ໜ່ວຍພັກຮາກຖານ ຄະນະກໍ່ສ້າງພັກ ແລະປະຫວັດສາດພັກ-ຄະນະປັດຊະຍາ ໄດ້ຈັດພິທີເລື່ອນສະມາຊິກພັກສຳຮອງຂຶ້ນເປັນສະມາຊິກພັກສົມບູນ ຢູ່ທີ່ຫ້ອງປະຊຸມຂອງສູນຂໍ້ມູນຂ່າວສານ ການເມືອງ ແລະການປົກຄອງ ຊັ້ນ 5, ໂດຍການເປັນປະທານ ຂອງສະຫາຍ ຮສ ພູວົງ ອຸ່ນຄຳແສນ ກຳມະການສູນກາງພັກ, ເລຂາຄະນະບໍລິຫານງານພັກ,ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ.
ໃນພິທີດັ່ງກ່າວ ສະຫາຍ ວິໄລສິດ ພິມພັກດີ ຮອງຫົວໜ້າພະແນກພັກ-ປ້ອງກັນພັກ ຜ່ານຂໍ້ຕົກລົງວ່າດ້ວຍການເລື່ອນສະມາຊິກພັກສຳຮອງເປັນສະມາຊິກພັກສົມບູນ 2 ສະຫາຍຄື: ສະຫາຍ ນ. ທັດສະລີ ພົມສີສຸວັນ ແລະສະຫາຍ ນ. ອານຸລັກ ແກ້ວຄໍາດີ ທີ່ໄດ້ຜ່ານການຝຶກຝົນຫຼໍ່ຫຼອມ ແລະທົດສອບໃນຂະບວນການວຽກງານຕົວຈິງ, ມີຜົນງານດີເດັ່ນ ໄດ້ຮັບຄວາມເຊື່ອຖື ແລະໄວ້ວາງໃຈຈາກມະຫາຊົນ. ຈາກນັ້ນ, ສະຫາຍ ປທ ແສງທອງ ພຸດທະວົງ ເລຂາໜ່ວຍພັກຮາກຖານ ໄດ້ມີຄຳເຫັນກ່າວຮັບ ແລະມອບຂໍ້ຕົກລົງໃຫ້ສະມາຊິກພັກສົມບູນ.
ໃນຕອນທ້າຍຂອງພິທີ ສະຫາຍ ຮສ ພູວົງ ອຸ່ນຄຳແສນ ໄດ້ມີຄຳເຫັນໂອ້ລົມຕໍ່ພິທີ ໂດຍສະເພາະຕໍ່ສະມາຊິກ ພັກສົມບູນ 2 ສະຫາຍ ເຊິ່ງສະຫາຍໄດ້ຍ້ອງຍໍຊົມເຊີຍຕໍ່ຜົນງານການກໍ່ສ້າງ ແລະຝຶກຝົນຫຼໍ່ຫຼອມຕົນເອງຈົນສາມາດເລື່ອນເປັນສະມາຊິກພັກສົມບູນ, ສະຫາຍ ມີຄວາມເຊື່ອໝັ້ນ ແລະ ຮຽກຮ້ອງໃຫ້ສະມາຊິກພັກສົມບູນ ຈົ່ງເອົາໃຈໃສ່ໃນການຄົ້ນຄວ້າຮ່ຳຮຽນ, ກຳແໜ້ນແນວທາງນະໂຍບາຍ, ກົດລະບຽບຂອງພັກ, ກົດໝາຍຂອງລັດໃຫ້ເລິກເຊິ່ງ, ມີຄວາມຫ້າວຫັນຕໍ່ໜ້າທີ່ວຽກງານ ແລະບຸກບືນຜ່ານຜ່າທຸກຂໍ້ຫຍຸ້ງຍາກໃນການປະຕິບັດໜ້າທີ່ວຽກງານ ຂອງຕົນເອງດ້ວຍຄວາມຮັບຜິດຊອບສູງ, ມີນ້ຳໃຈເສຍສະຫຼະ, ມີຄວາມອົດທົນ, ຖືຜົນປະໂຫຍດສ່ວນລວມສູງກວ່າຜົນປະໂຫຍດສ່ວນຕົວ, ມີຄວາມເປັນແບບຢ່າງໃນການດຳລົງຊີວິດ ທີ່ປອດໃສຂາວສະອາດ, ຮູ້ໃຫ້ກຽດຮູ້ໃຫ້ອະໄພເຊິ່ງກັນ ແລະກັນ, ມີຄວາມສາມັກຄີເປັນປຶກແຜ່ນ ແລະຍຶດໝັ້ນໃນການປະກອບສ່ວນສ້າງລະບອບ ປະຊາທິປະໄຕ ປະຊາຊົນ ໃຫ້ກ້າວສູ່ຈຸດໝາຍສັງຄົມນິຍົມເທື່ອລະກ້າວ.
ຂ່າວ: ຕາອັອດ ແສນທະວີສຸກ
ຮູບພາບ: ນ. ທິດດາວອນ ດວງປະເສີດ
ບັນນາທິການ: ປທ ບຸນປັນ ສຸມຸນທອງ