ໃນວັນທີ 7 ມັງກອນ 2022 ໜ່ວຍພັກຮາກຖານ ນັກສຶກສາ ລະບົບປະລິນຍາໂທ ຮຸ່ນທີ XVII ຫ້ອງ ຂ ໄດ້ເປີດກອງປະຊຸມໃຫຍ່ຄັ້ງທີ I ຂຶ້ນຢ່າງເປັນທາງການ ໂດຍການເປັນປະທານ ຂອງ ສະຫາຍ ຮສ ພູວົງ ອຸ່ນຄຳແສນ ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ມີຕາງໜ້າກົມຈັດຕັ້ງ-ພະນັກງານ, ຕາງໜ້າແຕ່ລະໜ່ວຍພັກຮາກຖານນັກສຶກສາເຂົ້າຮ່ວມພ້ອມພຽງ.
ໃນກອງປະຊຸມໄດ້ຮັບຟັງບົດລາຍງານການເມືອງ ຕໍ່ກອງປະຊຸມໃຫຍ່ຄັ້ງທີ I ຈາກສະຫາຍ ສຸລິຍົງ ວົງໂພຄຳ ເລຂາໜ່ວຍພັກຮາກຖານ ນັກສຶກສາ ລະບົບປະລິນຍາໂທ ຮຸ່ນທີ XVII ຫ້ອງ ຂ ເຊິ່ງສະຫາຍໄດ້ສະຫຼູບຕີລາຄາຈຸດດີ, ຈຸດອ່ອນ ແລະ ຂໍ້ຄົງຄ້າງ ໃນການເຄື່ອນໄຫວປະຕິບັດໜ້າທີ່ການເມືອງ ເວົ້າລວມ, ເວົ້າສະເພາະກໍແມ່ນການເຄື່ອນໄຫວປະຕິບັດໜ້າທີ່ ຢູ່ພາຍໃນໜ່ວຍພັກຕະຫຼອດໃນໄລຍະຜ່ານມາ ແລະໄດ້ວາງທິດທາງວຽກງານຈຸດສຸມໃນຕໍ່ໜ້າ; ຈາກນັ້ນຄະນະໜ່ວຍພັກຊຸດເກົ່າ ໄດ້ຂື້ນຜ່ານບົດສຳຫຼວດໃນການນຳພາ-ຊີ້ນຳ ໃນໄລຍະຜ່ານມາ ພ້ອມທັງລາໜ້າທີ່ ແລະປ່ອນບັດຄັດເລືອກເອົາຄະນະໜ່ວຍພັກຊຸດໃໝ່ ເຊິ່ງມີຜູ້ລົງສະໝັກເລືອກຕັ້ງຈຳນວນ 7 ສະຫາຍ, ຍິງ 3 ສະຫາຍ ໃນນັ້ນເລືອກເອົາ 5 ສະຫາຍ, ຍິງ 2 ສະຫາຍ ຜ່ານການປ່ອນບັດເລືອກຕັ້ງ ຂອງກອງປະຊຸມຄັ້ງປະຖົມມະລືກໄດ້ຕົກລົງແຕ່ງຕັ້ງຄື:
- ສະຫາຍ ສຸລິຍົງ ວົງໂພຄຳ ເປັນເລຂາໜ່ວຍພັກ
- ສະຫາຍ ນ. ແກ້ວຕາ ພັນດານຸວົງ ເປັນຮອງເລຂາ ແລະປະທານກວດກາ
- ສະຫາຍ ສົມນຶກ ອິນທະພົມ ເປັນຄະນະ
- ສະຫາຍ ນ. ປະທຸມພອນ ເພັດວັນຄຳ ເປັນຄະນະ
- ສະຫາຍ ແອ ວົງແສງຄຳ ເປັນຄະນະ
ກອງປະຊຸມໄດ້ຮັບຟັງການໂອ້ລົມຂອງປະທານ, ເຊິ່ງກ່ອນອື່ນໝົດ ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການເຄື່ອນໄຫວໃນໄລຍະຜ່ານມາ ທີ່ຍາດໄດ້ຜົນງານອັນໃຫຍ່ຫຼວງ ແລະຜ່ານຜ່າຄວາມຫຍຸ້ງຍາກຕ່າງໆ ເວົ້າລວມ, ເວົ້າສະເພາະກໍຄືວຽກງານດ້ານຕ່າງໆ ແລະຜົນງານໃນການປະກອບສ່ວນເຂົ້າໃນກິດຈະກໍາຕ່າງໆ ເຊິ່ງມັນສະແດງອອກໃນຄວາມເປັນເຈົ້າການຕໍ່ໜ້າທີ່ວຽກງານ, ມີສະຕິຕໍ່ການຈັດຕັ້ງ, ຄວາມຈົ່ງຮັກພັກດີຕໍ່ພັກຕໍ່ປະເທດຊາດ, ການປະກອບສ່ວນເຂົ້າໃນການຄົ້ນຄວ້າເຄື່ອນໄຫວປະຕິບັດໜ້າທີ່ການເມືອງຂອງຕົນຢ່າງຕັ້ງໜ້າ. ນອກນັ້ນ, ທ່ານຍັງໄດ້ຮຽກຮ້ອງມາຍັງຄະນະພັກຊຸດໃໝ່, ສະມາຊິກພັກທຸກ ສະຫາຍຈົ່ງເພີ່ມທະວີຄວາມສາມັກຄີເປັນເອກະພາບ, ພ້ອມກັນບຸກບືນພັດທະນາຕົນເອງຢ່າງຮອບດ້ານ ແລະເອົາໃຈໃສ່ຄົ້ນຄວ້າຮ່ຳຮຽນທິດສະດີ, ແນວທາງ ແລະວຽກງານວິຊາສະເພາະເຊີດຊູນ້ຳໃຈຮັກຊາດ, ເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ, ເພີ່ມທະວີຄວາມຮັບຜິດຊອບເຂົ້າໃນການຈັດຕັ້ງປະຕິບັດທິດທາງໜ້າທີ່ຈຸດສຸມໃຫ້ປະກົດຜົນເປັນຈິງ.
ຂ່າວ/ພາບ: ຕາອັອດ ແສນທະວີສຸກ
ບັນນາທິການ: ປທ ບຸນປັນ ສຸມຸນທອງ