ເພື່ອເປັນການສ້າງຄວາມເຂັ້ມແຂງ, ສົ່ງເສີມວິຊາຊີບ ແລະຍົກລະດັບສີມືແຮງງານໃຫ້ແກ່ເອື້ອຍນ້ອງແມ່ຍິງໃນຍຸກປັດຈຸບັນ, ພາຍໃຕ້ການສະໜັບສະໜູນທຶນການຝຶກອົບຮົມຈາກ ວິທະຍາໄລເຕັກນິກປາກປ່າສັກ, ຄະນະສະຫະພັນແມ່ຍິງຮາກຖານວິທະຍາໄລເຕັກນິກປາກປ່າສັກ ໄດ້ຈັດຕັ້ງຊຸດຝຶກອົບຮົມວິຊາຊີບໄລຍະສັ້ນ ໃນຫົວຂໍ້ “ການເຮັດເຂົ້າໜົມ ແລະເບເກີຣີ” ຂຶ້ນຢ່າງເປັນທາງການໃນວັນທີ 12 ມີນາ 2026. ການຝຶກອົບຮົມຄັ້ງນີ້ໄດ້ຈັດຂຶ້ນທີ່ສູນເມຊານ (Maysan Center), ເຊິ່ງຕັ້ງຢູ່ຊັ້ນ 4 ຂອງສູນການຄ້າ ວຽງຈັນເຊັນເຕີ (Vientiane Center).
ພິທີເປີດການຝຶກອົບຮົມໃນຄັ້ງນີ້ ໄດ້ຮັບກຽດເຂົ້າຮ່ວມ ແລະ ຊີ້ນຳຢ່າງໃກ້ຊິດໂດຍທ່ານ ອຈ ຈັນແກ້ວ ບູລົມ, ປະທານສະຫະພັນແມ່ຍິງຮາກຖານ ວິທະຍາໄລເຕັກນິກປາກປ່າສັກ ແລະທ່ານ ອຈ ອຸທອນ ສີພັນດອນ, ຮອງປະທານສະຫະພັນແມ່ຍິງຮາກຖານ ພ້ອມດ້ວຍຄະນະສະມາຊິກເຂົ້າຮ່ວມຢ່າງພ້ອມພຽງ.
ຈຸດປະສົງຫຼັກຂອງການຈັດກິດຈະກຳໃນຄັ້ງນີ້ ແມ່ນເພື່ອເປັນການສົ່ງເສີມວິຊາຊີບໃຫ້ແກ່ແມ່ຍິງ, ສ້າງໂອກາດໃຫ້ເອື້ອຍນ້ອງສະມາຊິກໄດ້ຮຽນຮູ້ທັກສະໃໝ່ໆ ໃນການປຸງແຕ່ງອາຫານ ແລະການເຮັດເຂົ້າໜົມຢ່າງຖືກຕ້ອງຕາມຫຼັກສູດມາດຕະຖານ. ເຊິ່ງທັກສະເຫຼົ່ານີ້ສາມາດນຳໄປຕໍ່ຍອດປະກອບເປັນອາຊີບຫຼັກ ຫຼື ອາຊີບເສີມ ເພື່ອສ້າງລາຍຮັບເພີ່ມເຕີມໃຫ້ແກ່ຕົນເອງ ແລະຄອບຄົວ, ພ້ອມທັງເປັນການຊຸກຍູ້ໃຫ້ແມ່ຍິງລາວມີຄວາມເປັນເອກະລາດທາງດ້ານເສດຖະກິດ ແລະສາມາດເພິ່ງພາຕົນເອງໄດ້ຫຼາຍຂຶ້ນ.
ຊຸດຝຶກອົບຮົມຄັ້ງນີ້ ໄດ້ຮັບກຽດຈາກ ທ່ານ ອາຈານ ດາວສຸກອຸລາ ວິໄລ ຊ່ຽວຊານ ແລະຄູຝຶກປະຈຳສູນລວມການປຸງແຕ່ງ ແລະການເຮັດເຂົ້າໜົມ ມາເປັນວິທະຍາກອນຖ່າຍທອດຄວາມຮູ້ທາງດ້ານທິດສະດີ ແລະນຳພາລົງມືປະຕິບັດຕົວຈິງໃນທຸກຂັ້ນຕອນ. ສຳລັບຜູ້ເຂົ້າຮ່ວມການຝຶກອົບຮົມໃນຄັ້ງນີ້ ມີຈຳນວນທັງໝົດ 24 ທ່ານ, ເຊິ່ງປະກອບມີສະມາຊິກແມ່ຍິງ (ສມປຊ) ຈຳນວນ 23 ທ່ານ ແລະພິເສດຍັງມີຜູ້ເຂົ້າຮ່ວມທີ່ເປັນເພດຊາຍ 1 ທ່ານ ທີ່ໃຫ້ຄວາມສົນໃຈໃນການຮຽນຮູ້ທັກສະດ້ານນີ້ເຊັ່ນດຽວກັນ, ສິ່ງນີ້ສະແດງໃຫ້ເຫັນເຖິງການເປີດກວ້າງ ແລະຄວາມສະເໝີພາບທາງເພດໃນການເຂົ້າເຖິງການຮຽນຮູ້ວິຊາຊີບ.ໃນພາກປະຕິບັດຕົວຈິງ, ທາງຄູຝຶກໄດ້ເນັ້ນໜັກການສອນເຮັດເຂົ້າໜົມ ທີ່ກຳລັງເປັນທີ່ນິຍົມໃນຕະຫຼາດ, ໃຊ້ຕົ້ນທຶນການຜະລິດບໍ່ສູງ ແຕ່ສາມາດສ້າງຜົນກຳໄລໄດ້ດີ ເຊິ່ງປະກອບມີ 3 ປະເພດຫຼັກຄື:
1). ເຂົ້າໜົມໂດນັດ (Donut): ຜູ້ເຂົ້າຮ່ວມໄດ້ຮຽນຮູ້ຕັ້ງແຕ່ເຕັກນິກການປະສົມແປ້ງ, ການນວດແປ້ງ, ການໝັກແປ້ງໃຫ້ຟູໄດ້ທີ່, ຕະຫຼອດຮອດເຕັກນິກການທອດໃຫ້ສີສວຍງາມ ແລະການແຕ່ງໜ້າເຂົ້າໜົມດ້ວຍລົດຊາດຕ່າງໆທີ່ໜ້າຮັບປະທານ.
2). ເຂົ້າຈີ່ຫວຽດນາມ (Banh Mi): ສອນວິທີການເຮັດເຂົ້າຈີ່ທີ່ມີຄວາມກອບນອກ-ນຸ້ມໃນອັນເປັນເອກະລັກສະເພາະ ເຊິ່ງເປັນເມນູຍອດຮິດທີ່ສາມາດນຳໄປເຮັດເປັນແຊນວິດເຂົ້າຈີ່ປາເຕທີ່ຂາຍດີ ແລະເປັນທີ່ຕ້ອງການໃນທ້ອງຕະຫຼາດ.
3). ເຄັກກ້ວຍຫອມ (Banana Cake): ສອນເຕັກນິກການອົບເຄັກກ້ວຍຫອມໃຫ້ມີຄວາມນຸ້ມ, ເນື້ອຟູ, ຫອມ ແລະມີລົດຊາດແຊບຊ້ອຍ ເຊິ່ງເປັນເມນູທີ່ເຮັດງ່າຍ, ເໝາະສຳລັບການເລີ່ມຕົ້ນທຸລະກິດເບເກີຣີຂະໜາດນ້ອຍ.
ບັນຍາກາດຕະຫຼອດການຝຶກອົບຮົມແມ່ນເຕັມໄປດ້ວຍຄວາມຟົດຟື້ນ, ມີຄວາມກະຕືລືລົ້ນໃນການຮຽນຮູ້ ແລະຄວາມສາມັກຄີຊ່ວຍເຫຼືອເຊິ່ງກັນແລະກັນ ຂອງຜູ້ເຂົ້າຮ່ວມທຸກທ່ານ. ຜົນສຳເລັດຈາກການຝຶກອົບຮົມຄັ້ງນີ້, ເຊື່ອໝັ້ນວ່າຜູ້ເຂົ້າຮ່ວມທັງໝົດຈະສາມາດນຳເອົາຄວາມຮູ້ ແລະປະສົບການຕົວຈິງທີ່ໄດ້ຮັບໄປໝູນໃຊ້ໃຫ້ເກີດປະໂຫຍດສູງສຸດ, ບໍ່ວ່າຈະເປັນການເຮັດຮັບປະທານໃນຄອບຄົວ ຫຼື ການນຳໄປຕໍ່ຍອດເປີດຮ້ານນ້ອຍໆ ແລະຂາຍຜ່ານຊ່ອງທາງອອນລາຍ.ໂຄງການດັ່ງກ່າວນີ້ ຖືເປັນອີກໜຶ່ງຜົນງານທີ່ສຳຄັນ ແລະໜ້າຊື່ນຊົມຂອງ ວິທະຍາໄລເຕັກນິກປາກປ່າສັກ ໃນການປະຕິບັດພັນທະຕໍ່ສັງຄົມ ແລະປະກອບສ່ວນອັນສຳຄັນເຂົ້າໃນການພັດທະນາຊັບພະຍາກອນມະນຸດ ໂດຍສະເພາະແມ່ນການສ້າງຄວາມເຂັ້ມແຂງໃຫ້ແກ່ແມ່ຍິງລາວ ໃຫ້ກ້າວທັນຍຸກສະໄໝຢ່າງແທ້ຈິງ.
ຂ່າວ: ປທ ຕາອັອດ ແສນທະວີສຸກ
ຮູບພາບ: ປທ ນ. ພາວັນ ວິລະວົງ
ບັນນາທິການ: ປທ ບຸນປັນ ສຸມຸນທອງ