ໃນວັນພຸດທີ 16 ມີນາ 2022 ຢູ່ສະຖາບັນການເມືອງ ແລະການປົກຄອງແຫ່ງຊາດ ໄດ້ຈັດຕັ້ງກອງປະຊຸມສາມັນ ເທື່ອທີ 3 (ປະຈໍາປີ 2021) ຂອງສະພາວິທະຍາສາດ ຊຸດທີ V ສະຖາບັນການເມືອງ ແລະການປົກຄອງແຫ່ງຊາດຂຶ້ນພາຍໃຕ້ການເປັນປະທານ ຂອງທ່ານ ຮສ ພູວົງ ອຸ່ນຄໍາແສນ ກໍາມະການສູນກາງພັກ ປະທານສະພາວິທະຍາສາດ, ຫົວໜ້າສະຖາບັນການເມືອງ ແລະການປົກຄອງແຫ່ງຊາດ,ໃນພິທີມີສະມາຊິກສະພາວິທະຍາສາດຄະນະປະຈຳ, ສະມາຊິກສະພາວິທະຍາສາດພາຍນອກ ພ້ອມດ້ວຍກອງເລຂາ ເຂົ້າຮ່ວມທັງໝົດ 21 ທ່ານ ຍິງ 05 ທ່ານ.
ໃນພິທີ ທ່ານ ປອ ຄຳມອນ ຈັນທະຈິດ ຫົວໜ້າກົມຄຸ້ມຄອງການຄົ້ນຄວ້າວິທະຍາສາດໄດ້ສະຫຼຸບຕີລາຄາ, ຖອດຖອນບົດຮຽນການຈັດຕັ້ງປະຕິບັດເຄື່ອນໄຫວວຽກງານສະພາວິທະຍາສາດ ປີ 2021 ແລະແຜນການປີ 2022 ຂອງສະພາວິທະຍາສາດ ສມປຊ ແລະປຶກສາຫາລື ພ້ອມກັນລົງຄະແນນສຽງ ວ່າດ້ວຍການຮັບຮອງເອົາຫຼັກສູດປະລິນຍາໂທ 7 ສາຂາ (ຫຼັກສູດປັບປຸງໃໝ່) ພ້ອມທັງສະເໜີຜ່ານຜົນງານ ຂອງບັນດາຄູ-ອາຈານທີ່ຂໍຕໍາແໜ່ງວິຊາການຄູພ້ອມລົງຄະແນນຮັບຮອງ.
ການສະຫຼຸບວຽກງານ ຂອງສະພາວິທະຍາສາດ ປີ 2021 ແລະທິດທາງແຜນການເຄື່ອນໄຫວ ປີ 2022 ຂອງສະພາວິທະຍາສາດ ສມປຊ ພ້ອມດຽວກັນນັ້ນ ຍັງໄດ້ຟັງການລາຍງານ ກ່ຽວກັບການປັບປຸງຫຼັກສູດປະລິນຍາໂທ 7 ສາຂາ (ຫຼັກສູດປັບປຸງໃໝ່) ແລະ ໄດ້ຮັບຟັງການຜ່ານຜົນງານຂອງບັນດາຄູ-ອາຈານ ພາຍໃນ ສມປຊ ຜູ້ທີ່ສະເໜີຂໍຕຳແໜ່ງວິຊາການຄູ. ນອກນັ້ນ, ສະມາຊິກສະພາວິທະຍາສາດ ໄດ້ພ້ອມກັນປະກອບຄຳຄິດເຫັນໃສ່ບົດສະຫຼຸບ, ຫຼັກສູດປະລິນຍາໂທ 7 ສາຂາ ແລະມາດຖານ, ຜົນງານ ຜູ້ທີ່ສະເໜີຂໍຕຳແໜ່ງວິຊາການຄູ ໃຫ້ຖືກຕ້ອງຕາມລະບຽບການທີ່ກຳນົດໄວ້.
ຕໍ່ກັບບົດສະຫຼຸບທີ່ໄດ້ຜ່ານໃນກອງປະຊຸມ ສະມາຊິກໄດ້ພ້ອມກັນປະກອບຄຳຄິດເຫັນ ແລະລົງຄະແນນຮັບຮອງເອົາບັນດາຫົວຂໍ້ສຳຄັນດັ່ງນີ້:
1). ເຫັນດີໃຫ້ປັບປຸງບາງຈຸດ ແລະຮັບຮອງເອົາຫຼັກສູດ ປະລິນຍາໂທ 7 ສາຂາ (ຫຼັກສູດປັບປຸງໃໝ່).
2). ເຫັນດີຮັບຮອງຜູ້ທີ່ສະເໜີຂໍຕຳແໜ່ງວິຊາການຄູ ຂັ້ນອາຈານ ແລະຜູ້ຊ່ວຍອາຈານ ຈຳນວນ 17 ທ່ານ ດັ່ງນີ້:
– ຂັ້ນຜູ້ຊ່ວຍອາຈານ ຈຳນວນ 5 ທ່ານ, ຍິງ 4 ທ່ານ.
– ຂັ້ນອາຈານ 12 ທ່ານ, ຍິງ 3 ທ່ານ .
ໃນຕອນທ້າຍກອງປະຊຸມ ທ່ານ ຮສ ພູວົງ ອຸ່ນຄໍາແສນ ປະທານກອງປະຊຸມໄດ້ໃຫ້ທິດຊີ້ນຳຄື:
1). ກົມຄຸ້ມຄອງການຄົ້ນຄວ້າວິທະຍາສາດ ໃນຖານະເປັນເສນາທິການໃຫ້ສະພາວິທະຍາສາດ ສມປຊ ຈົ່ງສືບຕໍ່ຈັດຕັ້ງປະຕິບັດທິດທາງແຜນການປີ 2022 ທີ່ໄດ້ວາງໄວ້ໃຫ້ປະກົດຜົນເປັນຈິງ.
2). ສໍາລັບສະມາຊິກສະພາວິທະຍາສາດຂັ້ນສະຖາບັນ ເປັນຕົ້ນແມ່ນຄະນະປະຈຳ ຕ້ອງໄດ້ເປັນເຈົ້າການໃນການປະຕິບັດໜ້າທີ່ຂອງສະພາ ໃນການຮັບຮອງເອົານິຕິກຳ, ຮັບຮອງຜົນການຄົ້ນຄວ້າ, ຍົກສູງຂີດຄວາມສາມາດ ຂອງຕົນ ແລະ ສະມາຊິກໃຫ້ຮັບປະກັນໃນການປະຕິບັດໜ້າທີ່ການເມືອງຢ່າງສົມກຽດ.
3). ສະພາວິທະຍາສາດແຕ່ລະຄະນະຈົ່ງຍົກສູງຄວາມຮັບຜິດຊອບຕື່ມໃນການຈັດຕັ້ງປະຕິບັດແຜນການພາລະບົດບາດ ແລະໜ້າທີ່ຮັບຜິດຊອບຂອງຕົນຢ່າງເປັນເຈົ້າການ ແລະມີຄວາມຮັບຜິດຊອບສູງ, ເພີ່ມທະວີຄວາມເປັນເຈົ້າການໃນການຄົ້ນຄວ້າວິທະຍາສາດໃຫ້ຫຼາຍຂື້ນ, ສະມາຊິກສະພາວິທະຍາສາດຂັ້ນຕ່າງໆ ຕ້ອງໄດ້ມີຜະລິດຕະພັນອອກມາຮັບໃຊ້ຢ່າງຕໍ່ເນື່ອງ.
ຂ່າວ: ຕາອັອດ ແສນທະວີສຸກ
ຮູບພາບ: ປທ ແກ້ວອຸດອນ ພັນດານຸວົງ
ບັນນາທິການ: ປທ ບຸນປັນ ສຸມຸນທອງ