ເພື່ອອຳນວຍຄວາມສະດວກໃນການເຂົ້າເຖິງການສັກວັກຊິນປ້ອງກັນໂຄວິດ 19 ສຳລັບພະນັກງານ, ຄູ-ອາຈານຂອງ ສະຖາບັນການເມືອງ ແລະ ການປົກຄອງແຫ່ງຊາດ, ພະນັກງານບຳນານ, ຍາດຕິພີ້ນ້ອງຂອງພະນັກງານ, ຄູ-ອາຈານ ແລະນັກສຶກສາ, ທັງນີ້ເພື່ອສ້າງເລັ່ງສ້າງພູມຄຸ້ມກັນ, ທັງຮັບປະກັນໃຫ້ແກ່ການຮຽນ-ການສອນປີສຸດທ້າຍ ແລະການເຮັດວຽກຂອງພະນັກງານໄດ້ຢ່າງສະບາຍໃຈ, ດັ່ງນັ້ນ, ໃນວັນທີ 23 ມິຖຸນາ 2021 ສມປຊ ໄດ້ປະສານສົມທົບກັບ ກະຊວງສາທາລະນະສຸກ ໄດ້ສົ່ງທີມແພດນຳພາໂດຍ ທ່ານ ນ. ສີວັນ ສີບຸນເຮືອງ ຮອງຫົວໜ້າພະແນກພະຍາບານ ໂຮງໝໍມິດຕະພາບ ພ້ອມດ້ວຍຄະນະ 7 ທ່ານ ໄດ້ຕັ້ງຈຸດສັກວັກຊິນກັນພະຍາດໂຄວິດ 19 ເຂັມທີ 1 ຢູ່ ສະໂມສອນ ສມປຊ ເພື່ອດໍາເນີນການສັກວັກຊີນໃຫ້ ພະນັກງານ, ຄູ-ອາຈານຂອງ ສມປຊ, ພະນັກງານບຳນານ, ຍາດຕິພີ້ນ້ອງຂອງພະນັກງານ, ຄູ-ອາຈານ ແລະນັກສຶກສາ.
ໃນລະຫວ່າງການສັກວັກຊິນ ທ່ານ ປອ ດາວສະຫວັນ ເຄືອມີໄຊ ກໍາມະການຄະນະພັກ, ຫົວໜ້າສູນແນວຄິດ ໄກສອນ ພົມວິຫານ, ກໍາມະການສູນກາງຊາວໜຸ່ມ ປປລ, ເລຂາຄະນະບໍລິຫານງານຊາວໜຸ່ມ ສມປຊ, ຫົວໜ້າຄະນະສະເພາະກິດ ສະກັດກັ້ນ, ຄວບຄຸມ ແລະ ຕ້ານພະຍາດ ໂຄວິດ 19 ໄດ້ເປີດພິທີ ແລະ ພ້ອມທັງນໍາເອົາກໍາລັງແຮງສະມາຊິກຊາວໜຸ່ມ ສມປຊ ປະກອບສ່ວນຊ່ວຍທີມແພດ ໃນການບັນທຶກຂໍ້ມູນ ແລະກວດວັດແທກອຸນນະພູມ,ຈັດສັນສະຖານທີ່ຈອດລົດ ແລະໃຫ້ຟອມຂໍ້ມູນ, ຂັ້ນຕອນຕ່າງໆ ທັງນີ້ເພື່ອຮັບປະກັນຄວາມເປັນລະບຽບ, ຕິດຕາມມາດຕະການຕໍ່ຜູ້ທີ່ມາໃຊ້ຮັບວັກຊີນນັ້ນຕ້ອງໃສ່ຜ້າປິດປາກ ແລະຢືນລຽນແຖວລໍຖ້າຕາມການອາ່ນລາຍຊື່ທີ່ໄດ້ລົງທະບຽນກ່ອນໜ້ານີ້.
ທ່ານຍັງໃຫ້ຮູ້ອີກວ່າ ຈຳນວນທີ່ໄດ້ຮັບການສັກວັກຊິນທັງໝົດມີ 303 ທ່ານ, ໃນນັ້ນ ໄຟເຊິ 123 ທ່ານ, ຊີໂນຝາມ 180 ທ່ານ ຊຶ່ງໃນຈຳນວນດັ່ງກ່າວນີ້ສະແດງໃຫ້ເຫັນພະນັກງານ, ຄູ-ອາຈານຂອງສະຖາບັນການເມືອງ ແລະ ການປົກຄອງແຫ່ງຊາດ, ພະນັກງານບຳນານ, ຍາດຕິພີ້ນ້ອງຂອງພະນັກງານ, ຄູ-ອາຈານ ແລະນັກສຶກສາມີຄວາມຕື່ນຕົວຕໍ່ກັບການຕ້ານສະກັດກັ້ນພະຍາດໂຄວິດ 19 ເປັນຢ່າງສູງ.
ຂ່າວ/ພາບ: ຕາອັອດ ແສນທະວີສຸກ
ບັນນາທິການ: ປທ ບຸນປັນ ສຸມຸນທອງ