ໃນຕອນເຊົ້າຂອງວັນທີ 19 ມີນາ 2026, ຢູ່ທີ່ ສະຖາບັນການເມືອງ ແລະ ການປົກຄອງແຫ່ງຊາດ (ສມປຊ) ໄດ້ມີພິທີ ມອບ-ຮັບ ປຶ້ມການຄົ້ນຄວ້າທິດສະດີ ແລະ ພຶດຕິກຳ ຂອງສະພາທິດສະດີສູນກາງພັກ. ເຫດການດັ່ງກ່າວ, ເປັນຂີດໝາຍສຳຄັນໃນການເພີ່ມທະວີແຫຼ່ງຂໍ້ມູນທາງດ້ານທິດສະດີ, ວິທະຍາສາດການເມືອງ ແລະພຶດຕິກຳແຫ່ງການປົກປັກຮັກສາ ແລະສ້າງສາພັດທະນາປະເທດຊາດ ໃຫ້ແກ່ສະຖາບັນການສຶກສາຊັ້ນສູງຂອງພັກ.
ພິທີທີ່ມີຄວາມໝາຍຄວາມສຳຄັນນີ້ ໄດ້ຮັບກຽດກ່າວມອບໂດຍ ທ່ານ ປອ ຄຳມອນ ຈັນທະຈິດ ຮອງຫົວໜ້າຄະນະໂຄສະນາອົບຮົມສູນກາງພັກ, ຮອງຫົວໜ້າສະພາທິດສະດີສູນກາງພັກ ແລະໃຫ້ກຽດກ່າວຮັບໂດຍ ທ່ານ ຮສ ປອ ດາວສະຫວັນ ເຄືອມີໄຊ ກຳມະການສຳຮອງສູນກາງພັກ, ຮອງເລຂາຄະນະບໍລິຫານງານພັກ, ຮອງຫົວໜ້າ ສມປຊ, ໂດຍມີພະນັກງານ, ຄູ-ອາຈານ ແລະພາກສ່ວນທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.
ປຶ້ມທີ່ນຳມາມອບໃນຄັ້ງນີ້ ລ້ວນແຕ່ເປັນຜົນງານການຄົ້ນຄວ້າລະດັບຊາດ ແລະ ສາກົນ ທີ່ຕົກພຶກຈາກພຶດຕິກຳຕົວຈິງໃນການນຳພາຂອງພັກ ເຊິ່ງປະກອບມີທັງໝົດ 10 ລາຍການ, ລວມຈຳນວນ 190 ຫົວ, ຄິດເປັນມູນຄ່າທັງໝົດ 16,000,000 ກີບ ໂດຍມີລາຍລະອຽດດັ່ງນີ້:
- ປຶ້ມ ສະຫຼຸບທິດສະດີ ແລະ ພຶດຕິກຳ ສ້າງປະຖົມປັດໄຈ ຕາມເສັ້ນທາງກ້າວຂຶ້ນສັງຄົມນິຍົມ (ຈຳນວນ 10 ຫົວ).
- ປຶ້ມ ການສ້າງລັດທີ່ປົກຄອງດ້ວຍກົດໝາຍ ຢູ່ ສປປ ລາວ (ຈຳນວນ 10 ຫົວ).
- ປຶ້ມ ສະຫຼຸບ 40 ປີ ແຫ່ງການປະຕິບັດແນວທາງປ່ຽນແປງໃໝ່ຮອບດ້ານ ມີໄຊ ຂອງພັກ ຢູ່ ສປປ ລາວ (ຈຳນວນ 100 ຫົວ) ເຊິ່ງເປັນເອກະສານພື້ນຖານສຳຄັນທີ່ສຸດໃນໄລຍະປັດຈຸບັນ.
- ປຶ້ມ ສຳມະນາທິດສະດີສອງພັກ ລາວ-ກູບາ, ຄັ້ງທີ 1 (ຈຳນວນ 10 ຫົວ).
- ປຶ້ມ ສຳມະນາທິດສະດີສອງພັກ ລາວ-ຫວຽດນາມ, ຄັ້ງທີ 9 (ຈຳນວນ 10 ຫົວ).
- ປຶ້ມ ສຳມະນາທິດສະດີສອງພັກ ລາວ-ຫວຽດນາມ, ຄັ້ງທີ 8 (ຈຳນວນ 10 ຫົວ).
- ປຶ້ມ ສຳມະນາທິດສະດີສອງພັກ ລາວ-ຈີນ, ຄັ້ງທີ 9 (ຈຳນວນ 10 ຫົວ).
- ປຶ້ມ ສຳມະນາທິດສະດີສອງພັກ ລາວ-ຈີນ, ຄັ້ງທີ 10 (ຈຳນວນ 10 ຫົວ).
- ປຶ້ມ 60 ປີ ສ້າງຕັ້ງສາຍພົວພັນການທູດ, 45 ປີ ວັນເຊັນສັນຍາມິດຕະພາບ ແລະການຮ່ວມມື ລາວ-ຫວຽດນາມ (ຈຳນວນ 10 ຫົວ).
- ປຶ້ມ ການກໍ່ສ້າງພັກປະຊາຊົນປະຕິວັດລາວ ໃນເງື່ອນໄຂພັກດຽວກຳອຳນາດຢູ່ລາວ (ຈຳນວນ 10 ຫົວ).
ການມອບ-ຮັບເອກະສານຄົ້ນຄວ້າທິດສະດີໃນຄັ້ງນີ້ ເປັນການປະກອບ “ອາວຸດທາງດ້ານແນວຄິດ-ທິດສະດີ” ທີ່ແຫຼມຄົມ ໃຫ້ແກ່ ສມປຊ ເຊິ່ງເປັນກົມກອງເສນາທິການທາງດ້ານການເມືອງທີ່ສຳຄັນຂອງພັກ. ບັນດາປຶ້ມເຫຼົ່ານີ້ ແມ່ນສ່ອງແສງໃຫ້ເຫັນເຖິງການສະຫຼຸບຕີລາຄາພຶດຕິກຳ 40 ປີ ແຫ່ງການປ່ຽນແປງໃໝ່, ການຖອດຖອນບົດຮຽນທາງດ້ານທິດສະດີຈາກບັນດາປະເທດເພື່ອນມິດຍຸດທະສາດສັງຄົມນິຍົມ (ຫວຽດນາມ, ຈີນ, ກູບາ) ແລະ ການຢືນຢັນເຖິງຄວາມຈຳເປັນພາວະວິໄສ ໃນການຍົກສູງຄວາມສາມາດນຳພາຂອງພັກ ໃນເງື່ອນໄຂພັກດຽວກຳອຳນາດ. ເອກະສານທັງໝົດນີ້ ຈະກາຍເປັນບ່ອນອີງອັນໜັກແໜ້ນທາງດ້ານທິດສະດີ ໃຫ້ແກ່ຄູ-ອາຈານ, ນັກຄົ້ນຄວ້າ ແລະ ນັກສຶກສາ ໃນການຄົ້ນຄວ້າ, ເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ຂອງພັກ ເຂົ້າສູ່ລວງເລິກ, ພ້ອມທັງເປັນການຕ້ານຄືນກົນອຸບາຍຫັນປ່ຽນໂດຍສັນຕິ ຂອງກຳລັງປໍລະປັກ.
ໃນໂອກາດດັ່ງກ່າວ, ທ່ານ ຮສ ປອ ດາວສະຫວັນ ເຄືອມີໄຊ ໄດ້ຕາງໜ້າຄະນະພັກ, ຄະນະນຳ ກ່າວສະແດງຄວາມຂອບໃຈຢ່າງເລິກເຊິ່ງມາຍັງ ຫ້ອງການສະພາທິດສະດີສູນກາງພັກ ທີ່ຍາມໃດກໍໃຫ້ຄວາມສຳຄັນ ແລະຕິດຕາມຊຸກຍູ້ວຽກງານກໍ່ສ້າງພະນັກງານນຳພາ-ຄຸ້ມຄອງ. ພ້ອມທັງໃຫ້ຄຳໝັ້ນສັນຍາວ່າ ຈະນຳເອົາບັນດາປຶ້ມ ແລະເອກະສານທິດສະດີອັນລ້ຳຄ່າເຫຼົ່ານີ້ ໄປຄຸ້ມຄອງ, ປົກປັກຮັກສາ ແລະ ນຳໃຊ້ເຂົ້າໃນວຽກງານການຮຽນ-ການສອນ, ການຄົ້ນຄວ້າວິທະຍາສາດ ໃຫ້ເກີດປະໂຫຍດສູງສຸດ ເພື່ອສ້າງຖັນແຖວພະນັກງານໃຫ້ມີຫຼັກໝັ້ນການເມືອງໜັກແໜ້ນ, ມີຄຸນສົມບັດສິນທຳປະຕິວັດ ແລະມີຄວາມສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການ ຂອງໜ້າທີ່ການເມືອງໃນໄລຍະ ໃໝ່ຢ່າງແທ້ຈິງ.
ຂ່າວ/ພາບ: ປທ ຕາອັອດ ແສນທະວີສຸກ
ບັນນາທິການ: ປທ ວຽງສະຫວັນ ຈັນທະວິໄຊ