ເນື່ອງໃນໂອກາດວັນສ້າງຕັ້ງສະຫະພັນກຳມະບານລາວ ຄົບຮອບ 66 ປີ (1/2/1956-1/2/2022) ສະຫະພັນກຳມະບານ ສະຖາບັນການເມືອງ ແລະ ການປົກຄອງແຫ່ງຊາດ ໄດ້ຈັດຕັ້ງການບໍລິຈາກເລືອດຈາກບັນດາສະມາຊິກກຳມະບານຂອງແຕ່ລະຮາກຖານຂອງ ສມປຊ ໄດ້ຮ່ວມແຮງຮ່ວມໃຈກັນບໍລິຈາກເລືອດໃຫ້ແກ່ສູນເລືອດແຫ່ງຊາດ ຂອງອົງການກາແດງລາວໃນວັນທີ 28 ມັງກອນ 2022 ທີ່ສູນກາງສະຫະພັນກຳມະບານລາວ.
ການບໍລິຈາກເລືອດຄັ້ງນີ້ ກໍ່ຢູ່ໃນທ່າມກາງທີ່ທົ່ວທັງໂລກ ພວມຢູ່ໃນໄລຍະທີ່ມີການແຜ່ລະບາດຂອງພະຍາດໂຄວິດ-19 ແລະມີສະມາຊິກກໍາມະບານພະນັກງານ, ຄູ-ອາຈານ ແລະນັກສຶກສາຮ່ວມບໍລິຈາກເລືອດທັງໝົດ 7 ສະຫາຍ ຊຶ່ງເປັນການບໍລິຈາກທີ່ບໍລິສຸດ, ໂດຍບໍ່ໄດ້ຫວັງຜົນຕອບແທນແຕ່ຢ່າງໃດ ທັງນີ້ກໍ່ເປັນການບໍລິຈາກເລືອດ ແລະຜະລິດຕະພັນເລືອດທີ່ປອດໄພ ເພື່ອເປັນການຊ່ວຍຊີວິດຂອງຄົນເຈັບໃຫ້ປອດໄພ ແລະເປັນການປູກຈິດສໍານຶກໃຫ້ແກ່ສັງຄົມ ໃນການປະກອບສ່ວນຢ່າງຕັ້ງໜ້າ ໃນການບໍລິຈາກເລືອດຫຼາຍຂຶ້ນເຮັດໃຫ້ສັງຄົມມີຄວາມສະຫງົບ ເປັນສັງຄົມທີ່ມີຈິດ ໃຈເອື້ອເຟື້ອເພື່ອແຜ່, ມີຄວາມສາມັກຄີ ແລະມີສຸຂະພາບທີ່ແຂງແຮງດີ.
ຈາກການໃຫ້ຂໍ້ມູນຂອງຜູ້ບໍລິຈາກເລືອກໄດ້ໃຫ້ທັດສະນະວ່າ: ການບໍລິຈາກເລືອດຄັ້ງນີ້ ແມ່ນມີຄວາມພາກພູມໃຈ ແລະຍິນດີທີ່ໄດ້ໃຫ້ເລືອດຄືໃຫ້ຊີວິດ ແລະໃຫ້ອະນາຄົດແກ່ເພື່ອນມະນຸດດ້ວຍກັນ, ການບໍລິຈາກເລືອດເປັນສິ່ງທີ່ດີ, ປອດໄພ ແລະກໍຄືການບໍລິຈາກເລືອດດ້ວຍຄວາມຈິງໃຈ ເພາະເປັນການຊ່ວຍເຫຼືອເພື່ອນມະນຸດດ້ວຍກັນ.
ຂ່າວ: ຕາອັອດ ແສນທະວີສຸກ
ຮູບພາບ: ຄຳໃບ ນາຈານ
ບັນນາທິການ: ປທ ບຸນປັນ ສຸມຸນທອງ