ໃນຕອນເຊົ້້າວັນທີ 3 ກັນຍາ 2025 ທີ່ຫ້ອງປະຊຸມຊັ້ນ 1 ຕຶກສູນຂໍ້ມູນຂ່າວສານການເມືອງ ແລະການປົກຄອງ ໄດ້ຈັດກອງປະຊຸມຜ່ານໂຄງຮ່າງບົດຄົ້ນຄວ້າວິທະຍາສາດ ຂອງຄະນະບໍລິຫານງານຊາວໜຸ່ມ ສມປຊ ປະຈຳປີ 2025 ໃຫ້ກຽດເປັນປະທານໂດຍ: ທ່ານ ປອ ດາວສະຫວັນ ເຄືອມີໄຊ ຮອງເລຂາຄະນະບໍລິຫານງານພັກ, ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ມີນັກຄົ້ນຄວ້າວິທະຍາສາດໜຸ່ມ ແລະແຂກທີ່ຖືກເຊີນກໍ່ເຂົ້້າຮ່ວມ ລວມທັງໝົດ 21 ທ່ານ, ຍິງ 6 ທ່ານ.
ຈຸດປະສົງໃນການຈັດກອງປະຊຸມໃນມື້ນີ້ ກໍ່ເພື່ອຜ່ານໂຄງຮ່າງບົດຄົ້ນຄວ້າວິທະຍາສາດ ຂອງຄະນະບໍລິຫານງານຊາວໜຸ່ມ ສມປຊ ປະຈຳປີ 2025, ເພື່ອເປັນການຍົກສູງຄວາມຄິດ, ຄວາມສາມາດຂອງການຄົ້ນຄວ້າວິທະຍາ ສາດຂອງຊາວໜຸ່ມ ສມປຊ ໃຫ້ກ້າວໄປສູ່ລະດັບໃໝ່ ແລະເພື່ອເປັນການເສີມຂະຫຍາຍຊຸກຍູ້ການສະເໜີຂໍຕໍາແໜ່ງວິຊາການຄູ ຂອງ ສມປຊ ແລະເປັນການຍົກສູງການຄົ້ນຄວ້າວິທະຍາສາດຂອງສະຖາບັນໃຫ້ກວ້າງຂຶ້ນ.
ພ້ອມກັນນັ້ນ, ທ່ານ ປອ ດາວສະຫວັນ ເຄືອມີໄຊ ກໍ່ໄດ້ກ່າວເປີດກອງປະຊຸມພ້ອມທັງໃຫ້ທິດຊີ້ນໍາຕໍ່ກອງປະຊຸມໃນຫ້ອງປະຊຸມດັ່ງກາວ. ທ່ານ ປອ ໂພທອງ ໄຊທິບວົງສາ ຮອງຫົວໜ້າພະແນກຫ້ອງການເລຂາສະພາວິທະ ຍາສາດ ໄດ້ນໍາສະເໜີກ່ຽວກັບຮູບແບບການຄົ້ນຄວ້າ ແລະ ການຕີພິມລົງວາລະສານ ຂອງ ມຊ, ມະຫາວິທະຍາໄລສຸພາ ນຸວົງ, ວິທະຍາໄລສ້າງຄູຄັງໄຂ. ພ້ອມກັນນັ້ນ, ຍັງໄດ້ຮັບຟັງການຜ່ານໂຄງຮ່າງບົດຄົ້ນຄວ້າວິທະຍາສາດ ຂອງຄະນະບໍລິຫານງານຊາວໜຸ່ມ ສມປຊ ປະຈຳປີ 2025 ເຊິ່ງມີ 14 ຫົວຂໍ້ຫຍ່ອຍຈາກນັກວິທະຍາສາດໜຸ່ມດັ່ງລຸ່ມນີ້:
- ເພີ່ມທະວີການນໍາພາຂອງພັກຕໍ່ຄະນະຊາວໜຸ່ມ ປປລາວ ໃນເງື່ອນໄຂຫັນເປັນທັນສະໄໝ;
- ປັບປຸງກົງຈັກການຈັດຕັ້ງຂອງຊາວໜຸ່ມໃຫ້ມີປະສິດທິພາບ;
- ພັດທະນາຊາວໜຸ່ມ ຕິດພັນກັບການສ້າງເສດຖະກິດເອກະລາດ ເປັນເຈົ້າຕົນເອງ;
- ຍົກສູງຄວາມສາມາດ ໃນການໝູນໃຊ້ເຕັກໂນໂລຊີ ເຂົ້າໃນການຄົ້ນຄວ້າວິທະຍາສາດ;
- ສ້າງຈິດສານຶກທີ່ຖືກຕ້ອງ ໃຫ້ກັບຖັນແຖວຊາວໜຸ່ມ ໃນການນໍາໃຊ້ສື່ສັງຄົມອອນລາຍ;
- ຫັນວຽກງານຊາວໜຸ່ມ ເປັນດີຈິຕອນ;
- ຊາວໜຸ່ມກັບການຄົ້ນຄວ້ານະວັດຕະກໍາໃໝ່;
- ຍົກສູງບົດບາດປະຈັນບານ ຂອງຊາວໜຸ່ມ ໃນເງື່ອນໄຂຫັນເປັນວິທະຍາສາດທັນສະໄໝ;
- ພັດທະນາວຽກງານຊາວໜຸ່ມໃຫ້ທັນສະໄໝ;
- ສົ່ງເສີມການສ້າງວຽກເຮັດງານທໍາໃຫ້ແກ່ຊາວໜຸ່ມ;
- ຍົກສູງຄວາມສາມາດ ຂອງຊາວໜຸ່ມ ໃນການນໍາໃຊ້ AI ເຂົ້າໃນການພັດທະນາປະເທດຊາດ;
- ຍົກລະດັບຄວາມຮູ້ຄວາມສາມາດ ໃນການໝູນໃຊ້ເຕັກໂນໂລຊີ ຂອງຊາວໜຸ່ມ;
- ເພີ່ມທະວີການຈັດຕັ້ງປະຕິບັດນິຕິກາຂອງຊາວໜຸ່ມ ໃຫ້ມີປະສິດທິພາບ ແລະປະສິດທິຜົນ;
- ພັດທະນາຊາວໜຸຸ່ມ ຕາມວິໄສທັດ ພັດທະນາເສດຖະກິດດິຈິຕອນແຫ່ງຊາດ
ພ້ອມກັນນັ້ນ, ເພື່ອເປັນການຊີ້ທິດເຍືອງທາງໃນການໃຫ້ ໂຄງຮ່າງບົດວິທະຍາສາດໃຫ້ຄົບຖ້ວນສົມບູນ ພາຍໃນກອງປະຊຸມຍັງໄດ້ຮັບການປະກອບຄໍາຄິດ-ຄໍາເຫັນຢ່າງກົງໄປກົງມາຈາກສະພາວິທະຍາສາດ.
ໃນຕອນທ້າຍກອງປະຊຸມປະທານໄດ້ສະຫຼຸບຄືນກອງປະຊຸມ ແລະເນັ້ນຕໍ່ນັກວິທະຍາສາດໜຸ່ມຄື:
- ພາຍຫຼັງຄົ້ນຄວ້າສໍາເລັດການຂຽນບົດ ຈະໄດ້ຈັດກອງປະຊຸມສໍາມະນາຄືນໃໝ່, ສະນັ້ນຈຶ່ງຮຽກຮ້ອງມາຍັງນັກວິທະຍາສາດປະຕິບັດລົງມື້ຂຽນໂດຍໃຫ້ສໍາເລັດກາງເດືອນ 10;
- ການຂຽນບົດວິທະຍາສາດດັ່ງກ່າວແມ່ນບໍ່ໃຫ້ກາຍ 15 ໝ້າ;
- ມອບໃຫ້ກົມຄຸ້ມຄອງຄົ້ນຄວ້າວິທະຍາສາດຮີບຮ້ອນຈັດຝຶກອົບຮົມກ່ຽວກັບການຂຽນວາລະສານ;
- ຜູ້ຂຽນຕ້ອງມີຄວາມຮັບຜິດຊອບສູງຕໍ່ກັບເນື້ອໃນບົດວິທະຍາສາດຂອງຕົນເອງ;
- ມອບໃຫ້ຄະນະຮັບຜິດຊອບຕິດຕາມຊຸກຍູ້ໃນການເກັບກໍາບົດວິທະຍາສາດໃຫ້ທັນຕາມກໍານົດເວລາ.
ພາບ/ຂ່າວ: ນາງ ທິດດາວອນ ດວງປະເສີດ
ບັນນາທິການ: ປທ ບຸນປັນ ສຸມຸນທອງ