ໃນວັນທີ 14 ພະຈິກ 2025 ຜ່ານມານີ້ ຂະບວນທັດສະນະສຶກສາ ຂອງນັກສຶກສາທິດສະດີການເມືອງ ແລະການປົກຄອງຂັ້ນກາງຮຸ່ນທີ IV ໂຮງຮຽນທິດສະດີການເມືອງ-ການປົກຄອງ ແຂວງໄຊຍະບູລີ ໄດ້ເດີນທາງໄປທັດສະນະສຶກສາ ຢູ່ເມືອງຫົງສາ ແຂວງໄຊຍະບູລີ ໂດຍໃຫ້ກຽດນຳພາທີມງານນັກສຶກສາໄປທັດສະນະສຶກສາທີ່ເມືອງຫົງສາ ໃນຄັ້ງນີ້ໂດຍແມ່ນທ່ານ ອາຈານ ບຸນຍອງ ອາລີລັກ ຜູ້ຊີ້ນຳວຽກງານຂະແໜງຂໍ້ມູນຂ່າວສານ ໂຮງຮຽນການເມືອງການປົກຄອງ ແຂວງໄຊຍະບູລີ ມີສກສາທັງໝົດ 53 ສະຫາຍ ລວມທັງຄູອາຈານ ໂດຍໃຫ້ກຽດຕ້ອນຮັບຄະນະທີມງານນັກສຶກສາໄປທັດສະນະສຶກສາ ໂດຍແມ່ນ ທ່ານ ແຫຼ້ ອ່ອນສົມບູນ ຮອງເລຂາຄະນະບໍລິຫານງານພັກເມືອງຫົງສາ ກໍໄດ້ໃຫ້ກຽດກ່າວຕ້ອນຮັບທີມງານທັດສະນະຄັ້ງນີ້ວ່າ: ພາຍໃຕ້ບັນຍາກາດທີ່ທົ່ວພັກ-ທົ່ວລັດ, ທົ່ວກຳລັງປະກອບອາວຸດ ແລະ ປະຊາຊົນລາວບັນດາເຜົ່າທົ່ວປະເທດ ເວົ້າລວມ, ເວົ້າສະເພາະ ປະຊາຊົນຊາວເມືອງຫົງສາ ພວມຈັດຕັ້ງປະຕິບັດກອງປະຊຸມໃຫຍ່ຄັ້ງທີ XI ຂອງສູນກາງພັກ ມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງ ແລະມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກເມືອງ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ໄປຄຽງຄູ່ກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ຂອງແຕ່ລະຂັ້ນວາງອອກ ແລະພວມຢູ່ໃນຂະບວນການສຳຫຼວດພົນລະເມືອງ ແລະທີ່ຢູ່ອາໄສທົ່ວປະເທດ ຄັ້ງທີ 5 ໄປພ້ອມກັນໃນທົ່ວປະເທດ ເພື່ອຂໍ່ານັບຮັບຕ້ອນວັນສຳຄັນຂອງຊາດ ຂອງພັກ ຢ່າງເປັນຂະບວນຟົດຟື້ນ.
ໃນໂອກາດທີ່ມີຄວາມໝາຍຄວາມສຳຄັນນີ້ ທ່ານ ແຫຼ້ ອ່ອນສົມບູນ ຮອງເລຂາຄະນະບໍລິຫານງານພັກເມືອງຫົງສາ ກໍໄດ້ລາຍງານການນຳພາ-ຊີ້ນຳວຽກງານຮອບດ້ານ ຢູ່ເມືອງຫົງສາ ໂດຍຫຍໍ້ຕໍ່ທີມງານທັດສະນະ ກ່ຽວກັບສະພາບລວມ ຂອງເມືອງຫົງສາ ຊຶ່ງມີເນື້ອໃນຕົ້ນຕໍຄື: ເມືອງຫົງສາ ມີເນື້ອທີທັງໝົດ 1.626 ຕາຕະລາງກິລິໂລແມັດ ເນື້ອທີສ່ວນໃຫຍ່ເປັນດອຍກວມ 90%, ປະກອບມີ 32 ບ້ານມີ 6.437 ຄອບຄົວ ພົນລະເມືອງທັງໝົດ 31.929 ຄົນ, ຍິງ 15.717 ຄົນ, ມີ 8 ເຜົ່າຄື: ເຜົ່າລາວ ກວມ 47,23%, ເຜົ່າກຶມມຸ ກວມເອົາ 17,77%, ເຜົ່າໄປຼ່ ກວມເອົາ 17,12%, ເຜົ່າມົ່ງ ກວມເອົາ 9,09% ເຜົ່າລື້ ກວມເອົາ 8,01%, ເຜົ່າອິ່ວມຽນ ກວມເອົາ 0,64%, ເຜົ່າໄທດຳ ກວມເອົາ 0,12 % ແລະ ເຜົ່າຍວນ ກວມເອົາ 0,03%; ອາຊີບ ຂອງປະຊາຊົນສ່ວນຫຼາຍ ແມ່ນເຮັດກະສິກຳ ປູກຝັງ-ລ້ຽງສັດ ຮອງລົງມາແມ່ນບໍລິການຄ້າຂາຍ ແລະບໍລິການແຮງງານໃນໂຄງການໄຟຟ້າພະລັງງານຄວາມຮ້ອນຫົງສາ.
ໃນໂອກາດດຽວກັນນີ້, ທ່ານ ແຫຼ້ ອ່ອນສົມບູນ ຮອງເລຂາຄະນະບໍລິຫານງານພັກເມືອງຫົງສາ ກໍໄດ້ລາຍງານຜົນສຳເລັດທີ່ພົ້ນເດັ່ນໃນການນຳພາໃນໄລຍະຜ່ານມາ ໃນແຜນພັດທະນາເສດຖະ ກິດ-ສັງຄົມ 5 ປີ ຄັ້ງທີ VIII ຜ່ານມາ ໄດ້ວາງຄາດໝາຍສູ້ຊົນໃຫ້ເສດຖະກິດມີການຂະຫຍາຍຕົວ 7,5% ລວມຍອດຜົນຜະລິດທັງໝົດ 995,51 ຕື້ກີບ, ສະເລ່ຍໃສ່ຫົວຄົນໜຶ່ງໃຫ້ໄດ້ 31 ລ້ານກີບ ຫຼື ເທົ່າກັບ 3,570 ໂດລາສະຫະລັດ (ອັດຕາແລກປ່ຽນ 8.500ກີບ/ໂດລາ), ຜ່ານການຈັດຕັ້ງປະຕິບັດຕົວຈິງ ເຫັນວ່າບໍ່ສາມາດບັນລຸຕາມຄາດໝາຍ ເນື່ອງຈາກການແຜ່ລະບາດຂອງພະຍາດໂຄວິດ-19, ວິກິດການທາງດ້ານເສດຖະກິດ-ການເງີນ, ເກີດໄພພິບັດທາງທຳມະຊາດ (ໄພແຫ້ງແລ້ງ, ນ້ຳຖ້ວມ, ສັດຕູພືດ, ພະຍາດລະບາດສັດ) ແຕ່ໂດຍລວມເສດຖະກິດຂອງເມືອງມີການຂະຫຍາຍໃນລະດັບສະເລ່ຍ 6,5% ຕໍ່ປີ ລວມຍອດຜົນຜະລິດໄດ້ທັງໝົດ 905,45 ຕື້ກີບ, ສະເລ່ຍຕໍ່ຫົວຄົນໜື່ງໄດ້28,35 ລ້ານກີບ ຫຼື ເທົ່າກັບ 1.418 ໂດລາສະຫະລັດຕໍ່ຄົນຕໍ່ປີ ທຽບໃສ່ແຜນການປະຕິບັດໄດ້ 90,95%. ໃນນີ້: ຂະແໜງກະສິກຳ 240,72 ຕື້ກີບ ກວມເອົາ 26,59% ຂອງລວມຍອດຜົນຜະລິດທັງໝົດ; ຂະແໜງອຸດສາຫະກຳ 225,22 ຕື້ກີບ ກວມເອົາ 24.87% ຂອງລວມຍອດຜົນຜະລິດທັງໝົດ; ຂະແໜງການບໍລິການ 439,51 ຕື້ກີບ ກວມເອົາ 48,54% ຂອງລວມຍອດຜົນຜະລິດທັງໝົດ. ພ້ອມນັ້ນ, ຍັງໄດ້ຍົກໃຫ້ເຫັນສາເຫດທີ່ພາໃຫ້ມີຜົນສຳເລັດ ຄື: 1). ມີການນຳພາ-ຊີ້ນຳ ຂອງອົງການປົກຄອງແຕ່ລະຂັ້ນຢ່າງເປັນລະບົບ, ແຜນພັດທະນາເສດຖະກິດ-ສັງຄົມ 5 ປີ ຜ່ານມາ ແມ່ນຖືກຕ້ອງສອດຄ່ອງກັບສະພາບຄວາມເປັນຈິງ; 2). ໄດ້ຜັນຂະຫຍາຍແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ເປັນອັນລະອຽດ, ພ້ອມກັນນັ້ນ ກໍໄດ້ຮັບການຊີ້ນຳຢ່າງໄກ້ຊິດ ຂອງອົງການປົກຄອງເມືອງ, ບັນດາຂະແໜງການຂັ້ນເມືອງ ແລະ ອົງການປົກຄອງບ້ານ ເພື່ອນຳໄປຈັດຕັ້ງປຕິບັດ; 3). ອົງການຈັດຕັ້ງທຸກຂັ້ນ, ຜູ້ປະກອບການ ທັງພາຍໃນແລະ ຕ່າງປະເທດ ແລະ ປະຊາຊົນບັນດາເຜົ່າ ໄດ້ມີສ່ວນຮ່ວມຢ່າງຕັ້ງໜ້າເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຢ່າງເປັນຂະບວນການຢ່າງຕໍ່ເນື່ອງ; 4). ມີການຕິດຕາມ,ກວດກາ ແລະຊຸກຍູ້ ຂອງອົງການປົກຄອງແຂວງ, ສະພາປະຊາຊົນແຂວງ, ອົງການປົກຄອງເມືອງ,ບັນດາຂະແໜງການ ຂອງເມືອງຢ່າງເປັນປົກກະຕິ.
ຂ່າວ/ພາບ: ທ່ານ ວັດທະນາ ພັນລັກ ເດີຈານ
ບັນນາທິການ: ປທ ວຽງສະຫວັນ ຈັນທະວິໄຊ