ໃນວັນທີ 4 ສິງຫາ 2025 ສະຖາບັນການເມືອງ ແລະ ການປົກຄອງແຫ່ງຊາດ (ສມປຊ) ໄດ້ສ້າງຂະບວນການອອກແຮງງານລວມທົ່ວ ສມປຊ ເພື່ອກະກຽມໃຫ້ແກ່ກອງປະຊຸມໃຫຍ່ ຄັ້ງທີ VI ຂອງອົງຄະນະພັກ ສມປຊ ທີ່ຈະມາເຖິງໃນມໍ່ໆນີ້ ເຊິ່ງເປັນເຫດການ ທີ່ສຳຄັນ ຂອງ ສມປຊ.
ການອອກແຮງງານໄດ້ສຸມໃສ່ການຕັດຫຍ້າເດີ່ນກິລາ, ຕັດຫຍ້າຂອບເຂດຮັບຜິດຊອບ ຂອງແຕ່ລະພາກສ່ວນ ພາຍໃນ ສມປຊ ພ້ອມທັງມີການປັດກວາດຕາມຂອບເຂດລຽບຕາມເສັ້ນທາງ ພາຍໃນ ສມປຊ ແລະເດີ່ນໜ້າຮູບປັ້ນ ປະທານໄກສອນ ພົມວິຫານ ໃຫ້ມີຄວາມສະອາດຈົບງາມ. ການອອກແຮງງານດັ່ງກ່າວ ແມ່ນການມີສ່ວນຮ່ວມຈາກພະນັກງານ, ຄູ-ອາຈານ ຂອງແຕ່ລະຄະນະຕ່າງໆ, ແຕ່ລະກົມ, ສູນຂໍ້ມູນຂ່າວສານ, ສູນຄົ້ນຄວ້າແນວຄິດໄກສອນ ພົມວິຫານ ແລະຫ້ອງການ ກໍຄືສາມອົງການຈັດຕັ້ງມະຫາຊົນ ແລະນັກສຶກສາທຸກຮຸ່ນທຸກລະບົບ ກໍໄດ້ເຮັດເປັນຂະບວນຟົດຟື້ນຫ້າວຫັນ ແລະເອົາໃຈໃສ່ຢ່າງຕັ້ງໜ້າ ເພື່ອສ້າງຂະບວນການອອກແຮງງານລວມຄັ້ງນີ້ ດ້ວຍຜົນສໍາເລັດຢ່າງຈົບງາມ.
ຂ່າວ/ພາບ: ຕາອັອດ ແສນທະວີສຸກ
ບັນນາທິການ: ປທ ວຽງສະຫວັນ ຈັນທະວີໄຊ