ໃນວັນທີ 29 ກໍລະກົດ 2021 ນີ້ ສະຖາບັນການເມືອງ ແລະ ການປົກຄອງແຫ່ງຊາດ ໄດ້ຈັດກອງປະຊຸມເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກປະຊາຊົນປະຕິວັດລາວ ໂດຍການເປັນປະທານຂອງ ສະຫາຍ ຮສ ພູວົງ ອຸ່ນຄຳແສນ ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ມີບັນດາສະຫາຍເລຂາ, ຮອງເລຂາ, ເລຂາໜ່ວຍພັກຮາກຖານ, ຫົວໜ້າຫ້ອງການພ້ອມດ້ວຍຄະນະ, ຫົວໜ້າກົມພ້ອມດ້ວຍຄະນະ, ຫົວໜ້າຄະນະຕ່າງໆ ພ້ອມດ້ວຍຄະນະ, ຫົວໜ້າສູນຂໍ້ມູນຂ່າວສານການເມືອງ ແລະ ການປົກຄອງພ້ອມດ້ວຍຄະນະ, ຫົວໜ້າສູນຄົ້ນຄວ້າແນວຄິດໄກສອນພົມວິຫານພ້ອມດ້ວຍຄະນະ ແລະພະນັກງານ, ຄູ-ອາຈານ ເຂົ້າຮ່ວມກັນຢ່າງພ້ອມພຽງ.
ໃນທ່າມກາງບັນຍາກາດທີ່ທົ່ວພັກ, ທົ່ວລັດ ແລະ ທົ່ວງປວງຊົນລາວ ທັງຊາດພວມອອກແຮງແຂ່ງຂັນກັນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຜູ້ແທນຜູ້ແທນທົ່ວປະເທດ ຄັ້ງທີ XI ຂອງພັກ ເຂົ້າສູ່ວຽກງານຕົວຈິງຂອງຂະແໜງການຕົນຢ່າງເປັນຂະບວນຟົດຟື້ນ ແລະ ຕໍ່ເນື່ອງ ໂດຍສະເພາະແມ່ນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງລັດ ຄັ້ງທີ IX. ສະຖາບັນການເມືອງ ແລະ ການປົກຄອງແຫ່ງຊາດ ໄດ້ຈັດຕັ້ງກອງປະຊຸມເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ຂຶ້ນ ຈຸດປະສົງແມ່ນ ເຊື່ອມຊຶມຜັນຂະຫຍາຍມະຕິເຮັດໃຫ້ເນື້ອໃນມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນປະຕິວັດລາວ ໄດ້ສືບຕໍ່ຈັດຕັ້ງເຊື່ອມຊຶມ ແລະ ຜັນຂະຫຍາຍຢ່າງເລິກເຊິ່ງ, ທົ່ວເຖິງທຸກເປົ້າໝາຍ;
ໃນກອງປະຊຸມ, ສະຫາຍ ຮສ ພູວົງ ອຸ່ນຄຳແສນ ໄດ້ເຜີຍແຜ່ເອກະສານ ມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ຊຶ່ງເນື້ອໃນໄດ້ສ່ອງແສງເຖິງ ການເຄື່ອນໄຫວຂອງອຳນາດລັດໃຫ້ເຂັ້ມແຂງ ແລະ ມີປະສິດທິຜົນ; ຈັດຕັ້ງຜັນຂະຫຍາຍມະຕິຜູ້ແທນທົ່ວປະເທດ ຄັ້ງທີ XI ຂອງພັກ ເຂົ້າສູ່ວຽກງານວິຊາສະເພາະຂອງ ສມປຊ ໃຫ້ເຊື່ອມໂຍງ ແລະ ເຊື່ອມຈອດກັບການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກສະຖາບັນເຮົາ. ໃນນັ້ນພວກເຮົາຕ້ອງກຳແໜ້ນ 02 ບັນຫາ, 6 ທິດທາງ, 08 ຄາດໝາຍສູ້ຊົນ ແລະ 07 ໜ້າທີ່ຕົ້ນຕໍເພື່ອເຮັດໃຫ້ພະນັກງານ, ສະມາຊິກພັກ ແລະ ປະຊາຊົນບັນດາເຜົ່າໃຫ້ມີຄວາມຮັບຮູ້, ເຂົ້າໃຈຢ່າງເລິກເຊິ່ງ ແລະ ມີຄວາມເປັນເອກະພາບສູງ ໃນການຈັດຕັ້ງປະຕິບັດເນື້ອໃນມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ໃຫ້ປະກົດຜົນເປັນຈິງ ແລະ ສ້າງຄວາມຮັບຮູ້ໃໝ່, ມີຄວາມເຊື່ອໝັ້ນຕໍ່ແນວທາງນະໂຍບາຍຂອງພັກ-ລັດ, ມີຄວາມຕັດສິນໃຈສູງ ແລະ ຍົກສູງຄວາມຮັບຜິດຊອບຂອງໜ່ວຍພັກຮາກຖານ ກໍ່ຄືພະນັກງານ, ຄູ-ອາຈານ, ສະມາຊິກພັກ ແລະບັນດາຊັ້ນຄົນໃນທົ່ວສັງຄົມ ພ້ອມກັນຈັດຕັ້ງຜັນຂະຫຍາຍເນື້ອໃນຈິດໃຈຂອງມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກໃຫ້ໄດ້ຮັບຜົນດີ.
ໃນໂອກາດດັ່ງກ່າວ ສະຫາຍ ຮສ ພູວົງ ອຸ່ນຄຳແສນ ໄດ້ໂອ້ລົມຕໍ່ກອງປະຊຸມ ຕໍ່ກັບການເຊື່ອມຊຶມເນື້ອໃນເອກະສານໃນກອງປະຊຸມໃນຄັ້ງນີ້ ແມ່ນເຕັມໄປດ້ວຍເນື້ອໃນທີ່ມີຄວາມສຳຄັນ ໃນການກໍານົດບາດກ້າວເດີນທີ່ເປັນບາດລ້ຽວສຳຄັນ ແຫ່ງການສືບຕໍ່ປະຕິບັດແນວທາງປ່ຽນແປງໃໝ່ ເພື່ອນໍາພາທົ່ວພັກ-ລັດ, ທົ່ວປວງຊົນລາວທັງຊາດ ຮັບຮູ້ບັນດາເຫດການປະຫວັດສາດໃນເງື່ອນໄຂໃໝ່ຂອງການປະຕິວັດ ພັກເຮົາໄດ້ນຳພາປະເທດຊາດໃຫ້ຫຼຸດພົ້ນອອກຈາກສະຖານະພາບຄວາມປະເທດດ້ອຍພັດທະນາເທື່ອລະກ້າວ. ມາຮອດມື້ນີ້ການຄົ້ນຄວ້າເຊື່ອມຊຶມ ແລະຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ແມ່ນໄດ້ບັນລຸຕາມຈຸດປະສົງ ແລະ ຄາດໝາຍທີ່ໄດ້ວາງເອົາໄວ້.
ຂ່າວ: ຕາອັອດ ແສນທະວີສຸກ
ຮູບພາບ: ນ. ທິດດາວອນ ດວງປະເສີດ
ບັນນາທິການ: ປທ ບຸນປັນ ສຸມຸນທອງ