ໃນຕອນເຊົ້າ ຂອງວັນທີ 17 ທັນວາ 2025 ນີ້ ຢູ່ທີ່ໂຮງຮຽນການເມືອງ ແລະການປົກຄອງ ແຂວງໄຊຍະບູລີ ໄດ້ຕອນຮັບ ສະຫາຍ ຫງວຽນ ມິງເຕິມ ເອກອັກຄະລັດຖະທູດວິສາມັນຜູ້ມີອຳເຕັມ ແຫ່ງ ສສ ຫວຽດນາມ ພ້ອມດ້ວຍຄະນະ ທີເດີນທາງມາຢ້ຽມຢາມ ແລະເຮັດວຽກຢູ່ໂຮງຮຽນການເມືອງ ແລະການປົກຄອງແຂວງໄຊຍະບູລີ ໂດຍໃຫ້ກຽດຕ້ອນຮັບ ໂດຍ ທ່ານ ເພັງນິລັນ ຄຳພັນເພັງ ເລຂາຄະນະບໍລິຫານງານພັກແຂວງ, ປະທານສະພາປະຊາຊົນ ແຂວງໄຊຍະບູລີ ໃນພິທີຕ້ອນຮັບນີ້ໄດ້ຈັດຂຶ້ນທີ່ຫ້ອງປະຊຸມນ້ອຍ ຂອງໂຮງຮຽນທິດສະດີການເມືອງ ແລະການປົກຄອງ ແຂວງໄຊຍະບູລີ.
ໃນພິທີດັງກ່າວ ທ່ານ ປທ ນຸດຈິລາ ພົນຈະເລີນ ຫົວໜ້າໂຮງຮຽນການເມືອງ ແລະ ການປົກຄອງແຂວງ ກໍໄດ້ລາຍງານສະພາບການ ຂອງໂຮງຮຽນ ຕໍ່ສະຫາຍ ຫງວຽນ ມິງ ເຕິມ ວ່າ: ໂຮງຮຽນການເມືອງ ແລະ ການປົກຄອງແຂວງ ໃນເມື່ອກ່ອນແມ່ນຂຶ້ນກັບຄະນະໂຄສະນາອົບຮົມແຂວງ. ໂດຍປະຕິບັດຕາມມະຕິຕົກລົງ ຂອງກົມການເມືອງ ສູນກາງພັກສະບັບເລກທີ 65/ກມສພ, ລົງວັນທີ 21 ກໍລະກົດ 2003 ວ່າດ້ວຍການໂອນຄວາມຮັບຜິດຊອບ ແລະການຊີ້ນຳບັນດາໂຮງຮຽນການເມືອງ ແລະ ການປົກຄອງແຂວງ, ນະຄອນຫຼວງໃນທົ່ວປະເທດ ຂຶ້ນກັບສະຖາບັນການເມືອງ ແລະ ການປົກຄອງແຫ່ງຊາດ ໃນການນຳພາ-ຊີ້ນຳດ້ານວິຊາການ, ສ່ວນທາງດ້ານຊີວິດການເມືອງ ແມ່ນຂຶ້ນກັບແຂວງ.
ໃນວັນທີ 16 ມັງກອນ 2002 ໃນໂອກາດ ສະຫາຍ ນົງ ດຶກ ແມັງ ເລຂາທິການໃຫຍ່ ພັກກອມມູນິດຫວຽດນາມ ທີ່ມາຢ້ຽມຢາມ ແລະເຮັດວຽກ ຢູ່ແຂວງໄຊຍະບູລີ ແລະໄດ້ຕົກລົງຊ່ວຍສ້າງໂຮງຮຽນການເມືອງ ແລະ ການປົກຄອງ ແຂວງໄຊຍະບູລີ ໃນມູນຄ່າ 10 ຕື້ດົງ ໂດຍມອບໃຫ້ທະຫານເຂດ 4 ຂອງກະຊວງປ້ອງກັນປະເທດ ສສ ຫວຽດນາມ ເປັນຜູ້ຮັບຜິດຊອບ ໃນການສຳຫຼວດອອກແບບ ແລະລົງມືກໍ່ສ້າງ ໃນໄລຍະເວລາການກໍ່ສ້າງ 6 ເດືອນໂດຍເລີ່ມແຕ່ (ວັນທີ 22 ພະຈິກ 2002 ຫາວັນທີ 19 ພຶດສະພາ 2003 ) ແລະມອບໃຫ້ອຳນາດການປົກຄອງແຂວງໄຊຍະບູລີ ຢ່າງເປັນທາງການ).
ສະພາບລວມດ້ານການຈັດຕັ້ງ ແລະບຸກຄະລາກອນ ຂອງໂຮງຮຽນການເມືອງ ແລະ ການປົກຄອງ ແຂວງໄຊຍະບູລິີ ມີຄະນະອຳນວຍການຈຳນວນ 5 ສະຫາຍ, ຍິງ 2 ສະຫາຍ; ມີພະນັກງານ-ລັດຖະກອນ ທັງໝົດ 24 ສະຫາຍ, ຍິິງ 9 ສະຫາຍ, ໃນນີ້ເປັນຄູສອນ 16 ສະຫາຍ, ຍິງ 5 ສະຫາຍ; ມີລະດັບວິຊາສະເພາະ ປະລິນຍາເອກ 1 ສະຫາຍ, ຍິງ 1 ສະຫາຍ, ປະລິນຍາໂທ 10 ສະຫາຍ, ຍິງ 2 ສະຫາຍ, ປະລິນຍາຕີມີ 8 ສະຫາຍ, ຍິງ 3 ສະຫາຍ, ຊັ້ນສູງ 5 ສະຫາຍ, ຍິງ 3 ສະຫາຍ; ມີລະດັບທິດສະດີການເມືອງ ຂັ້ນສູງ 14 ສະຫາຍ, ຍິງ 4 ສະຫາຍ, ຂັ້ນກາງ 5 ສະຫາຍ, ຍິງ 3 ສະຫາຍ, ຂັ້ນຕົ້ນມີ 1 ສະຫາຍ, ປະກອບມີ 4 ຂະແໜງການ ຄື: ຂະແໜງຈັດຕັ້ງ-ພະນັກງານ ແລະຄຸ້ມຄອງບໍລິຫານ, ຂະແໜງຄຸ້ມຄອງການຮຽນ-ການສອນ, ຂະແໜງວິຊາການ ແລະຂະແໜງຂໍ້ມູນຂ່າວສານ.
ດ້ານພື້ນຖານໂຄງລ່າງ ຂອງໂຮງຮຽນການເມືອງ ແລະການປົກຄອງ ແຂວງໄຊຍະບູລີ ມິຕຶກອາຄານຈຳນວນ 1 ຫຼັງ, ປະກອບມີ 21 ຫ້ອງ, ໃນນັ້ນມີ 4 ຫ້ອງຮຽນ (ສາມາດຮອງຮັບນັກສຶກສາໄດ້ຫ້ອງລະ 50 ຄົນ) ມີ 1 ຫ້ອງສະໝຸດ, ມີ 1 ຫ້ອງປະຊຸມ (ສາມາດຮອງຮັບຈຳນວນພົນໄດ້ 50 ຄົນ) ແລະມີ 15 ຫ້ອງເຮັດວຽກ. ສຳລັບຫໍພັກ ແລະຫ້ອງອາຫານນັກສຶກສາ ແມ່ນຍັງບໍ່ທັນມີເປັນຂອງຕົນເອງ ເຊິ່ງໄດ້ນຳໃຊ້ຫໍພັກ ແລະຫ້ອງອາຫານ ຂອງແຂວງ.
ຜົນງານການເຄື່ອນໄຫວວຽກງານ ນັບແຕ່ປີ 2003 ມາເຖິງປະຈຸບັນ ໂຮງຮຽນການເມືອງ ແລະການປົກຄອງແຂວງ ກໍໄດ້ນຳໃຊ້ຕຶກອາຄານດັ່ງກ່າວນີ້ ເຂົ້າໃນການເຄື່ອນໄຫວປະຕິບັດໜ້າທີ່ວຽກງານຕາມພາລະບົດບາດ,ສິດ, ໜ້າທີ ຂອງຕົນໃນການກໍ່ສ້າງ-ບຳລຸງທາງດ້ານທິດສະດີການເມືອງ ໃຫ້ແກ່ພະນັກງານນຳພາ-ຄຸ້ມຄອງ, ພະນັກງານຫຼັກແຫຼ່ງ ຂອງແຂວງ, ຂອງເມືອງ ຕະຫຼອດຮອດຮາກຖານບ້ານ ໃນຂອບເຂດທົ່ວແຂວງໄຊຍະບູລີ ເຊິ່ງໄດ້ດຳເນີນຊຸດຮຽນລະບົບຕ່າງໆດັ່ງນີ້:
– ລະບົບຊັ້ນກາງ (15 ເດືອນ): ໄດ້ 18 ຊຸດ ມີຜູ້ເຂົ້າຮຽນທັງໝົດ 932 ຄົນ, ຍິງ 159 ຄົນ.
– ລະບົບຂັ້ນກາງ (6 ເດືອນ): ໄດ້ 4 ຊຸດ ມີຜູ້ເຂົ້າຮຽນທັງໝົດ 203 ຄົນ, ຍິງ 38 ຄົນ, ໃນປັດຈຸບັນພວມສືບຕໍ່ການຮຽນ-ການສອນ ຮຸ່ນທີ IV ມີຜູ້ເຂົ້າຮຽນ 51 ຄົນ, ຍິງ 12 ຄົນ.
– ລະບົບຊັ້ນຕົ້ນ (3 ເດືອນ) ໄດ້ 30 ຊຸດ ມີຜູ້ເຂົ້າຮຽນທັງໝົດ 1.529 ຄົນ, ຍິງ 387 ຄົນ.
– ລະບົບຂັ້ນຕົ້ນ (3 ເດືອນ) ໄດ້ 6 ຊຸດ ມີຜູ້ເຂົ້າຮຽນທັງຮຽນທັງ 285 ຄົນ, ຍິງ 81 ຄົນ.
– ລະບົບບຳລຸງ 45 ວັນ ໄດ້ 9 ຊຸດ ມີຜູ້ເຂົ້າຮຽນທັງໝົດ 464 ຄົນ, ຍິງ 167 ຄົນ.
– ລະບົບບຳລຸງ 10 ວັນໃຫ້ເລຂາພັກບ້ານ-ນາຍບ້ານ ໄດ້ 15 ຊຸດ ມີຜູ້ເຂົ້າຮຽນທັງໝົດ 490 ຄົນ, ຍິງ 64 ຄົນ.
ໄປຄຽງຄູ່ກັບຜົນງານທີ່ກ່າວມາຂ້າງເທິງນັ້ນ ໂຮງຮຽນການເມືອງ ແລະການປົກຄອງ ແຂວງໄຊຍະບູລີ ຍັງພົບຄວາມຍຸ້ງຍາກຈຳນວນໜຶ່ງເປັນຕົ້ນແມ່ນ:
- ຫໍພັກ ແລະຫ້ອງອາຫານນັກສຶກສາ ແມ່ນຍັງບໍ່ທັນມີເປັນຂອງຕົນເອງ ເຊິ່ງໄດ້ນຳໃຊ້ຫໍພັກ ແລະຫ້ອງອາຫານ ຂອງແຂວງຢູ່.
- ອຸປະກອນຮັບໃຊ້ທີ່ທັນສະໄໝເຂົ້າໃນວຽກງານການຮຽນ-ການສອນ ຍັງບໍ່ທັນພຽງພໍ ໂດຍສະເພາະແມ່ນ ຄອມພິວເຕີ, ໂປຼເຈັກເຕີ, ວິດີໂອຄອນເຟີເຣັນ.
- ລະບົບການຄຸ້ມຄອງຫ້ອງສະໝຸດ ຍັງບໍ່ສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການ, ພະນັກງານທີ່ຮັບຜິດຊອບ ຍັງບໍ່ທັນໄດ້ຮັບການຝືກອົບຮົມຢ່າງເປັນລະບົບ.
ຂ່າວ/ພາບ: ປຕ ວັດທະນາ ພັນລັກ
ບັນນາທິການ: ປທ ວຽງສະຫວັນ ຈັນທະວິໄຊ
