ໃນຕອນເຊົ້າ ຂອງວັນທີ 15 ມີນາ 2022, ກະຊວງກະສິກຳ ແລະ ປ່າໄມ້ ຮ່ວມກັບ ສະຖາບັນການເມືອງ ແລະ ການປົກຄອງແຫ່ງຊາດ ໄດ້ຈັດພິທີເປີດ ຊຸດຝຶກອົບຮົມທິດສະດີການເມືອງ ແລະ ການປົກຄອງ ລະບົບ 45 ວັນ, ຊຸດທີ XX ໃຫ້ແກ່ສະມາຊິກພັກ, ພະນັກງານຫຼັກແຫຼ່ງ ພາຍໃນກະຊວງ ໃນພິທີໃຫ້ກຽດເປັນປະທານໂດຍ: ທ່ານ ກິແກ້ວ ສິງນາວົງ ຄະນະປະຈຳພັກກະຊວງ, ຮອງລັດຖະມົນຕີກະຊວງກະສິກຳ ແລະປ່າໄມ້ ພ້ອມດ້ວຍ ທ່ານ ປທ ນ. ບຸນມີ ຈຸນລະຈັກ ຮອງເລຂາຄະນະບໍລິຫານງານພັກ, ປະທານກວດກາ, ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ມີບັນດາຕາງໜ້າຄູ-ອາຈານ ຈາກສະຖາບັນການເມືອງ ແລະ ການປົກຄອງແຫ່ງຊາດ ແລະບັນດາທ່ານຜູ້ຕາງໜ້າຈາກກົມຕ່າງໆ ພາຍໃນກະຊວງ.
ທ່ານ ບຸນທະວີ ໄຊຍະເພັດ ຫົວໜ້າກົມຈັດຕັ້ງ-ພະນັກງານ, ກະຊວງກະສິກຳ ແລະ ປ່າໄມ້ ໄດ້ຂື້ນລາຍງານແຜນການຝຶກອົບຮົມທິດສະດີການເມືອງ ແລະ ການປົກຄອງ ລະບົບ 45 ວັນ, ຊຸດທີ XX ໃຫ້ແກ່ສະມາຊິກພັກ, ພະນັກງານຫຼັກແຫຼ່ງ ພາຍໃນກະຊວງ ຈໍານວນ 50 ທ່ານ, ຍິງ 15 ທ່ານ ຊຶ່ງຕະຫຼອດໄລຍະເວລາດັ່ງກ່າວ ຜູ້ເຂົ້າຮ່ວມຝຶກອົບຮົມຈະໄດ້ຍົກລະດັບຄວາມຮູ້ພື້ນຖານທາງດ້ານທິດສະດີການເມືອງ ແລະ ການປົກຄອງ, ຄົ້ນຄ້ວາຮ່ຳຮຽນທິດສະດີມາກ-ເລນິນ,ແນວທາງການປ່ຽນແປງໃໝ່ຂອງພັກ ໃນແຕ່ລະໄລຍະ, ການຝຶກອົບຮົມຄັ້ງນີ້ ແມ່ນແນ່ໃສ່ເພື່ອໃຫ້ພະນັກງານນຳພາ-ຄຸ້ມຄອງ, ພະນັກງານສືບທອດ ກໍຄືສະມາຊິກພັກ, ພະນັກງານຫຼັກແຫຼ່ງ ມີວິທີການເຮັດວຽກທີ່ຖືກຕ້ອງ ແລະ ຮູ້ໝູນໃຊ້ ບັນດາບົດຮຽນດັ່ງກ່າວເຂົ້າໃນໜ້າທີ່ວຽກງານຂອງຕົນ.
ໃນພິທີດັ່ງກ່າວ, ທ່ານ ກິແກ້ວ ສິງນາວົງ ໄດ້ໃຫ້ຄຳໂອ້ລົມ ແລະໃຫ້ທິດຊີ້ນຳ ໂດຍໄດ້ຍົກໃຫ້ເຫັນເຖິງຄວາມສຳຄັນຂອງການຝຶກອົບຮົມເທື່ອນີ້ ເປັນການຝຶກອົບຮົມໄລຍະສັ້ນ, ມັນອາດຈະມີຄວາມຈຳກັດໃນຫຼາຍດ້ານໃຫ້ແກ່ຄູ-ອາຈານ ແລະ ຜູ້ເຂົ້າຝຶກອົບຮົມຂອງພວກເຮົາ. ແຕ່ເຖິງຢ່າງໃດກໍ່ຕາມ ຂໍໃຫ້ບັນດາສະຫາຍນັກຝຶກອົບຮົມ ຈົ່ງພ້ອມກັນສຸມຈິດສຸມໃຈເຂົ້າໃນການຝຶກອົບຮົມຄັ້ງນີ້ ໃຫ້ສຳເລັດຜົນເປັນຢ່າງດີ. ພ້ອມກັນນັ້ນ, ກໍຂໍສະແດງຄວາມຂອບໃຈມາຍັງ ຄະນະພັກ, ຄະນະນໍາ ຂອງສະຖາບັນການເມືອງ ແລະ ການປົກຄອງແຫ່ງຊາດ ຊຶ່ງຍາມ ໃດກໍໄດ້ເອົາໃຈໃສ່ໃນການປະກອບສ່ວນສ້າງພະນັກງານ ໃນຂະແໜງກະສິກຳ, ປ່າໄມ້ ແລະ ພັດທະນາໃຫ້ມີຄວາມຮັບຮູ້ ແລະ ເຂົ້າໃຈ ກ່ຽວກັບພື້ນຖານທິດສະດີມາກ-ເລນິນ ເພື່ອເຮັດໃຫ້ສະມາຊິກພັກ, ພະນັກງານນໍາພາຫຼັກແຫຼ່ງ ສາມາດກຳໄດ້ພື້ນຖານທາງດ້ານທິດສະດີ, ຮູ້ໝູນໃຊ້ທິດສະດີ ເຂົ້າໃນການຊີ້ນຳ-ນຳພາວຽກງານຂອງຕົນພາຍໃນກະຊວງ.
ຂ່າວ/ພາບ: ຕາອັອດ ແສນທະວີສຸກ
ບັນນາທິການ: ປທ ບຸນປັນ ສຸມຸນທອງ