ໃນຕອນເຊົ້າວັນທີ 19 ເມສາ 2022 ນີ້ຢູ່ທີ່ສະໂມສອນ ເມືອງວຽງພູຄາ ແຂວງຫຼວງນ້ຳທາໄດ້ຈັດພິທີເປີດຊຸດຮຽນທິດສະດີການເມືອງ-ການປົກຄອງ ໄລຍະ 10 ວັນ ຊຸດທີ II ໃຫ້ເລຂາພັກບ້ານ, ນາຍບ້ານ ຢູ່ເມືອງວຽງພູຄາ ແຂວງຫຼວງນໍ້າທາ. ທັງນີ້ກໍເພື່ອເປັນການຈັດຕັ້ງປະຕິບັດຕາມເນື້ອໃນ ຂອງກອງປະຊຸມໃຫຍ່ ຂອງພັກໃນແຕ່ລະໄລຍະ ໃຫ້ປະກົດຜົນເປັນຈິງເທື່ອລະກ້າວ. ໂດຍເປັນປະທານ ຂອງທ່ານ ປທ ສິງໄຊ ວັນຄຳ ກຳມະການພັກແຂວງ ເລຂາໜ່ວຍພັກ, ຫົວໜ້າໂຮງຮຽນການເມືອງ ແລະ ການປົກຄອງແຂວງ. ເປັນກຽດເຂົ້າຮ່ວມ ຂອງທ່ານ ຕຽງສະໝອນ ພອນປະເສີດ ກຳມະການພັກແຂວງ, ເລຂາພັກ, ເຈົ້າເມືອງໆເມືອງວຽງພູຄາ ແຂວງຫຼວງນໍ້າທາ; ພ້ອມດ້ວຍບັນດາທ່ານທີ່ເປັນຄະນະຮັບຜິດຊອບການຝຶກອົບຮົມໃນຄັ້ງນີ້, ມີຕົວແທນມາຈາກ ຫ້ອງວ່າການເມືອງ, ຄະນະໂຄສະນາອົບຮົມເມືອງ, ຄະນະຈັດຕັ້ງເມືອງ, ອົງການຈັດຕັ້ງມະຫາຊົນອ້ອມຂ້າງພາຍໃນເມືອງ, ຕະຫຼອດຮອດພະນັກງານຄູ-ອາຈານ ແລະນັກຝຶກອົບຮົມ 10 ວັນ ເຂົ້າຮ່ວມຢ່າງພ້ອມພຽງ.
ໃນພິທີ, ຄະນະຈັດຕັ້ງພິທີກໍໄດ້ຂຶ້ນຜ່ານຂໍ້ຕົກລົງ ແລະທ່ານ ປທ ສິງໄຊ ວັນຄຳ ກຳມະການພັກແຂວງ ເລຂາໜ່ວຍພັກ, ຫົວໜ້າໂຮງຮຽນການເມືອງ ແລະ ການປົກຄອງແຂວງ ໄດ້ຂຶ້ນກ່າວເປີດຊຸດຝຶກອົບຮົມ ຢ່າງເປັນທາງການ. ຈາກນັ້ນ ທ່ານ ແອທອງ ບຸນຖາວອນ ຮອງຫົວໜ້າວິຊາການ ໄດ້ຂຶ້ນຜ່ານແຜນການຮຽນ-ການສອນຝຶກອົບຮົມທິດສະດີໃນຄັ້ງນີ້ ຈະໄດ້ຈັດຕັ້ງປະຕິບັດການຮຽນ-ການສອນທັງໝົດ 87 ຊົ່ວໂມງ ໃນນັ້ນ, ຊົ່ວໂມງຂຶ້ນຫ້ອງຟັງບັນລະຍາຍຕົວຈິງ 64 ຊົ່ວໂມງ, ຄົ້ນຄວ້າສຳມະນາ ແລະ ແກ້ຂໍ້ຂ້ອງໃຈ 11 ຊົ່ວໂມງ, ກວດກາປະເມີນຜົນ 12 ຊົ່ວໂມງ, ລວມມີ 3 ກຸ່ມວິຊາຄື: ກຸ່ມວິຊາທິດທາງລວມມີ 4 ບົດ; ກຸ່ມວິຊາວຽກງານພັກມີ 7 ບົດ ແລະກຸ່ມວິຊາວຽກງານບໍລິຫານ ແລະການປົກຄອງມີ 8 ບົດ, ກໍານົດເວລາຈັດຕັ້ງປະຕິບັດ ໂດຍເລີ່ມແຕ່ວັນທີ 19 ເມສາ ເຖິງ 29 ເມສາ 2021 ສໍາເລັດການຝຶກອົບຮົມ. ກໍານົດເວລາຮຽນທັງໝົດ 10 ວັນ.
ທ່ານ ຕຽງສະໝອນ ພອນປະເສີດ ກຳມະການພັກແຂວງ, ເລຂາພັກ, ເຈົ້າເມືອງໆວຽງພູຄາ ແຂວງຫຼວງນໍ້າທາ ໄດ້ໃຫ້ກຽດໂອ້ລົມຕໍ່ພິທີເປີດຊຸດຮຽນ ເຊິ່ງທ່ານໄດ້ກ່າວຍ້ອງຍໍຊົມເຊີຍທາງຄະນະພັກ ແລະທຸກພາກສ່ວນທີ່ໄດ້ໃຫ້ຄວາມສຳຄັນເຊິ່ງໄດ້ສ່ອງແສງເຖິງຄວາມຕື່ນຕົວຂອງທຸກພາກສ່ວນ ແລະທ່ານໄດ້ກ່າວວ່າ: ການຮ່ຳຮຽນເຖິງວ່າຈະຮຽນໜ້ອຍແຕ່ໃຫ້ໄດ້ຮັບປະສິດທິຜົນສູງ, ການຄົ້ນຄວ້າຮ່ຳຮຽນແມ່ນມີຄວາມສຳຄັນຄື
1). ການຮຽນທິດສະດີມັນເປັນພື້ນຖານແນວຄິດ ໃຫ້ແກ່ຕົວເຮົາເອງເຫັນແຈ້ງ ແລະກາຍເປັນພື້ນ ຖານ, ສ້າງຄວາມໜັກແໜ້ນຂຶ້ນຕື່ມອີກ.
2). ສາມາດປຽບທຽບໃນຕອນບໍ່ທັນຮຽນ ແລະຮຽນຈົບໄປແລ້ວ ວ່າອັນໃດຜິດ ແລະອັນໃດຖືກ.
3). ນັກຝຶກອົບຮົມຕ້ອງເອົາໃຈໃສ່ໃນການຄົ້ນຄວ້າຮໍ່າຮຽນ ແລະນຳເອົາພຶດຕິກຳຕົວຈິງທີ່ຕົນເຄີຍຈັດຕັ້ງປະຕິບັດ ຫຼື ພົບພໍ້ຢູ່ພາຍໃນບ້ານທີ່ຜ່ານສົນທະນາແລກປ່ຽນບົດຮຽນກັບນັກຝຶກອົບຮົມດ້ວຍກັນ ແລະຄູອາຈານຜູ້ທີ່ຂຶ້ນຫ້ອງບັນລະຍາຍ, ເພີ່ມທັດສະນະຫຼັກໝັ້ນການເມືອງໃຫ້ແກ່ຕົນເອງ, ມີການຄົ້ນຄວ້າເລິກເຊິ່ງ ແລະມີຄວາມຕັ້ງໃຈປະກອບສ່ວນເຂົ້າໃນການເຄື່ອນໄຫວວຽກງານລວມ ຂອງໂຮງຮຽນວາງອອກ, ມີຄວາມຮັບຜິດຊອບສູງ ແລະມີສະຕິຕໍ່ການຈັດຕັ້ງໃຫ້ເຂັ້ມງວດ.
4). ຄະນະພັກ ຂອງໂຮງຮຽນການເມືອງ ແລະການປົກຄອງ ຕ້ອງມີຄວາມສາມັກຄີກັນ; ແບ່ງຄວາມຮັບຜິດຊອບໃຫ້ກັນຢ່າງລະອຽດ, ສ່ອງແສງລາຍງານໃຫ້ຈະແຈ້ງ ແລະໃຫ້ເບິ່ງຄືນວ່າອັນໃດບໍ່ສອດຄ່ອງ.
5). ພະນັກງານ, ຄູອາຈານທີ່ຂຶ້ນຫ້ອງສອນຕ້ອງແຕ່ງບົດສອນໃຫ້ມັນແທດເໝາະກັບສະພາບຄວາມເປັນຈິງ ແລະປັບປຸງບົດສອນໃຫ້ເຂົ້າກັບສະພາບການປ່ຽນແປງໃໝ່ ແລະໃຫ້ເໜາະສົມກັບລະດັບຂອງນັກຝຶກອົບຮົມ.
ຂ່າວ/ພາບ: ປທ ນ. ມະນີລາ ແກ້ວລະກໍາ
ບັນນາທິການ: ຕາອັອດ ແສນທະວີສຸກ