໃນການແບ່ງຂັ້ນຄຸ້ມຄອງ ພ້ອມທັງເອົາໃຈໃສ່ປັບປຸງກົງຈັກການບໍລິຫານລັດຂັ້ນສູນກາງ ແລະທ້ອງຖິ່ນ; ເພີ່ມທະວີການຄຸ້ມຄອງລັດຖະບານໃຫ້ເປັນລະບົບ ແລະເຂັ້ມງວດ; ຈັດຕັ້ງຜັນຂະຫຍາຍນິຕິກຳ ແລະລະບຽບການບໍລິຫານຢ່າງແຂງແຮງ ແລະເລິກເຊິ່ງ ແນໃສ່ເຮັດໃຫ້ການແບ່ງຂັ້ນຄຸ້ມຄອງ ໃນລະບົບການບໍລິຫານລັດຂອງພັກ, ມີການຫັນປ່ຽນທີ່ຕັ້ງໜ້າ. ການແບ່ງຂັ້ນຄຸ້ມຄອງຕ້ອງໄປພ້ອມກັບແບ່ງຄວາມຮັບຜິດຊອບ, ຜົນປະໂຫຍດ ແລະງົບປະມານ.
ກອງປະຊຸມຍັງໄດ້ຮັບຟັງການແລກປ່ຽນຄໍາເຫັນບັນດານັກວິທະຍາສາດຂອງຝ່າຍທີ່ໄດ້ສົນທະນາກັນ, ແລກປ່ຽນບົດຮຽນໃນແຕ່ລະບັນຫາດ້ວຍຄວາມຈິງໃຈ ແລະກົງໄປກົງມາເຊິ່ງມີຄວາມກະຈ່າງແຈ້ງທັງໃນແງ່ທິດສະດີວິທະຍາສາດ ແລະພຶດຕິກຳທີ່ມີຊີວິດຊີວາ, ມີຄວາມໝາຍສໍາຄັນໃຫ້ແກ່ການສືບຕໍ່ນຳພາຄຸ້ມຄອງບໍລິຫານປະເທດຂອງພັກປະຊາຊົນປະຕິວັດລາວ ແລະພັກກອມມູນິດຈີນ.
ໃນຕອນທ້າຍກອງປະຊຸມ ທ່ານ ປອ ດາວສະຫວັນ ເຄືອມີໄຊ ແລະ ທ່ານເຫວີຍຢື້ພິງ ຕ່າງຝ່າຍໄດ້ສະແດງຄວາມຊົມເຊີຍຕໍ່ກັບນັກວິທະຍາສາດ, ບັນດາພະນັກງານ, ຄູ-ອາຈານ ຂອງສອງສະຖາບັນທີ່ໄດ້ສຸມທຸກປັນຍາກຳລັງວັງຊາເຂົ້າໃນການຂີດຂຽນເຮັດໃຫ້ກອງປະຊຸມຄັ້ງນີ້ ດໍາເນີນໄປດ້ວຍຜົນສຳເລັດອັນຈົບງາມ ແລະໄດ້ສ້າງສາຍພົວພັນມິດຕະພາບອັນເປັນມູນເຊື້ອ, ການເປັນຄູ່ຮ່ວມຍຸດທະສາດຮອບດ້ານ, ໝັ້ນຄົງຍາວນານ ຕາມທິດ 4 ດີ ແລະສາຍພົວພັນແບບຄູ່ຮ່ວມຊາຕາກໍາສັງຄົມນິຍົມ ທີ່ບໍ່ສາມາດທັບມ້າງໄດ້ ລະຫວ່າງ ສອງພັກ, ສອງລັດ ແລະປະຊາຊົນສອງຊາດລາວ-ຈີນ, ຈີນ-ລາວຈົ່ງໝັ້ນຄົງທະນົງແກ່ນ.
ຂ່າວ: ຕາອັອດ ແສນທະວີສຸກ
ຮູບພາບ: ນ. ທິດດາວອນ ດວງປະເສີດ
ບັນນາທິການ: ປທ ບຸນປັນ ສຸມຸນທອງ