ຊຸດຝຶກອົບຮົມທິດສະດີການເມືອງ ແລະ ການບໍລິຫານຄຸ້ມຄອງລັດຕາມຫົວຂໍ້ ໃຫ້ແກ່ເລຂາພັກເມືອງ, ຄະນະປະຈໍາພັກເມືອງ ແລະ ກໍາມະການພັກເມືອງ ໃນຂອບເຂດທົ່ວປະເທດ ຊຸດທີ IV ຖືວ່າຄົບຕາມກໍານົດເວລາທີ່ໄດ້ກໍານົດໄວ້ 15 ວັນ ທີ່ໄດ້ຈັດຂຶ້ນແຕ່ວັນທີ 22 ພະຈິກ ເປັນຕົ້ນມາ, ຊຸດຝຶກອົບຮົມຄັ້ງນີ້ມີສອງຫຼັກສູດ ຝຶກອົບຮົມທິດສະດີການເມືອງ (ສມປຊ) ແລະການບໍລິຫານຄຸ້ມຄອງລັດ ຈາກສະຖາບັນຄົ້ນຄວ້າວິທະຍາສາດການປົກຄອງ ແລະຝຶກອົບຮົມ.
ພິທີປິດຊຸດຝຶກອົບຮົມດັ່ງກ່າວ, ໃຫ້ກຽດເປັນປະທານ ທ່ານ ຮສ ພູວົງ ອຸ່ນຄຳແສນ ກໍາມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ແລະທ່ານ ປອ ທອງຈັນ ມະນີໄຊ ກໍາມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງພາຍໃນ, ມີຕາງໜ້າຫົວໜ້າຫ້ອງການ, ກົມ, ຄະນະຕ່າງໆ, ສູນຕ່າງໆ ແລະພາກສ່ວນທີ່ກ່ຽວຂ້ອງເຂົ້າຮ່ວມ.
ຈຸດພິເສດຂອງຫຼັກສູດຊຸດຝຶກອົບຮົມທິດສະດີການເມືອງ ແລະການບໍລິຫານຄຸ້ມຄອງລັດຕາມຫົວຂໍ້ ໃຫ້ແກ່ເລຂາພັກເມືອງ, ຄະນະປະຈໍາພັກເມືອງ ແລະກໍາມະການພັກເມືອງ ໃນຂອບເຂດທົ່ວປະເທດ ຊຸດທີ IV ແມ່ນນອນຢູ່ໃນໂຄງການຝຶກອົບຮົມ ປະຈໍາປີ 2021 ຂອງສະຖາບັນການເມືອງ ແລະ ການປົກຄອງແຫ່ງຊາດ ແລະຂອງກະຊວງພາຍໃນ.
ທ່ານ ປອ ນ. ຈັນທາ ອ່ອນໄຊວຽງ ຫົວໜ້າສະຖາບັນຄົ້ນຄວ້າວິທະຍາສາດການປົກຄອງ ແລະ ຝຶກອົບຮົມໄດ້ສະຫຼຸບລາຍງານວ່າ: ການຝຶກອົບຮົມເປັນເວລາ 15 ວັນນີ້ເຫັນວ່າ ສຳມະນາກອນ ມີຄວາມເອົາໃຈໃສ່, ມີຄວາມກະຕືລືລົ້ນໃນການຊອກຮູ້ຮ່ໍ່າຮຽນນໍາຄູ-ອາຈານ ເຊິ່ງມັນສະແດງອອກໃນການຕັ້ງຄຳຖາມ, ການປະກອບຄໍາຄິດຄໍາເຫັນເພື່ອແລກປ່ຽນບົດຮຽນຢ່າງຫ້າວຫັນ, ເປັນຂະບວນຟົດຟື້ນ ແລະມີເນື້ອໃນທີ່ອຸດົມສົມບູນທີ່ສຸດ ທາງດ້ານການຈັດຕັ້ງຂອງຫ້ອງໂດຍປະຕິບັດຕາມມະຕິຕົກລົງວ່າດ້ວຍການແຕ່ງຄັ້ງຄະນະຮັບຜິດຊອບຫ້ອງຮຽນ, ບັນດາທ່ານທີ່ໄດ້ຮັບການແຕ່ງຕັ້ງມີຄວາມໄດ້ເອົາໃຈໃສ່ປະຕິບັດໜ້າທີ່ການເມືອງຂອງຕົນໄດ້ເປັນຢ່າງດີ ຊຶ່ງສະແດງອອກ ຄະນະຫ້ອງໄດ້ມີການປະຊຸມ ແຕ່ງຕັ້ງຄະນະໜ່ວຍ ເພື່ອຕິດຕາມກວດກາຈໍານວນພົນໃນແຕ່ລະມື້, ມີການສະຫຼຸບບົດຮຽນ, ຮັກສາໄດ້ຄວາມເປັນລະບຽບຮຽບຮ້ອຍຂອງຫ້ອງຮຽນ, ມີການປະຊຸມພາຍໃນຫ້ອງ ເພື່ອລາຍງານສະພາບການຮຽນ-ການສອນ ຕໍ່ຄູປະຈໍາຫ້ອງຢ່າງປົກກະຕິ, ມີຄວາມສາມັກຄີຮັກແພງຊ່ວຍເຫຼືອເຊິ່ງກັນ ແລະ ກັນ, ມີການແລກປ່ຽນບົດຮຽນ-ປະສົບການ ຢ່າງມີບັນຍາກາດຄຶກຄື້ນດີ ແລະຜົນໄດ້ຮັບຈາກການປະເມີນລວມຂອງການຈັດຊຸດຝຶກອົບຮົມໃນຊຸດທີ IV ນີ້ ແມ່ນຢູ່ໃນລະດັບດີ ຫາ ດີຫຼາຍ, ຕີລາຄາຄວາມຮັບຮູ້ຂອງຜູ້ເຂົ້າຝຶກອົບຮົມສະເລ່ຍ 85,13% (ດີເລີດ) ທາງດ້ານເນື້ອໃນໂດຍລວມແລ້ວ, ເຫັນວ່າຜູ້ເຂົ້າຝຶກອົບຮົມທີ່ໄດ້ຜ່ານຄົບ 15 ວັນ ແມ່ນມີທັດສະນະຫຼັກໝັ້ນການເມືອງໜັກແໜ້ນ, ມີຄວາມອຸ່ນອ່ຽນ, ທຸ່ນທ່ຽງ ສາມາດເຊື່ອມຊຶມກໍາ ແໜ້ນແນວທາງນະໂຍບາຍຂອງພັກ-ລັດ, ມີຄວາມບຸກບືນຫ້າວຫັນປະຕິບັດໜ້າທີ່ວຽກງານການເມືອງຂອງຕົນ ກໍຄືການຍາດແຍ່ງເອົາຄວາມຮູ້ນຳຄູ-ອາຈານ, ເຊື່ອໝັ້ນຕໍ່ກໍາລັງແຮງ ແລະສະຕິປັນຍາຂອງອາຈານສອນ, ກ້າຄິດ, ກ້າຕັ້ງບັນຫາ ແລະກ້າຮັບຜິດຊອບຕໍ່ການແລກປ່ຽນບົດຮຽນເຊິ່ງກັນ ແລະ ກັນ.
ຊຶ່ງຜົນງານ ແລະຜົນສຳເລັດຂອງຊຸດຝຶກອົບຮົມທິດສະດີການເມືອງ ແລະ ການບໍລິຫານຄຸ້ມຄອງລັດ ຕາມຫົວຂໍ້ ແມ່ນມີຄຸນນະພາບ ແລະໜ້າເພິ່ງພໍໃຈຕໍ່ຜົນສໍາເລັດດັ່ງກ່າວກໍ່ຍ້ອນມີຄະນະພັກ, ຄະນະນໍາສະຖາບັນການເມືອງ ແລະ ການປົກຄອງແຫ່ງຊາດ, ສະຖາບັນຄົ້ນຄວ້າວິທະຍາສາດການປົກຄອງ ແລະຝຶກອົບຮົມ, ກະຊວງພາຍໃນ ແລະ ຄະນະພັກບັນດາກະຊວງ, ອົງການທຽບເທົ່າ, ອ້ອມຂ້າງສູນກາງ ໄດ້ເອົາໃຈໃສ່ໃຫ້ການນຳພາ-ຊີ້ນຳຢ່າງໃກ້ສິດ, ມີການປະສານສົມທົບກັນຢ່າງຕໍ່ເນື່ອງ ເພື່ອຈັດສົ່ງຄູ-ອາຈານ ຜູ້ມີປະສົບການສູງເຂົ້າຮ່ວມເປັນຜູ້ບັນຍາຍ ຈິ່ງເຮັດໃຫ້ມີຜົນສໍາເລັດເປັນຢ່າງດີ. ນອກຈາກການຊີ້ນຳທາງດ້ານເນື້ອໃນແລ້ວ, ຄະນະພັກ-ຄະນະນຳ ແຕ່ລະແຂວງໄດ້ຖືສຳຄັນໃນການນຳພາ-ຊີ້ນຳ, ຊຸກຍູ້ ແລະ ຕິດຕາມຢ່າງເລິກເຊິ່ງຮອບດ້ານສະແດງອອກການສ້າງເງື່ອນໄຂ ທີ່ຈໍາເປັນສຳລັບການຝຶກອົບຮົມ, ຊີວິດການເປັນຢູ່, ການໄປມາຂອງຜູ້ເຂົ້າຮ່ວມຝຶກອົບຮົມ ເພື່ອເປັນການປ້ອງກັນການແຜ່ນລະບາດໂຄວິດ-19 ໄດ້ຮ້ອຍສ່ວນຮ້ອຍ.
ເພື່ອເປັນການຢັ້ງຢືນຜົນສຳເລັດການຝຶກອົບຮົມ, ທ່ານ ຮສ ພູວົງ ອຸ່ນຄຳແສນ ໄດ້ມອບໃບຢັ້ງຢືນຝຶກອົບຮົມ ທິດສະດີການເມືອງ ແລະ ທ່ານ ປອ ທອງຈັນ ມະນີໄຊ ມອບໃບຢັ້ງຢືນຝຶກອົບຮົມການບໍລິຫານຄຸ້ມຄອງລັດ ຈຳນວນ 45 ທ່ານ, ຍິງ 3 ທ່ານ.
ທ້າຍພິທີ ທ່ານ ຮສ ພູວົງ ອຸ່ນຄຳແສນ ໄດ້ໃຫ້ທິດເຍືອງທາງ ແລະ ໂອລົມຕໍ່ກັບສຳມະນາກອນ ທີ່ສຳເລັດຝຶກອົບຮົມດ້ວຍໝາກຜົນອັນຈົບງາມ ແຕ່ເພື່ອຕອບສະໜອງຄວາມຮຽກຮ້ອງຕ້ອງການໃນໄລຍະໃໝ່ ຈຶ່ງໄດ້ຮຽກຮ້ອງມາຍັງບັນດາສະຫາຍທັງໝົດ ຈົ່ງພ້ອມກັນນຳເອົາບົດຮຽນ ແລະພຶດຕິກຳຕົວຈິງຈາກຊຸດຝຶກອົບຮົມຄັ້ງນີ້ ໄປໝູນໃຊ້ເຂົ້າໃນການຈັດຕັ້ງປະຕິບັດວຽກງານຕົວຈິງ ໃນຂະແໜງການຂອງຕົນໃຫ້ເກີດດອກອອກຜົນ, ໃຫ້ມີປະສິດທິພາບ ແລະ ປະສິດທິຜົນສູງກວ່າເກົ່າ ໂດຍສະເພາະແມ່ນເອົາໃຈໃສ່ ບາງດ້ານຕື່ມຄື: ໜຶ່ງ: ບັນດາສະຫາຍໃນນາມເປັນຜູ້ບໍລິຫານສູງສຸດ ຂັ້ນເມືອງ-ນະຄອນ ທີ່ມີບົດບາດໃນການນຳພາ-ຊີ້ນຳທຸກດ້ານບັນດາ ສະຫາຍຈະຕ້ອງໄດ້ສຶກສາ, ຄົ້ນຄວ້າບົດຮຽນທີ່ໄດ້ຈາການຝຶກອົບຮົມຄັ້ງນີ້ ໃຫ້ເຂົ້າໃຈຢ່າງເລິກເຊິ່ງ ຕໍ່ເນື້ອໃນຂອງແຕ່ລະບົດເອົາໄປໝູນໃຊ້ເຂົ້າໃນວຽກງານທີ່ຮັບຜິດຊອບໃຫ້ມີຄວາມເຂັ້ມແຂງ ແລະມີປະສິດທິພາບສູງຂຶ້ນ, ໂດຍສະເພາະການນຳພາແນວຄິດການເມືອງໃນທຸກຂົງເຂດ, ເຕົ້າໂຮມຄວາມສາມັກຄີ ເປັນເອກະພາບກັບແນວທາງນະໂຍບາຍຂອງພັກ, ນຳພາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມ ຄັ້ງທີ IX ເຂົ້າສູ່ທ້ອງຖິ່ນຕົວຈິງ ເພື່ອພັດທະນາຊີວິດການເປັນຢູ່ຂອງປະຊາຊົນ ໃຫ້ດີຂຶ້ນໃນແຕ່ລະໄລຍະ. ຫັນການຄຸ້ມຄອງລັດ-ຄຸ້ມຄອງສັງຄົມ ໃນທ້ອງຖິ່ນຕົນເຂົ້າສູ່ລະບຽບກົດໝາຍເທື່ອລະກ້າວ; ສອງ: ພ້ອມກັນນໍາເອົາບົດຮຽນທີ່ເຫັນວ່າເປັນບົດຮຽນ ແລະແທດ ເໝາະຄັ້ງນີ້ໄປຖ່າຍທອດ ໃຫ້ແກ່ພະນັກງານຫຼັກແຫຼ່ງພາຍໃນເມືອງ ເພື່ອໃຫ້ການຈັດຕັ້ງປະຕິບັດວຽກງານມີຄວາມຖືກຕ້ອງ ແລະ ຮັດກຸມຂຶ້ນທັງເປັນການພັດທະນາພະນັກງານ, ສະມາຊິກພັກ ໃຫ້ມີຄວາມເຂົ້າໃຈ ແລະຮັບຮູ້ ແນວທາງການເມືອງ, ທິດສະດີການເມືອງ ແລະ ການບໍລິຫານຄຸ້ມຄອງລັດ; ສາມ: ນໍາເອົາໝາກຜົນສຳເລັດອັນຈົບງາມນີ້ ລາຍງານຕໍ່ຄະນະນຳຂອງພວກສະຫາຍ ເພື່ອຢັ້ງຢືນເຖິງຜົນສໍາເລັດການເຂົ້າຮ່ວມຊຸດຝຶກອົບຮົມໃນຄັ້ງນີ້ ແລະເງື່ອນໄຂອັນດີໃນຕໍ່ໜ້າ ໃນການພັດທະນາຂີດຄວາມສາມາດໃນການນໍາພາ-ຄຸ້ມຄອງຕໍ່ໄປ.
ຂ່າວ: ຕາອັອດ ແສນທະວີສຸກ
ຮູບພາບ: ນ. ທິດດາວອນ ດວງປະເສີດ
ບັນນາທິການ: ປທ ບຸນປັນ ສຸມຸນທອງ