ຫ້ອງການສະຖາບັນການເມືອງ ແລະການປົກຄອງແຫ່ງຊາດໄດ້ຈັດກອງປະຊຸມການທາບທາມບັນດາກົດລະບຽບຕ່າງໆ ທີ່ຈະໄດ້ນໍາໃຊ້ພາຍໃນ ສມປຊ ຊຶ່ງກອງປະຊຸມໄດ້ຈັດຂື້ນໃນວັນທີ 01 ກໍລະກົດ 2021 ທີ່ຫ້ອງປະຊຸມຊັ້ນ 5 ຂອງຕຶກສູນຂໍ້ມູນຂ່າວສານ ສມປຊ. ພາຍໃຕ້ການເປັນປະທານຂອງທ່ານ ປທ ນ. ບຸນມີ ຈຸນລະຈັກ ຮອງເລຂາຄະນະບໍລິຫານງານພັກ, ປະທານກວດກາພັກ, ຮອງຫົວໜ້າ ສມປຊ, ສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງທີ 15. ພ້ອມດ້ວຍຕາງໜ້າບັນດາກົມ, ຄະນະຕ່າງໆ, ສູນຂໍ້ມູນຂ່າວສານການເມືອງ ແລະການປົກຄອງ, ສູນຄົ້ນຄວ້າແນວຄິດໄກສອນ ພົມວິຫານ, ຕຳຫຼວດປ້ອງກັນທີ່ຕັ້ງ ປະຈຳການຢູ່ ສມປຊ.
ໃນກອງປະຊຸມດັ່ງກ່າວໄດ້ນຳສະເໜີຮ່າງເອກະສານຄື: ຮ່າງກົດລະບຽບການຄຸ້ມຄອງຊັບສິນຂອງລັດຢູ່ພາຍໃນ ສະຖາບັນການເມືອງ ແລະການປົກຄອງແຫ່ງຊາດ, ຮ່າງກົດລະບຽບການປ້ອງກັນຄວາມສະຫງົບຂອງ ສະຖາບັນການເມືອງ ແລະ ການປົກຄອງແຫ່ງຊາດ ແລະຮ່າງກົດລະບຽບການຄຸ້ມຄອງຫໍພັກນັກສຶກສາ. ຊຶ່ງເນື້ອໃນກົດລະບຽບສະບັບນີ້ກຳນົດມາດຕະການຕ່າງໆ ເພື່ອເປັນບ່ອນອີງໃຫ້ແກ່ການຄຸ້ມຄອງຊັບສິນຂອງລັດ ຢູ່ ສມປຊ ໃຫ້ມີຄວາມຢືນຍົງ, ເຮັດໃຫ້ການຄຸ້ມຄອງ, ການນໍາໃຊ້, ປົກປັກຮັກສາ, ຕິດຕາມກວດກາຊັບສິນຂອງລັດຢູ່ພາຍໃນ ສມປຊ ໃຫ້ມີປະສິດທິພາບ. ຄຽງຄູ່ກັບຄວາມເປັນເອກະພາບໃນການຈັດຕັ້ງປະຕິບັດວຽກງານປ້ອງກັນຄວາມສະຫງົບພາຍໃນ ສມປຊ, ກຳແໜ້ນສະພາບຮອບດ້ານຂອງຄູ-ອາຈານ, ພະນັກງານ-ລັດຖະກອນ, ພະນັກງານຕາມສັນຍາ ແລະນັກສຶກສາ ພ້ອມກັບການຕິດຕາມການປ້ອງກັນເວນຍາມຕາມອາຄານ-ສຳນັກງານ, ຮັກສາຄວາມສະຫງົບ, ຄວາມປອດໄພຢູ່ພາຍໃນ ສມປຊ ເພື່ອແນໃສ່ເຮັດໃຫ້ການຄຸ້ມຄອງ, ນໍາໃຊ້ຫໍພັກນັກສຶກສາ ຫັນເຂົ້າສູ່ຄວາມເປັນລະບຽບຮຽບຮ້ອຍ, ເປັນການຮັບປະກັນດ້ານຄວາມສະອາດ, ຄວາມປອດໄພໃນດ້ານຕ່າງໆ. ເພື່ອແນໃສ່ຍົກສູງສະຕິໃຫ້ຜູ້ຊົມໃຊ້, ສ້າງຄວາມເປັນເຈົ້າການຂອງນັກສຶກສາໃນການປົກປັກຮັກສາ, ຄຸ້ມຄອງດູແລຫໍພັກທີ່ຕົນເອງຢູ່.
ນອກຈາກນີ້ ທ່ານປະທານກອງປະຊຸມ ໄດ້ໃຫ້ໃຫ້ທິດຊີ້ນໍາເພິ່ມເຕີມ ແລະບັນດາທ່ານທີ່ເຂົ້າຮ່ວມກອງປະຊຸມກໍ່ໄດ້ປະກອບຄໍາຄິດເຫັນໃສ່ຮ່າງກົດລະບຽບເພື່ອເປັນພື້ນຖານທີ່ສໍາຄັນໃຫ້ແກ່ການສືບຕໍ່ປັບປຸງຮ່າງເອກະສານດັ່ງກ່າວໃຫ້ມີເນື້ອໃນເລິກເຊິ່ງ, ຄົບຖ້ວນ, ແທດເໝາະກັບສະພາບຄວາມເປັນຕົວຈິງ ແລະສາມາດນໍາເອົາໄປຈັດຕັ້ງປະຕິບັດໃຫ້ປະກົດຜົນເປັນຈິງ.
ຂ່າວ: ນ. ທິດດາວອນ ດວງປະເສີດ
ຮູບພາບ: ຕາອັອດ ແສນທະວີສຸກ
ບັນນາທິການ: ປທ ບຸນປັນ ສຸມຸນທອງ