ໃນຕອນເຊົ້າວັນທີ 10 ກໍລະກົດ 2025 ໂຮງຮຽນການເມືອງ ແລະ ການປົກຄອງ 6 ແຂວງພາກ ເໜືອ ໄດ້ຈັດກອງປະຊຸມຖອດຖອນບົດຮຽນການຄຸ້ມຄອງການຮຽນ-ການສອນ ໂຮງຮຽນການເມືອງ ແລະ ການປົກຄອງ 6 ແຂວງພາກເໜືອ ທີ່ແຂວງໄຊຍະບູລີ ໂດຍໃຫ້ກຽດເປັນປະທານ ຂອງທ່ານ ຮສ ພູວົງ ອຸ່ນຄຳແສນ ກໍາມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ ແລະ ມີແຂກຖືກເຊີນຈາກພາກສ່ວນຕ່າງໆ ກໍໃຫ້ກຽດເຂົ້າຮ່ວມ.
ໃນກອງປະຊຸມດັ່ງກ່າວ ທ່ານ ປອ ສີສອນພັນ ບຸນສີ ຫົວໜ້າໂຮງຮຽນການເມືອງ ແລະ ການປົກຄອງ ແຂວງໄຊຍະບູລີ ກໍໄດ້ຂຶ້ນຜ່ານບົດລາຍງານສະພາບຈຸດພິເສດບາງດ້ານ ຂອງແຂວງໄຊຍະບູລີ ວ່າ: ໂຮງຮຽນການເມືອງ ແລະ ການປົກຄອງ ແຂວງໄຊຍະບູລີ ເປັນອົງການວິຊາການຂັ້ນແຂວງ ມີບົດບາດທຽບເທົ່າກັບພະແນກການຕ່າງໆຂັ້ນແຂວງ ເຊິ່ງຢູ່ພາຍໃຕ້ການນຳພາ-ຊີ້ນຳໂດຍກົງທາງດ້ານການເມືອງ-ແນວຄິດ, ການຈັດຕັ້ງ ຂອງຄະນະປະຈຳພັກແຂວງ, ສະຖາບັນການເມືອງ ແລະ ການປົກຄອງແຫ່ງຊາດ.
ດ້ານວຽກງານຄຸ້ມຄອງການຮຽນ-ການສອນ ໃນໄລຍະຜ່ານໄດ້ສຸມໃສ່ຈັດຕັ້ງປະຕິບັດມະຕິກອງປະຊຸມຜູ້ບໍລິຫານໂຮງຮຽນປະຈຳແຕ່ລະປີ ກ່ຽວກັບຫຼັກສູດການຮຽນ-ການສອນ ລະບົບທິດສະດີການເມືອງຂັ້ນຕົ້ນ ແລະ ຂັ້ນກາງ ແລະ ລະບົບ 10 ວັນໃຫ້ເລຂາພັກບ້ານ ແລະ ຄະນະພັກບ້ານ, ມີທັງໝົດ 3 ຊຸດ ຮຽນ, ມີຜູ້ເຂົ້າຮຽນທັງໝົດ 149 ຄົນ, ຍິງ 31 ຄົນ ລາຍລະອຽດມີດັ່ງນີ້: ລະບົບທິດສະດີການເມືອງຂັ້ນຕົ້ນ: ມີ 2 ຊຸດ, ມີຜູ້ເຂົ້າຮຽນທັງໝົດ 98 ຄົນ, ຍິງ 18 ຄົນ; ລະບົບທິດສະດີການເມືອງຂັ້ນກາງ ມີ 1 ຊຸດ,ມີຜູ້ເຂົ້າຮຽນທັງໝົດ 51 ຄົນ, ຍິງ 13 ຄົນ. ປັດຈຸບັນ ພວມກະກຽມສືບຕໍ່ເປີດຊຸດຮຽນທິດສະດີການເມືອງຂັ້ນຕົ້ນຮຸ່ນທີ VI ແລະ ຂັ້ນກາງຮຸ່ນທີ IV ພາຍໃນເດືອນກໍລະກົດ ປີ 2025 ແລະ ກະກຽມເປີດຊຸດບຳລຸງ 10 ວັນ ເລຂາພັກບ້ານ, ນາຍບ້ານ ເມືອງໄຊຍະບູລີ ຊຸດທີ IV ແລະ ເມືອງພຽງ ຊຸດທີ III ຕິດຕາມກວດກາປະຕິບັດລະບຽບຕ່າງໆ ກ່ຽວກັບການຮຽນ-ການສອນ ໃນທຸກລະບົບ ແລະ ຄຸມຄອງການເກັບກຳສະຖິຕິ ຊີວະປະຫວັດ ແລະ ຂຶ້ນທະບຽນຂອງນັກສຶກສາລະບົບທິດສະດີການເມືອງຂັ້ນຕົ້ນ ແລະ ຂັ້ນກາງ ແລະ ລະບົບ 10 ວັນ.
ໃນຕອນທ້າຍກອງປະຊຸມ ທ່ານປະທານໄດ້ສະຫຼຸບຄືນກອງປະຊຸມ ພ້ອມທັງໂອ້ລົມຮຽກຮ້ອງມາຍັງພະນັກພະນັກງານ, ຄູ-ອາຈານ ໃຫ້ເພີ່ມທະວີຄວາມເອົາໃຈໃສ່ສຶກສາອົບຮົມການເມືອງ-ແນວຄິດ ຢ່າງເປັນປົກກະຕິ, ຖືເອົາການຄົ້ນຄວ້າເຊື່ອມຊຶມບັນດາມະຕິ, ຄໍາສັ່ງ, ຂໍ້ກໍານົດ, ກົດລະບຽບ ແລະ ກົດໝາຍຂອງລັດ ເພື່ອຮັບຮູ້ເຂົ້າໃຈໃຫ້ເລິກເຊິ່ງ ສ້າງຄວາມຮູ້ໃຫ້ພະນັກງານ, ຄູ-ອາຈານ ຕ້ອງເປັນເອກະພາບໃນການຈັດຕັ້ງປະຕິບັດໜ້າທີ່ການເມືອງ ແລະ ວຽກອື່ນໆທີ່ຕິດພັນກັບການຮຽນ-ການສອນ.
ຂ່າວ/ພາບ: ວັດທະນາ ພັນລັກ
ບັນນາທິການ: ປທ ວຽງສະຫວັນ ຈັນທະວີໄຊ