ໃນຕອນເຊົ້າ ຂອງວັນທີ 11 ທັນວາ 2025 ຢູ່ທີ່ໂຮງຮຽນທິດສະດີການເມືອງ ແລະການປົກຄອງ ແຂວງໄຊຍະບູລີ ໄດ້ມີພິທີປິດຊຸດຮຽນທິດສະດີການເມືອງ ຂັ້ນຕົ້ນ ຮຸ່ນທີ VI ໃນພິທີດັ່ງກ່າວ ໂດຍໃຫ້ເປັນປະທານ ຂອງທ່ານ ປະລີນຍາເອກ ສີສອນພັນ ບຸນສີ ຮອງເລຂາພັກແຂວງ, ຜູ້ຊີນຳວຽກງານການເມືອງ-ແນວຄິດ, ວຽກພັກ-ພະນັກງານ ແລະອົງການຈັດຕັ້ງມະຫາຊົນ, ໃນພິທີດັ່ງກ່າວນີ້ ທ່ານ ປະລີນຍາເອກ ນາງ ໄມພອນ ເຮີ ຜູ້ຮັກສາການແທນຫົວໂຮງຮຽນທິດສະດີການເມືອງ ກໍ່ໄດ້ລາຍງານຕໍ່ແຂກທີມາຮ່ວມພິທີວ່າຕະຫຼອດໄລຍະເວລາແຫ່ງການຈັດຕັ້ງປະຕິບັດຫຼັກສູດການຮຽນ-ການສອນ ເປັນຊ່ວງໄລຍະທີທົ່ວພັກ, ທົ່ວກອງທັບ ແລະປະຊາຊົນລາວບັນດາເຜົ່າກໍຄືຄະນະພັກ, ອົງການປົກຄອງ ແລະ ປະຊາຊົນທົ່ວແຂວງໄຊຍະບູລີ ພວມສຸມໃສ່ການຈັດຕັ້ງປະຕິບັດມະຕິກອງຊຸມໃຫຍ່ຄັ້ງທີ XI ຂອງພັກທ້າຍສະໄໝ, ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ, ຄັ້ງທີ IX ຕິດພັນກັບການຜັນຂະຫຍາຍມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ( 2025-2030 ) ຕິດພັນກັບການຜັນຂະຫຍາຍ ແລະ ຈັດຕັ້ງປະຕິບັດ 2 ວາລະແຫ່ງຊາດ, ມະຕິ 04/ ກມສພ ວ່າດ້ວຍການສ້າງເສດຖະກິດເອກະລາດ, ເປັນເຈົ້າຕົນເອງໃນໄລຍະໃໝ່ໃຫ້ມີໝາກຜົນຕົວຈີງ; ການກະກຽມຄວາມພ້ອມໃນການສະເຫຼີມສະຫຼອງວັນຊາດທີ 2 ທັນວ່າຄົບຮອບ 50 ປີ, ວັນເກີດປະທານ ໄກສອນ ພົມວິຫານ ຄົບຮອບ 105 ປີ ຢ່າງເປັນຂະບວນຟົດຟື້ນ, ກວ້າງຂວາງເພື່ອຍູ້ຂະບວນການກ້າວເຂົ້າສູ່ກອງປະຊຸມໃຫຍ່ຄັ້ງທີ XII ຂອງພັກຢ່າງໜັກແໜ້ນ ແລະເພືອປະຕິບັດຕາມແຜນພັດທະນາວຽກງານໂຮງຮຽນການເມືອງ ແລະການປົກຄອງທົ່ວປເທດປະຈຳປີ 2025.
ໂຮງຮຽນການເມືອງ ແລະການປົກຄອງແຂວງໄຊຍະບູລີ ໄດ້ຈັດຕັ້ງການຮຽນ-ການສອນທິດສະດີການເມື່ອງ ຂັ້ນຕົ້ນ ຮຸ່ນທີ VI ເລີ່ມແຕ່ວັນທີ 13 ສິງຫາ 2025; ຊຸດຮຽນນີ້ມີຜູ້ເຂົ້າຮຽນທັງໝົດຈຳນວນ 47 ສະຫາຍ, ຍິງ 19 ສະຫາຍ; ໃນນັ້ນ ມາຈາກພະແນກ, ກົມກອງອ້ອມຂ້າງແຂວງ 27 ສະຫາຍ, ຍິງ 17 ສະຫາຍ, ມາຈາກປ້ອງກັນຊາດ-ປ້ອງກັນຄວາມສະຫງົບ 6 ສະຫາຍ, ມາຈາກເມືອງໃນທົ່ວແຂວງ 14 ສະຫາຍ, ຍິງ 2 ສະຫາຍ; ລະດັບວິຊາສະເພາະຕ່ຳສຸດ ຊັ້ນຕົ້ນ, ສູງສຸດ ຊັ້ນປະລິນຍາໂທ; ອາຍຸກະສຽນສູງສຸດ 53 ປີ, ອາຍຸກະສຽນຕ່ຳສຸດ 30 ປີ, ອາຍຸສະເລ່ຍ 42 ປີ; ໂຮງຮຽນໄດ້ຈັດຕັ້ງການຮຽນ-ການສອນ ຕາມໂຄງການຫຼັກສູດ ທີ່ສະຖາບັນການເມືອງ ແລະ ການປົກຄອງແຫ່ງຊາດກຳນົດອອກຢ່າງເຂັ້ມງວດ.
ພິເສດ, ຊຸດຮຽນນີ້ຍັງໄດ້ປະກອບສ່ວນສ້າງບົດຮຽນອັນອຸດົມສົມບູນຂຶ້ນອີກກ້າວໜຶ່ງ ໃຫ້ແກ່ໂຮງຮຽນ ເປັນຕົ້ນແມ່ນ ບົດຮຽນໃນການນຳພາ-ຊີ້ນຳຄຸ້ມຄອງຊຸດຮຽນ, ຖັນແຖວຄູ-ອາຈານ ກໍໄດ້ເຕີບໃຫຍ່ຂຶ້ນທາງດ້ານຄວາມຮູ້ ກໍຄືປະສົບການ, ພະນັກງານ-ລັດຖະກອນສາມາດຖອດຖອນບົດຮຽນໃນວຽກງານຄຸ້ມຄອງບໍລິຫານ. ສິ່ງສຳຄັນເປັນພິເສດ ແມ່ນໂຮງຮຽນການເມືອງ ແລະການປົກຄອງ ແຂວງໄຊຍະບູລີ ໄດ້ມີຜະລິດຕະພັນທີ່ຮຽນຈົບທິດສະດີການເມືອງ ຂັ້ນຕົ້ນ ເພີ່ມຂຶ້ນຕື່ມ ບວກກັບບັນດາຊຸດຮຽນຜ່ານມາພວກເຮົາມີຜະລິດຕະພັນທີ່ຮຽນຈົບທິດສະດີການເມືອງ ຂັ້ນຕົ້ນ ທັງໝົດ 1.841 ສຫາຍ, ຍິງ 468 ສະຫາຍ, ເຊິ່ງເປັນຜູ້ທີ່ໄດ້ປະກອບອາວຸດທາງດ້ານທິດສະດີກຽມພ້ອມທີ່ຈະນຳເອົາຄວາມຮູ້, ຄວາມສາມາດ ຂອງຕົນໄປພັດທະນາ, ໄປຈັດຕັ້ງປະຕິບັດໃນວຽກງານຕົວຈິງ ຢູ່ຮາກຖານ, ຮັບໃຊ້ໜ້າທີ່ການເມືອງ ຂອງພັກ-ລັດ, ຮັບໃຊ້ຊາດ, ຮັບໃຊ້ປະຊາຊົນ ແລະຈະກາຍເປັນພະນັກງານນຳພາ-ຄຸ້ມຄອງໄດ້ໃນສະເພາະໜ້າ ແລະຍາວນານ.
ການຈັດຕັ້ງປະຕິບັດຫຼັກສູດ ຂອງຊຸດຮຽນທິດສະດີການເມືອງ ຂັ້ນຕົ້ນ ຮຸ່ນທີ VI ໄດ້ໃຊ້ເວລາຮຽນ 3 ເດືອນ, ມີວິຊາຮຽນທັງໝົດ 11 ວິຊາ, ແບ່ງອອກເປັນ 7 ກຸ່ມວິຊາຮຽນ ຄື: ກຸ່ມວິຊາປັດຊະຍາມາກ-ເລນິນ, ກຸ່ມວິຊາເສດຖະສາດການເມືອງມາກ-ເລນິນ, ກຸ່ມວິຊາລັດທິສັງຄົມນິຍົມວິທະຍາ, ການເມືອງວິທະຍາ, ສັງຄົມສາດ, ແນວຄິດໄກສອນ ພົມວິຫານ, ກຸ່ມວິຊາພື້ນຖານການຄຸ້ມຄອງບໍລິຫານລັດ, ທິດສະດີລັດ ແລະກົດໝາຍ, ເຕັກນິກບໍລິຫານ, ກຸ່ມວິຊາປະຫວັດສາດພັກ ແລະກໍ່ສ້າງພັກ ແລະກຸ່ມວິຊາພາກບັງຄັບ. ໃຊ້ເວລາຮຽນຕົວຈິງ 487 ຊົ່ວໂມງ, ຂຶ້ນຫ້ອງບັນຍາຍ 204 ຊົ່ວໂມງ, ສຳມະນາ 77 ຊົ່ວໂມງ, ແກ້ຂໍ້ຂ້ອງໃຈ 42 ຊົ່ວໂມງ, ສອບເສັງປາກເປົ່າ 28 ຊົ່ວໂມງ, ລາຍງານເພີ່ມ 28 ຊົ່ວໂມງ, ທັດສະນະສຶກສາທ້າຍຊຸດຮຽນ 7 ຊົ່ວໂມງ, ແນະນຳການປ້ອງກັນບົດປະເມີນຄວາມຮັບຮູ້ຈົບຂັ້ນ 3 ຊົ່ວໂມງ, ປ້ອງກັນບົດປະເມີນຄວາມຮັບຮູ້ຈົບຂັ້ນຕົ້ນ 7 ຊົ່ວໂມງ. ໃນຊຸດຮຽນນີ້ ໄດ້ນຳໃຊ້ອາຈານສິດສອນທັງໝົດ ຈຳນວນ 23 ທ່ານ, ຍິງ 4 ທ່ານ.
ການປະເມີນຜົນການຮຽນແບ່ງອອກເປັນ 2 ຮູບການ ຄື: ສອບເສັງຊຽນ, ສອບເສັງປາກເປົ່າ ແລະຂຽນບົດປະເມີນຄວາມຮັບຮູ້ຈົບຂັ້ນຕົ້ນ ປັດຈຸບັນແມ່ນປ້ອງກັນສຳເລັດ 100% ໃນວັນທີ 28 ພະຈິກ 2025 ແລະການຮຽນ- ການສອນ ແມ່ນການຂຶ້ນຫ້ອງຮັບຟັງການບັນຍາຍເນື້ອໃນບົດຮຽນ ຈາກຄູ-ອາຈານເປັນຫຼັກ. ນອກຈາກນັ້ນ ກໍໄດ້ປະຕິບັດຕາມຂອດຮຽນອື່ນໆ ເຊັ່ນ: ການກຽມສຳມະນາດ້ວຍຕົນເອງ ຫຼື ແບ່ງເປັນໜ່ວຍຄົ້ນຄວ້າ; ການສຳມະນາເປັນຈຸ ຫຼື ສຳມະນາລວມຫ້ອງ, ການທວນຄືນ, ການແກ້ຂໍ້ຂ້ອງໃຈ, ການກວດກາ ແລະສອບເສັງຈົບວິຊາ, ການເຄື່ອນໄຫວກິດຈະກຳ, ການໄປທັດສະນະສຶກສາ ແລະຂຽນບົດປະເມີນຄວາມຮັບຮູ້ຈົບຂັ້ນ.
ສຳລັບອາຈານສອນ ແມ່ນນຳໃຊ້ອາຈານປະຈຳຢູ່ໂຮງຮຽນການເມືອງ ແລະການປົກຄອງແຂວງ ເປັນຕົ້ນຕໍ ມີຈຳນວນຊົ່ວໂມງສອນ 459 ຊົ່ວໂມງ ກວມເອົາ 94% ຂອງຊົ່ວໂມງທັງໝົດ.
ມີອາຈານຮັບເຊີນຈາກຄະນະປະຈຳພັກແຂວງ, ບັນດາພະແນກການແຂວງ ຊຶ່ງມີຊົ່ວໂມງສອນ 28 ຊົວໂມງກວມເອົາ 6% ຂອງຊົວໂມງທັງໝົດ. ສິ່ງທີ່ເປັນໄມ້ຫຼາວັດແທກຜົນສຳເລັດ ຂອງຊຸດຮຽນທິດສະດີການເມືອງ ຂັ້ນຕົ້ນ ຄະແນນສອບເສັງ 11 ວິຊາ ສາມາດສະເລ່ຍ ແລະຈັດປະເພດໄດ້ ຄື: ເກຼດ A ຄະແນນສະເລ່ຍ 4,0 ມີ 30 ສະຫາຍ, ຍິງ 11 ສະຫາຍ ເທົ່າກັບ 64%; ເກຼດ B+ ຄະແນນສະເລ່ຍ 3,5 ມີ 17 ສະຫາຍ, ຍິງ 8 ສະຫາຍ, ກວມເອົາ 36%. ຕະຫຼອດໄລຍະການສຶກສາຮ່ຳຮຽນມີນັກສືກສາຮຽນດີມີວິໄນ ໄດ້ຕາມມາດຖານທີ່ໂຮຽຮຽນກຳນົດໄວ້ໄດ້ຮັບຍ້ອງຍໍຈາກທ່ານເຈົ້າແຂວງ ຈຳນວນ 13 ສະຫາຍ, ຍິງ 5 ສະຫາຍ ແລະໄດ້ຮັບຊົມເຊີຍຈາກທ່ານເຈົ້າແຂວງຈຳນວນ 10 ສະຫາຍ, ຍິງ 3 ສະຫາຍ ຊຶ່ງໃຫ້ກຽດມອບໃບຍ້ອງຍໍ ໂດຍແມ່ນທ່ານ ປະລິນຍາເອກ ສີສອນພັນ ບຸນສີ ຮອງເລຂາພັກແຂວງ, ຜູ້ຊີ້ນຳວຽກງານການເມືອງ-ແນວຄິດ, ວຽກພັກ-ພະນັກງານ ແລະອົງການຈັດຕັ້ງມະຫາຊົນ ແລະໃຫ້ກຽດມອບໃບຊົມເຊີຍ ໂດຍແມ່ນທ່ານ ປະລິນຍາເອກ ນາງ ໄມພອນ ເຮີ.
ຜົນໄດ້ຮັບ ຂອງຊຸດຮຽນໄດ້ຈັດຕັ້ງປະຕິບັດຕາມແຜນໂຄງການຫຼັກສູດການຮຽນ-ການສອນສຳເລັດຕາມແຜນການທີໄດ້ກຳນົດໄວ້. ຜ່ານການປະເມີນການຮຽນ ຂອງນັກສຶກສາ ສາມາດຮຽນຮູ້ ແລະກຳໄດ້ດ້ານທິດສະດີ, ສົມທຽບໃສ່ພຶດຕິກຳຕົວຈິງ. ນອກຈາກຮຽນພາກທິດສະດີໃນຫ້ອງຮຽນແລ້ວ ນັກສຶກສາຍັງໄດ້ໄປທັດສະນະສຶກສາຊອກຮູ້ກັບພຶດຕິກຳຕົວຈິງຢ້ຽມຢາມກອງພັນ 609 ກອງບັນຊາການທະຫານແຂວງ.
ໃນຕອນທ້າຍ ຂອງພິທີປິດຊຸດຮຽນນີ້ ທ່ານປະທານກໍໄດ້ມີຄຳເຫັນວ່າ: ໃນໄລຍະຜ່ານມາຂ້າພະເຈົ້າກໍໄດ້ເອົາໃຈໃສ່ຕິດຕາມການຈັດຕັ້ງການຮຽນ-ການສອນ ແລະການເຄືອນໄຫວ ຂອງຊຸດຮຽນຊຸດນີ້ ເປັນແຕ່ລະໄລຍະ ແລະຜ່ານການຕິດຕາມຮັບຟັງການສະຫຼຸບການຈັດຕັ້ງ-ຄຸ້ມຄອງຊຸດຮຽນ ຂອງພວກສະຫາຍທີ່ໄດ້ຜ່ານມານັ້ນ ກໍເຫັນໄດ້ວ່າ: ຄະນະພັກ-ຄະນະນຳໂຮງຮຽນ ພ້ອມກັບພະນັກງານຄູອາຈານ ແລະນັກສືກສາ ກໍໄດ້ເອົາໃຈໄສ່ປະຕິບັດໜ້າທີ່ຄວາມຮັບຜິດຊອບໃນການຄຸ້ມຄອງຊຸດຮຽນຕາມໂຄງການຫຼັກສູດທີ່ສະຖາບັນການເມືອງ ແລະ ການປົກຄອງແຫ່ງຊາດ ໄດ້ກຳໄວ້ຢ່າງມີຜົນສຳເລັດດີພໍສົມຄວນ ເປັນຖັນແຖວຄູ-ອາຈານ ກໍໄດ້ຕັ້ງໜ້າຄົ້ນຄວ້າສິດສອນຢ່າງມີຄວາມຮັບຜິດຊອບສູງ ປະຕິບັດທຸກຂັ້ນຕອນບັນດາຂອດຮຽນຕາມໂຄງການຫຼັກສູດທີ່ກຳນົດໄວຢ່າງຄົບຖ້ວນ, ນັກສຶກສາກໍໄດ້ຕັ້ງໜ້າເຂົ້າຮ່ວມການຮຽນ-ການສອນຢ່າງເປັນປົກກະຕິ, ຕັ້ງໜ້າປະຕິບັດລະບຽບ ຂອງໂຮງຮຽນ ລະບຽບການຄຸ້ມຄອງຊຸດຮຽນ; ນອກຈາກນີ້ ນັກສຶກສາຍັງໄດ້ປະກອບສ່ວນເຂົ້າໃນການປົກປັກຮັກສາພື້ນຖານໂຄງລ່າງ ຂອງໂຮງຮຽນໃຫ້ມີຄວາມເປັນລະບຽບຮຽບຮ້ອຍ, ສະຫຼະເຫື່ອແຮງທືນຮອນສ່ວນຕົວ ຂອງຕົນເອງ ເພື່ອຊ່ວຍເຫຼືອດ້ານວັດຖຸອຸປະກອນການຮຽນ-ການສອນ ແລະການເຄື່ອນໄຫວວຽກງານກິດຈະກຳ ຂອງໂຮງຮຽນໃຫ້ມີຄວາມສະດວກ ແລະຂໍເອົາໂອກາດນີ້ ຍ້ອງຍໍຊົມເຊີຍບັນດາສະຫາຍ ພະນັກງານ ຄູ-ອາຈານ, ນັກສຶກສາ ແລະການຈັດຕັ້ງທຸກພາກສ່ວນ ທີ່ໄດ້ໃຫ້ຄວາມຮ່ວມມືເຮັດໃຫ້ຊຸດຮຽນຊຸດນີ້ມີຜົນສຳເລັດໄປດ້ວຍດີ ຕາມໂຄງການຫຼັກສູດທີ່ໄດ້ກຳນົດໄວ້.
ພາບ/ຂ່າວ: ປຕ ວັດທະນາ ພັນລັກ
ບັນນາທິການ: ປທ ວຽງສະຫວັນ ຈັນທະວິໄຊ