ກອງປະຊຸມຄັ້ງນີ້; ແມ່ນກອງປະຊຸມສໍາມະນາວິທະຍາສາດທີ່ ໄດ້ຄົ້ນຄວ້າລົງເລິກ, ສ້າງຄວາມກະຈ່າງແຈ້ງທາງດ້ານວິທະຍາສາດ ກ່ຽວກັບຫົວຂໍ້: ວຽກງານປ້ອງກັນຊາດ-ປ້ອງກັນຄວາມສະຫງົບໃນສະພາບການໃໝ່ ເພື່ອຕອບສະໜອງໃຫ້ແກ່ຄວາມຮຽກຮ້ອງຕ້ອງການ ຂອງວຽກງານການຄົ້ນຄ້ວາວິທະຍາສາດ ແລະເຕັກໂນໂລຊີຂອງຍຸກສະໄໝປັດຈຸບັນ, ເຊື່ອມໂຍງແລະການປະຕິວັດອຸດສາຫະກຳ 4.0 (ປະຕິວັດອຸດສາຫະກຳຄັ້ງທີ IV), ແນໃສ່ປົກປັກຮັກສາຄວາມສະຫງົບທາງດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມ, ກໍ່ສ້າງພະນັກງານຕິດພັນກັບການພັດທະນາເສດຖະກິດ-ສັງຄົມຂອງປະເທດຊາດກ້າວໄປສູ່ຄວາມຮັ່ງມີ, ເຂັ້ມແຂງ, ໂປ່ງໃສ, ຍຸຕິທຳ ແລະທີ່ສຳຄັນກອງປະຊຸມຄັ້ງນີ້ເປັນຄັ້ງທີ IV ທີ່ 4 ສະຖາບັນຮ່ວມກັນຈັດຂຶ້ນເພື່ອຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ປະຊາຊົນປະຕິວັດລາວ, ມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງປ້ອງກັນຄວາມສະຫງົບ, ເຊື່ອມສານກັບການຈັດຕັ້ງປະຕິບັດ 4 ແຜນງານໃຫຍ່ 41 ໂຄງການຂອງກະຊວງປ້ອງກັນຄວາມສະຫງົບ ແລະຄວບຄູ່ກັບການຈັດຕັ້ງປະຕິບັດມະຕິກອງປະຊຸມໃຫຍ່ຂອງອົງຄະນະພັກ ທັງ 4 ສະຖາບັນວາງອອກໃຫ້ປະກົດຜົນເປັນຈິງ.
ໃນພິທີໃຫ້ກຽດເປັນປະທານຮ່ວມໂດຍ: ທ່ານ ພົຈວ. ປອ. ວົງເຊໂດນ ພັນທະແກ້ວ, ກຳມະການຄະນະພັກກະຊວງປ້ອງກັນຄວາມສະຫງົບ, ຫົວໜ້າອໍານວຍການ ວິທະຍາຄານຕໍາຫຼວດປະຊາຊົນ, ທ່ານ ຮສ ພູວົງ ອຸ່ນຄຳແສນ, ກຳມະການສູນກາງພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ທ່ານ ພົຈວ. ປອ. ສົງກາ ບຸນຄຸນ, ຄະນະພັກວິທະຍາຄານ, ຮອງຫົວໜ້າການທະຫານ, ວິທະຍາຄານປ້ອງກັນຊາດ ໄກສອນ ພົມວິຫານ, ທ່ານພົຈວ. ປອ. ວັນສົມ ສີສົມບັດ ກຳມະການຄະນະພັກກະຊວງ, ຫົວໜ້າວິທະຍາຄານປ້ອງກັນຄວາມສະຫງົບແຫ່ງຊາດ, ພ້ອມດ້ວຍພະນັກງານ, ຄູ-ອາຈານ ຕ່າງໜ້າ 4 ຝ່າຍເຂົ້າຮ່ວມ.
ໃນກອງປະຊຸມໄດ້ຜ່ານບົດວິທະຍາສາດທີ່ເສີມຂະຫຍາຍຄວາມຮັບຜິດຊອບຂອງຕົນ ເຂົ້າໃນການຄົ້ນຄວ້າ, ວິເຄາະ, ວິໄຈ ຢ່າງເລິກເຊິ່ງ, ສ້າງຄວາມກະຈ່າງແຈ້ງ ດ້ວຍຫຼາຍຮູບ, ຫຼາຍສີສັນ ທີ່ມີເນື້ອໃນອຸດົມສົມບູນ ແລະນໍາສະເໜີແນວຄວາມຄິດຂອງຕົນຕໍ່ຫົວຂໍ້: “ຄວາມເປັນລະບຽບຮຽບຮ້ອຍ, ປອດໄພຂອງສັງຄົມ ແມ່ນໜ້າທີ່ພື້ນຖານໃຫ້ແກ່ການພັດທະນາປະເທດຊາດໃນເງື່ອນໄຂໃໝ່” ເຊິ່ງເປັນຫົວຂໍ້ຫຼັກຂອງກອງປະຊຸມ ແລະໄດ້ຮັບຟັງການນໍາສະເໜີຂອງນັກວິທະຍາສາດ ທັງໝົດ 8 ຫົວຂໍ້ຄື:
1. ປຸກລະດົມຂົນຂວາຍມະຫາຊົນ ເຂົ້າຮ່ວມວາລະແຫ່ງຊາດແກ້ໄຂບັນຫາເສບຕິດ ຢູ່ ສປປ ລາວ.
2. ສະກັດກັ້ນ ແລະ ຕ້ານປະກົດການຫຍໍ້ທໍ້ທາງດ້ານວັດທະນະທໍາ ຢູ່ປະເທດເຮົາ ໃນເງື່ອນໄຂໃໝ່.
3. ສ້າງກໍາລັງປ້ອງກັນຊາດຕາມທິດປະຕິວັດ, ມີແບບແຜນ ແລ ທັນສະໄໝ ຮັບປະກັນໃຫ້ແກ່ຄວາມໝັ້ນຄົງຂອງຊາດ.
4. ຍົກສູງສະຕິເຄົາລົບກົດໝາຍຂອງພົນລະເມືອງ ເພື່ອສ້າງລັດທີ່ປົກຄອງດ້ວຍກົດໝາຍ.
5. ປັບປຸງອົງການສືບສວນ-ສອບສວນ ຂອງເຈົ້າໜ້າທີ່ຕຳຫຼວດໃຫ້ມີຄວາມຮັດກຸມ, ໂປ່ງໃສ, ມືອາຊີບ ແລະຍຸຕິທຳ.
6. ສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະຮອບດ້ານໃນຖັນແຖວພະນັກງານ ຢູ່ປະເທດເຮົາ.
7. ຈັດຕັ້ງ, ນຳໃຊ້ກຳລັງເຄື່ອນທີ່ຂອງກະຊວງປ້ອງກັນປະເທດ ເຂົ້າຮ່ວມຕ້ານຂະບວນການກໍ່ກະບົດລຸກຮື້ຂຶ້ນ.
8. ປັບປຸງວຽກງານຄຸ້ມຄອງລັດດ້ານຄວາມສະຫງົບ ແລະຄວາມເປັນລະບຽບຮຽບຮ້ອຍຂອງສັງຄົມ ຢູ່ປະເທດເຮົາ.
ຊຶ່ງທັງ 8 ຫົວຂໍ້ນັ້ນແມ່ນບົດຄົ້ນຄວ້າກ່ຽວກັບການຕັ້ງບັນຫາ, ເນື້ອໃນທີ່ມີຄວາມກະຈ່າງແຈ້ງພໍສົມຄວນ, ພ້ອມກັນນັ້ນກໍໄດ້ສະຫຼຸບຕີລາຄາຢັ້ງຢືນໃຫ້ເຫັນຜົນສຳເລັດ ແລະຂໍ້ຄົງຄ້າງຈຳນວນໜຶ່ງ, ເຖິງວ່າຍັງບໍ່ທັນເລິກເຊິ່ງໃນຄຳຄິດຄຳເຫັນຂອງບັນດານັກວິທະຍາສາດ, ແຕ່ກໍເປັນພື້ນຖານໃຫ້ພວກເຮົາສາມາດສະຫຼຸບຕີລາຄາໄດ້.ຈາກນັ້ນ, ນັກວິທະຍາສາດກໍໄດ້ນໍາສະເໜີຄວາມສຳຄັນກ່ຽວກັບ “ຄວາມເປັນລະບຽບຮຽບຮ້ອຍ, ປອດໄພຂອງສັງຄົມ ແມ່ນໜ້າທີ່ພື້ນຖານໃຫ້ແກ່ການພັດທະນາປະເທດຊາດໃນເງື່ອນໄຂໃໝ່”, ເນື້ອໃນແຕ່ລະບົດແມ່ນໄດ້ສະຫຼຸບສັງລວມຢ່າງລະອຽດຖີ່ຖ້ວນ, ພ້ອມທັງສະຫຼຸບບັນຫາໃຫ້ເຫັນປະເດັນທີ່ພວກເຮົາຈະຕ້ອງໄດ້ສືບຕໍ່ຄົ້ນຄວ້າໃຫ້ເລິກເຊິ່ງຕື່ມອີກ. ບົດຄົ້ນຄວ້າໄດ້ຍົກໃຫ້ເຫັນເນື້ອໃນສຳຄັນຢ່າງພາວະວິໄສ, ໂດຍອີງໃສ່ຫຼັກການຂອງພັກໂດຍກົງ, ຮອບດ້ານ ເຊິ່ງໄດ້ຢັ້ງຢືນໃຫ້ເຫັນວ່າ: ພັກມີການນໍາພາທາງດ້ານການເມືອງທີ່ຖືກຕ້ອງ, ມີວິຊາສະເພາະທີ່ແນ່ນອນ, ມີເຕັກນິກທີ່ຖືກຕ້ອງ; ການນຳພາທີ່ຖືກຕ້ອງຂອງພັກ ກໍຄືແສງສະຫວ່າງຊີ້ທິດເຍືອງທາງຊ່ວຍໃຫ້ທຸກກຳລັງໄປຖືກທິດ ກາຍເປັນກໍາລັງແຮງທີ່ເຮັດສຳເລັດໜ້າທີ່, ສືບຕໍ່ເປັນກໍາລັງທີ່ມີບົດບາດສຳຄັນຄຽງຄູ່ກັບທີ່ຕັ້ງ, ບົດບາດ, ພາລະໜ້າທີ່ໃນການປົກປັກຮັກສາ “ຄວາມເປັນລະບຽບຮຽບຮ້ອຍ, ປອດໄພຂອງສັງຄົມ ແມ່ນໜ້າທີ່ພື້ນຖານໃຫ້ແກ່ການພັດທະນາປະເທດຊາດໃນເງື່ອນໄຂໃໝ່”, ບົດຢ່ອຍກໍໄດ້ຕີລາຄາຢ່າງຊັດເຈນແລ້ວ, ແຕ່ຢູ່ໃນນີ້ຢາກເນັ້ນຕື່ມວ່າ:ບົດບາດເປັນຫຼັກແຫຼ່ງ ໃນການນຳພາ-ພາລະກິດປົກປັກຮັກສາ ແລະສ້າງສາພັດທະນາປະເທດຊາດ ແລະບົດບາດອື່ນໆ;ນອກຈາກນັ້ນ ກໍແມ່ນໜ້າທີ່ຂອງກຳລັງປ້ອງກັນຊາດ-ປ້ອງກັນຄວາມສະຫງົບ.
ຂ່າວ: ຕາອັອດ ແສນທະວີສຸກ
ຮູບພາບ: ນ. ທິດດາວອນ ດວງປະເສີດ
ບັນນາທິການ: ປທ ບຸນປັນ ສຸມຸນທອງ