ໃນຕອນບ່າຍ ຂອງວັນທີ 25 ທັນວາ 2025 ຢູ່ທີ່ເດີ່ນກິລາ ຂອງສະຖາບັນການເມືອງ ແລະ ການປົກຄອງແຫ່ງຊາດ ໄດ້ມີພິທີເປີດຂະບວນການແຂ່ງຂັນກິລາ-ສິລະປະວັນນະຄະດີ ຊີງຂັນຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ຄັ້ງທີ XV ຂຶ້ນຢ່າງເປັນຂະບວນຟົດຟື້ນ ໂດຍການໃຫ້ກຽດເຂົ້າຮ່ວມເປັນປະທານ ຂອງ ທ່ານ ຮສ ພູວົງ ອຸ່ນຄໍາແສນ, ກໍາມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ພ້ອມດ້ວຍຄະນະພັກ, ຄະນະນຳ, ພະນັກງານ, ຄູ-ອາຈານ ແລະ ນັກສຶກສາ ທຸກຮຸ່ນ ທຸກລະບົບ ເຂົ້າຮ່ວມຢ່າງພ້ອມພຽງ.
ພິທີໄດ້ເລີ່ມຕົ້ນຂຶ້ນໃນເວລາ 14:30 ໂມງ, ດ້ວຍພາບອັນປະທັບໃຈຂອງ ບັນດາກ້ອນກຳລັງນັກກິລາ ທີ່ເຄື່ອນຍ້າຍເຂົ້າສູ່ເດີ່ນ ດ້ວຍທ່ວງທ່າທີ່ເຂັ້ມແຂງ, ສະຫງ່າຜ່າເຜີຍ ແລະ ເປັນລະບຽບຮຽບຮ້ອຍ. ສຽງຕົບມືໄດ້ດັງກ້ອງກັງວານຂຶ້ນ ເມື່ອຂະບວນນັກກິລາຈາກ ລະບົບຮຽນປະລິນຍາເອກ ຮຸ່ນທີ I, ລະບົບປະລິນຍາໂທ ຮຸ່ນທີ 21, ລະບົບປະລິນຍາຕີ ຮຸ່ນທີ XXVI, ລະບົບປະລິນຍາຕີຕໍ່ເນື່ອງ ຮຸ່ນທີ XV ແລະ ພະນັກງານ, ຄູ-ອາຈານ ໄດ້ຍ່າງເຂົ້າສູ່ພິທີ ຊຶ່ງສະແດງໃຫ້ເຫັນເຖິງການປຸກລະດົມຈິດໃຈ “ສາມັກຄີ, ມີວິໄນ ແລະ ສຸຂະພາບເຂັ້ມແຂງ” ດ້ວຍບັນຍາກາດແຫ່ງຄວາມເບີກບານມ່ວນຊື່ນ ແລະ ຄວາມສາມັກຄີຮັກແພງເຊິ່ງກັນ ແລະ ກັນ.
ໃນພິທີດັ່ງກ່າວ, ທ່ານ ປທ ແສງຈັນ ຈັນທະສຸກ, ຫົວໜ້າຄະນະຮັບຜິດຊອບກິລາ-ສິລະປະວັນນະຄະດີ ໄດ້ຂຶ້ນຜ່ານບົດລາຍງານ ແລະ ແຜນການເຄື່ອນໄຫວ. ທ່ານໄດ້ໃຫ້ຮູ້ວ່າ: ການແຂ່ງຂັນຄັ້ງນີ້ ຈັດຂຶ້ນເພື່ອເປັນການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ແຜນຍຸດທະສາດຂອງ ສມປຊ ແລະ ເພື່ອສ້າງຂະບວນການຂໍ່ານັບຮັບຕ້ອນ ວັນສຳຄັນ ຂອງພັກ ຂອງຊາດ. ການແຂ່ງຂັນຈະປະກອບມີ 4 ປະເພດກິລາ ຄື: ບານເຕະ, ບານສົ່ງ, ເປຕັງ ແລະ ດຶງເຊືອກ; ປະເພດສິລະປະ ຄື: ຮ້ອງເພງ, ຂັບລຳ ແລະ ຟ້ອນ.
ເພື່ອເຮັດໃຫ້ພິທີເປີດມີຄວາມສັກສິດ ແລະ ຢັ້ງຢືນເຖິງມາດຕະຖານ ຂອງການແຂ່ງຂັນ, ຕາງໜ້ານັກກິລາ ແລະ ຕາງໜ້າຄະນະກຳມະການຕັດສິນ ໄດ້ຂຶ້ນກ່າວຄຳປະຕິຍານຕົນ ຕໍ່ໜ້າທ່ານປະທານ ແລະ ບັນດານັກກິລາ. ການກ່າວຄຳປະຕິຍານ ໄດ້ຢືນຢັນວ່າ: ການແຂ່ງຂັນຄັ້ງນີ້ຈະດຳເນີນໄປດ້ວຍ “ນໍ້າໃຈນັກກິລາ, ຄວາມບໍລິສຸດຍຸຕິທຳ, ຮູ້ແພ້-ຮູ້ຊະນະ ແລະ ໃຫ້ອະໄພເຊິ່ງກັນ ແລະ ກັນ”.
ໃນພິທີ ໄດ້ມີການກ່າວເປີດ ແລະ ໃຫ້ຄຳໂອວາດ ຂອງ ທ່ານ ຮສ ພູວົງ ອຸ່ນຄໍາແສນ ຊຶ່ງທ່ານໄດ້ມີຄໍາເຫັນຊີ້ນໍາທີ່ເລິກເຊິ່ງ ໂດຍເນັ້ນໜັກ 5 ບັນຫາສຳຄັນ ດັ່ງນີ້:
- ກິລາ ແລະ ສິລະປະ ບໍ່ແມ່ນພຽງແຕ່ການຫຼິ້ນມ່ວນຊື່ນ, ແຕ່ແມ່ນການ “ສ້າງຄົນ”. ມັນແມ່ນຂະບວນການຝຶກຝົນຫຼໍ່ຫຼອມທາງດ້ານຮ່າງກາຍ ແລະ ຈິດໃຈ ເພື່ອສ້າງພະນັກງານທີ່ມີຄຸນທາດການເມືອງໜັກແໜ້ນ ແລະ ມີສຸຂະພາບເຂັ້ມແຂງ ພ້ອມທີ່ຈະຮັບໃຊ້ຊາດ ຮັບໃຊ້ປະຊາຊົນຢ່າງສຸດກົກສຸດປາຍ.
- “ການແຂ່ງຂັນ ຢ່າຫວັງແຕ່ຢາກເອົາຊະນະຢ່າງດຽວ ໂດຍບໍ່ຄໍານຶງເຖິງກະຕິກາ”, ໃຫ້ຫຼີກລ້ຽງການປະທະກັນດ້ວຍຄວາມຮຸນແຮງ ຫຼື ວາຈາທີ່ບໍ່ສຸພາບ, ເປົ້າໝາຍສູງສຸດຄືມິດຕະພາບ ແລະ ຄວາມສາມັກຄີຢ່າງແໜ້ນແຟ້ນ.
- ຮຽກຮ້ອງໃຫ້ນັກກິລາທຸກຄົນ ປະຕິບັດໂມງເວລາຢ່າງເຂັ້ມງວດ ແລະ ເຄົາລົບການຕັດສິນ ຂອງຄະນະກໍາມະການ.
- ຄະນະກຳມະການຕັດສິນ “ຕ້ອງຕັດສິນໃຫ້ຖືກຕ້ອງ, ບໍ່ອ່ຽງຊ້າຍ-ອ່ຽງຂວາ, ຕ້ອງມີຫຼັກໝັ້ນ ແລະ ຍຸຕິທຳ” ເພື່ອຫຼີກລ້ຽງຫາງສຽງສັງຄົມ ແລະ ຮັກສາຄວາມສັກສິດ ຂອງການແຂ່ງຂັນ.
- ການມີສ່ວນຮ່ວມຂອງກອງເຊຍ ຕ້ອງເຊຍຢ່າງມີວັດທະນະທຳ, ສ້າງບັນຍາກາດທີ່ເບີກບານມ່ວນຊື່ນ ມີລັກສະນະສ້າງສັນ, ບໍ່ແມ່ນການສ້າງຄວາມແຕກແຍກສາມັກຄີ.
ພິທີເປີດຂະບວນການແຂ່ງຂັນກິລາ-ສິລະປະວັນນະຄະດີ ຄັ້ງທີ XV ຂອງ ສມປຊ ໄດ້ສິ້ນສຸດລົງໃນເວລາ 16:00 ໂມງ ໃນວັນດຽວກັນ, ຂະບວນການແຂ່ງຂັນກິລາ ແລະ ສິລະປະຄັ້ງນີ້ ຈະດຳເນີນໄປຢ່າງຕໍ່ເນື່ອງ ຈົນເຖິງເດືອນກຸມພາ 2026 ຈຶ່ງຈະໄດ້ອັດລົງ.
ຂ່າວ/ພາບ: ປທ ຕາອັອດ ແສນທະວີສຸກ
ບັນນາທິການ: ປທ ວຽງສະຫວັນ ຈັນທະວິໄຊ
