ໃນຍຸກສະໄໝທີ່ຂໍ້ມູນຂ່າວສານປຽບເໝືອນສະໜາມຮົບທາງດ້ານແນວຄິດ, ວຽກງານສື່ມວນຊົນຈຶ່ງບໍ່ແມ່ນພຽງແຕ່ການລາຍງານເຫດການທົ່ວໄປ, ແຕ່ຄື “ກະບອກສຽງ” ແລະ “ອາວຸດທາງປັນຍາ” ອັນແຫຼມຄົມ ທີ່ເຮັດໜ້າທີ່ປົກປ້ອງແນວທາງນະໂຍບາຍຂອງພັກ-ລັດ ພ້ອມທັງເຕົ້າໂຮມຄວາມສາມັກຄີຂອງປວງຊົນ. ດ້ວຍເຫດນີ້, ການຍົກລະດັບຄວາມສາມາດໃຫ້ແກ່ນັກຂ່າວ ດ້ານຂໍ້ມູນຂ່າວສານ ຈຶ່ງເປັນວຽກງານຍຸດທະສາດທີ່ສຳຄັນຍິ່ງ.
ຫຼ້າສຸດ, ໃນລະຫວ່າງວັນທີ 24-26 ກຸມພາ 2026 ທີ່ຜ່ານມາ, ທີ່ເມືອງແກ້ວອຸດົມ ແຂວງວຽງຈັນ, ຫ້ອງຮຽນຂົງຈື້ ຂອງວິທະຍຸກະຈາຍສຽງແຫ່ງຊາດລາວ (ວສລ) ໄດ້ເປັນເຈົ້າພາບຈັດຊຸດຝຶກອົບຮົມຍົກລະດັບເຕັກນິກການຜະລິດຂ່າວຢ່າງເປັນທາງການ. ພິທີດັ່ງກ່າວໄດ້ຮັບກຽດເຂົ້າຮ່ວມຊີ້ນຳໂດຍ ທ່ານ ນາງ ສິມມະນີ ແກ້ວແກ່ນ ຜູ້ອໍານວຍການໃຫຍ່ ວສລ, ທ່ານ ວຽງວັດທະນາ ຊະນະພານ ຮອງຜູ້ອໍານວຍການໃຫຍ່ ວສລ, ພ້ອມດ້ວຍຫົວໜ້າຫ້ອງຮຽນຂົງຈື້ ວສລ, ບັນດາວິທະຍາກອນ ແລະ ທີ່ສຳຄັນແມ່ນມີສໍາມະນາກອນຈາກຫ້ອງຮຽນຂົງຈື້ 5 ແຫ່ງ ເຊິ່ງໃນນັ້ນ ສະຖາບັນການເມືອງ ແລະ ການປົກຄອງແຫ່ງຊາດ ໄດ້ນຳສົ່ງ ທ່ານ ປທ ຕາອັອດ ແສນທະວີສຸກ ເຂົ້າຮ່ວມການຝຶກອົບຮົມ.
ສະຖາບັນການເມືອງ ແລະ ການປົກຄອງແຫ່ງຊາດ ແມ່ນສະຖາບັນການສຶກສາຊັ້ນສູງທີ່ເປັນໃຈກາງໃນການຄົ້ນຄວ້າ ແລະ ຝຶກຝົນຫຼໍ່ຫຼອມພະນັກງານການນຳ-ຄຸ້ມຄອງ ຂອງພັກ ແລະ ລັດຖະບານ. ດັ່ງນັ້ນ, ທີມງານນັກຂ່າວ ຂອງ ສມປຊ ຈຶ່ງມີບົດບາດສຳຄັນໃນການເປັນຂົວຕໍ່ ເພື່ອເຜີຍແຜ່ທິດສະດີ ມາກ-ເລນິນ, ແນວຄິດໄກສອນ ພົມວິຫານ ແລະ ແນວທາງນະໂຍບາຍຂອງພັກ ໃຫ້ລົງເລິກສູ່ສັງຄົມ. ການເຂົ້າຮ່ວມຝຶກອົບຮົມໃນຄັ້ງນີ້, ຈຶ່ງຖືເປັນບາດກ້າວສຳຄັນໃນການ “ຕີດາບທາງດ້ານແນວຄິດ” ໃຫ້ນັກຂ່າວ ສມປຊ ມີຄວາມພ້ອມຮອບດ້ານໃນການນຳໃຊ້ສື່ທຸກຮູບແບບ ເພື່ອຮັບໃຊ້ໜ້າທີ່ການເມືອງໃນໄລຍະໃໝ່.
ໂອກາດດັ່ງກ່າວ, ທ່ານ ນາງ ສິມມະນີ ແກ້ວແກ່ນ ໄດ້ໃຫ້ທັດສະນະຊີ້ນຳຢ່າງເລິກເຊິ່ງວ່າ: ເປົ້າໝາຍຫຼັກ ຂອງການຝຶກອົບຮົມ ແມ່ນເພື່ອຍົກລະດັບຄວາມຮູ້ ແລະ ສ້າງຄວາມເຂົ້າໃຈດ້ານເຕັກນິກການຜະລິດຂ່າວຢ່າງເປັນລະບົບ. ທ່ານໄດ້ເນັ້ນໜັກເຖິງສະພາບການຕົວຈິງໃນປັດຈຸບັນ ທີ່ເປັນຍຸກຂໍ້ມູນຂ່າວສານເຄື່ອນໄຫວຢ່າງວ່ອງໄວ, ມີການແຂ່ງຂັນສູງ ແລະ ເຕັມໄປດ້ວຍຂໍ້ມູນທີ່ບິດເບືອນ. ດັ່ງນັ້ນ, ນັກຂ່າວ ແລະ ຜູ້ຜະລິດສື່ ຈຳເປັນຕ້ອງມີທັກສະອັນແນ່ນອນ ແລະ ເປັນມືອາຊີບໃນທຸກຂັ້ນຕອນ ນັບຕັ້ງແຕ່:
- ການເກັບກຳຂໍ້ມູນ ແລະ ການສຳພາດ: ເພື່ອໃຫ້ໄດ້ແຫຼ່ງຂ່າວທີ່ໜ້າເຊື່ອຖື ແລະ ຖືກຕ້ອງຕາມຫຼັກການຂອງພັກ.
- ການຂຽນຂ່າວ: ທີ່ຕ້ອງມີເນື້ອໃນຄົບຖ້ວນ, ສັ້ນກະທັດຮັດ, ຊັດເຈນ ແລະ ເຂົ້າໃຈງ່າຍ.
- ການຖ່າຍຮູບ-ຖ່າຍວິດີໂອ ແລະ ການຕັດຕໍ່: ເພື່ອສ້າງຄວາມໜ້າສົນໃຈ ແລະ ດຶງດູດມວນຊົນໃນຍຸກສື່ສັງຄົມອອນລາຍ.
ການຜະລິດຂ່າວທີ່ດີ ບໍ່ພຽງແຕ່ຕ້ອງ “ວ່ອງໄວທັນເຫດການ” ແຕ່ຕ້ອງ “ຕອບສະໜອງຄວາມຕ້ອງການຂອງສັງຄົມ” ໄປພ້ອມໆກັບການຊີ້ນຳຫາງສຽງສັງຄົມໄປໃນທິດທາງທີ່ຖືກຕ້ອງ, ສະກັດກັ້ນ ແລະ ຕ້ານຄືນທຸກຖ້ອຍທຳນອງການໃສ່ຮ້າຍປ້າຍສີ ຂອງອິດທິກຳລັງປໍລະປັກ ທີ່ຫວັງມ້າງເພທຳລາຍລະບອບໃໝ່ຂອງພວກເຮົາ.
ນອກຈາກການຍົກລະດັບວິຊາສະເພາະແລ້ວ, ການທີ່ຫ້ອງຮຽນຂົງຈື້ ວສລ ເປັນເຈົ້າພາບ ແລະ ມີການເຕົ້າ ໂຮມນັກຂ່າວຈາກຫ້ອງຮຽນຂົງຈື້ເຖິງ 5 ແຫ່ງ ຍັງສະທ້ອນໃຫ້ເຫັນເຖິງໝາກຜົນຂອງການຮ່ວມມືດ້ານວັດທະນະທຳ-ສັງຄົມ ລະຫວ່າງ ລາວ ແລະ ຈີນ. ສິ່ງນີ້ເປັນການຮັດແໜ້ນສາຍພົວພັນຄູ່ຮ່ວມຊະຕາກຳ ລາວ-ຈີນ ໃຫ້ແໜ້ນແຟ້ນຍິ່ງຂຶ້ນ, ເຊິ່ງສື່ມວນຊົນຄືກົນໄກສຳຄັນໃນການສົ່ງເສີມຄວາມເຂົ້າໃຈອັນດີ ລະຫວ່າງປະຊາຊົນສອງຊາດ. ຊຸດຝຶກອົບຮົມຄັ້ງນີ້ ໄດ້ດຳເນີນໄປຈົນເຖິງວັນທີ 26 ກຸມພາ 2026 ໄດ້ສຳເລັດລົງຢ່າງຈົບງາມ. ຜົນສຳເລັດຈາກການຝຶກອົບຮົມ ໄດ້ເປັນກຳລັງແຮງໃໝ່ໃຫ້ແກ່ນັກຂ່າວ ສມປຊ ແລະ ສໍາມະນາກອນທຸກພາກສ່ວນ ໃນການນຳເອົາບົດຮຽນທາງດ້ານເຕັກນິກ ໄປໝູນໃຊ້ເຂົ້າໃນວຽກງານຕົວຈິງ, ສືບຕໍ່ເຮັດໜ້າທີ່ເປັນນັກຮົບຜູ້ກ້າແກ່ນໃນແນວຮົບດ້ານແນວຄິດ-ວັດທະນະທຳ ແລະ ຂໍ້ມູນຂ່າວສານ ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຢ່າງໜັກແໜ້ນ ແລະ ກ້າວໜ້າຕໍ່ໄປ.
ຂ່າວ: ປທ ຕາອັອດ ແສນທະວີສຸກ
ຮູບພາບ: ວິທະຍຸກະຈາຍສຽງແຫ່ງຊາດລາວ
ບັນນາທິການ: ປທ ວຽງສະຫວັນ ຈັນທະວິໄຊ