ການຮ່ວມມືລະຫວ່າງ ລັດຖະບານລາວ ກັບ ລັດຖະບານອົດສະຕາລີ ແມ່ນມີສາຍພົວພັນ ແລະການຮ່ວມມືອັນດີງາມມາແຕ່ຍາວນານ, ເປັນການພົວພັນທີ່ຕ່າງຝ່າຍຕ່າງໄດ້ຜົນປະໂຫຍດ, ບໍ່ກ້າວກາຍກິດຈະການພາຍໃນເຊິ່ງກັນ ແລະກັນ ເຊິ່ງສະແດງອອກໃນໄລຍະຜ່ານມາ ລັດຖະບານອົດສະຕາລີ ໄດ້ໃຫ້ການສະໜັບສະໜູນທາງດ້ານການສຶກສາ ແລະການພັດທະນາຊັບພະຍາກອນມະນຸດ, ວຽກງານສິດທິມະນຸດ ຢ່າງມະຫາສານແກ່ລັດຖະບານ ສປປ ລາວ ເວົ້າລວມ, ເວົ້າສະເພາະ ກໍຄືສະຖາບັນການເມືອງ ແລະການປົກຄອງແຫ່ງຊາດ ແມ່ນໄດ້ຮັບການຊ່ວຍເຫຼືອຈາກລັດຖະບານອົດສະຕາລີ ໃນການສ້າງ ແລະພັດທະນາບຸກຄະລາກອນຄູ, ຝຶກອົບຮົມດ້ານວິຊາການ, ປື້ມຄູ່ມື, ຊ່ຽວຊານ, ການຝຶກອົບຮົມວຽກງານສິດທິມະນຸດ, ວຽກງານບຸກຄະລາກອນ ແລະການແລກປ່ຽນບົດຮຽນໃນດ້ານອື່ນໆ.
ສະນັ້ນ, ເພື່ອເປັນການແລກປ່ຽນ ແລະປຶກສາຫາລື ເພື່ອເກັບກຳຂໍ້ມູນການຈັດຕັ້ງປະຕິບັດ ຂອງໂຄງການສະຖາບັນລາວ-ອົດສະຕາລີ ໄລຍະ IV ທີ່ ສະຖາບັນການເມືອງ ແລະ ການ ປົກຄອງແຫ່ງຊາດ ທີ່ໄດ້ຮັບການຊ່ວຍເຫຼືອຈາດລັດຖະບານອົດສະຕາລີ ໃນໄລຍະຜ່ານມາຈຶ່ງໄດ້ຈັດກອງປະຊຸມ ຂຶ້ນທີ່ຫ້ອງປະຊຸມ ຕຶກຫ້ອງການ ໃນວັນທີ 23 ກັນຍາ 2025 ໂດຍການເປັນປະທານ (ຝ່າຍລາວ) ຂອງທ່ານ ປອ ນ. ໄກສອນ ຈັນສີນາ ຄະນະບໍລິຫານງານພັກ, ຫົວໜ້າຫ້ອງການ ສມປຊ ພ້ອມດ້ວຍຄະນະ ແລະ ທ່ານ ນ. ເຄດ ກຸດຟຼຸດ ເລຂາສອງ ສະຖານທູດອົດສະຕາລີ ພ້ອມດ້ວຍຄະນະ.
ທ່ານ ປອ ນ. ໄກສອນ ຈັນສີນາ ໄດ້ລາຍງານຜົນສຳເລັດ ຂອງການຮ່ວມມືທີ່ຜ່ານມາ ລະຫວ່າງ ສມປຊ ແລະສະຖານທູດ ອົດສະຕາລີ ປະຈຳ ສປປ ລາວ ເປັນຕົ້ນ: ໄດ້ຕ້ອນຮັບຄະນະ ຈາກສະຖາບັນລາວ-ອົດສະຕາລີ, ຕ້ອນຮັບຄະນະຈາກສະຖານທູດອົດສະຕາລີ ປະຈຳ ສປປ ລາວ ມາເຂົ້າຮ່ວມປຶກສາຫາລື ກ່ຽວກັບໂຄງການຄວາມຮູ້ທາງດ້ານສິດທິມະນຸດ ໄລຍະ 3, ນອກນັ້ນ, ໄດ້ສຳເລັດຈັດກອງປະຊຸມອອນລາຍ ຮ່ວມກັບເອກອັກຄະລັດຖະທູດອົດສະຕຣາລີ ປະຈຳລາວ ແລະຄະນະຊ່ຽວຊານອອກແບບໂຄງການສະຖາບັນ ລາວ-ອົດສະຕາລີ, ສຳເລັດການສົ່ງພະນັກງານເຂົ້າຮ່ວມຝຶກອົບຮົມຫົວຂໍ້ຕ່າງໆ ເປັນຕົ້ນ: ພາວະຄວາມເປັນຜູ້ນຳ ແລະວຽກງານບໍລິຫານລັດ, ວຽກງານພັດທະນາຊັບພະຍາກອນມະນຸດ, ການນຳພາທີ່ມີປະສິດທິພາບ, ການວິເຄາະຍຸດທະສາດ, ບົດບາດຍິງ-ຊາຍ ທີ່ສະຖານທູດອົດສະຕາລີຈັດຂຶ້ນ ໂດຍຜ່ານກະຊວງສຶກສາທິການ ແລະ ກິລາ ໄດ້ 14 ຄັ້ງ 87 ເທື່ອຄົນ; ຂັ້ນກົມ ຈຳນວນ 02 ເທື່ອຄົນ; ເຂົ້າຮ່ວມຝຶກອົບຮົມພາສາອັງກິດ Module 1 ແລະ Module 2 ໄດ້ 15 ເທື່ອຄົນ; ເຂົ້າຮ່ວມຫົວຂໍ້ຕ່າງໆ ຂອງ LAI ຈັດຂຶ້ນ ໄດ້ 23 ຄັ້ງ 84 ເທື່ອຄົນ; ພ້ອມກັນນັ້ນ, ໄດ້ຜ່ານທິດທາງການຮ່ວມມືໃນຕໍ່ໜ້າໃນການຮ່ວມມືໄລຍະ IV. ຫຼັງຈາກໄດ້ຮັບຟັງການລາຍງານ, ໄດ້ຖືວາລະໂອກາດແລກປ່ຽນບົດຮຽນປະສົບການ ແລະຂໍ້ສະເໜີ ຄື:
1). ໃຫ້ສະຖານທູດອົດສະຕາລີ ຈັດສັນທຶນຝຶກອົບຮົມໄລຍະສັ້້ນ, ໄລຍະກາງ ແລະໄລຍະຍາວ ໃຫ້ແກ່ຄູ-ອາຈານ ແລະພະນັກງານວິຊາການ ທີ່ຮັບຜິດຊອບວຽກງານພົວພັນສາກົນຕື່ມ ເພື່ອເປັນການຍົກລະດັບພາສາອັງກິດ ຂອງ ຄູ-ອາຈານ ແລະວິຊາການທີ່ກ່ຽວຂ້ອງ ຢູ່ ສມປຊ ຍັງບໍ່ຜ່ານລະດັບ IELTS 5.
2).ສະເໜີໃຫ້ສະຖານທູດອົດສະຕາລີ ຊ່ວຍສົ່ງຊ່ຽວຊານ ມາຝຶກອົບຮົມໃຫ້ຄູ-ອາຈານ ແລະວິຊາການທີ່ກ່ຽວຂ້ອງ ຢ່າງເປັນປົກກະຕິ.
3. ສະເໜີໃຫ້ສະຖານທູດອົດຕາລີ ຊ່ວຍກະຕຸກຊຸກຍູ້ ແລະຕິດຕາມໂຄງການປັບປຸງລະບົບໄຟເວທີ-ເຄື່ອງສຽງຢູ່ສະໂມສອນໃຫຍ່ ຂອງ ສມປຊ.
ຂ່າວ/ພາບ: ປທ ຕາອັອດ ແສນທະວີສຸກ
ບັນນາທິການ: ປທ ວຽງສະຫວັນ ຈັນທະວີໄຊ